ياقلبي ربي يرزقك بالخير

وبالذريه الصالحه امين امين امين

وينك ياأم راحيل

من طول الغيبات جاب الغنايم

ربي يجزاكم خير ياااااااارب
واسال الله العظيم ان يجمعني بكم بجناته ياااااااااااااااارب العالمين يااارب
ربي يرزقكم من حيث لاتحتسبون على هالدعوات

اكمل

جلست على الساعة 8 ونص
استغربت ما اتصلو
ظليت افكر وافكر
خذني الشيطان الى ان صار في الاجنة شي وتصعب عليهم الامر انهم يبلغونا
قلت لا لا يمكن الان اللمرضة مع الدكتور جالسة تقولة وتسالة عن الاجراءات اللي بكرة(( يوم الاربعاء )) لازم نسويها علشان تخبرنا بها لذلك تأخرو
المهم جلست اضرب اخماس باسداس
وكل وقت اطالع الساعه
الى ان جات الساعه 9 رن التلفون
رفعه زوجي
وجرى الحوار التالي :
الممرصة : ....
زوجي : نعم
الممرضة : .....
زوجي : فلان الفلاني
الممرضة : ......
زوجي : 27/ ديسمبر / ...19م
الممرضة : ........
زوجي : اها .......اها .........اها
الممرضة : .......
زوجي : لذلك راح ترجعونهم اثنينهم او واحد فقط ؟
الممرضة : ......
زوجي اوكي
الممرضة : ......
زوجي : كم الساعه ؟
الممرضة : ....
زوجي :بنفس المستشفى ها ؟
الممرضة : .....
زوجي : أوكى ، أي توصيات ثانية ، هل مثلا يجب على ام راحيل ان تتقيد بشي معين
الممرضة : ....
زوجي : اوكى شكرا
الممرضة : .....
زوجي : باي

قلت له وشو صار
قال بكرة موعدنا على الساعه 1 الظهر
قلت له ادري غيرة
قال : جنين من الاجنة اوكي ،، والثاني صار بطئ في النمو

مارديت علية سكت ،،
تضايقت وحزنت
واشوى ان زوجي رجع نام ثانية (( او يمكن مثل ما انا افتكرت انه نام )) لانه يتضايق اذا شافني متضايقة
وعلشان ما اتعب اكثر قمت توضيت وصليت
دعيت ربي ان يربط على صدري وان يصبرني ويخليني انسى هالموضوع
دعيته اني ما اشوف نظرة الانكسار بعيون زوجي
ودعيته ان يحفظ جنيني وان يرزقني من واسع فضلة
دعيته ان يرحمني وان مايردني برحمته
لاني احس اني خلاص مافيني استحمل اكثر
ولاحول ولاقوة الا بالله


بعد ما شكيت حزني وهمي لله
ارتحت كثير وقلت الحمد الله
ان كان لي رزق راح ربي يعطيني اياه

بعد فترة سويت لي فطور
كورن فليكس
وجلست اطالع هالتلفزيون الممل
وزوجي يصحى وينام يصحى وينام يصحى وينام

اليوم مشوارنا راح يكون حديقة الحيوان (( او مثل ما انا كنت اتوقع انها حديقة ))

جلس زوجي قريب الصلاة
وعلى مادخل وقت الصلاة ،، قام صلى وسويت له فطور
والمفروض نروح لمحطة القطار من بدري ،، بس ماطلعنا من الفندق الا 1 ونص تقريبا ،، زوجي اخرنا لانه ماصحى بدري


ركبنا القطار اللي بيودينا للمدينه
ظلينا في القطار حوالي 45 دقيقة
لانه بين كل منطقة ومطنقة يوقف
علشان فية ركوب وفية نزول

وصلنا للمدينه
رحنا لمبني التذاكر علشان حديقة الحيوان
قالوا لنا
الرحلة اللي لازم تروحونها علشان تاخذون وقتكم في التمشي والأستمتاع فاتتكم (( لان يبغى لكم علشان تتمشون وتشاهدون الحيوانات 3 ساعات ،، وعلى ماترجع السفينه مافية عندكم وقت ))
لكن فية رحلة بتمشي الان بعد نص ساعه ،
لكنكم مابتقدرون تاخذون راحتكم في التمشي ،، يعني قدامكم فقط ساعه او ساعه ونص ولاااازم ترجعون .
اذا تبغون هالرحلة روحوا لشباك تذاكر رقم2

قلنا خيرها بغيرها
بس مارجعنا البيت وقلت لزوجي خلنا نتمشى هنا بحر وناس وحالة
احنا جينا من قبل هنا (( اذا تذكرون يوم قلنا للممرضة ان احنا بنطلع ولا بنرجع الا متاخرين وقالت بترك لكم مسج ،، وبحاول اتصل عليكم ...،، هذاك اليوم جينا لهالمنطقة وزرنا اماكن سياحية ))
لكن ماكان فية وقت كفاية ان نستكشف المنطقة


قال زوجي انا عندي لك مكان
كنا قبل شافين في كتاب سياحي مركز الارصاد الفلكية
قال خلينا نروحه مدام مابنروح لحديقة الحيوان

وبعد البحث في الخريطة وسؤال المتجولين المسؤولين عن ارشاد الناس
دلينا المكان
ومن حظنا كان ذاك اليوم مجانا

دخلنا وشفنا المجاهر الفلكية ، بعض المجسمات ،، مجاهر قديمة جدا وبعضها حديثه
مجسمات ضخمة للكرة الارضية وللشمس وللقمر ولباقي الكواكب .......
وكان نفسي ان نصعد فوق ونشوف بالتلسكوب (( ما ادري هل صحيح اسمة او لا ،، ذاك المجهر الضخم اللي يكون في برج عالي وتنفتح قبة ويطلع المجهر ،، اللي تتابع بانك بانثر تعرفة ،، جاء في حلقة من حلقاته ))
قلت لزوجي
قال خلينا نصعد ونشوف
صعدنا الدرج وجلسنا بنص الطريق علشان ارتاح
وصلنا
لكن للاسف كانوا واضعين علية اشرطة ممنوع المرور
كان ذاك اليوم مو فاتحين هالركن
استمعنا وشفنا برنامج (( استغفر الله رب العالمين ))
اشلون تكونت الارض والشمس والكواكب والمجرة ،،
بيخفسونا هذولا استغفر الله
تابعناه وزوجي يضحك ويستغفر


المهم استمتعنا
وهذي بعض الصور لما طلعنا من المركز .

هذي قريبة من البحر ،،
لما خلصنا من المركز رجعنا ثانية لجنب البحر لانه قريب من محطة القطار اللي بترجعنا لمنطقتنا







كل الصور السياحية صورتها بجوال زوجي
لان ماكان مخططين ان نروح اماكن سياحية قبل مانجي استراليا لكذا ماجبنا معنا الكاميرا





يوم الاربعاء 11/6/ 2008م يوم الترجيع

جلسنا على الساعه 9 او 10
فطرنا
ولما جا وقت الصلاة صلينا على الساعه 12 وربع ،، وبعد الصلاة طلعنا على طول ،، لان موعدنا على 1 الظهر مثل ماقلت لكم
دعيت ربي انه يرحمني
وصلنا هناك وحده الا ربع او الا عشر
قالوا لنا استريحوا
كان هناك عائلتين عربيتين مع اطفالهم وازواجهم
وكل عائلة مشغولة بحاجه اللي تقرا من هالجرايد ـ واللي تسولف مع زوجها او تلاعب طفلها

زوجي كان يحاول مايخليني اعيش جو التوتر والقلق
كان يسولف معي ويسالني عن اخبار هالعالم ،، ارتفاع الاسعار ،، تدهور حالات الناس اللي كان راتبهم في رتبه جيد اصبح الان ضعيف يالله يكفيهم ،،واللي في راتبة ممتاز اصبح الان جيد ......
الى ان جات الساعه 1 بالضبط نادونا
دخلنا غرفة صغيرة مرة
فيها كرسي سرير (( كرسي يتحول الى سرير)) وعليه غطاء
وجنبة لمبة طبية
واذا انسدحتي على الكرسي في وجهك فوق شاشة
وفية كرسيين صغيرين
واحد من جهه اليمين والثاني اليسار
وفية باب ثاني غير الباب اللي دخلنا منه
باب متصل بالمختبر

قالت لي الممرضة : كم تاريخ ميلادك ؟
قلت لها : 26/ فبراير / 1977م
سالته زوجي برضو عن تاريخ ميلادة
قالت : للأسف بقى عندكم جنين وااحد فقط
أنا اسفة الجنين الثاني توقف نموه ،ن والان راح يجي الدكتور وراح يرجع لك الجنين في اقل من 5 دقايق .
ضاقت بي الدنيا ،، ودي اطلع من هالغرفة الصغيرة حاسة انها كتمة ،، كفاية انها ظلمة
قلت الحمد الله
قلت لها :ابغى اروح الحمام وانتوا بكرامة
قالت :ضروري
قلت :اية (( لاني بعد الترجيع ما ابغى اقوم واتحرك ))
قالت :اوكي
رحت ورجعت بسرعه وانا اقول رحمتك ياارب

قالت لي : شيلي الملابس التحتية فقط .وطلعت من الباب المتصل بالمختبر ،، وقفلته وراها
شلت الملابس التحتية وحطيت علي الغطاء ،، دقايق بسيطة الا دق الباب ودخل البروفسور
سالنا عن احوالنا وتأسف لنا عن اللي حصل وان راح يرجع بس جنين واااحد
اشتغلت الشاشه اللي قدامي
والممرضة اسمع صوتها بالمختبر تنادي :أم راحيل ؟
(( والدكتور بدى اجرءاته ،، دخل الالة الحديدية علشان يجهزني ،، وفرصة الممرضة تكلمني علشان ما أتألم ))
قلت نعم :
قالت : تشوفي الشاشه اللي قدامك
قلت : اية (( كان على الشاشة مثل الصحن الصغير وعلية تاريخ ميلادي ))
قالت لي : هذا تاريخ ميلادك
قلت لها : اية
فتحت الطبق الصغير
قالت: هذا جنينك ،،اليوم بدى مرحلة البلاستوسست
سبحان الله
اغرست ابرة دقيقة مرة في الوعاء وسحبت الجنين فية
وعلى طول جات عندنا
وعطت الابرة للبروفسور

ولما شعرب بالابرة داخل قلت بسم الله ياااارب
طبعا زوجي جنبي على احد الكرسيين

قال لنا البروفسور خلاص
رجعي الان الى البيت وخلال هاليوم فقط لاتبذلين مجهود ،،
والايام الباقية عادي مارسي حياتك عادية ،،واستمعي لصوت جسدك
قلت له اوكي
قالة زوجي : ماتحتاج تجلس هنا ترتاح لو ساعه او نص ساعه ؟
قال : لا ،، وموعد التحليل 23 /6/2008م
قالة زوجي : اوكي لكن متى نقدر نقابلك مرة ثانية قبل ما نسافر لان يوجد عندنا بعض الاسئلة (( من قبل زوجي قال لي انا راح استفسر من البروفسورعن بعض الاشياء اذا عندكم اسئلة لة كتبيها علشان ماتنسينها ونساله اياها ))
قال: يوم الجمعة الساعه 12 الظهر
قال زوجي : اوكي وشكرا


ظليت على كرسي السرير الى ان طلع البروفسور
لبسني زوجي ملابسي (( لاني ما ابغى احني ظهري او ابذل جهد في هالدقايق ))
وطلعنا حتى خمس دقايق استؤراحه ماخذت
طلعنا من الغرفة وانا حدي متضايقة وحزينه
طلبنا منهم يطلبون لنا تاكسي
قالي زوجي : ارتاحي جلسي هنا لحد مايجي التاكسي
قلت له : انا بطلع برة استنى التاكسي
(( كنت ابغى مكان مكشوف ،، اشوف السماء ،، ابغى اشكي لله انه يرحمني ويخفف عني ،، انه يحفظ جنيني ويرزقنا )) دموعي نزلت وكنت ما ابغى اصيح ،، مسحت دموعي
زوجي لحقني ،، تمنيت انه يجلس داخل علشان اخذ راحتي لكنه جاني ،، وقال احنا وشو اتفقنا علية ،، مو اتفقنا انه مافية زعل او تضايق اذا لاسامح الله فشلت العملية .
مارديت علية
وجلس ينكت وما ادري وش يقول
وانا فايخه ومتضايقة حدي ولا معطتية وجهه
قال لي علشان يطلعني اشوي من اللي انا فية وهو مبتسم وحاط يدينه على خصرة : انا تعبت من الوقفة ،، كلة منك مخلتينا واقفين هنا ،، مو راضية تجلسين .
قلت له وانا احاول امسك نفسي واعصابي لا انفجر مسكين مايستاهل : تبغى تروح تجلس روح انا ماقلت لك تعال معي .
وانا خلاص مو قادرة اتحمل
عرف وضعي
يعرف اني اذا كلمته بهاللهجه وبالحزن معناها اعاني
سكت وخلاني وبدى يطالع في الرايح والجاي وكل اشوي يلتفت لي
انا حطيت يدي على بطني ودعيت ربي انه يحفظ جنيني
يارب استودعك جنيني
ياربي الذي رفع السماء بدون عمد
احفظ جنيني من السقوط ياارب

بعد فترة جا التاكسي
وصلنا الفندق
بدلت ملابسي
وقلت لزوجي : اذا بتطلع تخلص اشغالك اللحين .
قال: الليلة احنا متفقين
قلت لة : اللحين
قال يبغى يتأكد : ليش ؟
قلت له: ابغى اكون لحالي اشوي .
قال : اوكى خذي راحتك
وطلع واعلية حبيبي مسكين

وانا اخذت راحتي في الصياح والدعاء والاستغفار وارتحت نوعا ما
طبعا اول ماجيت حطيت تحت حوضي مخدتين علشان ارفع حوضي ،، وقررت انام بعد ما ارتحت نوعا ما
ما جاني النوم
علشان ما ارجع لحالتي وافكر واضايق زوجي قلت اتابع التلفزيون يمكن انسى
جلست افرفر مافية حاجه عدلة
حطيت رسوم متحركة
((سبانش بوب ،، الاسفنجة الصفراء اللي تعيش في البحر مع زملائها اذا تعرفونها ))
المهم
الساعه 3 تقريبا جا زوجي
ورجع ينكت مرة ثانية
طلبت منه انه يسامحني على اللي سويت فية ..........


ومثل ماقلت لكم
خلال كل الايام اللي فاتت واللي جاية كنت ادعو ربي انه يثبت اجنتي ان كان فية خير لي
وان لم يكن لي خير انه يربط على صدري ويصبرني


ظليت يومين تقريبا ماطلعت من الفندق
بس اقوم للصلاة ، والحمام وانتوا بكرامة

في اليوم الثالث من الترجيع اللي هو يوم الجمعة طلعنا نتمشى قريب الفندق لاني طقيت
بس ماطولنا رجعنا
وعلى 12 الظهر رحنا العيادة علشان نقابل البروفسور
وجا نادانا من الاستراحه
واصطحبنا لغرفته
برجع اكمل

اصطحبنا لغرفته
فتح ملفي
وجلس يشرح لنا من اول ماسحبوا البويضات مرورا بتطورات الاجنه الى يوم الترجيع .
شرح لنا اسباب عدم اكتمال الاجنه وانه يوجد جينات هي المسؤولة عن موت الاجنه ،، ان الاجنه تحتاج الى جينات مهمة تكون فاقدتها،،، وهذا يحصل حتى في الحمل الطبيعي
ولا يقدرون حيالة يسوون شي
قالي : اتمنى يكون عندك بيبي
قلت لة : ان شاء الله (( مايفهم بس ماعندي رد احسن من كذا ))

من ضمن الاسئلة اللي قلت لزوجي يسالها
لويش عطوني تحاميل البروجسترون مو ابر هل فية فرق ، (( لاني اخاف احط التحاميل اقول يمكن تاثر على الجنين ))
، وهل استمر في شرب السؤائل لاني طفرت
(((وين رايحه رايحه الحمام ،،
من وين جاية جاية من الحمام :09:
وزوجي يستهبل علي : وين بتروحين
انا : الحمام
زوجي : شتسوين
انا : اكوي ملابس او اطبخ او ازور الجيران اقولة اي حاجه
زوجي : اجي اساعدك )))



قال مافية فرق بين التحاميل والابر
لكن هنا باستراليا مايوفرون الابر بكثرة
لكن التحاميل نقدر نوفرها

والسوائل تشرب العادي اللي تعودت كل يوم تشربة
بس احنا نوصي بشرب السوئل بعد عملية السحب علشان الحفاظ على الجسم
لانه مليان سوائل وادوية ويقدر يتخلص منها بشرب السوائل



وابتدى يسالة زوجي بالاسئلة الجدية
قال زوجي : ما ادري يمكن اكون على صح ويمكن اكون غلط
البروفسور : اكيد
زوجي : ماتشوف انك تسرعت في قرار موعد سحب البويضات ؟ مقاسهم كان 17 و18 ،،
بعد السحب طلع عندنا 8 بويضات
2 مو كاملين مو ناضجين
2 مافيهم غشاء
هذي 4 راحوا بسبب يمكن التسرع في السحب ،، وكان بالامكان ان نستفيد منهم ؟
البروفسور : انا معك في هذا ،، وهذي نقطة في صالحك
بس خمس الايام الاولى من تعاطي الابر هي اللاساس
الجرعه اليي قررناها لام راحيل ماكانت كافية ولا كان بأمكانا بعدين نسوي شي ،،
وان نخليها مده اطول ماراح ينفع
وبالنسبة لـ 8 بويضات فقط ،، احنا سحبنا اللي واضحين مرة،، كان فية بويضات لكن مو واضحين .وكنا نعتقد ان 8 كفاية .
زوجي : طيب بالمستقبل اذا بنسويها وشو الاجراءات المختلفة اللي تحسن من فرصة النجاح ونقدر نتفادى هالاشياء ؟
البروفسور : راح نزيد الجرعه في الايام الاولى من تعاطي الابر ،،، وراح نتبع طريقة الفلاشنق في سحب البويضات (( هذي الطريقة توريهم المبيض بوضوح وتوريهم عدد البويضات بالضبط كم ،، ووين مكانهم علشان يقدرون يسحبونهم كلهم ))
وعلشان يجبر خاطرنا قال :
الان راح نخلي الممرضة نادية تاخذ لك تحليل دم نشوف الهرمون اذا مرتفع او لا
اذا مرتفع اوكي اما اذا منخفض راح تضطرين تاخذين بدل التحملتين 3 تحاميل

ماكان فية داعي لنقاشة اكثر ،، لاتعصيب علية تقدر ترجع اللي راح ولا الاستستبلام يقدر يسوي لنا شي
الحمد الله


طلعنا عند الممرضة نادية واخذت التحليل
تمنت لنا حظ طيب
وقالت أي مساعدة لاتترددون بالاتصال
واذا في المستقبل بتسوونها هنا باستراليا او بمكان اقامتكم خبرونا علشان نقدر نساعدكم باللي نقدر علية .
نصحتنا كما الدكتور بمستشفى في مقر اقامتنا متطور وجيد باطفال الانابيب نقدر نروح لة علشان مانتكلف ماديا اكثر .
قالت : التحليل نتايجة بكرة راح تطلع وراح نتصل عليكم نخبرك بالنتيجة .

طلعنا
قال زوجي شفتي الحركة اللي سووها البروفسور .
قلت له أي حركة ؟
قال حركة التحليل ،، بس يلا احنا سوينا اللي علينا .
قلت له اية ،، بس يالله اللي الله كاتبة بيصير ،،
الحمد الله

وانا بالطريق قلت اذاربي كاتب لي مهما سوينا ومهما حصل راح احصل على طفل
واذا مو كاتب ماراح اشوفة
تذكرت كلام البنات هنا
وحده تقول : من سويت العملية وانا ما اقوم الا للحمام وللصلاة ومرتاحه على الاخر
العملية فشلت
تذكرت اللي يوم الترجيع بالليل لما رجعت بيتها جاها ضيوف ،، وكانت تروح وتجي وتعبت ،،ونزفت
لكن لما ربي كان كاتب لها ، حملت

الحمد الله


رجعنا البيت وصلينا وكلنا غدانا وطلعنا نتمشى وعلى اربع العصر رحنا للبقالة نشوف الانرنت
زوجي مارضى ياخذني معة بس انا اصريت ورضخ لي
خذ زوجي 40 دقيقة بس وهو يتابع اخبار العالم
لكن جاتني الالالام وانا جالسة قوية
مثل الالالام الدورة
قلت يمكن لاني ما جلست بوضعية مناسبة اومشيت فترة طويلة
رجعنا البيت وصلينا وانسدحت وزوجي قلق علي
راح جاب العشاء وتعشينا وانا الا الام تجي وتروح تجي وتروح
نمت وجلست على الساعه 1 الفجر وزوجي مانام
قال لي اشلونك اللحين قلت له مافيني شي

وبروضو ثاني يوم نفس الحالة الا الام
قلنا اكيد من الجلسة او اني مشيت كثير

اتصلت الممرضة وقالت : اسفين التحاليل تطلع بكرة
قال زوجي مو مشكلة .

اليوم اللي بعده
دق التلفون ،، الممرضة خبرتنا ان التحليل اوكي والهرمون مرتفع ولا احتاج تحاميل اضافية
سالها زوجي : ام راحيل هذي يومين تجيها الالام مثل الدورة وشو الاسباب ؟
قالت له : هذي الالام طبيعية بسبب هرمون البرجسترون


اليوم اللي بعده الاالام خفت جدا ، الى ان راح في الايام التالية .

ماصرت احس بشي
كنت ابغى لو عارض واااحد من عوارض الحمل يجيني
لكن ولا عارض جاني ،، كان كل اللي فيني الم في حلمات الصدر ،، وهذا من عمايل التاحاميل ،، يعني طبيعي
صرت يوم عن يوم ايقن ان العملية فشلت خلاص ربي مو كاتب لي الذرية الان
بس مازلت ادعو ربي انه يمن علي بالولد الصالح المعافي وان يربط على صدري ويصبرني

كررت على زوجي وعدنا لبعضنا بعض بان مانزعل او نتضايق ونحمد ربنا اذا فشلت العملية
رد علي ،،مين اللي بيزعل انتي او انا!!
ادري ان قلبة ينزف بس مايبن لي

فية شي نسيت ماخبرتكم به
قبل عملية السحب وقبل عملية الترجيع
قالوا لنا عادي تمارسوون العلاقة عادي
ماعدا قبل السحب بايام يراعي فيها الرقة
علشان المبايض تكون منتفخه وممكن تألم
والزوج لازم العيينه حقته ثلاث ايام او اربعه فقط ماتزيد يكون المخزون عنده


اخر الايام كانت مملة
حاولت اني ما اهتم بالموضوع علشان زوجي وعلشان مانعيش جو القلق والتوتر والحزن
قررنا نطلع
طلعنا بالقطار لأحياء قريبة منا
نتمشى
تمشينا في المراكز التجارية والاحياء
وسعنا صدورنا ،، رحنا لمنطقة اغلبية اللي فيها مسلمين
شعرنا فيها ان فعلا في هالمنطقة تحسين انك عايشه
بعض الاماكن مكتوب عليها باللغه العربية
المحجبات كثرينيييييييييييييييييين هناك
تحسين انك عايشة
مرينا على محل ذهب
قال زوجي نفسي اشتري لك قطعة ذهب
قلت له خلها لبعدين ،، لما تنجح العملية ان شاء الله ،، علشان تكون كبيرة
قال: انا بشتريها بشتريها عاد نجحت ولا لا لاسامح الله ،، بس ارتب اموري
قلت له : انت اول ماتحب الذهب ،، وحاط حيلك في هالملابس وش خلاك اللحين تغير
قال : لانك انتي تفضلين الذهب على الملابس
قلت له : لاتصير مثالي بس ،، هالايام الذهب ماحد يشتري ،،
قال : مالك دخل فيني ،، انا اللي بشترية ولا انتي





رجعنا
لما وصلنا للفندق رحنا دفعنا باقي مستحقاتهم
لان اول ماوصلنا دفعنا دفعه اولى
قلنا يمكن نغير الفندق نلقى ارخص بس ماربي كتب

قبل يوم الرحلة للعودة
قررنا نروح لحديقة الحيوان
لان زوجي كان مصمم يروحها بس بشرط ما اكون تعابنه
وانا لاتعبانه ولا شي مافيني الا العافية
لاني حاولت انسى مع اني عشت الحلم وتخيلت كل شي واني حامل واني والد واني واني واني ،، قلت الحمد الله على الاقل ربي اكرمني بشي وهو شعور اني ام واني عشت الدور
الحمد الله

قرننا نروح لجزيرة الحيوان
هالمرة جلس زوجي من بدري
جا وقت الصلاة
صلينا وطلعنا على طول
وصلنا في وقت مناسب
رحنا خذنا التذاكر وركبنا السفينه اللي بتنقلنا للجزيرة
وماكان فيها كثير
قلت زوجي خلنا نصعد على سطح السفينه
ووافقني واعلية مع انه يخاف من الاماكن المرتفعه ويختل عنده التوازن في البحر وعند الاماكن المرتفعه

بس قال يلا اذا ماعاودت اللحين متى اعاود لمتى اظل كذا خخخخخخخ

المهم وصلنا للجزيرة وكان فية باص ينقلنا للمكان المقصود واللي يبغى يمشى يروح يمشي لان المكان مو بعيد
بس زوجي قال اللحين احنا ورانا مشي 3 ساعات في هالجزيرة خلينا ناخذ باص افضل علشان ماتتعبين

ركبنا الباص خمس دقايق ووصلنا
استعمتعنا بالجزيرة كانت جدا جدا واسعه
ولا درناها كلها
زوجي كان يحاتي بي وماخذ علي وعد اني اقولة نجلس نستريح اذا حسيت بتعب

نمشي واذا تعبت اقولة ونجلس
المهم استمتعنا ولله الحمد

طلعنا من الجزيرة على الساعه 4ونص تقريبا
هم يقفلون على 5
احنا قلنا علشان نلحق الباص والسفينه ومانرجع متاخرين

رجعنا الفندق على 6 او ست ونص
القطارات كانت زحمة مرة
شفنا ورقة تحت الباب مكتوب فيه ان موعدنا للرحلة بكرة و ان التاكسي بيجي الساعه 6 ونص الصباح (( رحلتنا كانت 9 بس لان احنا بعيدين كثيير عن المطار ))

صلينا وجاب زوجي العشاء وتعشينا ورتبنا الاغراض استعداد للمغادرة بكرة




يوم الاربعاء 18/6/2008م يوم عودتنا من استراليا
جلست انا الساعه 4 الفجر
دخلت كل شي بالشنطة ولا بقى على زوجي الا يشيلهم ولبست ملابسي
وعلى 6 الا ربع صليت وحطيت التحميلة علشان تاخذ على الاقل نص ساعه
على الساعه 6 وثلث جا التاكسي ،، رحنا سلمنا بطاقة الغرفة للرسبشن
وتوكلنا على الله


وصلنا المطار على 8 ونص
بعد تعبئة الاوراق وبعض الاجراءات
والحمد الله
قالت لي راح احطك جنب النافذة واخلي فية كرسي فاضي جنبك علشان تاخذين راحتك ،، لان مافية مسافرين كثر
قلت الحمد الله هذي نعمة من ربي ،، سخر لنا وحده ماتدري عنا اي شي وبتريحنا بالطيارة

دخلنا الطيارة
زوجي كرسية سي وانا اى وكرسي بي فاضي
خلاني زوجي في كرسية لان وراة مافية احد وممكن ارجع الكرسي لوراء علشان اخذ راحتي
وهو اخذ الكرسي اللي جنبي

الطيارة ما اقلعت الا متأخرة بسبب الاجواء


نسيت ماخبرتكم
اني من اول يوم من ترجيع جنيني كنت اشغل سورة البقرة واية الكرسي وسورة ياسين والفاتحه في الجوال واحط السماعات على بطني
واذ طفي يتكرر لحالة
وكنت كل يوم على هالحاله
واذا جيت انام بعد

يوم الرحلة ماقدرت اسوي هالشي
لان رحلتنا كانت مبكرة اكتفيت في الطيارة بقراة سورة البقرة ويس ومريم وبين التسبيح والاستغفار

رحلتنا كانت 3 ساعات
زوجي كل فترة يسالني فية الاالام ؟
مرتاحه ؟


وصلنا على الساعه 2ونص
اخذنا تاكسي (( شتيل )) = كبير ويوصل اكثر من شخص
والتكلفة تتوزع على الاشخاص

وصلنا البيت على الساعه 4 بسبب انه التاكسي يمر على البيوت يوصل اللي معنا

صلينا وبما اني اوكى وتعبنا من جلسة الطيارة
قررنا نروح نشتري بعض اغراض البيت
طبعا بالسيارة مع ان المركز قريب بس لان احنا بيتنا فوق هضبة وتعب علي الصعود ،، وبسبب ان بيكون عندنا اغراض كثيرة
وعلشان برضو نمشي السيارة اشوي لها 3 اسابيع مامشت ماتحركت

رجعنا المغرب
صلينا ورتنبا الاغراض ونمنا
بقى على موعد التحليل 4 أيام

يوم ثاني من وصولنا طلعنا نتمشي اشوية بالسيارة ونرجع مافية شي نسوية
وزوجي مو متحمس للدراسة قال على يوم الاثنين ان شاء الله اتحمس

المهم
في اليوم العاشر من الترجيع (( موعد التحليل لاتنسون يوم الاثنين 23/6/ بقى علية 3 أيام ))
نزل منى دم قليل
في بداية الام فرحت اشوي
تذكرت اني قريت اكثر من مرة انه ممكن يكون من علامات الحمل
بس نزول الدم في الايام الاولى من الترجيع هو اللي ممكن يكون من علامات انغراس الجنين مو في اليوم العاشر
وجلست اهوجس
وكنت خايفة وكل اشوي اروح الحمام وانتوا بكرامة،، ولا علمت زوجي

يوم السبت (( اليوم الـ 11 من الترجيع )) زاد الدم
والاالام برضو زادت
ولا فية الى الان علامة من علامات الحمل
ما احس بشي
وقلت خلاص هذي دورة

بلغت زوجي ان الدورة جات
قال وان يكن ،، البروفسور قال حتى لو جات لازم ناخذ التحليل نتأكد ،،
لان فية نبسة من الحريم تجيهم الدورة مع وجود الحمل، اختي ام فلان جاتها الدورة وهي حامل
قلت له : لويش نتعب نفسنا
قال احنا وشو اتفقنا علية ،، مالازم نخلي هالشي يأثر علينا سمعتي ،،
بعدين الله مو كاتب لنا الا بالغصب تبغين ،، كل شي تبغينه كل شي تبغينه ،، بلا طمع عاد
(( مو وقت التنكت اللحين ))
قلت خلاص انا ما ابغى الا انت ويارب اقدر انسى ،،و على كيفك اللي تبغية سوية

بديت ما اهتم بنفسي ،، اول كنت امشي بشويش واريح نفسي
الاالام زادت فضيعة
وبدى ينزل قطع دم
قلت مستحيل يكون فية حمل
لو كان فية حمل ماينزل قطع دم على الاقل ينزل سائل

ايقنت ان العملية فشلت للمرة السادسة
وقعدت احاول اصبر نفسي
قلت الحمد الله
يمكن مو هذا وقت رزقي

يوم الاحد
(( قبل موعد التحليل بيوم ))

زادت الا الام والدم ينزل اكثر واكثر
وظهري احسة بيتقطع علي
وانا ابلع في هالبنادول ولا ينفع

على المغرب رحت الحمام
ونزلت منى قطعة صغيرة مثل اللحم مخلوطة بدم
قلت يمكن كان حمل يمكن ،، مو بعيدة عن الله
جلست اللحين اوسوس
لا ليش لا يمكن كان فية حمل
وحتى لو كان فية حمل خلاص راح
الحمد الله رب العالمين
ماخبرت زوجي

قلت لزوجي
الى الان مصر ان ناخذ تحليل بكرة (( يوم 23/6 ))
قال
نتصل عليهم بكرة ونبلغهم انك متاكدة ان هذي دورة ونشوف وشو ينصحونا به ،، هل نسوي التحليل او لا .

جلسنا نتصفح الانترنت
ومن الطفر فتحنا القوقل وجلسنا نسوي بحث عن اسماءنا واسماء اللي نعرفهم




الى ان جات الساعه 11 قمنا ننام


يوم الاثنين اللي هو اليوم جلسنا على 8 الصباح ((انتوا كان عندكم 11 الليل ))
فطر زوجي وراح للجامعه
انا جاتني الاالام وامتدت لرجلي اليسار


جلست اكتب باقي حكايتي علشان ارتبها
وصار اللي صار

وقلت الحمد الله ان زوجي ما اصر انه ناخذ تحليل
يمكن تكون رحمة من ربي

هذي حكايتي
اسال الله الرحمن الرحيم ان يكتب لنا الاجر في هالتعب ويتقبل منا ويرحمنا يارب العالمين
اللهم امين

سبحانه ربي
الحمد الله رب العالمين
ولعل الذي ابطأ عني هو خير لي ، لعلمك بعاقبة الامور

ماندري وين الخير فية

((وعسى ان تكرهوا شيئا وهو خيرا لكم وعسى ان تحبوا شيئا وهو شرا لكم ))

السموحه مرة ثانية على التاخير
واي سؤال ان شاء الله اقدر افديكم ياارب

وانا كنت مثلكم اتمنى من ربي انه يرزقني وان هالمرة تنجح
لكن قدر الله وماشاء فعل
الحمد الله

الله يفرح قلبك و قلب زوجك يا رب