بنات ضايق خلقي ...ودي علاج وحل لمشكلتي

السلام عليكم .....


اشحالكن اخواتي


ودي احكي اسولف اطلع كل اللي بخاطري


ودي حد يفهمني انا شو عندي بالضبط?


هل انا انسانه طبيعيه ولا بي شئ?


بنات عشت في اسره فقيره وكلها مشاكل وصراخ وعصبيه
ابوي انسان قاسي واهله واهل امي كلهم كانوا جافين في التعامل وكله كلامهم تجريح
خلصت جامعه وتقدم لي شخص من غير حتى ماافكر وافقت عليه عشان اطلع من الوضع اللي انا فيه
وفرحت بهالزواجه ولكن طلع واحد جبان وصاحب سوابق وفوق هذا كله يشرب ويدخن تبهدلت معاه 3 سنوات حاولت اصلحه واوقف معاه بس بدون فايده
كنت توني صغيره بالسن ماعرفت شو اعمل اتحمله هو ومصايبه ولا اصبر على امه ومشاكلها?
ندمت كثير على هالزواجه وبكيت ايام وليالي وطلبت الطلاق وتطلقت منه عقب 4 سنوات من الهم والنكد.


ورجعت البيت اللي كنت هربانه من مشاكله وهمومه وطافت علي سنين وانا اكد واكدح لراحتهم وتوظفت وانا صابره ولما صار عمري 34 تقدم لي شخص عنده بنات وزوجته متوفيه


فرحت كثير قلت هاي حظي الحين ابتسم لي وتزوجته وانا حاطه في بالي اني خلاص صار لي اسره وزوج وبيت
لكن للاسف
بناته ما حبوني يتهربن مني والسبب خالاتهن وجدتهن كرهننهن فييي
حتى زوجي متعلق فيهن كثير وهن الاول والتالي في حياته بناته ما قلت حاجه لكن انا انثى يااخوات ودي حد يميزني بحاجه ودي احس بمكانتي ودي افرح واعيش حالي حال غيري!


واللي ضيق حالي تأخري في الحمل رغم اني تعالجت وسافرت وسويت كل الفحوصات منظار واشعه وادويه وتمريخ وحجامه كل الابواب طرقتهن
بس ما صار حمل
وهذت الموضوع وايد سبب لي ازمه نفسيه
واحس نفسي خلاص ما فيي شده تعبت
من وانا صغيره في الهم والنكد والانتظار
كنت لما اشوف زوجي يدلع بناته ويقدمهن علي في كل شئ كنت اقول في خاطري ماعليه بكره انا بحمل ويصير عندي عيال اكيد بحب عيالي اكثر منه
مثل ما هو الحين يحب بناته اكثر مني.
كنت ادعي ربي يرزقني بالحمل عشان انشغل بعيالي ومااتحسس من تصرفات بناته واهلهن معي


بنات احس كثير تعبانه متضايقه منهد حيلي من التفكير
شو اعمل بحالي انا?
ودي انسى الماضي والالم
ودي احمل ويكون عندي عيل يشغلني وارتاح من الهم




دعواتكن لي دخيلكن ربي يرزقني