تعالوا اسمعوا قصة صاحبتي ..تحتاجكم وانتوا كمان تحتاجون لها

مثل ماهو باين بالعنوان انا هنا مجرد ناقل لا اقل ولا اكثر لوقائع حصلت لاقرب صديقه لي وماكنت ادري عنها

كنت احسب اننا فعلاً اكثر من اخوات لكن الحقيقه اني كنت ابعد مايكون عنها وماحسيت فيها

ماالوم نفسي بعد الومها هي ماكانت تفتح قلبها لي وتشاركني همها لاسباب كثيره اولها خافت من ردة فعلي وخافت تخسرني حسب كلامها..

المهم بدت تحكي لي قصتها على المسن ومااستوعبت وقلت لها كلميني و كلمتني صاحبتي وجلسنا نتكلم ساعتين بس ينقطع الخط واشحن واكلمها وينقطع الخط وتشحن وتكلمني لاني انا برى السعوديه وهي بالرياض الحبيبه

وكانت تبي نصيحتي وتبيني اساعدها ويعلم الله قلت لها اللي نصيحتي بامانه واللي يرضيني عن نفسي ويرضي ربي ان شاء الله لان النصيحه امانه..

وبعد ماقلت لها خفت ان نظرتي قاصره وقلت لها وش رايك نعرض قصتك على بنات حواء وقلت لها عن المنتدى

ورحبت بالفكره بس هي ماهي عضوه وقلت لها عادي اعطيك معرفي واستخدميه وحسيتها متردده بعدها قلت طيب وش رايك ترسلين قصتك لي على الايميل وانا انزلها وانتي تابعينا من بعيد واسمعي النصائح..

على فكره هي تحتاج وقفتكم وماتبي تجريح او احد يلومها علشان كذا هي ماحبت تستخدم معرفي

فتكفون لاتهاجمونها واسمعوها للنهايه وكلنا نغلط وكلنا بشر

ادي طولت عليكم بس علشان تكونون بالصوره ولاتحطون حيلكم فيني ترى انا مجرد ناقل ولاعندي خبر الا من يومين بس

نبدا القصه اللي وصلتني امس وعلى فكره حاولت اسوي لها نسخ ولصق بس طلع الكلام مخربط فكتبتها بورقه والحين جالسه انقلها<< بس علشان ترحموني وتعذرون لي اخطائي

القصه على لسان صاحبتها:

قصتي من البدايه قصة اي فتاة لاتقل عنكم ولاتزيد عنكم بشي. عشت ايام حلوه في بيت اهلي وانتظرت الزواج لا لشيء الا لان في عائلتنا يعتبرون الزواج نصر مؤز للعائله وان بناتهم مرغوبات وينظرون للبنت اللي ماتتزوج نظرة دونيه.. وكان لي بنات خالتي ماتزوجوا وكملوا دراستهم وصاروا معلمات وكنت اسمع لما يجي طاريهم واحد يثني عليهم ترد اخرى بس ماتزوجوا!!!!! وكنها عيب وانتقاص وادركت ان النجاح مهما كان بدون زواج بنظر المجتمع يعتبر ناقص.

جاء النصيب بعد الثانوي مباشره والحمد لله ربي تمم على خير وتزوجت وكنت صغيره والفارق بيننا عشر سنوات ولكم ان تتخيلوا كنت مراهقه وهو عاقل كنت خفيفه وهو ثقيل

مع ذلك عشقته مو بس حبيته وحبيت جموده واعتبرته ثقل ورزانه وكنت اعوض نقصي فيه.. من كثر مااحب انه يهديني صرت اغرقه هدايا بمناسبه وبدون وطبعاً فقدت الهديه قيمتها.. كنت ادلعه بالكلام لاني كنت اتمناه يقول حبيبتي ( وربي ماكان يقولها) بس علشان اعوض نفسي عن الكلام الحلو.. لاتجيني وحده تقول يمكن مايحبك لا يحبني بس طبعه كذا مايعرف يعبر ومايحب يعبر يقول الحب تعامل مو كلام. وانا من كثر مااحبه ماااملك الا اقتنع وانا مو مقتنعه وشلون تجي مدري بس اقصد انه اقتناع وقتي فقط .

تطور هالحب من جهتي الى درجه سيطر فيها علي بشكل مرضي صرت اشوفه اهلي واشوفه الدنيا واشوفه كل شيء .. شاغلني بالليل والنهار بس افكر فيه . حتى اهلي يحايل فيني اروح لهم وانا اذا رحت ماارتحت على طول تعال خذني....

وصار مو حب طبيعي صار حب تملك....... مثل ماانا وهبته نفسي وصرت ملك له لحاله ابيه لي لحالي. مابي احد يشاركني فيه ومن هنا بدات المشاكل... صرت اغار من امه ومن اخواته... مااحب نروح لهم ولا احبهم يجون عندي.. ازعل منهم على اتفه الاسباب بس علشان اقاطعهم ويزعل مني وارضيه وافرح لارضى ونسى الموضوع

وكان يقول لي هذا حب تملك وكنت بداخلي اقول ادري ومن حقي املكك ... صارت علاقتي باهله اسوء علاقه على وجه الارض طبعاً من دون مشاكل ورفع صوت بس منسحبه منهم ولا ازورهم ولا اقدرهم ولا لي علاقه فيهم لا من قريب ولابعيد.. طبعاً كل الناس تنتقدني واولهم امي بس كنت اطنش المهم حبيبي معاي..

مع انه يزعل ويقول رضاي من رضى اهلي وانا مايهمني تهمني اللحظه وبس واللي ساعدني انه يزعل شوي بعدين ينشغل وينسى..

ومرت الايام وبعدها ملت امه من وضعي كانت تتامل اني اكبر واعقل وانا اكبر ويزيد هبالي.. وكلمت ولدها وطلبت منه يعدل وضعي.. وصارحني باللي صار واول مره لقيته حافظ كل مواقفي معهم ولاهو ناسي شي ولقيت قلبه اسود علي ويتوعدني ويحلف انه يطلقني او يقهرني ويتزوج بوحده لعيون امه... انا هنا بغيت اموت
وجلست مع نفسي اعيد حساباتي

ولقيت ان سبب مشكلتي هو تعلقي فيه الزايد........ قررت اتغير
بديت ابعده عن تفكيري واخفف حبي له وافتح عيوني على عيوبه واستمتع بوقتي واحاول انه مايهمني .. هذي الفتره من اسوى فترات حياتي كنت اعاني فيها لحالي ومااحد درى عني ولا حسوا فيني حتى اقرب الناس لي..
وشوي شوي بديت ابتعد ويخف التعلق وبدت تتحسن علاقتي باهله..

بس بديت احس بجفاف عاطفي.. ماعاد صرت اقوله حبيبي ولا صرت اهتم للتواريخ والايام ولا المناسبات بديت افقد نفسي.. وتعبت نفسيتي بس مابيدي حيله..

ومرت الايام وقلبي بدا يغبر ويصدا لا احساس ولا عواطف طبعا نسيت اقولكم ان ربي رزقني بطفلين بس مجيره كل مشاعري لابوهم وعيالي راميتهم على امي والخدامه وحدي فيهم الاعبهم وهم رايقين اواتسوق فيهم وبس غيره ع الخدامه اللي كنت مراعيتهم وتخاف الله فيهم<<< يمكن من رحمة ربي في هالاطفال سخرها لهم

وصرت اروح وانام عند اهلي واطنشه وبيوم من الايام وانا كنت نايمه عند اهلي
دق جوالي الساعه 6 الصباح رديت وانا مااشوف من النوم
قلت نعم

قال صباح الخير ياعسل

مع اني كنت نعسانه الا عيوني فتحت وقلبي تفتح على هالكلمه وجلست لحظات اقول يمكني احلم بعدها حسيت اني بالواقع واقفل الخط من الربكه

وتوالت الاتصالات وكنت وبكل امانه استمتع اشوف الرقم يدق وانا مطنشه وكان يعجبني حماسه
حتى جات لحظه غلبني الشيطان وقلت اسمع وش عنده ورديت قلت: نعم وش تبي ازعجتني ترى
وباقي السالفه تعرفونها كلام حلو وخرابيط واحلام واستمرت علاقتي فيه تقريبا 6 شهور من دون علم زوجي
استغلني هذا الخبيث استغلال مادي مو اكثر ولله الحمد

بعدها تركته وغيرت رقمي وانتصرت على ضعفي وحسيت اني شبعت كلام حب ودلال حتى لو كان مدفوع الثمن

بعدها بفتره ومن اربع سنوات مضت فتحت قناة غنائيه جديده لمطرب سعودي معروف وتحمست لتلك القناة من ضخم الدعايه حولها وكنت من متابعين القناة

ومره من المرات ارسلت ع الشات اطلب اغنية محدده لا اقل ولا اكثر.. بمجرد ماطلعت رسالتي كان احد الموجودين بالشات يرسل رسائل كلها طلب لتلبية طلبي وان مثلي لايرد طلبه وهو لايعرفني ولا اعرفه..
استغربت وقلت انسان فاضي وكان من النشيطين بالشات
وبعد يومين ارسلت رساله اطلب اغنيه ثانيه وشوي ويبدا يهلي ويعبر عن فرحته برجعتني وانه مشتاق
ورديت عليه برساله اتشكره ع ذوقه وشوي شوي الا طلب يتعرف وارسل لي رقمه
وكلمته وتعرفت عليه وطبعا ماقلت له اني متزوجه وعطيته اسم وهمي ومعلومات اي كلام
استمرت علاقتنا 3 شهور وطلب بعدها مني الزواج وسويت نفسي طايره من الفرح وقلت طيب انت مين واعطاني معلومات كامله عنه ومن سوء الحظ صار يقرب لي من بعيد لكن اعرف ابوه وهو يعرف ابوي لو جاء اسمه.. هنا ـتأزمت وحسيت انها بداية الفضيحه..... يتبع
الجزء الثاني بمجرد مااخلص نقله راح اضيفه يابنات