السلام عليكم و رحمة الله و بركاته

صباح الخير عليكم جميعا

ازيكم كلكم؟؟ عاملين ايه؟؟ طبعا انا مقدرتش اقرا كل كلامكم بالتفصيل بس حاولت الملم اللي قدرت عليه و فهمت ان فاطمة عندها مشكلة و لو اني شايفة انها محلولة ان شاء الله و حلها زي ما قالت بعض البنات انها تستضيف باباها عادي في اليوم ده و اهم حاجة تكون من جواها مقتنعة تماما انها بترضيه و متكونش زعلانة و لا متنكدة و بعد ما يمشوا ممكن تحتفل احتفال بسيط مع زوجها و في يوم تاني بقى تتعوض و تحتفل احتفال اكبر. عموما انا مش مجمعة اوي دلوقت فكلامي طالع عبيط، بس انا حاكلمك يا فطوم لما اروح ان شاء الله و اطمن عليكي و نتفاهم في الحدوتة البسيطة دي

لبنات رابطة ألسن، انا السن انجليزي/ فرنسي >>>>>> هبة موتتني على نفسي من الضحك لسبب بسيط، اني برضه قريتها زيها في الاول، بس انا استوعبتها قبلها ههههههههههههههه معلش يا هوبا فرق خبرة بقى!!!

على فكرة يا بنات، انا عندي احساس سخيف جدا. انا راجعة من الاجازة مكتئبة جدا جدا جدا للغاية بشكل مش قادرة اوصفه لدرجة اني كنت باعيط في القطر و انا راجعة امبارح و فتحت النوتة اللي باكتب فيها بعض يومياتي و كتبت كلام زي السم! بجد انا حاسة ان حالتي قبل الاجازة اليومين دول كانت افضل من دلوقت. راجعة نفسيتي زي الزفت. اصلا الرحلة من بدايتها كانت كلها حوادث. انا سافرت الجمعة بالليل و انا لسه على سلم بيتنا ايد من بتوع الشنطة ال packpack اتقطعت!! قلت اللهم اجعله خير. وصلت هناك خدوني من المحطة عالسينما و احنا مروحين ركبنا تاكسي البنطلون ليه عروة كده من الجنب من عند الركبة شبكت في حاجة و اتقطعت!!! قلت الحمد لله المهم لا البنطلون كله خرب و لا رجلي اتعورت. روحنا البيت و يا دوب غيرت و رايحة الحمام اتشطف و انا لسه في الصالة و معدية جنب التلاجة لقيت نفسي طايرة في الهوا و بوووووووم على ركبتي فوق السيراميك!!! طبعا كدمة و اخدة الركبة كلها و مش حاحكيلكم على النار اللي بتقيد فيها و انا باسجد في الصلاة، قلت الحمد لله بتحصل في احسن العائلات ان التلاجة تسيح مية و ان امل بالتحديد اللي تتزحلق فيها!!!! تاني يوم بقى الانفلوانزا ردت لي للمرة التالتة خلال شهر و نص!!!!! بس رجعت امبارح من غير حوادث الحمد لله غير الحالة النفسية الزفت و الامور السوداوية اللي بتلف في نافوخي!!! و كملت لما وصلت البيت لقيت انهم مش عاملين حسابي في عشاء و لا اي نوع من انواع الاكل على اعتبار اني اتغديت في اسكندرية قبل ما اركب!!!! بس طلع فيه ارز بلبن، قمت الساعة 2 بالليل اكلت طبق من الجوع!! و كملت بخطيبي العزيز متصل بيا الساعة 4 الفجر و هو عارف اني باصحى الساعة 5 عشان اركب القطر اروح الشغل، متصل يتخانق معايا لانه قلق من النوم قلب في موبايله لقى رسالة كنت باعتاها له من شهر تقريبا باتخانق معاه فيها و باقوله انه حيموتني كمدا و قهرا و غيظا، اصل البيه فكرها رسالة لسه طازة!!!! طيب مش يستنى للصبح و يمسك في زمارة رقبتي؟؟!!! او الحل الاسهل و الاذكى انه يبص على تاريخ و وقت ارسال المسج؟؟؟!!! الاجمل من كده ان اخر رسالة بعتها له امبارح بافكره ان النهاردة الذكرى السنوية الاولى لخطوبتنا المجيدة المديدة لم تلق عنده اي اثر و لم يذكرها بخير و لا بشر!!!!!!!

هو انا عملت فيهم كلهم ايه؟؟؟؟ ناس مش سايبين لي اكل اكله كأني كمالة عدد في البيت، و واحد قايم يجر شكلي الفجر!!!!! ده غير الموود العجيب اللي راجعة بيه بدل ما انبسط و اصيف زي الناس ما بيعملوا. لا حول و لا قوة الا بالله العلي العظيم، استغفر الله العظيم

معلش يا بنات سامحوني، بس بجد انا بقالي كام يوم الكلام محبوس في حلقي و عماله اتخبط كل خبطة و التانية بيطلعوا من نافوخي و فضفضت معاكوا

ربنا يفك كربك و همك يا فاطمة، و ربنا يسخر لك قلب ابيكي و يحنن قلبه عليكي و على زوجك

و ان شاء الله لنا كلام في وقت لاحق زي ما قلتلك

نودى الجميلة معلش ده احساس اى حد راجع من اجازة على الشغل بيبقى مش طايق نفسه ولا دنيته ده احساس طبيعى جدا
كون بقى موضوع الحوادث قولى بقى الحمد لله قضا اخف من قضا يمكن كان حصلك حاجه واحده بسكبيرة بعد الشر ولا اتسرقتى .. قولى الحمد لله واهى اجازة تفوت ولا حد يموت
ومتزعليش كده انا متعوده عليكى دايما بتضحكى يلا ارجعى نورينا تانى ده الصفحة كانت وحشة من غيرك

نوووووووووووووودى وقعت على كلامك

حبيبتى مالك ؟؟

سوره البقره يا امل يوميااااااااااا

امل بتقرى الحاجات ولا لا؟؟

صباح الخير..
نودى حمد لله على سلامتك حبيبتى :) نورتينا ومضايقيش نفسك واضح ان اسكندريه كان فيها حاجه غلط يوم الجمعه ما انا كمان كنت فيها الجمعه ومش انبسطنا خالصصصص ولا يهمك اديكى رجعتى لنا بالسلامه وكله يتصلح ان شاء الله .