السلام عليكم
كل اللى اقدر اقوله ليكى يا داليا الله يعينك
عندك ليانا وجالك اكتئاب
فى الاول والاخر عند الله
وطول ما انا ببص للاجر من عند الله هيطلع وشى فى الاخر بشوش وفرحان
فى واحده الله يصبحها ويمسيها بالخير كانت تقولى دا انا لو بجمل مفرش وعجب زوجى وولادى وادخل السرور على نفسهم اكيد ربنا هياجرنى باذن الله
احمدى ربنا انك معندكيش فوق ده كله اهل زوج بلائك فيهم او اهلك ابتلائك فيهم
الحمد لله اذا الامر على ليانا ده شيء هين ورائع وجميل كمان
حاولى انك تستمتعى معاها يعنى ما تخديش كل حاجه هيه بتعملها على محمل كده غلط كده عيب
وهات يا صريخ وهات يا زعيق
لا فهميها الاطفال اذكياء جدااا حتى لو عندهم سنه بيفهموا وهما عندهم شهورر سبحان الله
يعنى فهميها انها ممكن تتعور او تحصلها حاجه من كده ربنا يحفظها ليكى
ولما تحسى ان الفولت على خالص عندها ومفيش كنترول
اشغليها فى غنوه بتحبها او حدوته او اى حاجه هتلزق جنبك وتفضل قاعده عشان تديها الشيء اللى بتحبوا
انا بعمل كده مع مريم وعندى امل يجيب فى النهايه نتيجه
بصى فى حاجه انا جربتها مع مريم النهارده ونجحت فيها
لما كانت بتعيط عياط التمثيل كنت ولا ابص حتى ليها ولا كانها موجوده فى المكان هما دقيقتين وتهدا وتيجى تبوس فيا
يعنى تكبير الدماغ احسن شيء مع العيال والطناش فى وقته هايل
جربى وقوليلى
الله يعينك ويقويكى
ام باسل

<FONT face=Arial color=#008080 size=4>mona </FONT>

<FONT face=Arial color=#008080 size=2>ام عتريسة حبيبتى مش عارفة ليه مش موافقاكى على تحليلاتك الخاصة بام ابيها المرادى يعنى حسيت من كلامها انها مش شارية جوزها وبايعة اهلها ولا حاجة مندى ولا بتقول لاهلها ملهومش لازمة
ايه يا جماعة
لو واحد حب مراته يبقى ركبته ونسى اهله اللى هم قبلها واسيادها وهى ولا تسوى
ولو واحدة راعت ربنا فى الراجل اللى هى متجوزاه تبقى برده باعت اهلها عشانه وبكره هو نفسه يبيعها جزاء لخيانتها
لا اله الا الله
بعدين بليييييييييييييز
يا اما هنا ع العام او عندى ع الخاص قوليلى مشكلة ابو زوجك انتهت ازاى او يعنى ليه تدخله فى حياتكم قلت بجد محتاحة احابتك </FONT>


ايوه من وجهة نظر الأب طبعا هيكون حب بنته لزوجها مبالغ فيه خاصه لما يلاقيها ولا معبراه وبتقدم رغبات زوجها على رغباته ..

بعدين انا مقلتش ان الوحده متراعيش ربنا في زوجها بالعكس ده لازم تراعيه وتراعيه ونص كمان لان هو جنتها ونارها لكن انا مش شايفه ان لازم يكون في تعارض مابين مراعاتها لزوجها وبين مراعاتها لأهلها .. والمفروض إن اي مشاكل بين البنت وأهلها لايطلع عليها الزوج مطلقا حتى لو بدى لها انه كويس وانه في صفها .. هو كويس وفي صفها دلوقت لان علاقتها باهلها قدامه عاديه لكن لما تبقى علاقتها بيهم مش كويسه وطول النهار بتشتكي منهم شويه شويه هتلاقيه اتغير..في مثل بيقول إلي جوزها يقولها ياعوره يلعبوا بيها الناس الكوره ومن عندي بقى اقول إلي اهلها يلعبوا بيها الكورة جوزها يقولها ياعورة ..


خذي ياستي قصة حياتي ....


بالنسبة لأبو زوجي فهو ( كان ) السيئة الوحيدة في حياتي الزوجية .. والله .. لعنة .. مش عاوزه اغتابه بس .. المهم ربنا هداه والله معرفش ازاي بس يمكن تقولي ربنا هده مش هداه .. والله هو راجل غلبان جدا وطيب لكن مفتري .. عنده بتاع 80 سنة أو أكثر .. ولانه مخلف على كبر فهو بيحب عياله بطريقة بشعه .. بشعه جدا .. وحاسس انهم من بقية أملاكه وحظي المهبب إنه بيحب زوجي بالذات أكثر واحد .. وبالتالي فانا ( خطفت ) نن عينه منه ..

ولانه كان ناظر مدرسة قبل مايطلع معاش من يجي عشرين سنة فطبيعي إن طلباته اوامر .. لازم تتنفذ .. وفي الحال .. وياويله ياسواد ليله الي يكسر له طلب ..

طبعا انا مكنتش متعوده على كده اطلاقا .. عندنا في البيت كل واحد يعمل الي هو عاوزه وبابا بياخذ راينا من واحنا اطفال في كل شئ بل بالعكس ده احيانا أنا واخواتي كنا بنفرض رغباتنا على ماما وبابا ومكانوش بيعترضوا .. فكان طبيعي ان يحصل صدام ..

في بدايه زواجنا طبعا قرفني موت بس انا مكنتش بشتكي لزوجي عشان معكرش العلاقه الي بيني وبينه .. بعدين بدأ القرف يزيد خاصه وإننا ساكنين في بيت واحد .. اهل زوجي في الدور الثاني وإحنا في الدور الرابع .. كان تقريبا عايش معانا .. طول مازوجي في البيت إما يرسل في طلبه يقعد معاه لأي سبب أو يطلع هو يقعد معانا .. ( طبعا ده كله في أول ايام جوازنا ) .. وطبعا يتدخل في كل شئ .. لو اشترينا حاجه ليه اشتريتوها وبكام ومنين وكان من الحته الفلانية افضل والشكل العلاني احسن .. .. مثلا لو طابخين البامية بالفراخ يقول ليه بالفراخ مش باللحمه .. وهكذا .. غيرنا في وضع كراسي الأنتريه عشان يبقى شكله اوسع قعد يزن ويقول الشكل القديم أحسن لازم يرجع زي ماكان .. وهكذا وهكذا ..

وفجأة لقيت نفسي بقعد بالساعات في البيت لوحدي خاصة وانا متجوزه في مدينة تانيه معرفش فيها حد خالص غير زوجي واهله .. وزوجي اليوم كله عند اهله ويطلع ياكل وينام .. ولو طنشهم يستلموه بالتليفونات عشان ينزل لهم أو يطلع ابوه له ( انا شخصيا معنديش صحه اطلع الدور الرابع مرتين تلاته في اليوم .. أبوه بقى كان بيعملها ومعرفش ازاي )طبعا بدأت اشتكي له من الوضع ده خاصه وإن له اخوات تانيين لكن زي مابيقولوا ( غاسلين ايديهم من كل شئ ) .. لما كنت اشتكي له كان يرد علي بجملة ثابته لاتتغير " ده ابويه يرضيكي إني مكونش بار بيه في السن ده " .

لغايه ماجاء يوم بعد ماتجوزت بكام شهر وكنت في شهور الحمل الاولانية وكنت تعبانه جدا وطالعه عيني ( من اولها ) فقعدت وفكرت كده قلت معقول ممكن اني بعد التعب الي مستحملينه عشان الطفل ده ييجي ونربيه وتطلع عينينا فيه في الآخر هيتجوز وميبقاش لنا عليه حق .. فكرت وقلت لاه ده ظلم امال انا بتعب ليه ؟

وفعلا وقتها بس اكتشفت قد ايه انا كنت ظالمه حمايا وحماتي في اني كنت حاسه ان زوجي ده بتاعي وانه خلاص طالما اتجوز المفروض ( يحلوا عنه ) بقى ويسيبوه لبيته اولى بيه ..

والله من وقتها احترمت نفسي وبقيت بسيبه يروح وييجي عندهم زي ماهو عاوز .. صحيح ببقى بغلي من داخلي ومنغاظه بس مبقولوش بالعكس لو هو مش موجود بحاول اسد مكانه ..

وشويه شويه معرفش ازاي بدأت تحكماتهم تقل .. وبدأت قبضتهم تخف شويه شويه عنه .. حسيت وقتها انهم كانوا في البدايه حاسين إني خطفت ابنهم منهم لكن لما لقيوني سبته لهم بدأوا يعتادوا على الوضع الجديد .. حاليا الأب مش بيطلع عندنا خالص ( صحته مش مساعداه ) وزوجي بينزل لهم كل يوم ساعه ولا حاجه يشوف طلباتهم وخلاص على كده .. والجميع مرتاح بالوضع الجديد ..

خليتيني بس اغتاب الناس وهم والله ناس كويسه بس تعملي ايه لطبيعة البني آدم الي بتخليه ساعات زي الدبة الي قتلت صاحبها من كتر ماحبته ..


بعد ماكتبت لك القصيده الي فوق دي لقيت عتريسه مختفيه رحت اشوفها بتعمل ايه لقيتها عثرت على كنز حيث أن المدعوا والدها كان بيشرب شاي من شويه وساب بقايا التفل الموجود في الكوبايه والاخت مكدبتش خبر .. رحت لقيتها داهنه وشها والكراسي والارض بالتفل ..

آدي آخرة الي يغفل عن العيال ..

فاااااااااااااااااااااااااااااطمة
بما اني اول مرة اسمع عن حديث الرسول صلي الله عليه وسلم اذن فشيلي الفكرة دي من دماغك
وبما انك لو كلمتي مامتك بصراحة هتقول لباباكي وتحصل مشكلة اذن برضو شيلي الفكرة دي من دماغك
وبما انك باباكي معلش بقي عاوز يتصيد لمشكلة
فانت بقي اتحملي وخليهم ييجوا الجمعة ان شاءالله وبعد ماميمشوا اما تروحوا تزورو اهل جوزك او بعدها بيوم او قبلها بيوم
واختاري انت بقي يوم فرييييييييي خدي فيه اجازة من شغلك وقومي بعمل خطط الدلع الخمسية لانك مهما حاولتي تفلفصي يوم الجمعة مش هتعرفي تستمتعي بوقتك
ويمكن لما ترضي باباكي تلاقي اليوم اللي اخترتيه بعد كدة مبارك فيه واحلي مما تتمني
وحاولي ببقي تتحملي فترة وجوده في مصر دلوقتي
الله يكون في عونك يابنتي والله

شفتوا افترا الرجالة يا بنات
شوفوا التفكيرات الشيطانية
كنت حكتبلكوا اللينك لولا ممنوع
قمت نقلتلكو االلا قريته وخلانى بفكر ادخل اجيب الكياس والساطور واخلص دلوقتى :icon29: :angry2:
يللا اقروا
وتصبحوا على خير

**************************************

نصائح سريعه للعكننة على الزوجة!!!
--------------------------------------------------------------------------------

1. الصبح وأنت رايح على شغلك وهى نايمة تعمد اسقاط اى شيئ او اخبط الباب بصوت عالى علشان تصحيها هى كمان 00

اشمعنى انت ؟ ولو حاولت ترجع تنام تانى قول لها مادام صحيتى حضري الفطار بقى

2. اذا كنت بتتفرج على التلفزيون وهى عايزة تغير القناة 00 قول لها معلش الحلقة دى مهمة جدا واحد صحبى شافها على القناة الفضائية وقالى ان الحلقة دى هى المسلسل كلة 00 ولو كنت بتتفرج على ماتش كورة هيبقى الموضوع اسهل 00 كل ما حد من اللاعبين من اى فريق يمسك الكورة قالها معلش ثوانى بقى انا حاسس ان الكورة دى جون حتى لو كان حارس المرمى ماسك الكورة والماتش واقف لان فى واحد مصاب (ملاحظة : اغلب النساء ذو ثقافة كروية ضعيفة )

3. اصح يوم الجمعة بهمة ونشاط وجهز الافطار لزوجتك بس متنساش انك تستخدم 15 طبق واكبر كمية من الملاعق والشوك و 5 حلل من اللى عندكم فى المطبخ و 10 كوبيات لاعداد طبق بيض وسندوتش جبنة طبعا يراعى ترك اثار سمنة على الارض مع ترك التلاجة مفتوحة وقشر البيض فى الحوض.

4. فى عيد ميلادها زينلها تورتة عيد ميلادها بخمسين شمعة ولو سألتك لية خمسين رغم ان عندها 15 سنة بس ؟ اتحجج بضعف الاضاءة فى البيت وانت بتبص على النجفة اللى عندكم اللى فيها 30 لمبة مع ابتسامة صفراء خفيفة

5. لو عملة ريجيم اجرى على السوبر ماركت ومحلات الحلويات واملى التلاجة شكولاتة وحلويات وجاتوهات 00
يراعى التجول وانت مستمتع بأكل الجاتوة امامها.

6. متنساش رأيك فى طبيخها لو عاملة لحمة قول لها حلو اوووى الفراخ دى ولو طبخة بامية 00 جميلة اوى الملوخية دى حطة عليها اية ؟؟ ولو عملة كيكة قول لها انا بحب اشرب شاى مع البسكويت الحلو دة !!

7. لو طلبت منك تنشر الهدوم قول لها حاضر مع ابتسامة حانية وبعد ما تخلص نشر الهدوم ادخل عليها وقولها انا نازل اجيب الهدوم اللى وقعت منى فى الشارع ولو سألتك هو اية اللى وقع ؟ اذكر لها كل هدومها اللى كانت مغسولة مع فردة شراب من بتوعك علشان متبقاش مقصودة منك !

8. لو الزوجة قررت مسح الارضيات فى البيت حاول انك تروح وتيجى على المناطق المبلولة متحجج بأنك محتاج تتصل ضرورى بواحد صحبك ومرة عطشان ومرة تانية بتجيب الجرنال ومفيش مانع انك تقول انك حاسس ان التليفون هيرن كمان شوية.

9. لو كانت مشغولة فى نظافة البيت او مع الاولاد وطلبت منك تغسل كوبتين الشاى بتوع الصبح الموجودين فى الحوض ارجعلها كمان دقيقة من دخولك المطبخ وانت ماسك كوبية من الاتنين وهى مكسورة واسألها فى براءة ارمى دى فين ؟؟

10. وانت قاعد تتفرج على التلفزيون وهى طالع عينها فى تنظيف البيت وبعد ما تخلص وتيجى يدوبكك تقعد تستريح جنبك بصلها وقالها حبيبتى معلش ممكن كوبية مية علشان ضهرى بيوجعنى !!

مع خالص تحياتي بحياة زوجية سعيدة

spanishflower ..
هلا والله .. أيوا حبيبتي .. ياليت ترسليه .. وألف شكر ..

هبه عبد العظيم ..
مشكووووووورة حبيبتي .. ماااااا قصرتي ..

أم أبيها74 ..
شكراً حبيبتي .. كلك ذوق .. ألحين بشوف الموضوع ..

mona_abdelaziz ..
أفكااااااااااااااااااااااااااااااااااااااار تجنن ..
<<< ماتت من الضحك .. راح أطبعها .. وأعطيها لزوجي ههههههههه