صباح الخير يا بنات

بصوا انا باكتب و انا مش شايفة قدامي و مش مركزة ......بصوا مش عايزاكم تقولوا عليا كئيبة و نكد ...بس و الله حسيت انكم لازم تشاركوني ...

انا حالا جايه من معهد الاورام كل مرة ببقى عايزة اطلع مبلغ اروح احطه بالطريقة العادية بتاعة الوصل و خلاص او في جمعية النهارده اول مرة واحده زميلتي في الشغل دايما بتروح و عارفه موظف هناك قالت لي هو يعرف الناس اللي محتاجين و نديهولهم بنفسنا ده ثواب اكبر و لو فيه حاجة ممكن نشتريها ..... المهم رحت معاها ....صدقوني الموضوع غير .....

يا جماعه دول اكتر ناس محتاجين فعلا لانهم مرضى و الموضوع مكلف ربنا يعفو عنا يا رب و عنهم يا رب

بليز يا جماعه روحوا بنفسكم بيفرق في الاحساس و في الثواب ... يعني انا كنت مخصصه مبلغ معين رحت لقيتهم محتاجين بامبرز للكبار علشان الناس في العناية كملت عليه ....... انا باحكي لكم علشان تعرفوا ان الانسان روح بنفسه افضل كتير لانك ممكن تلاقي حد قدامك و تعملي خير ما كنتيش ح تعمليه لو مارحتيش بنفسك ........

بصوا احنا بنصرف فروس كتير جدا على الخروجات و الفسح و اللبس و الاكله دي عاجباني و حاجات هبله كتير و المحل ده عايزين نجربه و نسافر البلد دي علشان نتفسح و الفندق ده احسن و لا ده و حاجات هبل كتير ليه ما ناخدش جزء من المخصصات دي و نديها لناس همما في اشد الحاجة ليها ؟؟؟؟؟؟؟؟؟؟؟؟

ده اللي ح يفضل في الاخر

معلش كئيبة شوية بس انتوا اخواتي و حبيت اقوللكم احساسي
و ان شاء الله شوية كده و افك

والله فعلا عندك حق ربنا يعافيهم ويعافينا

والله انتى عسولة يا شيماء وعمرك ما هاتبقى كئيبة وفعلا كل شخص اما بيشوف حالات صعبة بيقعد يفكر فيها شويية ويقرب لربنا اكتر وربنا يقدرنا كلنا يارب علشان نسعد بعضنا
وفعلا اللى يقدر على حاجة يعملها حتى لو كانت صغيرة بالنسبة لنا ممكن تكون كبيرة عند غيرنا
وربنا يشفى كل مريض يارب ويعطى كل محتاج

انا ساكنة قريب من مستشفى السرطان في الاردن ( الله يعافينا ) وبتمنى اروح ازورهم واعطيهم بس كيف ؟؟؟؟
انا عندي اطفال و زوجي مااظن بيرضى يروح معي او حتى يخليني اروح لانو كسول وبيطنش

ياريت بس كيف؟؟؟؟