السلام عليكم
كيف حالك ي رشيقاات !
أخباركم .. والدايت والرياضة ،
بعطيكم معلومة نفسية بتفيدكم في تخفيف ه الشحيمات :
يمكن كلنا نشتغل ببيوتنا وبمدارسنا وكلياتنا ونفرق بين نتيجة العمل لما نعمله بحب واستمتاع وإخلاص وتفاني ولما نعمله بس لأننا مجبرين !
إحنا لازم نطبق ه العملية في هدفنا المهم اللي يجمع كل الدبدوبات !
نصيحة :
حتى تنحفي .. استمتعي بكل تفاصيل يومك ،
بوقت المشي استغفري .. اسمعي أناشيد والله بتمر عليك الساعة ماودك تدخلي للبيت !
أكلك نوعي فيه بالصحون والنكهات وبالسلطات غيري بالصوص والتتبيلات ،
والمعلومة الثانية الي أنا جربتها واستفدت منها بشكل سريع =)
أهدافك لاتحطيها بالخمسة كيلو والعشرة !
حطيها إن شالله كيلو كيلو عشان تحسي بالإنتاج وبطعم النجاح !
جربوها وادعولي !
والطريقة اللي بعطيكم إياها مو من رأسي جربتها بعد ما استشرت وحدة من الحلوات هنا
وقالت لي أنها ماترهل جسمها معها ولاشي
نزلت تجربتها مع زيت الزيتون قبل الوجبات .. أتعب وأنا أقول ممتااازة !
ونحفت بشهر 6 كيلو ..ماشاء الله عليها
طبعاً ..
في الصباح ع الريق أشرب الشراب النبوي م ص زيت زيتون + م ص عسل + كوب ماء مغلي
وأضفت عليه من عندي قطرات ليمون عشان يذيب الشحوم أشربها ع الريق وألبس للكلية وأحيان أفطر قبل لا أطلع من البيت وأحيان ما أفطر الا بالبريك !
لأنو فعلاً يسد الشهية ..
وطول اليوم قبل لا آكل أي وجبة بربع أو نصف ساعة أخذ م ص زيت زيتون + كوب ماء مغلي
والله إني صرت آكل وجباتي شي نفسي موب مثل أول أصير مشفوحة وأنا آكل !
تخيلو والله أول مايكفيني صحنين رز والحين أجبر نفسي آكل 5 ملاعق مع سلطة وأحيان ما أكملها ،
وطبعاً للحالة النفسية أيام الامتحانات دور كبير مع الزيت صار المفعول مضاعف :icon28:
ولما أمشي صرت أحس جسمي يعرررررق !
حتى لو ما أمشي الا عشر دقايق ..
طبعاً لي اسبوعين مانحفت الا 2 كيلو لكن الي يشوف الشكل يقول ناحفة 4 كيلو
لأن معروف الزيت الزيتون يستهدف الدهون مو العضلات والدهون لما تنحف تبين بالشكل أكثر من الميزان ..
والعضلا لم ما تنحف تبين أكثر بالميزان لكن ترهل الجسم !
وبالنهاية ..
ما يحتاج أتكلم وأمدح بزيت الزيتون اللي أقسم به ربي في كتابه
وحديث الرسول " كلوا الزيت وادهنوا به فإنه من شجرة مباركة "
وترا السمنة مرض فاحتسبي اتباع السنة في علاجها بالطب النبوي وتوكلي ع ربك قبل كل شي
وبإذن الله راح تنحفي وتنبهري من جسمك ..
وخاصة المناطق المستعصية بتصغر وتنحف !
جربوها .. وادعولي من كل قلوبكم أنه ربي يفرج همي وضيقتي
وييسر أمر امتحاناتي .. ويتمم زواجي على خير ..
تكفون ..
أمر زواجي معلق لا هو اللي تم ّ .. ولاهو اللي انتهى ..
دعواتكم ربي يسعدكم وينحفكم من غير شر ..
ودي لكنّ ..