تجربتي مع الليزر لإزالة الشعر الزائد بالوجه

قبل شهرين تقريبا قررت اعمل ليزر للوجه لإزالة الشعر الزائد .. لأني اعاني من لما كنت صغيرة منه و كان يسبب لي احراج كبير .. طبعا قبلها كنت اشيله بالخيط بس كان كل مرة يصير اسمك و يظهر بسرعه تقريبا كل اسبوعين و تحت الجلد حتى أن بشرتي صارت غامقة ومن كثر الشد بالخيط ظهرت مسامات ف ويهي .. عملت قبلها تحاليل للهرمونات وطلع كل شي طبيعي وعرفت بعدها أن السبب وراثي .. المهم نرجع للسالفه رحت المركز و دشيت للدكتورة بيوم اول جلسة والممرضة شالت لي الشعر الزايد بالشفرة و حددت لي الأماكن اللي بتشيل منها .. طبعا كنت خايفه لاني كنت بروحي 😣 .. المهم بدينا كان مؤلم كنها ابر تنغز الجلد وحار بس التبريد المصاحب كان يخفف الحرارة .. خلصت الجلسة وحطت لي كريم ميبو واعطتني ثلج وبعد اعطوني كريم مرطب احطه دوم .. انا بشرتي وايد حساسة فصارت شوي حمرا بس اليوم الثاني اختفى .. المهم بعض الشعر راح وبعضه بقى .. قالت لي الدكتورة لو ظهر الشعر قبل 15 يوم تعالي نعمل رتوش .. بالفعل ظهر و رحت لها بعد اسبوع تقريبا و عملت جلسة الرتوش .. حاليا انتظر الجلسة الياية ع نهاية الشهر .. الشعر وايد أقل وظهر ف مناطق بس خفيف وحتى وجهي صار افتح وارتحت من هم الخيط اللي صاحبني طول الفترة الماضية .. حبيت اشارككم تجربتي لأن ادري وايد بنات يعانون من الشعر مثلي قبل ف نصيحة مني اعملوا ليزر لو معكم شعر كثيف و سميك بترتاحون منه .. طبعا عدد الجلسات تختلف من شخص للثاني وكل ما كان الشعر اسمك كانت النتيجة أفضل وأسرع.. دمتم بود