تخبرون الان الاوضاع كيف وامتحان الله لنا بهذا الغلاء والاسراف اللي احنا عايشين فيه فراح اقولكم كم فكره محتسبة الاجر فيها وهو رد على هدية الغاليه مزايانا
اولاً انا حاطه ورقه في المطبخ ووقت مايخلص شيء من الاغراض اكتبه مثلاً : الملح اكتب ملح قشطه اكتب قشطه وبكذا آخر الشهر اكون عارفه ايش ناقصني وهذي خذتها من منتداي الحبيب
ثانياً وقت ماتخلص اغراض الثلاجه انظفها حتى لو ماقضيت علشان تكون نظيفه
ثالثاً الفاكهه أحياناً يبقى منها وتكون ( ذاويه ) وما راح تنأكل فبدل ما ارميها أخذها وأغسلها واقشر اللي يبي تقشير بعدين اقطعها زي التفاح والكمثرى والخوخ وأحطها بأكياس بحيث امدها واقدر أخذ منها اللي ابي ووقت ما أحتاج عصير بس اطلعها وبالخلاط مع شوي ماء واي اضافه انا احب
نفس الشيء اسويه بالفلفل البارد لما يبدأ يلين اقصصه قطع كبيره وبعلبه واذا احتجته اطلع واقصه بالشكل اللي ابي
كلنا عارفين ان الكلوركس مضر على الصحه اذا استخدمناه لالواح التقطيع فشسويت خلطت بعلبة بخاخ مطهر اللي للاستمالات المنزليه مع شوية خل وماء وبس اخلص مقطعه دجاج او لحم ابخ على اللوح
نفس البخاخ استعمله لتنظيف الثلاجه
اهم فكره الله يجزا من علمني عليها لو فاض منك رز من الغدا اوالعشاء نظيف حطيه بالثلاجه اذا لبكره او بالفريزر لبعدين واذا طبختي الغداء حطي نصف الكميه المعتاده وسويها عادي واذا بدأ الرز ينشف حطي فوقه اللي باقي من امس وغطيه بالقصدير وشوفي يصير كأنه مسويته اليوم
واذا كان باقي مثلاً صينية خضار ورز نفس الشيء حطي الخضار تحت وفوقهم اللي باقي من الرز وعلى النار الهدئه جداً وذوقي احلى مقلوبه
الفلفل الحار لو جبتي كميه كبيره حطي شوي منها بالثلاجه اللي يكفيكم والباقي غسليه ونشفيه وبعلبه بالفريزر للدقوس والسلطه الحاره وفوق الرز وكأنه جديد
الليمون لمّا يكون كثير قشريه وجففي قشره واستفيدي منه وقصصي اللب وطلعي بذوره وبالموس حق المولينكس مع شوي نعناع واضربيهم وحطيهم بقوالب الثلج ولما يجمد طلعيها وحطيها بعلبه بالفريزر ومتى ما اشتهيتوا عصير ليمون بالنعناع طلعيها وعلى طول بالخلاط مع ماء وسكر وصفيها ويالله من فضلك يبرد على القلب
وسلامتكم هذا اللي عندي اللحين وان ذكرت شيء ابشروا
وهذي هدية للأخت ( مزايا إنسانة ) والله يجزاها خير :
دعواتكم بصلاح ذريتي
