تشوفوني ياعرب والا لا 🤚

السلام عليكم كيفكم ياحوائيات الله يجعلكم في خير وإلى خير واحشيييني ياقدعات 🤍احسني جديدة ع المنتدى بعد هالتحديث ،وشوي مستحية 🙊😹شهرٍ مبارك عليكم يااخوات ❤️ مابقي ع نص الشهر غير يومين

قاعدة استرجع احاديث فضل هذا الشهر واتسائل  مواسم الخير وش الحكمة منها ؟؟ فعلا وش الحكمة من تخصيص ايام تفوق ايام وشهر يختلف عن الشهور؟فما لقيت غير إجابة وحدة وهي انها رحمة .. وبس .استغليناها فرطنا زدنا اجتهدنا ،،ذا موضوع ثاني مختلف...
لكن الاساس اللي شرعت من اجله هذي المواسم ..هي رحمة وفرصة من الله للعباد .
اجتهدوا لأنفسهم .قصروا لأنفسهم .
قعدت اقيسها بعقلي ومع نفسي ان الله يدعولنا لرحمته من خلال هذا الشهر ينادينا حتى يغمرنا بالرحمة والمغفرة ،
وحتى في القران كانت اية الدعاء تحت آيات رمضان وكإنه إخبار ان هذا الشهر شهر الإجابات والرحمات،واكيد والتطهير والعتق والعفو معقولة بعد هذا كله نزهد ! 😔 ما كنها كبيرة شوي صح ؟
او نساويها بأيامنا العادية والا نقوم على تثاقل وتباطأ
هي ايام معدودات وهذا وصفها بالقران ماقال عنها شهر بل ايام معدودات كناية عن القلة

 والله ان انفسنا متشبعة بعوالق تحتاج تصفية وتنقية ومافيه مثل مثل إغتنام الايام الفضيلة سواء رمضان والا ذي الحجة والا عاشوراء ،،
مافي افضل منها في محاولتنا ل تطهير النفس وتنقيتها لما تعتزلي ضجيج الدنيا وتأوي لك إلى حياة تخرجي فيها عن روتينك المعتاد
 كلها مليانة بأمور تسمو بالنفس وتهذبها وترجع لك بعوائد عظيمة سواء كان في دينك وارتفاع منزلتك عند الله والا تحقيق دعوات وأمنيات كانت بخاطرك والا استقرار وراحة نفسية وخروج من الضغوطات اللي تفرضها علينا الحياة ....

من غير رمضان شهر الإجابات والله ياان فيه فرص للاجابات استحالة تكون في غيره لكن قالها عمر " انا لا أحمل هم الإجابة ولكن أحمل هم الدعاء" هل بأجتهد في دعائي بإلحاح؟ واجتنب موانع الإجابة واحقق شروط الدعاء المعلومة ؟ حتى تكون الإجابة مضمونة بحقي!
 هذا السؤال الحقيقي.

في سنة من السنوات كنت اعاني ظروف سيئة بكل ماتعنيه الكلمة وماهو من جانب جتني من عدة جوانب وكما يقال احيان المصائب تأتي تباعا . واكيد لله حكمة سبحانه .. 
مااذكر اني استغليت رمضان زي هذاك الرمضان لعل الله فتح علي ذيك السنة
 ولعل الهم يدفع الإنسان أحيانا بينما الرخاء يثبطه . وذي حقيقة مؤسفة صراحة لكن تبقى حقيقة .
المهم نرجع لكلامنا ... 

والله والذي رفع السماء بدون عمد اني رايت مااقول إجابة لا فتووووحااات.و ما اقول فتوحات من فراغ. لأنه صارت بحياتي تحولات جذرية مو في أمر والله انها بجوانب كثثثثثيرة مرت علي شهور ابكي . لاني خجلانة وممتنة .ابكي لان الله حقق لي آمال سنين دفعة وحدة .وحسيته شعور كبير علي 😭 حسيت بالخجل والإمتنان لله الكريم ....

ذاك الرمضان ايقنت اني ماكنت اعرف ادعي وكان يتهيألي اني ادعي واجتهد برمضان ...وقتها ادركت معنى مقولة عمر رضي الله عنه.. لا أحمل هم الإجابة ولكن أحمل هم الدعاء ..  واتمنى ترجع لي ذيك الهمة صراحة 

كثرت بربرة لكن امنيتي اني اكون وصلت شي يجول في الخاطرا...لله يحفظكم  جميع 🤍

و يعيننا واياكم على طاعته ويبارك لنا فيما بقي من هذا الشهر الكريم