تزيين الأطفال

يا بنات ليش الوحدة تزين ولدها الذكر وكريمات وعطور حرام عليها لا تشوف فيه شي

يعني تخلي الطفل عرضه للخطف والتحرش انا شفت لي ولد مستشور شعره عمره حوالي 8 وأبيض ودب وجميل ماشاء الله وجاي مع السواق ونزل والعمال يطالعون فيه ويعلقون بنظرات سييئة

عاد اللحين أنا ما أدري ايش ظروف أمه اللي خلتها ترسله مع السواق الله يستر عليها ولا ليش أبوه ما جاء معه أنا علي من منظر الطفل خده يلمع من الكريمات والشعر مستشور !! والملابس تلق ومرسلته الساعة 11 الليل؟ زوجي جلس في السيارة ينتظره يطلع من البقالة خاف عليه ويدعي على أمه

أنا ما أقول لا تنظفين عيالك بس لا تخلينه ملفت للنظر من التزيين خاصه اللي ولدها وسيم أو أبيض ودب


أبو زوجي كل ما مشطت شعر ولدي (شعره طويل) يخربطه ويحوس في ثيابه ويزعل مع أني ألبس ولدي ترنقات أو ثياب أكثر شيء مو بدل ويقول تراي أعرف منك بالدنيا وبنوايا بعض الرجال لا تظلمين ولدك وتندمين !

يقول اذا طلعتوا مكان عام خليه مروح ومغبر عشان ما أحد يحبه ولا ينجذب له أكيد هو يبالغ بس مجرب عياله 6 ماشاء الله وعلى قولة المثل المال السائب يعلم السرقة