ماكينة خياطة

نظرة غموض

ام الخمائل

نهاوند المدينة

انوار البحرين

الله يسعدكم ويشرح صدوركم مثل ماشرحتوا صدري

فعلا ...كل وحدة معاها حق وكلامها عين العقل...والله وربي نفس كلامكم جالسة افكر فيه قبل مااقرا

ردودكم..وقاعدة اقول يمكن انا مزودتها شوي ومكبرتها..وحاطة حواجز مالها داعي


الله يبعد عنكم كل هم ويفرج عنكم كل كرب ويجمعني بكم في جناته يارب العالمين

تبين نصيحتي ؟
ردي واقري الموضوع اللي كتبتيه في وقت تكونين فيه مريحه وتخيلي انها مشكلة انسانة ثانية مو مشكلتج اعذريني على قسوتي واعذريني اذا قلتلج انج من النوع الحساس جدا وانه مشكلتج فيج مو فيهم .. بس عاذرتج لانج حامل والحمل ياثر على النفسية .. الصراحة انتي عازلة نفسج كأنج غريبة عنهم .. البنت لما تتزوج خلاص أهل زوجها يصيرون أهلها ومعظم وقتها معاهم لكن انتي عازلة روحج وحاطة كلفة بينج وبينهم ومسوية مسافة بينج وبينهم.. وتزعلين لما تلقين سلفتج سابقتج .. طيب اهي تلقينها مطيحة الميانة ولا بينها وبينهم حاجز ولا كلفة ولا رسمية وتلقينها تقعد معاهم وطق سوالف من الصبح لين شوي ويقولون لها قضبي الباب نبي ننام .. يعني تعاملها معاهم وتعاملهم معاها خلاص كأنها بنتهم .. وانتي بالعكس شكلهم يبون يقربون منج ومطيحين الكلفة معاج والدليل كلام ام زوجج عن الكيكة والله كانه كلام أمي لي تخيلي امج قالتها لج بتزعلين ؟ أكيد لأ .. بس بتزعلين اذا فكرتي فيها انها جت من غريبة .. وام زوجج كذلك تلقينها معتبرة نفسها بمرتبة أمج وكأنج بنتها فحاطة في بالها تعليق مثل هذا مايجرح البنت لي جا من امها صح ولا لأ ؟! وسالفة انهم راحو تغدو برى .. ماقصروا بلغوا زوجج مافيها شيء انتي تعاملج معاهم كأنج غريبة تبين يتصلون ويحددون موعد وينتظرون! يختي انتي عدي نفسج في بيتج مو عند غرب ! عادي انا اذا بطلع أقول لاختي شوفي منو موجود وقوليلهم بنمشي الساعة الفلانية ماقعد ادق على خواتي وحدة وحدة ولا حريم اخواني ! بس أقول الحاضر يعلم الغايب وسهالة ! انا مادري وين المشكلة يمكن من نفسيتج او انج متعود على نظام غير في بيت أهلج ؟!

وبالنسبة لزوجج المفروض تفرحين لانه اللي مافيه خير لاهله مافيه خير لعياله وزوجته.. اهل الولد لهم حق عليه حتى لو تزوج.. لهم حق عليه لي اخر يوم في حياته .. اذا نقصهم شي المفروض واحد من رياجيلهم يسدد وهو واحد من رياجيلهم ! طيب قلنا اخوانه مايساعدون وكل شي على راسه ..اخوانه مافيهم خير شتسوي امه ؟! تطر ؟ يختي هم لهم حق وان شاء الفلوس الي يصرفها على اهله تتعوض هو يضل مسؤوول عنهم ماديا ومعنويا .. انا اخواني متزوجين وكبار ولحد الحين يعطون أمي مصروف معنها ماهي محتاجة واخواني مو كلهم حالتهم المادية زينة يعني تخيلي بعضهم حالته المادية على قده لكن يبرها ويعتبر نفسه مسؤوول عنها ..حتى مقاضي البيت يمر البيت من فترة ليفترة ويسد النقص .. وان شاء الله زوجته مو ناقصها شيء واهي نفسج حامل ومحسبة من زماااااان للولادة وتجمعلها من زمااان لانها حاطه في بالها انه ممكن تطلع لبيت اهله ولا لبيتها مقاضي ومصاريف مني مناك ..

وسالفة انه ام زوجج تدزر لج أكل.. يحليلها.. يعني ذاكرتج ومريحتج تصدقين اعرف وحدة عايشة بغرفة وحدة مع زوجها وعندها طفل تخيلي ماعندهم حمام .. الحمام خارجي ومشترك لها ولغيرها ! ماعندها مطبخ ولما تنزل بتاكل تلقاهم مخلصين الأكل عنها ! وليسألت مافي غدا قالوا ليش ماجيتي مبجر ! هذي المسكينة شنقول عنها؟!

زوجج انتي عارفة انه مسكين متضايق وعنده مشاكل في الشغل يبي يرد البيت بلقى النفس الطيبة يلقى الراحة يلقى اللي ينسيه هموم العمل تجين تزيدين همه ؟! ترا ماينلام يترك البيت ويروح لبيت امه أو لربعه عللأقل يلقى النفس الطيبة ويلقى الراحة .. وزيادة ماتقدرين تحرمين أهله وامه منه هم لهم حق يشوفونه يوميا دام ساكنين نفس المكان عيب يطلع من العمارة مايمر امه ويسولف معاها ..انتي جان تبين راحة زوجج وتبين تقعدين معاه اسبقي زوجج لأهله وتقعدون كلكم سوى .. لانه صراحة مو معقول تحرمينه من الجمعة مع اهله اذا كان من النوع اللي يحب الجمعة ويحب القعدة والأكل مع أمه .. انتي أقلمي نفسج على جذي .. اسبقيه لأمه وبتتعودين انتي الظاهر من النوع اللي مايتكيف بسرعة الله يعينج.. بس كل شي مع الوقت الواحد يتعود عليه ..
اسفة اذا كنت قاسية عليج بس شفتج متضايقة وتبجين قلت أوريج حجم المشكلة الحقيقي عشان ترتاحين شوي وتعرفين الوضع بشكله الحقيقي .. والله يعينج على الحمل والنفسية اللي تجي مع الحمل .. وان شاء الله تولدين بالسلامة وهالله هالله بخالتج ام زوجج.. وهالله هالله بالمسيكين زوجج ارحميه شوي ترى هم هو بشر وتعبان ويبي الراحة حاولي تحبين اللي يحبه شاركيه لاتوقفين بعيد وتطالعين .. والي ينقال لأجل عين تكرم مدينة .. لأجل زوجج شيلي اهله بعيونج ..

حبيبتي لازم تحطين في بالك انه الحياة ما تصير مثل ما انت تبينها..انت لازم تتكيفين مع الحياة
و السعادة ما راح تجيك الين عندك اذا انت في داخل نفسك انك تعيشين سعيدة..كيف؟؟
اول شئ طنشي ولا تتقعدين لصغائر الأمور...
حطي نفسك مكان الناس الي حولك شلون تحبين انك تتعاملين و عامليهم على هالأساس...
لاتسيئين الظن بأحد من اهلك ولا تنسين انه اهل زوجك هم اهلك الثانين لأنهم عمان عيالك و انت عايشة بينهم أكثر من أهلك..
و أخيرا عليك بالقراءة لأنها تفتح عقل الأنسان و تغير طريقة تفكيره..مثل أحاديث الرسول و سيرته والأخلاق الأسلامية و طبقيها في حياتك راح تحسين بتغيير في نفسك و حياتك كبير...و طبعا المنتدى مليان بنصائح البنات الحكيمات الله لا يحرمهم أجر كل نصيحة يكتبونها لإفادتنا ...

ياقلبي

شكلك مرره حسااسه الله يسهل حمللك ويهون عليكي

كنت مثلك تمام
ترى المشكله فينا والله
حساااسه عالآخر ...
حطي هدف واحد قدامك وامشي عليه صدقيني بترتاحين
اهم شي رااحة زوجك ومع الوقت بيصير كل شي عندك عاايدي