بنات شورو علي انا حاسة ان حياتي معه خلاص انتهت

بسم الله الرحمن الرحيم

مدري وشلون اببتدي السالفه انا متابعه لعالم حواء من سنين لكني ما عمري فكرت اكتب اقراء كتابتكم وادعي لكم ان الله يزيدكم من نعيمه لكن اليوم قررت اني افتح قلبي واحكي لكم مشكلتي الا مصيبتي راجيت من كل اخت تدخل موضوعي لاتنساني من دعائها لاني بجد محطمه
حساه ان حياتي انتهت وان صبري الي صبرته ثنعش سنه طار في الهواء

مشكلتي بدت من ثنعش سنه من تزوجته جلف عمره ماقالي كلمه طيبه بس كوني اني بنت اجواد صبرت وقلت طبعه كذا.... يتهزاء فيني رغم اني بشهادة الكل حلوةه مرة لكن تعالو شوفو وش يطلع فيني رغم ان كلامه مهوب صحيح يعني يحط فيني شئ موب فيني وانا صابرة....

بخيل وقلت يالله الله يعوضني الجنةرغم ان دخله وراتبه راتب وزير يعني مهوب في حاجه الف والا الفين لي ولعيالي كل شهر لكن مااقول الا حسبي الله ونعم الوكيل.
منعني من زيارة اقاربي خوالي عماني جدتي وصابرة ماغير اذا سافر اروح لهم مااقدر احد منهم اذا ولدز او تعبو مايرضى ازورهم حتى السوق اقعد عنه بالسنه ماغير اوصي امي تجيب لي وتعرفون الي يجاب لك موب زي الي تاخذينه على ذوقك وصابرة وادعي له بالهدايه وان الله يصخرة ...كل هذا وانا حاولت معه بالتفاهم مافيه اصلن عنده تفاهم كلمته بتمشي بتناقشينه بيضرب على طول وبدى الضرب عقب ما جبت العيال بزعمه ضمني واذا قلت له شوف ترى هذا اخر مابيني وبينك يقول والله لرميك رميه الكلب..


المهم يروح ليلا لشله بالست ساعات وكل ماقلت له شئ يقول من زين خشتك عشان اقابلها رغم اني مدلعته دلع وربي يشهد علي البسه جزمته وافصخه شرابه اشكال الغدا والعشاء تعالو شوف ملابسي في البيت وربي انواع الدلع والاغراء حتى في علاقتي الزوجيه معه احاول اسوي الي يبيه بكل الطرق يعني وربي يشهد على كل حرف ماقصرت معه..


يعني على سواياه معي وتهزيئه لي
يعني وربي لو بجب اغرف غداء ولدي وازود له ملعقه انه يقعد يسب يا ويا وربي اللفاظ استحي اقولها ويقعد يسبسب في امي وابوي ويلعنهم وعموما هو مقاطع اهلي من خذته بس تحملت هالشئ على انه والله العظيم ماجاه منهم الا كل خير لكن هو انسان معقد المهم هو ماله ام او ابو ماله الا اخوان ما يسوي لهم اي اعتبار علشان الواحد يحاكيهم يتفاهمون معه

انسان اناني ماهو عايش الا لنفسه حتى عياله الي ياويلي يضربهم من اعمارهم سنه ويجلدهم اللحين بالنعله وربي ان قلبي يتقطع عليهم ولو بجي افزع واقول تعوذ من ابليس ضربني انا بدالهم..


صبرت وتحملت لاني عارفه انه بياخذهم مني ولو انه ابو كفو يربيهم كان قلت خلاص لكنه انسان انا ني معقد ماهو كفو تربيه يستمتع اذا خلاهم يتضاربون تخيلو يقول يالله الي بيعور الثاني له عشرة ريال!!!!!

مرت السنين وانا متحمله وادعي رب الكون ان يزيل هالغمة الي غمتني لكن هو راعي سفر ويقول شغل من خذته وهو يسافر اربع مرات في السنه وانا مصدقته واذا قلت بروح معك على اني منيب اهش ولاا انش لكنه يعيي المهم له سنتين صاير كل شهر ونص كل شهرين يسافر وبعدين هو من النوع الي يناظر الحريم وفي اي فرصه تجيه ولو اني جنبه وتجي حرمه تقولي عن اذنك او كم الساعه ينط هو يحاكيها وكل ماقلت ياخي عيب اقلها احترم مشاعري يقول انا قصدي برئ بس فضول احب اناظر الحريم بس موب اكثر..

المهم شراء جوال الي فيه بلو توث ومن شراه وقلبي ناغزني سافر سفرة في الصيف لدوله عربيه مليانه سعوديين المهم يوم رجع لقيته مغير الاسم الي كان في النك نيم حق البلو توث وحاط رقم جواله والله لو اني بقرة ماافهم هالحركه الرجال من سافر وهوقاعد يرقم المشكله اني عمري الان28 وهو 45 يعني هو وجهه شايب ماعقب هالعمر عقل لا وكل ماقلت له خلينا نطلع نتعشاء برى ونغير جو يقول انتي عجوز هذوليك الفرافير الي17 هم الي الواحد يطلعهم يعشيهم..


اذا زعلت ورحت لهلي يذبحني مكالمات وانا اسف انا امزح بس انتي تاخذين الموضوع جدي المهم واجهته بالرقم الي في جواله قال انا كنت اجرب هو ياخذ خانات الجوال ولا لا شدينا مع بعض طلقني طلقه وحده وفي نفس الوقت رجعني المهم مرت السالفه وهو يضن اني نسيتها لكن الموضوع صار يرن في راسي ماني قادرة انساه يعني انا عندي دليل على انه يشرب اذا سافر لكني حاولت انصحه سكتني وماعنده فيني صار يجاهر يقولي انا اسافر عشان اشرب مو اكثر مو حريم وخرابيط رغم الي انا اعرفه ان الي يشرب ممكن يسوي كل شي بس تعوذت من ابليس واذا شفت عيون عيالي قلت لعل الله يهديه المهم..
قدرت بطريقه ما اني اجيب بطاقه سواء واغير صوتي واكلمه على اني بنوته عمري17 والطامه الكبرى من اول مكالمه عطاني وجه وبعد اربع مكالمات يبيني اواعده في غرفه في اوتيل ....وعلمني بكل صولاته في سفراته وانا زي الهبله اذا سافر اتصلح واتضبط كني عروس واجهز الغرفه بالشموع والعشاء اشكال الوان والمشكله ماهو باين عليه يجني بشوق كنه ماسواء شي تخيلووووو؟؟؟

وربي كسرني حسبي الله عليه وربي مو جرح اكثر احس اشياء بداخلي تكسرت ابكي طوال اليوم وما نتشف دموعي طبعا قدامه مابينت له شئ وكني مدري بس افكر الان اني استفيد انا سجلت مكالمات ورسايله لي بالاايميل يعني بحاول اخليهم كرت اساومه اذا اخذ العيال لكني افكر وشلون ابواجهه هل اذا راح للاوتيل اجيه انا او اكلم الهيئه لكن الهيئه بتقول وين البنت والاا يازينها يادبونه هالمتخلف والا وش اسوي علموني ؟؟

وربي ماودي اخرب بيتي ولا ودي عيالي يتشحططون بين امهم وابوهم لكني وطيت الجمر ثنعش سنه وما شكيت الاا انه يروح لهال وصايخ انا اخاف يجيب لي ايدز والا بلا من هالاشكال وبعدين انا وطيت على كرامتي بس مافاد مازاده الاا حيونه ومثل ماقال المثل ان الكريم اذا اكرمته ملكته وان اللئيم اذا اكرمته تمرد....
بصراحه تحملت كل شي الاا اني بعد الاقي معه وحده على فراشي والله لو ان مافي هالبلد الا هالولد وانتم وش رايكم؟؟

الله يخليكم فكرو زين قبل لاتردون لاني محتاجه لفزعتكم خواتي وربي مالي احد في الهكون استفزع به الاالله الكريم ثم انتم والله يجزاها خير ولا يوريها مكروه في نفسها ولاا في من تحب من ترد علي وتدلني لاني بصراحه تعبت وربي تعتب لاانام ولا اكل ومانيب مع الناس ..
ادعو لي تكفون