سسسسسسسسسسسسسسلام لجميع احباب قلبي

طمنونا عنكـــــــــــــــــــــــــــــــــــم!!!!!!!!

أم الزمردات

ما شاء الله عليك! أنا لا يمكن أقدر أسوي ربع هالشي...
معليش يعني أنا بنتي أم سنة وعشر شهور راحت معاه بالغلط بغيت أموت,, قعدت أدور بمكاني كأني مجنونة.. وبنتي أم خمس سنين كل ما راحت معاه أموت وأحيا إلين تجي... هذا وأنا خابرة إنها مبسوطة معاه وتحبه... لو أدري إنها تمسها شعرة إلا راحت عنده ما خليتها تفيض الباب...
وشلون بنتك راعية مرض و سخيتي فيها...؟!
بعدين تبين الصراحة أنا عندي تتولاهم جدتهم وعماتهم أو حتي الشغالة ولا تتولاهم مرة أبوهم...
الله يجيرنا يا شيخة... ولو إني ما أدري عنها بنت الحلال هي زينة ولا شينة,, بس برضه ما أسخي بعيالي...
أنا فيني عيب خطير ولا قدرت أعالجه إلا الحين ...إني أبي الحياة المثالية لعيالي.. والحياة ما فيها شئ كامل... الشئ هذا مخليني مرهقة نفسي ومتوترة دايماً...دايماً عندي احساس بالذنب تجاههم لأني حرمتهم من أبوهم... مع إنه هو اللي أجبرني أمشي هالطريق ومع إنه كان بايع...
بس أظل أحس بالمسئولية...

ساعات أفكر يمكن أحسن لهم لو هم معاه يمكن هو يقدر يوفر لهم حياة أحسن من الحياة اللي أنا جالسة أوفرها لهم...
تصدقين إن بنته الكبيرة تحبه أكثر مني... وإنها تعتقد إن أبوها يحبها أكثر مني...
مع إني دايماً شايلة همها وقاطعة قلبي لها...
أوقات أفكر المفروض أنا اللي أكون حاقدة عليه... انسان دمر حياتي... سنين إنسرقت من عمري زي الحلم... كل شي خرب والسبب هو وأهله.. أفكر إذا فيه أحد المفروض ينلام علي هالتشتت والحياة الصعبة اللي عايشينها أنا وعيالي يكون هو... المفروض إنه يتحمل مسئولية أخطاؤه... ما يكفي حطم لي نفسيتي... حتي عقد لي حياتي... حتي بعد ما أتزوج ما بطل يحوس لي حياتي... وأنا ما أدري إلين متي بأصبر وأتجمل عشان عيالي... إلا متي بأبتل اجمل صورته وأزبرقها عشان عيالي يقدرون يفتخرون بأبوهم لما يكبرون...وما يحسون إنهم أقل من غيرهم...
تدرين حتي حاربني بشغلي...
ولا أقدر أدعي عليه...
وش أدعي عليه وأقول إلا شان حاله شان حال عيالي...
موب بس ضغط تربية أطفال من دون أبوهم.. ولا ضغط تربية طفلين أقل من سنتين في نفس الوقت... ولا ضغط العمل خارج المدينة يومياً...
ضغط الصورة المثالية اللي دايماً أحاول أضغط علي نفسي وأرسمها له قدام بنته وقدام الآخرين...
ضغط الناس اللي مستغربين شلون متحملة هذا كله ولا قدرت أصبر علي عشرة أبوهم...


معليش طولت عليك بس شكراً لك اللي خليتيني أطلع بعضاً مما في قلبي!


:)

أختي أناناسة ...... يمكن لما قرأتي اللي كتبته حسيتي إن قلبي ( جلف ) أو ماعندي حس والله يعلم إن نفسيتي مايعلم بها إلا اللي خالقها وعلى فكرة أنا قاعدة أكابر قدام أهلي لأني ماابغاهم يشيلون هم فوق همي عليهم ترى طلاقي كان ( الواقعة ) عليهم خاصة إن أهلي معروفين بين جماعتنا ومافيه أحد إلا ويذكرنا بالخير ودايما يقولون إن أبوي عرف يربي البنات والأولاد ..... لكن لمتى أبضل أراعي البنات معنويا وماديا وخاصة إني عند أهلي وتعرفين الوحدة تصير مثل الضيفة عند أهلها خاصة بعد الطلاق .... ولمتى أخليه مايحس بالمسؤولية تجاه بناته يعني أريحه وأتعب أبوي هالشايب !!!!! هذا ظلم لكن أؤكد لك إنه يعض أصابع الندم على كل لحظة بعد عني فيها وأكيد خالط حريم كثير لكن عرف معدني وعرف إنه حتى لو تزوج ماراح يلقى وحدة مثلي ....... أنا ضحيت بأشياء كثيرة علشانه عطيته مالي وحبي وعمري وتحملت كل مصاعب حياته لدرجة إنه كان مسكني في بيت على ( البلالالاط ) مافيه أي شي لمدة 4 شهور وأنا صابرة وكنت نايمة على روحي وكان هو يسوي علاقات نسائية من وراي وأنا شاربة المر وساكتة ومع ذلك ماقدر اللي سويته وأنكر كل اللي أعطيته أخذ كل شي شريته للبيت من مالي الخاص وأنكره وآخر شي يروح يعطيه لأهله ..... هذا مو ظلم ؟؟ ويكمل علي يرمي بنته ويخليني أصرف عليها أنا وأبوي !!!!
أختي أناناسة اللي بيصير لبناتي مكتوب عليهم سواء كنت معهم أو بعيدة عليهم اللي علي إني أستودعهم الله وأقرأ الأذكار عليهم وربي وحده اللي بيحفظهم ........ وانتي يااختي لاتصيرين مقيدة فيه إنحلي من قيودة إذا أخذت العيال منه فإنت حليت نصف مشاكله خاصة إذا هو متزوج أما إذا كان يصرف عليهم وانتي مرتاحة مع أهلك فاصبري واحتسبي الأجر وربي بيعوضك خير أما إذا كان مايصرف عليهم فصدقيني بيخليهم لحد مايكبرون ويعتمدون على أنفسهم وبعدين بينتزعهم منك على فكرة الرجال وده يصرف آلاف ولا يتحمل مسؤولية الأطفال مثل الحال مع أبو بناتي ...... الله يكون بعونك وعوني ويفرج لنا ويكتب لنا الأجر والمثوبة ...
0

هلا أم الزمردات...
أنا دارية إنك تعبانة من هالوضع ,,
بس...
يعني ما أدري أنا أشوف إن حياتي اتدمرت ونفسيتي خربت ماله داعي عيالي يصير لهم نفس الشي.. من مبدأ تقليص الخسائر يعني...
انا أقول علي الأقل لما تمر السنين ويكبرون عيالي وهم زينين و ناجحين بحياتهم ساعتها بأحس إن عمري ما راح بلاش...
لكن لما أرميهم علي أبوهم لا أنا راح أكون مبسوطة من دونهم... وهم بينحرمون من مقومات الحياة السليمة..
بالنسبة للصرف هو يرسل مصروف بانتظام زي ما قلت لك... حتي أقساط التمهيدي حق البنت الكبيرة هو اللي دفعها... وكان يرسل لهم كسوتهم مع اختهم الكبيرة وحتي الألعاب...
مب المشاكل المادية اللي أنا أتكلم عنها نظرة الأمان المفقودة بعيون بنتي... الأمان اللي من واجبه هو كأب إنه يوفره...

شوفي أنا ما يهمني إنه يتنكد بحياته عشان أحس إنه نال عقابه... حتي ما يهمني لو أدري إنه متحسف او ندمان علي تفريطه... يعني بالله وش باستفيد..؟
حياتي خربت .. مريت بمشاكل وعقبات الله وحده يعلم! بنتي الكبيرة نفسيتها دمار... عيالي الصغار محرومين من أبوهم... عايشين زي الأيتام وأبوهم موجود..ما يفكر يطل عليهم ولا حتي مرة بالشهر...
البنت تحسب أبوي أبوها ..والولد يحسب أخوي الكبير أبوه...
أنا سامحته علي اللي صار لي بحياتي.. لإن بالنهاية أنا قصرت بحق نفسي وتنازلت عن حقوقي برضاي...
لكن لا يمكن أسامحه علي حرمانه لعياله... وتقصيره بحقهم...
لأنهم ما تنازلوا عن حقهم فيه... ولا انا أو أهلي منعناه من هالشي... الأطفال محتاجين لأكثر من الفلوس...
وزي ما أنا جالسة أضحي وأحرق دمي يومياً علشانهم هو كان يقدر يوفر لهم حياة كريمة لكنه ما بغا...

وبصراحة لا أنا ولا عيالي نستاهل منه هالجحود...
مو حق وقفاتي معاه... ومساندتي له.. مو حق العطاء اللا محدود ولا صبر السنين...
مو حق أطفال زي الورد فيه ناس يتمنون واحد فيهم بس...

أنا أتمني إنه يكون مبسوط بحياته... علي الأقل ساعتها بيخلي لي عيالي أربيهم...
علي الأقل,, أطلع عيال ناجحين وسعداء- الشي اللي اعتبره يحتاج معجزة نظراً للظروف...
أنا ما أبغا أنتقم منه... لأني بصراحة إلا هالحين ما أقدر أكرهه... يكفي إنه أبو عيالي.. أكثر شئ مخليني متعلقة بالحياة... وأكثر شئ مبهج في حياتي...
كل الثلاثة فيهم أشياء كثيرة منه من ملامحه وتصرفاته لو كرهته معناته بأكره عيالي لأنهم يذكروني فيه... وأنا ما أبي هالشئ!

أختي أناناسة ....... معك حق في كلامك وهذا كلام العقل ....... لكن على فكرة الظروف الإجتماعية والأسرية تختلف من فرد لفرد ......... وزي ماقلت لك من قبل طالما إنه يصرف عليهم يعني إنه معترف بوجودهم وصدقيني بيجي اليوم اللي يندم على كل لحظة فارق فيها عياله ولا يهمك ربيهم بطريقتك وإنتي كوني لهم الأم والأب والصديق والأخ علشان تثبتين له في النهاية إن الفضل لك بعد الله في نجاحهم وحياتهم المثمرة ........ ومن جهة ثانية إقنعي عيالك بالأسلوب اللين إن هذا شي مكتوب عليهم ولازم يرضون فيه وأهم شي في حياتهم هي دراستهم ومستقبلهم اللي هو محور سعادتك وصبرك ........

بناتي لما يجوني دايما يشكون لي من بعدهم عني والألم والحزن مصاحب لهم خاصة لما يشوفون زميلاتهم في المدرسة مع أمهاتهم ...... لكن أنا أحاول أعوضهم وأقنعهم بإني ماأقصر عنهم من نواحي أخرى سواء في اللبس أو الترفيه أو الزيارات ومع الوقت يقتنعون وهم بنفسهم يذكرون كل اللي أسويه علشانهم ........ الله يكون بعونا وينفعنا بصلاحهم