تجمع اللي حملو بعد تأخر ...اطرحو تجاربكم لعلها تفتح باب أمل لأخواتنا المتأخرات

السلام عليكم ورحمه الله وبركاته
مثل ماهو واضح بالعنوان هي دعوة لطرح تجربتنا بالحمل بعد تأخر ايش هي الاسباب اللي عملناها بعد التوكل على الله
ايش العلاجات المستخدمه والمركز الصحي اللي تعالجنا فيه
المشكله بالضبط عند مين كانت انتي او زوجك
وايش الشغلات الطبيعيه اللي استخدمت وفادت معك ....مع الايمان التام ان كل هالامور اسباب ورب العالمين ان اراد شي قال كن فيكون
بس رب العالمين دعانا للسعي مع الاتكال والحمدلله الان الطب تطور
راح أبدأ بنفسي وبأختصر وضعي في نقاط حتى ماتضيع الفائده وسط سرد ماله أي فائده
مدة التأخر بالحمل/
4 سنوات ونصف
السبب/
زوجي كان عند دوالي سببت له ضعف بالحركه كانت الحركه عنده ماتتعدى 20% والعدد كان كويس بس كان يتناقص احيانا بسبب الدوالي
رحله العلاج/
طبعا كعاده اغلب الدكاتره باغلب المراكز المرأه هي المستهدفه بالعلاج حتى لو ماكانت المشكله فيها وانا ابصم بالعشره انو عشان الربح فقط
عملولي تنشيط كلوميد وابر وكل شي وتبهذلت شهور بدون اي نتيجه عمليتين تلقيح صناعي كلها فاشله والحمدلله
عملت اشعه صبغه
وكلما فشل شي وواجهتهم قالو نبدا العلاج خطوة بخطوة ونجرب كل الوسائل و4 سنين وانا ع هالحاله وزوجي ماياخذ الا فقط علاج للدوالي
اقول لهم المشكله مو عندي يقولو عادي في ناس تحمل بهالاساليب حتى لو المشكله بزوجها واحنا بالتلقيح الصناعي نضيف ع عينه الرجل شي يزيد سرعه الحركه
والله يابنات ندمت ندم شديد اني مشيت معهم بشي مو مقتنعه فيه وحتى زوجي ماكان راضي يقول تبهذلتي ع الفاضي
واخر شي حصل معي بسبب التنشيط حمل لاجنيني كان حمل بكيس فارغ والحمدلله ع كل حال
فاتفقت انا وزوجي انو انا خلاص اوقف علاج عشان مااتسبب لنفسي بمشكله من ورا هالتنشيط فبدل مانعالج مشكله بشخص نصير اثنين
هذا غير الاستنزاف المادي ويعلم الله قد ايش كانت ظروفنا الماديه صعبه بس عشان الضنى كل شي يهون
غيرنا المركز اللي كنا نتعالج فيها واللي صرت عندهم حقل تجارب
وتوجهنا لمركز مستشارك الطبي في خميس مشيط
قابلت الكتوره احلام الله يوفقها ويسعدها دنيا واخره
ونصحت زوجي يروح لدكتور عندهم حق مسالك بوليه قالت ابدأ انت العلاج هالمره والدكتور هذا ممتاز وللاسف انو الدكتور هذا حاليا غير موجود سافر الرياض
عمل زوجي تحليل وكشف عليه عشان الدوالي وع طول قال له كم لك كتزوج قال له زوجي 4 سنوات و3 شهور وشرح له زوجي كل اساليب العلاج اللي انعملت معنا
قال كل اللي سويتوه كلام فاضي وحرام اللي سووه بزوجتك والمشكله مو عندها ليش ماركزت ع المشكله اللي عندك وحليتها كنت اختصرت سنين علاج ع الفاضي وصرف لزوجي ابر تنشيط هي نفس اتذكر انها نفس الابره التفجيريه اللي نستخدمه حتى انا استغربت
قال له عندك 4 ابر كل اسبوع تاخذ ابره بالعضل لمده شهر وباذن الواحد الاحد تجيني بعد 3 شهور تبشرني بحمل زوجتك الله يوفقه دنيا واخره
وفعلا اخذ زوجي الابر .....وبعد ماانتهى من الكورس بديت مع زوجي بعلاجات طبيعيه العسل والزنجبيل والقرفه كلها شغلات منشطه وممتازه للحيامين عند الرجال كنت اعملها كمشروب واشرب معه ماأسويها واقول له اشرب عشان الحمل هذا غلط ....لاتحسسي زوجك ان عنده مشكله ابدا
واحاول قدر الامكان انسى موضوع الحمل خصوصي بوقت التبويض كنت اعاشر زوجي للمتعه فقط لاغير مافي شي افكر فيه ومهم جدا وعذرا ع الكلام بس عشان الفائده حاولي توصلي زوجك بالجماع لآخر متعه وانتي كمان سبحان الله حتى كميه القذف وسرعه الحيامين تتاثر بمدى تحقق المتعه الكامله هذا كلام الدكتور....وكمان نطلع نتمشى نروح اي مكان عشان مانفكر بالموضوع ماكنت اجلس بالبيت اطلع لصحباتي مع الجيران سوالف وضحك وصادفت فتره علاج زوجي مع دخول الصيفيه وانتو تعرفو اجواء الصيفيه والاجازات مافي وقت اصلا تفكري بالوضوع والعامل النفسي جدا مهم لحصول الحمل هذي مثبته ومعروفه
بدأ زوجي كورس علاجه بشهر 7 هجري بعام 33هـ ودخل رمضان وبمنتصف الشهر طلبت من زوجي ياخذنا عمره ورحنا واخذ امه وابوه واخته الارمله دعيت عند الكعبه وحسيت والله ان ربي راح يكرمني قريب
وجتني الدوره بشهر رمضان بيوم 26 وبالفعلا كانت اخر دوره شفتها ولله الحمد وبالضبط بعد 3 شهور من علاج زوجي بالابر واللهم لك الحمد اكيد الفضل اولا واخيرا لرب العالمين
وجبت احلى بسولي بالكون ومايحتاج اشرح لكم مشاعرنا بلحظه الحمل والولاده مشاعر يارب يارب اكتبها لكل متاخره يارب
وسبحان الله بولاده ابني زوجي مرض مرض جلدي والحمدلله يارب ع قضائك وقدرك وبسبب هالمرض ولانه شديد تعالج علاج بيولوجي لمده سنه كامله عن طريق المغذيات وانا طبعا ماكنت استخدم موانع لانو الحمل الاول جا بعد 5 سنوات وبعلاج طبيعي جدا مااستخدم موانع
وبسبب العلاج البيولوجي ومع اسباب زوجي الثانيه ماحصل حمل بس اكيد هالمره مافي ضغط نفسي والحمدلله بس كنا نبي اطفال خصوصي انو انا وزوجي نموت عليهم
طبعا بعد ماخلص زوجي علاجه البيولوجي بعده بكم شهر راح سوا تحليل السائل المنوي عشان يشوف وضعه طبعا و بنفس المستشفى اللي تعالج فيه اول مره لانو احنا بسبب ظروف مرض زوجي وتوقفه عن العمل بسبب الاجازات انتقلنا لديره اهل زوجي
راح لركز صحي عندنا وعمل التحيل وقالو له مافي حيوانات منويه .....وبوجهو قال مستحيل يصير حمل..حسبي الله عليهم من دكاتره زووجي من جد تحطم وقتها وانا خفت عليه ينتكس بسبب نفسيته ويزيد عليه المرض الجلدي هديته وطمنته وقلت له عندنا بسولي بالدنيا كلها بس اذا انت حا تطمن خلنا نروح لدكتور الجلديه بالمستشفى العسكري اسأله هل العلاج البيولوجي يأثر ع الحيوانات المنويه لاني كنت حاسه انو العلاج هو السبب
وبالفعل راح وقال له الدكتور نفس كلامي قال انعدام الحيوانات المنويه بسبب العلاج البيولوجي انتظر كم شهر وبترجع حالتك مثل قبل واذا حاب تتعالج وقتها ان شاء الله مافي شي راح يأثر مررره ارتحنا وانبسطنا بعد ماطمنا الدكتور
وبعد ماكمل ولدي سنه ونص حنيت اجيب له اخ او اخت يستانس معه وكلمت زوجي عشان اذا حب يتعالج ...وبالفعل بدا زوجي بالعلاج راح لنفس المركز الاول مستشارك الطبي بس للاسف طلع الدكتور مسافر وتغير المركز علينا حتى بالاسعار صار في زياده رهيبه وعشان ظروفنا الماديه قت لزوجي خلاص اذا ماتبي خلنا ندور مستشفى ارخص
ورحنا لمركز كالسيوم بخميس مشيط عمل تحليل وفعلا طلع عنده نقص بالعدد والحركه بسبب الدوالي بس الحمدلله في حيوانات منويه ولانه مو مركز متخصص بهالامور عطوه علاج للدوالي و فيتامينات فقط وهي
daflon 500mg مرتين باليوم صبح ومسا
Ponstan Forte بونستان فورت حمض الميفيناميك 500 مجم حبه باليوم عند اللزوم
وفيتامين dynamisan ديناميزان مقوي عام وهو مكمل غذائي مره باليوم وهذا المقوي جدا رائع ومفيد
طبعا مايحتاج اقول لكم ع مشكله الرجال مع الادويه يعني اذا مااخذها بانتظام مالها اي فائده ركزو على هالنقطه... والرجال الله يهديهم زي الاطفال لازم بيدك تعطيه ولازم انتي تذكريه فحرصت جدا انو ياخذها بانتظام لمده شهرين كنت انا اعطيه لاني لو اتكلت عليه اكيد ماراح ياخذ وبينسى ....ونفس المره الاولى قبل الحمل
العسل والزنجبيل والقرفه وقشر القهوة كل هالمشروبات حرصت عليها انو يتناولها وكمان اليانسون والحلبه كلها مفيده
واللهم لك الحمد والشكر بعد شهر من توقفه للحبوب حملت في بنتي ......يالله كم انت رحيم يارب ....والحمدلله دائما وابدا
الزبده/
الادويه تأخذ بانتظام ....الراحه النفسيه....الجماع خلوه طبيعي ولا تحطي براسك عشان الحمل انسيه تماما ولاتغتسلي ع طول بعد الجماع اقل شي ساعتين وكل نصف ساعه نامي على جنب....احسني الظن بالله وخليك متفائله ....الدعاء.....ابدأو العلاج الصح ع حسب الحاله وركزو ع المشكله واذا في ادويه او ابر او عمليه تختصر سنين محاولات لاتترددو فيها ابدا خصوصا اذا الماده متوفره....ولاتظنو انو كانت مسأله اقناع زوجي بالعلاج كانت سهله انا ماشرحت كل شي عشان احاول اجيب الزبده فعلا الرجال متعبين في موضوع العلاج حتى لو يبي الحمل والضنى بس مالهم خلق المراجعات ولافيهم صبر ع الادويه هنا استخدمي ذكائك كأنثى وألعبي عليه واعرفي متى تفتحي معه موضوع العلاج واذا بدأ العلاج لاتذكريهبمشكلته ولاتجيبي طاري الحمل عيشي طبيعي واي شي تبيه يشربه اعمليه لكم انتو الاثنين واشربي معه ....
واللي زوجها عنده ضعف بالحركه او العدد وهي مشكله شائعه يجرب الابر المنشطه ماشاء الله جدا نفعت زووجي والفيتامينات المقويه وحاليا سمعت بفيتامين عليه مدح كثير بس للامانه ماجربناه اسمه ويلمان اقراو عنه ....واخر حل للموضوع اذا مانفع الحقن المجهري والاهم من ذا كله وقت علاجكم لاتقولون ل احد لا اهل ولاصحبات اقضو حوائجكم بالسر والكتمان عشان ترتاحون نفسيا وترتاحون من الاسئله والسين والجيم
اعراض الحمل /
بالحملين سبحان الله كانت الاعراض وحده وكنت احس بالحمل قبل الدوره تتأخر
1_الم بالخاصرتين خصوصا اليمين ....بدون سبب واضح بعد التبويض
2_استمرار الم المبايض حتى بعد انتهاء فتره التبويض كنت احس بشد فيها
3_نغزات اسفل السره سبحان الله تحسي بشي غير طبيعي
4_ألم براس المعده شبيه بالقولون ومعدتي ماتتقبل الاكل ع طول تعورني وكنت احس بغثيان بسببها
5ـبوقت الجماع تحسي بألم بالمبايض هذا في حاله كنت طبيعيه وماعندك تكيس
6_دم التعشيش انا جاني قبل الدوره بعشر أيام نقطه دم ورديه نقطه فقط وتكون بعد التبويض باسبوع يعني لاتلخبطو في ناس تنزل معها بفتره التبويض نقط دم او افراز بني هذا يكون بسبب التبويض دم التعشيش مايجي لونه بني ولايكون بفتره التبويض يجي بعد التبويض ويكون لونه وردي ونقطه فقط مايستمر
وبس
اتمنى موضوعي يكون ذا فائده لكم ....ويجعله ربي سبب لحمل متأخره...واتمنى من كل وحده حملت بعد تأخر تفيد أخواتها لعل هالتجمع يكون باب أمل وفتحناه لأخواتنا المتأخرات
وثقو تماما انها ماتضيق الا وتفرج وكل شي خيره من رب العالمين
وباذنو كلكم تصيرو امهات بحول الله بالوقت اللي ربي شايف فيه خير لكم بس أنتو تفائلو واحسنو الظن بالله وابدأو بالعلاج بروح ايجابيه ....واحتسبو اجر التعب عند ربكم مايضيع شي
دعواتكم وقلبي معكم