السلام عليكم ورحمة الله وبركاته
اخبار حبيباتى واخواتى الحوائيات ايه يارب تكونوا بألف صحة وعافيه يارب
وكل سنه وكل اخت مسلمة وهى طيبه وربنا يبارك فى منتدانا الغالى اللى جمعنا وعرفنا ببعض وجمعنا على خير اللهم امين
رزقنى واياكم جنة الخلد اللهم امين
المهم ندخل فى موضوعنا على طول
كتير مننا زهق من شكل المطبخ والارضيه اللى مابتنضفش الا بطلوع الروح وبذل المجهود الجبار وهاتك يادعك بالفرش وحط فانيش مره وكلوركس وخل مرة ولا حياة لمن تنادى البلاط والسيراميك زى ماهو وان نضف يادوب ينضف شوية صغيريه انا بقى عملت ايه علشان اريح نفسى من الدعك والقرف بتاع كل يوم وريحة الكلور والمساحيق اللى خنقتنى انا والعيال وابو العيال اللى زهق منى طبعا كل يوم فى اختراع جديد وفكرة جديده هههههههههههههههههه المهم وانا قاعده كده بعد ماصحيت من النوم ولاقيت نفسى فاضيه دخلت المطبخ وقعدت ابوص يمين شمال شمال يمين وفوق تحت عينى جات على الارضيه بتاعت السيراميك والترويبه ولت يابت طالما انتى فاضيه النهارده فكرى كده تنضفيها ازاى قومت خرجت من المطبخ ودخلت اوضة النوم ولبست الاسدال ونقابى وخدت فلوس من مصروف البيت طبعا:( (هاين عليا ابكى هههههه) وروحت لمحل البويات قولت لراجل اللى واقف لو سمحت ادينى ب4جنيه اسمنت ابيض بتاع الارضيات الرجل ماكدبش خبر والا قالى خلى والا حاجه هههههههههههه المهم كملت باقى طلباتى من السوق بالمرة بقى بدل مانزل تانى وجريت ع البيت قبل العيال وابوهم مايصحوا ويعملولى قلق وخلصى وعايزين الحمام وحوارات بعيد عنكم مابتخلصش :09:المهم قومت رشيت الارض ميه مجرد بلل بس مغرقتهاش بليتها مش اكتر ومسكت كيس الاسمنت الابيض وقعدت ارش على كل الارضيه وقعدت شويه بتاع (5دقائق)كده وقعدت ادعكها بايدى على خفيف لغايه مابقى شكلها كده
وصبرت بتاع 10 دقايق تانى على بال مالاسمنت يمسك فى الارض ويجمد شويه علشان لما امسح مايطلعش معايا ويبقى كده كانى معملتش حاجه وتعبى يروح ع الفاضى ونفس الوقت ماضحكش ابو العيال عليا وده مابيصدق ههههههههههههه
المهم بعد مايعدوا ال10 دقايق نروح نجيب مساحة الارض اللى بنجر بيها الميه ونفضل نجر بيها الاسمنت من على الارض بالشكل ده
وبعدين نجيب الاسمنت الناشف تانى مرة ونرش على السيرميك من غير اى ميه وندعك بالمساحه او بايدك افضل ونصبر تانى 5دقايق وتجيبى قماشه نضيفه وتمسحى بيها السيراميك واحده واحده واستمتعى بمنظر سيراميك جديد لانج زى كده
وادى صورة كمان علشان خاطر عيونكم كلكم ياحبايبى ياقمرات انتوا
اللى عجبتها الفكرة تدعيلى ان ربنا ييسرلنا حالنا يارب ان شاء الله
ويباركلى فى ولادى
وانتظرونى فى الجزء التانى من ترتيب وتنضيف مطبخى ان شاء الله
((ملحوظه))
اللى حابة تنقل الموضوع تذكر انه منقول بالاسم لاءن بجد تعبت جدا فيه وقولت اقولكم علشان نستفاد كلنا زى ماافادتونى لازم افيدكم خاصة انى بحبكم فى الله وربنا يديم المحبة بينا يارب