أو ل تجااااااااربي

أفكار لأختصار العمل في البيت والمطبخ
وممكن تستغنين عن الخادمة للأبد مع هذه الأفكار





أولا أنصح أي زوجة بيتها شقة أن لاتحضرها أبداً وتحاول أنها تعوض نفسها بأجهزة زي
غسالة الملابس الأتوماتيك هذي مريحة جداً


وكذلك غسالة المواعين أيضاً ممتازة ومريحة



كذلك الطبخات اللي تحتاج وقت وتعب وممكن تحفظ
في الفريزر إذا أنتي عندك أوقات فراغ بعض الأيام حاولي
تسوينها وتعبين الفريزر منها هنا توفرين وقتك إذا جاك ضيوف
إذا جت المقاضي على طول نظفيها ورتبيها البقدونس
والورقيات أغسليها ونشفيها
تلاقي الطريقة في موضوع لي في قسم حواء
الباميا قمعيها وفرزنيها والفاصولياء قطعيها عدة أشكال
وعبيها في أكياس وأجمعيهم في علبة كبيرة
عشان ما تتعبين وأنتي تدورينها كذلك الملوخية
أورقها وأعبيها في أكياس في الفريزر
كذلك الجزر إذا كان كميات كبير ة والقرع
والفلفل الأخضر البارد والحار والأحمر والأصفر قطعيه
حسب حاجتك للمرق للبيتزا وغيره والزهرة كذلك
والطماطم أيضاً خاصة إذا كان موسمها أجيبها
بكميات كبيرة وأسويها بعدة طرق
شي معصج ومطبوخ وشي مقطع بس تقطيع
ولا أخلي باثلاجة إلا حق السلطة بس
وكذلك البصل أقطعه بعدة أشكال وأشوحها في الزيت وأقسمها في أكياس صغار وأجمعهم في علبة كبيرة والثوم قشري و قطعي كميات كبيرة
وحطيها بالفريزرالثوم أنا أحطه عدل وإذا
إحتجته حطيته في ماء دافي وعلى طول يتقشر
وممكن براتب الخادمة أو أقل منه بعد تشترين طبخات
حق الفريزر من الحريم السعوديات اللي يبيعون هنا أو ألأجنبيات

الأبـــــنــــــــــــــــــأء


تعويد الأبناء على المساعدة في المنزل وعدم الأتكالية يعني
نبتدي نعود الطفل من عمر أربع سنوات يرتب ألعابه يرتب
سريره حتى لو ماصار على مزاجك أهم شي يتعود
وإذا دخل المدرسة يجي على طول يحط الشنطة
في
مكانها والجزمة وأنتم بكرامة في مكانها الخاص
يبدل ملابسه ويحط الوسخ في السلة


إذا عند والدتك أو أختك
خادمة حاولي تاخذيها كل فترة تساعدك
على تعزيل البيت وعطيها المقسوم تراهن يفرحن و
أنتي جسي نبضها بعضهن ما تبي
في خادمات تجي الساعة بعشرين ريال
أنا كنت أجمع لها الكوي حق أسبوع وتجي
مرة في الأسبوع وتنظف عي البيت تنظيف كاااااامل


أنا تكلمت عن غسالة الملابس
الأوتوماتيك ويمكن البعض ماعرف اللي أقصدها
اللي أقصدها هي اللي أنتي بس حطي الملابس
وحددي الماء والصابون حسب كمية الملابس
وهذي اللي تفتح من فوق وليس من الأمام
ويجي معها مجفف حار يطلع لك الملابس ساخنة
وناشفة إذا أنتي على طول علقتيها وطبقتي
اللي يحتاج تطبيق ماراح تحتاجين تكوين
غير ثياب الزوج فقط واالأبناء الكبار
وهذي صورتها
7
7



طبعاً مو كل شي ينحط فيها عشان كذا لازم ننتبه
للعلامات الموجودة على الملابس لكن بالعموم
الملابس الداخلية الرجالية والأطفال والبيجامات
والشراشف والبشكير (الفوط)والشامواه
والصوف الصناعي في الغالب والقطنيات ذات الوبر
كلها ممتازة فيها والعبايات والإسترتشات والجينز
والملابس الرجالية اما
الأشياء التي يصعب عليك
كويها أو ماتحبينها ممكن تودينها للكواي
وترتاحين
من

وبكذا تخففين عنك عناء الكوي





إعداد الأكل وكيف تفرزني بعض المأكولات



هنا بأركز على تفريز الأطعمة لاخصوص لأنه لو بتلاحظون
أن الطبخ يستهلك وقت ويلزمك الجلوس بالمطبخ
ما تطلعين سواء كمية كبيرة أوقليلة لذلك أفضل
عمل كميات كبيرة وتفريزها
حتى أوفر الوقت والمواعين بعد ههههههههههه
حتى لو عندي خادمة الطبخ يحتاج وقت وصحصحة


وقلنا فرزنة أغلب الأغذية مثل الخضار وبعض
الطبخات أيضاً يوفر لك الوقت والتعب
كذلك شراء بعض الأطعمة المجمدة من النساء
اللي يطبخون بالبيت ويوصلون لك إذا كان عندك مناسبة
ومايجي نص راتب الخادمة ((إحسبي تكاليف الإستقدام وأكلها
وشربها ولبسها والأشياء اللي تخربها عليكم وتبذيرها في المواد المستهلكة في البيت من منظفات وغيره وعلاجها وإقامتها))
وشوفي الناتج والله إنه مبلغ خيالي


مكن تستأجرين خادمة في وقت فراغك وتعزلين البيت
أنتي وياها سوى مرة كل ست شهور كفاية
ولو أنتي من اللي يحافظون على وضع الأشياء في
مكانها بعد كل إستعمال وينظفون على طول
صدقيني يمكن ماتحتاجينها إلا بالسنة مرة

وممكن تستأجرينها من أي مكان أو من أي صديقة
أو خادمة الأهل مدة وتعبين الفريزر
من الطبخات اللي تصلح للتجميد
00


مثل0000000
السمبوسة بجميع أشكالها أصابع أو مثلثات

وجميع الحشوات (جبن لحوم مشكلة خضار تفاح وقرفة ولوز وسكر )
الكيك بأنواعه حتى السويسرول مايتغير
ورق العنب سواء مطبوخ أوقبل الطبخ
((أنا أحطه قبل ما أطبخه)) والآن فيه ورق عنب معلب جاهز
وهو نفسه اللي يبيعونه عليكم أغلب المطاعم بضعف

سعره العلبة فيها 2كيلو بالكثير عشرين ريال
وممكن أقل لبعض الشركات هذا أيضاً يوفر لك وقت
كذلك محشي الملفوف ممكن تجمدينه بالفريزر
المعمول بأنواعه وكتاب أم عبدالعزيز فيه نوع ممتاز
يقلى بالزيت هذا أنا أعبي منه الفريزر ومايتغير
المعجنان بجميع أنواعها فطاير وبيتزا وبجميع الأحجام
أهم شي تتعمل صح وتتركينها تبرد تماماً
قبل الفرزنة /الكبة بأنواعها ((فيه كبة في السوق
مجمدة إسمها شامي في كل المراكز الكبيرة روعة وجميع
الأنواع والأحجام)

الفطائر التي تقلي بالزيت أيضاً ممتازة بس ماتقليها إلا بعد ما تحتاجينها

الفواكه مثل الأناناس الجوافة مانجو برتقال شمام فراولة كل
هذي أقطعهم وأعبيهم بأكياس بالفريزر
وكل شي سويه على طول في وقت فراغك

الزنجبيل الطازج أبشريه وعبيه في كيس وأفرديه فيه وبعدين
لفيه رول أو إتركيه دون فرد وألصقي طرفه بلاصق
أو إستعملي الأكياس اللي لها كبس يغلقها تجدينها في الأسواق
عشان يكون سهل عليك تاخذين منها
أو قسميه في قوالب الثلج وإذا تجمد طلعيه حطيه في
علبة وخذي منه كل ما إحتجتي بسهولة


البهارات إطحنيها بكمية تكفيك مدة ست شهور وحطيها بالفريزر
تحميص القهوة حمصيها عند المحمصة يحمصها
ويطحنها لك الكيلو بريالين يا بلاش
ولا حوستها بالبيت

نجي للفرن أيضاً ياخذ وقت فأحرصي من البداية أنك
ماتوسخينه وشوفي كيف ممكن يجلس معاك إسبوع
كامل ماتحتاجين إلا إنك تمسحينه بالفوطة مسح عادي
يعني لا تحطين أكل كثير في قدر صغير وعلى العين الكبيرة
و تتركين إبريق القهوة والحليب والشاهي يفور
ولو حصل على طول إمسحيه
القلي إستخدمي القلاية الكهربائية مريحة وتوفر الوقت
والجهد ولا طرطشة ولا حروق
والزيت بعد توفره لك لكن يستحسن أنك ماتقلين فيها لحوم
مباشرة زي البروستد والسمك
هذولي دايم على عين كهربائية خارجية غير الفرن
((تلقينها عند أبو عشرة))
عشان تحافظين على فرنك والزيت تكبينه بعد الإستعمال


نجي للثلاجة أمسحيها كل شهر
مسح كامل شامل وكل يوم تلاقين شي خربان
طلعيه على طول وأي شي ينكب جواتها على طول أمسحيه
لا تتركينه لبعدين

دواليب المطبخ000000
تحتاج مسح سريع يومي ومسح دقيق أسبوعي بالماء والصابون ومسح عميق شهري كل 3شهور بالصابون والكلوركس وترتيب داخل الدواليب وتنظيفه

أعتقد خلصنا من أصعب شي بالبيت وهو المطبخ والغسيل والكوي

بسم الله مشاء الله تبارك الله ولا حول ولا قوة إلا بالله
نــــــــــــواصـــــــــــل
بقية غرف المنزل إذا بيتك شقة وعفشك قليل فسهل جداً أما إذا أثاثك كثير الله يعينك
المجلس للنساء أو الرجال 00000




ننظفه تنظيف كامل كل إسبوع أو إسبوعين ويكون هناك تنظيف شامل كل كم شهر
حسب كثرة الضيوف أول شي ننظف الكنبات أو الجلسات والمساند والمكاتب
والطاولات والتحف من الغبار والأوساخ من أثار اللمس أو الأكل وكذلك تنظيف فلتر التكييف
ثم نقوم بالكنس وتعطيره ولإقفاله لحد ما يجي ضيوف وبعد ما يجي ضيوف ويروحون مباشرة ننظفه تنظيف سريع ونقفله لحد ما يجي وقت التنظيف الشامل أو الأسبوعي
التنظيف الشامل والكامل للمجالس000000
هو إزاحة الكنبات أو الجلسات من مكانها وتنظيف ما يوجد تحتها أو خلفها
تنزيل الستائر وغسلها وكيها وتعليقها مرة أخرى وتنظيف الشبابيك والثريات واللبمات والمراوح إن وجدت
نجي لغرف النوم





أول شي إذا هي مكركبة لازم ترتيب شامل من البداية عشان يسهل علينا الترتيب اليومي المعتاد

كيف ترتبين غرف النوم ترتيب كامل وشامل ؟؟
أولا تخصصين لكل شخص درف معينة وأدراج تحطين فيها أغراضه أو تخصصين أدرج لكل نوع من الأغراض حسب عدد
أولادكم وغرفكم وخزاناتكم وكل وحدة تعرف بيتها أكثر
الأفضل يكون فيه لكل شخص رف كبير يوسع للبيجامات وتكون في جهة الملابس الداخلية
والتي شيرتات في جهة
البنطلونات أفضل لها التعليق ويكون فيه رف للملابس حقت الطلعات
والشراريب والأحذية وبكلات البنات والألعاب كل شي يككون له مكان مخصص ومرتب فيه


سلة للملابس الوسخة وشماعة للملابس النظيفة إللي ممكن نرجع نلبسها بعد ما نرجع بالليل زي البجامة أو ممكن نلبسها بعد ما نرجع من المدرسة



التنظيف الأسبوعي 0000000000


برضوه حسب أولادكم وشقاوتهم أنا بالنسبة لي يكفي أني أكنس الغرفة وأمسحها مرتين بالأسبوع
وأمسح الأرفف القريبة مني أما اللي بعيدة وعالية فيكون مرة بالشهر
وكذلك الشباك والستارة يكفي كل 3شهور
من هنا نجي للترتيب اليومي 000000
وهو ترتيب الأسرة والمكاتب حقت الأولاد وإعادة الأغراض إلى أماكنها بسرعة

غسيل دورات المياه والمغاسل )




هذي سهلة جداً




أولا تنظيف عميق وكامل وشامل--------------


00000 نقوم بتنظيف الحمام من أي شيئ عالق بالبلاط تنظيف جيدجداً مثلا لو فيه بقع بوية أو قطع جبس أو إسمنت ماسكة على البلاط أو على الكرسي أو على أي قطعة في الحمام ونزيل التكلسات بالخل أو بالفلاش وننتبه ما نستعمل الفلاش بكثرة ونستعمله بحذر عشان مايخرب البلاط ويشيل الترويبة اللي بين البلاط
ننظف مروحة الشفط حقة الحمام ضروري أقل شي كل 3شهور والشباك
الحنفيات إذا عليها ترسبات أولا شوفي نوع الحنفيان إذا هي نحاس يبي لها منظف خاص بالنحاس
أما إذا هي ستانستيل فهي سهلة بس رشي عليها شوي جف وأدعكيها أو من بخاخ الفرن وأتركيها ربع ساعة أو أكثر وبعدين نظفيها بالأسفنجة والصابون وتطلع تبرق
وإذا حوالين الحنفية تكلسات خذي عود براسه قطن وحطي فيه شوي فلاش وأمسحي حوالين الحنفية وإنتبهي ما تلمسين الحنفية نفسها بس على المغسلة أو كرسي البديه الخزف
إذا الجدار اللي عليه الدش والبانويوا مليانين دهون ماعليكي إلا ترشي من بخاخ الفرن أو تدعكينه بجف وبيطلع يبرق
وفيه بخاخ خاص للقيشاني من موبي برضوه رائع

إذا في الحمام خزانات رتبيها وأمسحيها من جوى وأفرشي في أرففها مناديل من لفات الرول وكل فترة غيريها
وإذا تحت المغسلة دولاب إنتبهي لا تتجمع فيه رطوبة أو أوساخ أحرصي على تنظيفه وتجفيفه حتى لايكون مرتع للصراصير والروائح الكريهةوإذا مغاسلك عادية أنتبهي من أنك تتركين أسفل المغسلة دون تنظيف وإذا أنتي عندك مغسلة قديمة ولافكرتي تنظفينها من زمان أقول لك شيئ حلو
روحي الآن ورشي عليها شوي جف وأدعكيها لحد ماتطلع تبرق عشان يسهل تنظيفها اليومي
أو أمسحيها بفلاش بس ألبسي كفوف وإنتبهي لعيونك
ولا تنسون وصلات الموية (الليات حقات المغاسل والسخاناتةالسيفون تراها ممكن كل فترة تمسحينها عن الغبار



ثانياً000000000


نجي للتنظيف اليومي العادي واللي بيكون سهل جدا إذا خلصنا من التنظيف العميق


أولا هاتي علبة (حقة تعليب التمر أو الأيسكريم الكبيرة إذا عندك أو سطل صغير من عند أبو ريالين)
حطي فيها المنظف اللي تستعملينه

أنا كنت أول أحط في العلبة هذي ملئ مقاس الدواء فيفادول) مرتين صابون ومرة كلوركس وأحط عليها 3كاسات ماء


والآن أستعمل الجل العملاق


أحط منه ملعقتين كبار على لتر ماء(4كاسات)

وأستعمله أغسل فيه حماماتي الأربعة ومغاسل الرجال ومعودة الخدم إذا جوني على نفس الطريقة
أقوم بغسل حمامات الدور الأرضي أبدا بحمام الرجال وأدعكه ومغاسلهم وأتركه وأروح لحمام النساء وأدعكه
ثم أرجع لحمام الرجال وأشطفه بالماء وأشطف المغاسل وأجففها بالفوطة زين
يعني كرسي الحمام :3_13_11: أمسحه من برى وجوانبه كلها لين ينظف ويصير يبرق وأجففه عشان ما يطلع عليه أثر قطرات الماء
وكذلك المغاسل أمسح المرايا قبل واللبمات اللي فوقها حسب الضرورة
ثم أجفف المغاسل من فوق وتحت وألمعها ولا أخلي أثر لقطرات الموية أو أي أوساخ تتجمع على جوانب المغسلة وأو تحتها
لأنه صراحة أشوف ناس مايهتمون بهذي النقطة المغسلة تبرق من فوق بس إذا نزلت راسي أحط شي بالزبالة لين المغسلة عليها خطوط من الوساخة من يوم حطوا المغسلة ما نظفوها
وإذا أنتهيت أروح أشطف حمام النساء وأسوي نفس اللي سويته في حمام الرجال
وحتى الأرضيات لازم تحافظين عليها جافة حتى لو حمامكم عربي إسحبي الماء بالمساحة وشغلي مراوح الشفط لين يجف الحمام

ونفس الحكاية مع باقي الحمامات وصدقوني الكمية اللي حطيتها تكفي ويبقى منها بعد





ومضة 00000000000000
الحمام ليس لأنه مكان لقضاء الحاجة معناته ما نهتم بنظافته ولا ريحته بالعكس
لازم ننظفه باستمرارخاصة إذا عندك ضيوف ومعهم أطفال لازم كل فترة تطلين على حمامك وتشوفين إذا يحتاج إعادة تنظيف(إذا عندي ضيوف نايمين عندي كم يوم لازم كل وقت صلاة أروح أغسله غسيل كامل) وإذا عندي عزيمة كل مالقيت فرصة رحت وشييكت عليه
ممكن نضيف له بعض قطع الصابون والتحف الخاصة للحمام والدعاسات ستارة للبانيو أرفف لحفظ بعض الأشياء اللي تستعمل في الحمام
يجب أن يكون فيه مناديل خاصة للحمام
أحرصي على توفير أكياس علقيها خلف الباب عشان لو جت وحدة تبي ترمي بامبرزولدها تحطها في كيس وتقفله ولا يطلع روائح
وضع بعض معطرات الحمامات


على العموم أنا أقييم المرة السنعة والنظيييييييييييييييفة من مطبخها ومن حمامها

اشكر مرروكم العطر

شقاء فرحه حتى انا اكبراولادي عمره 10 سنوات واذا ما عليكي كلافه ابي تردد قناة شفاء

هدوء الليل الله يرضى عليكي والله اني مقدره تعبكي في نسخ الجدول لي وانا احتفظت فيه الله يجعله بميزان حسناتك