تعالو سمعوني قصصكم

السلام عليكم
خلونا ننشط المنتدى شوي لأنو نايم
منسمع قصص غريبة او خيالية قصص بتحسيها انها مسلسلات لكن حتما موجودة بالواقع !!!

من ضمنها قصة ام محمد لي حكت عنها وحدة منعرفها قبل سنين طويلة وضلت بذاكرتنا 
هي من نفس منطقتهم وحارتهم
القصة لو ماشفنا صاحبتها كنا نقول قصة درامية او فيلم مكسيكي 
لكنها حتما موجودة وواقعية 
لكن القصة انفتحت مرة ثانية بعد عشرات السنين وبعد موت الزوجة

هي الحرمة الها قصة مأساوية
زوجها تركها من زمان طويل واختفى عام ١٩٧٣ اي قبل ٥٠ عام تقريبا
وكان بيبلغ من العمر ٢٧ عام تزوجو مبكرا هو ١٨ وهي ١٧ كان بحار في ميناء اللاذقية يغيب اشهر ويرجع لعندها كانو عايشين ومستقرين وخلفت منو بنتين وطفلين

لكن في مرة اختفى نهائيا مرت ٣ سنين بدون اي خبر
اخر خبر انو راح برحلة الى البرازيل

تضاربت الانباء عنو

غرقت السفينة وماتو
تعرف على وحدة برازيلية وتزوجها وضل معاها
عمل حادث وفقد ذاكرتو وضل هناك

وعشرات الاجوبة لي بتضل تخمين واشاعات

اهل الزوجة عملو كل شي مشان يسمعو خبر عنو لكن مافي بل وصلت انو احد ابناء البلد في البرازيل عمل بحث كامل عنو لكن بدون جدوى

البرازيل هي مثلث برمودا لي ابتلع اعداد كبيرة من شباب سوريا ياما شباب هاجرت لهناك فترة الستينيات والسبعينيات
واختفوا وانقطعت اخبارهم للأبد ونادرا ماكان يرجع واحد منهم

وزجتو كانت ترفض اي كلام عنو ورفضت تتزوج غيرو بحجة انو مات هي بتحبو وبتعرف اديش كان بيحبها ويعشقها
وضلت عايشة كل عمرها على امل عودته مرت السنين وكبرو البنتين والطفلين وتزوجو 

اولادو كانو يكرهوه جدا بحجة انو هجرهم وتركهم لكن الام كانت تسكتهم وتدافع عنو بكل قوة 

ماتت فلانة قبل ٤ سنين بدون ماتشوف زوجها لكن قبل اشهر قليلة فجأة رجع فلان بعد ٥٠ سنة الى دمشق !!!
غادرها وهو بعمر ٢٧وعاد اليها بعمر ٧٧

لكن رجع وهو منتهي من المرض والتعب وماعاش ايام الا مات

الرجل ماكان فيه شي ومتذكر والدليل انو رجع لمنطقته نفسها وعرف ابنائه وبناته عليه

عاش ٣ ايام فقط بعد عودته
كان كلامه سامحوني ماكان قصدي اني اترككم واروح انا ندمان وبكاء وحسرة وتوفى بعدها ودفنوه بجانب زوجته

لما غاب طول هي السنين وانتهى الامل اكدو انو مات

وعملو الو عزاء وسكرو على قصته

لكن عودته اربكتهم مرة اخرى ورجعت طرحت عشرات الاسئلة ماجاوب عليها وماتت الاجوبة معاه
مات قبل مايقول 
وين كان كل هي المدة الطويلة ؟؟؟

وليش رجع بعد ٥٠ سنة من غيابه مات والسر معاه للابد وماحدا بيعرف وين اختفى وليش رجع هلق وفتح الدفاتر القديمة

وانتو شو اغرب القصص لي سمعتوها او شفتوها هاتو قصصكم خلينا نسمع وانا رح انشر عدة قصص ثانية