السلام عليكم ورحمة الله وبركاته
هلا وغلا بكل اللي دخلوا
يالله حيهن
عسى ما تخرعتوا من العنوان ؟؟
بس تراني أقصد والله الكلام اللي قلته ..
الحمد لله على سلامتي وعلى سلامة بعلي العزيز .
الله ستر علينا من جريمة كانت على وشك الحصول ، إما مني أو منه أو منا الإثنين حميعا .
القصة ومافيها ::::::::::::::
إنه كان بيننا خلاف ... صار لنا كم يوم ...وزوجي ماشاء الله عليه عطاني ذيك التطنيشه .. اللي الله لا يوريكم ... تخلي الكافر يسلم على قولتهم ...
وأنا خبركم ما أقدر أتحمل ...قعدت أراجع نفسي ... ايش الغلط اللي غلطته ؟؟؟ ايش المصيبة اللي هببتها ؟؟؟ وأعصر مخي وأعصر وأعصر ...
وأثناء ما العصر يشتغل ... طبعا طفحت الأيام السوداء في حياتي مع زوجي كلها ... وركبت راسي عفاريت الدنيا كلها ... لأن زي ماانتوا عارفين : الصديق وقت الضيق .. والعفاريت ما تجي الا وقت الضيق ... يافرحتي بهم .. والأيام الحلوة ؟؟؟ اختفت وتبخرت ومارأيت منه خيرا قط !!!
الموهيم ....
وبناء عليه ...
قررت أني ما أجيبها البر .. مع أنه مو من عوايدي العناد والله ، كله أنا اللي أراضي ، أقول ميخالف يابنت الحلال .. احتسبي الأجر ...وفي العادة ما أخليه ينام الليل إلا وحنا متراضين لأني أصلا ما أقدر .... خوافة .
لكن أبو الشباب كأنه ماصدق ارتاح مني ... يزداد تطنيشا ً
وأنا أزداد غيظا ً
ويمر يوم
يومين
ثلاثة
واحنا كل واحد وده يقتل الثاني .....أنا ما أعلم الغيب وبإيش كان يفكر لكن هذا للي تصور لي ..
فكرت أروح بيت أهلي ... بس عمري ما سويتها .. ايش بقولون عني الحين ؟؟
أنام في الغرفة الثانية ؟؟؟ لا لا لا ما تصلح جربتها من قبل وانبسط الأخ صارت له الغرفة كلها ... ياسلام هو يستمتع بالفراش الوثير وأنا أنام على الكنبة ... لا والف لا ..
ياربيييييييييييييييييه
ايييييييييه مافي حل الا واحد من اثنين : إما إني أعرس عليه ، أو أطلقه .. عشان أبرد كبدي ..( طبعا أقصد العكس ، وهذا خوفنا موت يالحريم )
يوم جت في بالي هالسالفة ... قلت لا ياحرمة ... اعقلي .. والله ماراح ينفعك أحد ..
طيب كيف أراضيه وانا نفسي بخشمي ؟؟
والله مالي خلق حتى أناظر في وجهه ..
صح يمكن أنا غلطت ،،، لكن حتى هو غلط ..
قلت يا آدمية مالك الا اللي خلقك وخلقه ، سبحانه وحده مفرج هم المهمومين وكاشف حزن المحزونين
وتذكرت موضوع وحدة من البنات الله يجزاها خير تقول أنها تهاوشت ويا زوجها وأخذها بالسيارة يبي يوديها لأهلها وأنها صارت تذكر الله وتدعي وفجأة زوجها يتبدل حاله ويرضى ويصيرون سمن على عسل ... وتذكرت أنه هذا ابتلاء من الله ليرى صبرنا وثقتنا به ، وأنه مانزل بلاء الا بذنب ولا يرفع الا بتوبة ،وانه سبحانه كريم مجيب دعوة الداع إذا دعاه ... وتذكرت فضائل الإستغفار ودعوة ذي النون ودعاء الكرب وأدعية الهم ... وتذكرت ( واستعينوا بالصبر والصلاة ) فلزمت كل هذه الأشياء وأنا على ثقة بأن الله تعالى لن يخيبني سبحانه ..
والحمد لله أكرم الأكرمين وأجود الأجودين ..... أصلح الحال ، وتبدلت الأحوال ، وتحسنت الأوضاع ،وعادت المياه الى مجاريها
فالله الله ياخواتي ، لا تعطون العفاريت مجال انهم يركبون راسكم ، والحذر الحذر من ( ما رأيت منك خير قط ) فإن أكثر نساء أهل النار بسببها ..
هداني الله واياكم لما يحب ويرضى وجعل ايامنا وأيامكم كلها فرح وسعادة ياااااااااااارب .
أم يحيى @am_yhy
عضوة شرف في عالم حواء
يلزم عليك تسجيل الدخول أولًا لكتابة تعليق.
الصفحة الأخيرة
والله يوفقك بالدنيا والاخره