حبايب ألبي..
شوفو انا قريت هنا وصفه للتنظيف و التضييق (للمتزوجات فقط) هي حلوه
بس المصيبه اني غلطت في احدى المقادير الله لايوريكم مكروه .. والسبب من العطار نفسه.
حبيت انزل تجربتي عشاااااان تنتبهووووون زين,,
بالذات هذا المكان لاتلعبوون فيه , واستفسري واستشيري قبل كل شي.
...............................
هنا معاناتي.
انا لما شريتها كلها بس الملح رحنا للعطار وطلع لي ملح الليمون
وقال هذا هو الملح الفارسي وانا على عمايه اخذته
وسويت كل شي بس طبعاً قشر الرمان مااشتريت.
وبدأت اخذها , لاحظت ينزل مني شي زي الامعاء على هيئة قطع
انفجعت , رحت كلمت وحده استخدمتها ,, قالت انا ماصار لي كذا
لكن يمكن قاعد ينظفك من جوه, سكتت واستمريت 5 ايام
بعدها ماحسيت بتحسن (......) احس بالعكس فيه مويه وحرقان والمكان ماضاق ولاشي.
الشهر اللي بعده عدتها وبرضه نفس القطع تنزل مني ,, بعد 4 شهور
بالصدفه كنا نتمشى في مول وكان فيه محل عطاره ودخلنا عشان بشتري قشر رمان.
لقيت ملح فارسي وشكله مختلف عن اللي عندي تماماً..
شكله زي قطع الثلج كبيره وترا تشبه الشب , بس طبعاً فرق
بينهم في الاستخدامات والوظيفه.
سألناه عن ملح الليمون والملح هذا.. قال الفرق بينهم كبير ومالهم علاقه ببعض
ملح الليمون للأكل ويستخدموه الناس لبعض الاشياء في التنظيف.
وقال مو اسمه ملح فارسي.. هذا هو الفارسي ..
انا انفجعت وربي,,, كل هالشهور وانا ألعب في نفسي وانا غافله..
حسبي الله على العطار الاول , الله ينتقم منه.
المصيبه يابنات لما اشتريت باقي المقادير من عنده (العطار الاول) يقول
.. الناس يستخدمونه للتشطيف من تحت..
وانا كل مره بعد الاستخدامات استغرب مااحس بفرق,, بالعكس احس بمويه اتاريه
سببلي إلتهابات والمكان احسه كأنه واسع يمكن بسبب الالتهاب والمويه.
....................
المقادير الصحيحه والكامله اللي هي
عسل اصلي (لازم اصلي مو حق البقايل)
ملح فارسي
مُره
محلب
قشر رمان مطحون ....
فيك تستخدميها بالرمان او من غيره. يعني قشر الرمان مو ضروري
بس اللي تبغا تضييق اكثر تستخدمه.
طبعاً كلها تكون مطحونه, كل مقدار لحاله وتحطيها في اكياس
وبرضه عشان تكون ناعمه انخليها ( اشخليها)
عشان لاتضايقك لما تبدأ تذوب داخل المهبل.
ملعقه من كل حاجه بس المُر والمحلب زودي نص ملعقه.
طبعا تكوني عجينه ثقيله مره يادوب بس عشان تتشكل معاك .
يعني لاتكثري عسل.
وشكليها على هيئة تحامل صغيره بالضبط بحجم نواة التمر
ولفيها في قصدير. كل حبه لحالها واحفظيها في الفريزر.
........................................................
تنبيه يابنات
التحاميل هذي حلوه لكن نصيحه لوجه الله
استخدامها لمدة ثلاث الى اربع ايام فقط لاتطولي في استخدامها ابداً .
استخدميها وقت الدوره يعني ابدأي فيها من ثاني يوم في الدوره.. لاتزيدي.
لأن الملح الفارسي يخلصك من الرطوبه والسوائل الزايده
وكثرتها تنشف الرحم ... وهذا خطاء , (جفاف الرحم والمهبل بزياده مو كويس يابنات).
تأكدو من المقادير انها هي الصحيحه ,,, بالذات الملح <<<----- ملدوغه منه.
وبالنسبه للمُره حاولي تكون نظيفه واذا لقيتيها فيها بقع سودا حاولي تشيلي
السواد بالسكينه .. والمحلب نقيه وشيلي الاعواد إللي معاه والحبات اللي تكون
سودا لو كانت فيها شيليها..
يعني خلي مقاديرك كلها نظيفه..
لأن المهبل يبغاله عنايه ومو اي شي يدخله.
.........................................
بالنسبه لي بعد تعديل الملح واضافة قشر الرمان .. النتيجه حلوه و مُرضيه واستخدمتها
من ثاني يوم بالدوره لمدة 3 ايام قبل النوم ,, يعني وانا على الفراش بنام خلاص.
......................................
اتمنى تدعولي بالهدايه والصلاح لي ولزوجي وبنتي.
الا هالمكان ما ينحط فيه شي غير طبي
يعني تحاميل طبية فقط
لا تلعبي بنفسك