بسم الله الرحمن الرحيم
و الصلاة و السلام على خير الانبياء و المرسلين
بنات بعطيكم عصارة خبرتي ويا الريجيم و كل بنت تستفيد تدعي
لي بالزوج و الوظيفه و الحموله الصالحين و لكم بالمثل
بس قبل اذكرو الله و قولو ماشاء الله تبارك الرحمن ولا حول ولا قوة الا بالله العلي العظيم
1- نوع الخبز يفرق كثير كنت اكل الخبز الايراني احنا كذا نسميه البعض يسميه الافغاني
شكله مثل التميس فيه فقاعات بس مو تميس يعني مو املس زيه لو اعرف اصور كان صورته لكم
ينباع طازه من الخباز هذا كان وزني ينخفض عليه بس يطول
السر جربت اللبناني الاسمر، الي ما تعرفه هو الرقيق جدا، يعني شفتو خبز السندويش الابيض كيف رقيق
هو مثله بس اخذو الاسمر هذا بالريجيم جبار ماشاء الله
ما ينخبز طازه تلقونه بمحلات المخابز الي تبيع الفطاير ولا بالاسواق
2- تقليل الاكل: اذا مطوله بريجيمك او مالك خلق تطبخين او ما عندك وقت اكلي نص الاكل و املي معدتك قبل اي وجبه بتفاحه ولا برتقاله وشوفي كيف تفرق معاك
يعني لما تاكلين اوصلي لحد الاكتفاء مو الامتلاء يعني لما تتنفسين تحسين كل الهوا يدخل لمعدتك
ما تحسين الاكل يمنعه لانه اذا امنعه اعرفي اكلتي بزياده
و هذا خليه نظام حياة و سيري عليه قومي من الاكل وانتي تشتهينه
و هذا تطبيق لمعنى حديث الرسول صلى الله عليه و سلم ثلث لطعامك و ثلث لشرابك و ثلث لنفسك
3- ابتعدي عن الاكل على الاكل يعني لا تاكلين الا اذا حسيتي بجوع
4- لاتحرمين نفسك من اي شي الاحساس بالحرمان بيخليك ترجعين للاكل بشراهه بعد نجاح الريجيم و ترجع
الكيلوات الزايده يعني اكلي من كل شي بس بحدود و هذي اكدتها هيفا قالت ما تحرم روحها من شي
5- الخضروات مثل الجرجير و البقدونس رهيبين معروفه فوايدهم هذول مثل الي يصفون الشرايين و بسرعه
يمشي الدم و تزيد عملية الحرق
6- لا اؤمن بسالفه لا تتعشين خير يا طير ليه الحرمان هذا يعني اقعد 6 ساعات ياكلني الجوع
تعشي بس حاولي قبل النوم بفتره
7- ريجيم من غير رياضه ما ينفع لازم رياضه لو يوم و ترك و احسن شي المشي
امشي بسرعه معتدله لا بشويش كنك مالك خلق ولا بسرعه رهيبه لا التوسط حلو
يعني لما تمشين تحسين كل شي فيك يتخضخض خلي الشحيمات تتخضخض و تتفكك:)
8- اختي كانت دبه و ريجيمها طول عاد تركيبتها كذا كانت تشرب عصير الجريب فروت ممتاز للريجيم
بس اذا حامض عليك خففيه بمويه
9- خلطات الريجيم من الاعشاب اخذي الي يناسبك مو شرط الي يفيد غيرك يفيدك الي عندهم معده ينتبهون على انفسهم
10- مقولة الاعشاب اذا ماراح تفيد ماراح تضر غلط ملية بالمية
الاعشاب مليانه مواد كيميائية و لها اضرار اذا انوخذت على المدى الطويل
قبل اي خلطه سوي بحث بالنت عن اضرار كل عشبه فيها
11- اذا صارت عزيمة اكلي براحتك و اشبعي براحتك انسي الريجيم ماهي ضارتك هالوجبة
لا تلخين الريجيم يحسسك بالحرمان و عموما طلعات الكثيرين قليلة يعني مو كل يوم بتنعزمين
فلا تحرمين روحك من اصناف جميلة
12- اشفطي بطنك ونتي جالسه بالنت ولا منسدحه ولا قاعده مهم جدا
13- كثري موية خليها جنبك كل شوي اشربي الدهون الي صار لها سنين تبي سوايل تمشيها و تذوبها
14- وصفات سهله للريجيم من تجربتي:
باذنجان اشويه على النار فورا لين يسود جيبي سكين و اغرزيها و تعرفين اذا استوت ولا لا
بعدين تبرد و قشريها و حطي زيت زيتون عليها ترا يضعف و ليمون و اكليها مع السلطه و الخبز
لبنة قليلة الدسم عليها زعتر و زيت زيتون
اخذي من لحم البيت ولا من الدجاج واكليه بخبز اذا فيه دهن نشفيه بمناديل انا كذا اسوي
بيضه مسلوقه مع توابع الوجبة سلطه و خضره
15- اهم شي الاستغفار استغفري بنية الاجر و غفران الذنوب ثم جددي النية عشان اي شي دنيوي منها الوزن
و الله انه رهيب اغمضي عيونك و استغفري و ادعي يارب خفف وزني من غير شر يارب روح كرشتي
16- تمرين المعده سويه ونتي تتفرجين على التلفزيون لو لربع ساعه و استمري
الكرشه من سنين متكونه لا تهقين باسابيع بتروح
17- الشاي الاخضر لا تتعبين بالبحث عن الشاي ابو درجه اولى لانه سعره من سعر الذهب
شفت برنامج مع خبير عنه حط انواع كثيره منه و طبعا اخذي المتوفر
انا اشرب شاي الوزه ممتاز و ينصحون عشان الفايده اكثر من كوب
بس الاكثار منه يروح الخدود كذا سمعت
يعني كوب واحد طيب باليوم اشربيه مر عشان الفايده تكون اكثر
سمعت الخبير يقول الحراه 60 او 70 بالمية حرارة الماي
بس انا كنت اغلي الماي ثم اصبه و جاب نتيجته الحمد لله
الشاي الاخضر له اكثر من فايده بس اشهر فوايده
1- ينقي الجسم من السموم
2- ينقص الوزن
3- يثبت الوزن
هذا الي عندي و اذا ذكرت شي اخبركم
بس اهم شي الدعاء ان الله تعالى يعطيكم العزيمة و الصبر و الصحه
ما ابي الا الدعاء بتيسير اموري و كل الصالحين يارب:)
ادعو لي يعطيني الله تعالى واحد مملوح مثل هذا:arb:
نسيت شي اللبن انا يسوي لي كرش فتركته و استخدمت الروب قليل الدسم
علميا اثبتو ان الروب يقضي على الكرش بشكل رهيب و فعلا فرق معاي و الله بس كل يوم اكلو روبه
لو تقسمونها نصين على وجبتين
شاهه2 @shahh2
محررة
تجربتي الناجحه مع الريجيم و السبب نوع الخبز لا ما اقصد بس اسمر شي ثاني
127
20K
يلزم عليك تسجيل الدخول أولًا لكتابة تعليق.
التاجرة أم عبودي
•
مشكورة والله يحقق لك ماتتمنين
يسعدك ربي ويرزقك الزوج الصالح المصلح التقي النقي الحنون العفيف
موفقه يارب
تجربة اكثر من رائعه
موفقه يارب
تجربة اكثر من رائعه
الصفحة الأخيرة