تجربتي الناجحه مع دكتورة دلال الشمري

السلام عليكم ورحمة الله وبركاته
حابه أحكي لكم عن تجربتي مع دكتورة دلال الشمري في مستشفى الحبيب في الرياض، لأني ما لقيت لها في النت اي تجارب مع الأخوات، فقلت افيدكم .
بعد تأخر إنجاب ١٢ سنه تقريبا و٣ محاولات حقن مجهري. منها واحده أجنه مجمدة وكلها لم يكتب الله لها النجاح.
فقررنا نسوي المحاولة الرابعه عند الدكتورة دلال لما زرناها المره الأولى وأرتحنا لها وحسينا ما شاء الله انها شاطره وفاهمه ولقيت منها معلومات كثير جديده عليا رغم اني قرأت في النت كثير وبحثت عن اسباب الفشل.
في البداية سوت لي عمليه منظار رحمي استكشافي ولقيت لحميه وشالتها وسوت لي التحفيز في الأخير وأنا مبنجه.
ويومها اعطتني كورتيزون ١٠ مل وحبوب اسبرين وفوليك اسيد الى ما بعد عمليه الحقن.
ولما جاتني الدورة بدأت معايا متابعة التبويض عن بعد لأني ما قدرت اروح الرياض من بدري بسبب ظروف سارت عندنا... وكانت كل مره ارسل لها تقرير السونار .. تحدد لي جرعة التنشيط المناسبه.
آخر متابعة تبويض وهي الرابعه سويتها عندهم في الحبيب . ويومها حددت لي موعد الابرة التفجيرية وموعد سحب البويضات.
قبل موعد السحب بيوم اعطتني محلول في الوريد .. قالت انه للأجسام المضاده.
بحمد الله تم السحب وتلقيح البويضات.
وبدأت تحاميل سايكلوجيست في نفس يوم السحب.
واعطتني مضاد حيوي.
والارجاع كان بعد ٥ ايام. يومها قالوا لي اجيهم والمثانه نصف ممتلئة وقبل ما يدخلوني غرفة العمليات اعطوني ابرة مثبته.
وتم الارجاع على بركة الله.
وأعطتني حبوب دافستون للتثبيت.
وبدأت اسبوعين الانتظار وأكيد عارفين وضعها والملل والقلق اللي فيها.
كنت يوم اقرا سورة البقرة.. ويوم اقرا ايات الإحياء على بطني والفاتحه ٧ ومرات وياسين.
وقبل موعد التحليل بيوم نزلت عليا افرازات بني غامق.. في البدايه حفت .. بس بعدين قالوا لي انها من علامات ثبوت الأجنه.
وجاء موعد تحليل الحمل (يومها الدورة متأخرة ٦ أيام بس كنت اقول يمكن المثبتات أخرتها) ورحت سحبت الدم وطول الطريق استغفر وأدعي . بعد كم ساعه استلمنا تقرير النتيجه على الواتس. وفتحناه وقلوبنا تخفق بقوه.
وكانت المفاجئه .. (أنا حامل).
يارب لك الحمد والشكر.
وقلت لازم أبشر حبيباتي بنات حواء حتى يستفيدوا من تجربتي.
وأي سؤال أنا حاضرة..