هلا والله ام عمر - ولدي الحمد لله بخير بس تعرفين بعد العملية يبيله حرص واهتمام والله يعيني واخوانه فيهم عنقز(الجدري المائي) وخايفة يجيه حاولت ابعدهم الله يهديهم ماكو فايدة اطفال ومايسمعون الحجي - والله اخاف يحوشه وانا على ولادة - يارب يسهلها ويهونها على يارب الله يستر انا المفروض باي وقت اولد الله يعيني باجر موعدي عند دكتورى بشوف شيقول والله يستر ويارب تسهل ولادتى
انتى حبيبتى طمنينا عليج شفيج ؟ والله شغلتى بالى حنا خوات هنى وكل وحدة تعين الثانية وتعاون وتخفف عنها انا والله ربي يعلم بحالى قبل لا اشوف هالتجمع كنت بحال وجزاكم الله خير خففتوا عنى حيل - يارب يكون بالموعد اخبار طيبة ان شاءالله وخلى ثقتج بالله كبيرة

فديت شوشو بنتئ عمرها ست شهور. كيف ولدك الحين طمنينا عنه. بنتئ بالعنايه بتدخل اليوم الثالث وما شالوا عنها جهاز التنفس وماصحت مخدرينها على طول وماطلبوا مني حليب ولاشيء أنا خائفه كثير عليها ونفسيا تعبانه قررت ماادخل العنايه لحد ماتصحى. حتى وجدوا عندها ضيق بالصمام ووسعوه. الله يسهل طيب فدين شوشو كيف أتعامل معها إدا طلعت من العنايه هل راح يالمها الجرح هل أروشها. مدري كيف أتعامل معها نوريني الله يعافيك

الله يقومها بالسلامه يارب لاتخافين بس من رايي لاتدشين عليها بالعناية ادرى قلب الام مايتحمل ارتاحي هاليومين عشان تقدرين تعتنين فيها اذا طلعت ان شاءالله للجناح اقري عليها الرقيه الشرعيه واستودغيها ربج وان شاءالله تقوم سالمه ومتعافيه .
شوفى عقب العملية اكيد يعورها بس طبعن راح يعطونها مسكن للالم يعنى اذا بكت يعطونها مسكن فان شاءالله ماراح تحاتين انه يعورها
بس الشغلات اللى ممكن تشوفينها وانا شفتها بولدي : اولا راح يكون فى بلغم بصدرها بعد البنج تلاقين حتى صوتها يبين انه بلغم فعادي يسوولها علاج طبيعي بالمستشفى ويطلع كل البلغم لاتحاتين وكانوا يقولون لى خليه يبجي البجي زين يفتح الرئة ويطلع البلغم ويحرك الهواء بالرئة
اول الايام ماراح تتحرك راح تظل على ظهرها لانها تحس بالعوار فتصير بس تبي على ظهرها وماتبي تتحرك والحمد لله بنتج صغيرة يعنى ماراح تاذيج انها تبي تمشي او تحبي بس وفريلها العاب تتعلق عالسرير لانه يملون بسرعه انا ولدى اسم الله عليه كبير فكان ماذينى فحطيتله اى باد وحطيتله طيور الجنه وافلام كرتون والعاب عشان يلتهى فيهم ومايتحرك
راح يقولون لج لاتشيلينها من ايدها شيليها مثل البيبي من تحت ظهرها ومقعدتها بشكل مستقيم وهالطريقة تستمرين عليها حتى اذا طلعتى من المستشفى لمدة ثلاث شهور عشان يلتئم الضلوع بشكل صحيح واول الايام اذا تخافين السسترات يساعدونج وشوفى شلون يتعاملون وياها انا ماكنت اشيله اخاف فكنت اناديهم وهم يشيلونه واراقبهم
- السبوح انا اول يومين ماسبحوه بس كانوا يبدلون ملابسه ويعقمون الجرح بيتادين ويغطونه
بس ثالث يوم سبحوه مايفركون الجسم بس صابون يخلطونه بماى ويرشون فى الجسم بدون فرك وعقب يسبحونهم بماى ويعقمون الجرح ويغطونه
طبعن انا كانوا حاطين انبوب فى بطنه واسلاك كانت تطلع الوصخ من الجرح وخلوها ليما بغينا نطلع وشالوها وهذي انا ماشفتها كانوا مغطينها بشاش وخفت اشوفها بس لما شالوها ورديت البيت قالولى لازم كل يوم انظف جرح هالانبوب لانه كان فيه دم مثل الجرح واعقمه بالبيتادين ليما ينشف ويطيح من نفسه
بس ان شاءالله اذا طلعتى من المستشفى انتى تسبحينها كل يوم عشان الجرح يطيب
- اخذي مرة وحطيها ببطل ماي صحه صغير واذا طلعت بنتج للجناح غسلي وجهها وخليها تشمها زينة للشمم الله يهديهم السسترات عطورات تصك الراس
خليج طبيعية وياها اول الايام وضع جديد بتخافين بس عقب خلاص بتتعودين ويصير سهالات ان شاءالله ولاتنسين كل يوم مع صلاه الفجر اقري الرقيه وقبل المغرب
بعد اسبوع ان شاءالله من العملية تقدرين تقعدينها بحضنج عادي بس انتبهى من سالفه الايد لاتشدين ايدها ولاتشيلينها من منطقه الاباط تحت الايد هذي ممنوعه
ترا عادي تقعد بالعناية الا اربع ايام مو مشكله انا اللى وياي بالمستشفى اغلبهم اربع وخمس ايام فعادي بس اهم شي استفسري من الجراح عن حالتها واسئليه كل اللى بخاطرج
وربي يقومها بالسلامه ان شاءالله وطمنينا عليها عفية واى سؤال انا حاضرة لايردج شي

السلام عليكم يارب ياكريم اشفي مرضانا ومرضى المسلمين

بسالكم اذا احد عنده خلفيه عن مستشفى التخصصي بالرياض !! بنتي المفروض تعمل عمليتها هناك

هي برمضان تتم سنتين ان شالله وعندها ضيق بالصمام الميترالي ضيق شديد جدا وطبعا عمليتها فتح قلب

ماعرف كيف التعامل هناك وكيف الممرضات ؟ سبق لها عملت عملية قلب مفتوح بس بالحرس وكانت صغيره 5 شهور ماتتحرك بس منسدحه الحين بسم الله عليها غير مدري شلون بترضى تقعد بالسرير وماعرف كيف التعامل مع الجرح بعد العمليه اكيد تبي تقعد وتحبي .... شايله هم مره وضايق صدري بالحيل يارب افرجها علي وعليكم وعلى كل متضايق

فديت شوشو حبيبتي الله يسهلك ولادتك يارب وولدك مسكين اخوانه ماجاهم العنقز الا دحين الله يحفظه يارب
انا دحين دخلت الثامن والموعد اللي فات كان ايكو ماخلا الدكتور شئ ماقاله الشريين معكوسه وتصب في مكان واحد وكمان الشريان اللي جاي من البطن كمان معكوس وثقب كبير بين البطينين وانسداد في الشريان الرئوي ويقول عضلة القلب كمان سميكه وفيه مويات متجمعه في البطن وحول الرئه لكن الحمد لله خفيفه جدا والله يافديت اني بهم و غم مايعلم بيه الا الله
غربة ولا اهل ومشاكل البيبي كثيرة لكن الحمد لله على كل حال مابيد الواحد الا يقول اللهم اجرنا في مصيبتنا واخلفنا خيرا منها
وموعد اليوم كان متابعه للمويه اللي متجمعه لكن الحمد لله مازادت ولاشئ
لا تنسي تبشرينا لما تولدي