السلام عليكم
كيفكم
انا زيي زي اي بنت تبي الشعر الزين
كان شعري لين اخر ظهري قبل 3 س وقصيته لين كتفي وتندمت ��
مابقي زيت او خلطة ماحطيتها ومحلك سر ���� الا ماجا اليوم الي
قررت اتبع نظام وفادني كثير وقلت لازم افيد البنات
اولا شي حللت تحليل شامل فيتامينات بكل انواعها وغدة و كلي والخ
والحمدلله كل شي سليم
اخذت حبوب اوميقا ثري
وبيوتن
طلبتها من برا وخف التساقط بس لازال شعري
مو زي اول ويبكي �� رحت دكتوره جلديه ووصفت لي رواكوتان
وقالت سبب القشره والدهون والتساقط الدهن الزايد بسبب اللخبطه ومن اعطتني
وماشا الله تبارك الله شعري متغييير رغم الجفاف خلصنا من الداخل الخلاصه
: التحليل واكل فيتامينات وغذا صحي
نجي للخارج
اولا \\
اشتريت فرشة ترنقل حقت التشابك من صيدلية بوتس جدا رائعه واغنتني
عن مشط بودي شوب والشعر يوميا لازم يتمشط عشان التشابك يعدمه
ثانيا \\
ما اتروش بموية حاره ، لانها تفتح المسام وتطيح الشعر صرت اتروش
بباردة وتعاودت والشامبو حقي انا استخدم جوز الهند المجموعة كامله بخاخ
التشابك وبلسم وشامبو وماسك طبيعيه من صيدلية بوتس ولافيها سيلكون
ثالثا \\
بعدت عن الاستشوار والخرابيط واشتريت حامي الشعر من تيرمسي
اذا جيت بستشور
رابع \\
قص اطراف الشعر كل 3 ش
هذه اشيا اساسيه
نجي للخلاصه ، فرشة التشابك وتمشيط الشعر يوميا وتظفيره استخدام
شامبوات خاليه من السيلكون الاستشوار انسيه واذا استخدمتيه لازم حامي
ولاتمشطين شعرك وفيه موية
نجي للخارجيه
مرتين بالاسبوع الي 3 تجيببين صبار وتوخرين قشرته وتفركين فروتك
بالجل ينبت الشعر زيييين وتسوين مساج 5 د وتركعين وبعد نص ساعه تدهنين الشعر
مو الفروة ب اي زيت انا احط نخاع اسويه او اشتريه ع حسب او ترشوب
لانه طول شعري وناسبه جدا ساعه ونص وتتروشين واخر شطفه بموية شرب
بعدين كل 10 ايام او 15 يوم احط حنا مع خليط المشاط خلطتي الي فادتني وزينت شعري
هي ك التالي اجيب كثيره وجل صبار وانقعهم يوم كامل همن بالخلاط
مع اي زيت مثل بارشوت احطها مع ثوم وبصل وجرجير اخليه ينقع
يوم كامل واصفيه واحطه ببرطمان زجاج بثلاجة
وقت استخدام الحنا اسوي كتالي
ملعقتين من المشاط وبصل وثوم واكليل جبل قد كف يدي واحطها بقدر
مع 3 كيسان موية واخليه يغلي 10 د اطفيه ولما يفتر اصفيه
واجيب الحنا احط 4 ملاعق عشان طول شعري وملعقتين من الخلطه الي
بالبرطمان واعجني بالموية الي صفيتها اذا خلصت احط ملعقة زبادي
ومايونيز وملعقة من اي زيت خروع او جوز هند
لازم لازم الحنا يكون شبه سايل ولايجلس بشعري اكثر من 3 س ولا ترا بيقصف
شعرك بعد 3 ساعات اتروش بموية وانتبهوا تمشطونه تحت الدش يطيح مع الموية
واطلع انتظر ينشف وامشطه واحط زيت وارجع اتروش بشامبو
ويوميا استخدم تونك اكليل الجبل والاس واسوي مساج
الخلاصه :
مرتين بالاسبوع جل صبار وزيت
يوميا تونك الاس والجبل
كل 15 او 10 ايام خلطه الحنا
النظام هذا استمريت عليه 4 شهور وماشاء الله تبارك الله زان شعري عن اول
وبستمر لين اشوف نتيجة احسن واحسن الاستمرارررر والغذا الصحي وقولو
ماشا الله تبارك الله ما احلل من لايذكر الله اتعبتني العيون والامراض
دعواتكم بان الله يوفقني ويحققلي الي ابيه ��
مشكوره يعطيك العافيه عالافاده