بيب بيب...تحبين تسوقين ادخلي سوقي ....

بسم الله الرحمن الرحيم
السلام عليكم ورحمه الله وبركاته

كيفكم ؟؟ اخباركم ؟؟ مع الدراسه ووجع الراس
المهم حبيباتي انا اول مره اكتب في هذا القسم واتمنى ماتكون اخر مره
ولاني احب اوسع صدري امر على هالقسم الرائع وحبيت اوسع صدوركم بعد معي الله يوسع صدورنا بالعافيه والطاعه … المهم انا بصراحه احب
السياره وماادراك بالسياره وسواقه السياره ..طيب ابسألك قد سقتي سياره >> لحضه لايروح فكرك بعيد في ا لبر مو في الشارع
طيب تعرفين للسياره انا بصراحه من عشاق السيارات احب اسوقها اذا طلعنا البر من يوم اني صغيره وانا منهبله على السيارات بس احب اسوقها
احس انها متعه لكن الحمد الله على ان سواقه الحريم ممنوعه الله يعز الحكومه خخخ …
ولا كان شفتوا العجب العجاب ولكم ان تتخيلوا حجم الحوادث التي تحصل عند محلات الاكسسوارات والازياء الحرمه ماتصدق تلقى المحل الا وداخلتن فيه هي وسيارتها وتلقون الشارع الوان Xالوان وردي، عنابي
الوان صارخه موضات سيارات مكاليف مالها اول ولا تالي وفتن وكوارث…
>>اقول لايكثر
طبعا انا واعوذ بالله من كلمه انا اول من ساق السياره لحالي من بنات عماتي وخلاتي >>حشا اختراع
بس بصراحه حسيت بشي غير طبيعي من يوم مسكت الدركسون >>تراه موب اكسسوار خخخخخخخخخ
جاتني ام الركب وابو العرق وولدهم الخوف >>اجتمعت العائله الكريمه خخخخخخ
والمشكله انا مولحالي معاي العائله يعني انفس برقبتي >>شفتوا المسؤاليه يعني لاتلومون الرجاجيل اذا رفضوا يودونكم السوق
المهم اول بداياتي في درايف ذا كار >>ابحثوا في القاموس عن معناها خخخ كنا في البراو البراري او الصحراء القاحله >>وهذي ربع المملكه
كنا مجتمعين نحن واعمامنا وكنا جايبين سيارتين اخوي بيودينا في سياره وابوي لحاله في سياره المهم طقت >>طقت ولاضربت.. فيني اروح مع ابوي راحمته لحاله في الطريق >>الا والله موب عشانه عشان السياره خخخخخخخ يوم جينا بنروح الا واقترح على ابوي اقتراح وجيه >>ونعم الاقتراح
قلت بابي >>شوفوا الدلع عشان اذا بغيتي تطلبين تزبط معك
ممكن اشغل السياره >>شوفوا الاحترام طبعا بابا اللي نفسه بابي >>صدق موب غيره .. ماقدر يقاوم الاحترام اجاب بالرفض فورا>>يخاف على هالنعومه والاحترام
فاستخدمت خطتي التاليه >>حرب مو خطه حبيت راسه وقلت تكفى ترا تكفى تهز الرجاجيل >>من يوم سمع هالبيت وقال صح لسانتس انتي اطلبي
مايردتس الا كيبوردتتس>>اقصد لسانتس خخخخخخ
قلت له بشغل السياره واسوق >>اثنين في واحد يعني حامي في حامي >>تعودواعلى السناعه والذرابه
المهم تردد خاف هاالادب يروح من اول دعسه >>خخخخخ.. المهم قال ابشري خذي المفتاح.. وانقز >>تقرب لـ اقفز تصير بنت عمتها
واشغل الكار >>اللي هي السياره الموقره وابدا بسم الله الا انقزت>>ترجمتها في الفقره السابقه.. نقزتن بغت تروح فيها السياره وطفت>>سواقه خخخخخخخ
المهم وبديت امشي بها.. تحسين انك ماسكه العالم مو الدركسون >>ايضا اكرر واقول ليس اكسسسوار
والله لو اني ماسكه العالم كان راح في غمضه عين ولا طب في وادي
وترا كان بابي جنبي يعلمني لاني زي ماقلت لكم كنت في بداياتي >>والمشوار طوييل وكنت يومها ماتغطى >>ياخزياه .. كنت صغيره لدرجه اني مااوصل للدعاسات واذا وصلت لها اختفي عن القزازه
>>ياحليلي صغينونه …الين وصلت للطريق العام يوم برجع مكاني قالي بابا ماتبين تكملين قلت وصلنا للطريق قال عادي انا معك ماصدقت خبر قلت ابشر والله مااردلك هالطلب >>الا واالله انتي اللي تبغين المهم وانا امشي من الدلاخه اللي فيني اذا مرت سياره انزل تحت وانا ماسكه الدركسون >>مستهتره الاخت ماتخاف تصقع في عمود… وابوي يهاوشني ويقول تبين نسوي اكسدنت >> يعني حادث بسم الله علينا ويقول الحين انتي ماتتغطين ليش تتوزين >>تتخبين قلت اخاف يشوفني احد ويعلم الشرطه >>سائقه غير نظاميه >>قال ابوي اقول لايكثر وهاتي الدركسون ماتنعطين وجه >>جنت على نفسها براقش ..
وهذي مغامرتي في السياره بداياتي >>حشا فنانه >>بسم الله علي
واذا شفت تفاعل وتجارب راح انزل لكم اصدار جديد ومغامره حللوه والجاي احلى باذن الله
يالله همتكم ..