تعالو شوفو الحق مع مين معي ولا مع حمولتي

السلام عليكم ورحمة الله وبركاته
انا جارة ام النشاما واخذت معرفها بطرح عليكم مشكلتي وابيكم تقولو لي الحق مع مين

انا عمري 18 ولي سنه متزوجه والحمد لله ربي رزقني بولد الله يخليه لي ولبوه

المهم سالفتي
انو وانا حامل ام زوجي طلبت مننا اني اتنفس عندهم اجلس نفاسي كله ببيتهم لانه هذا اول حفيد لها

للعلم انو بيتي وبيت اهلي بنفس المدينه وقريب منهم بس هي تبيني في بيتها


ووافقت لاني طيبه معي ويحبوني لاني زوجة ولدهم الكبير واول كنه لهم والحمد من تزوجت ما صار بينا اي مشاكل

مع اني كان نفسي اتنفس ببيت امي لاني بكريه وصغيره وما اعرف للبيبي بس عشان خاطرها وافقت على اني اجلس عندهم اسبوع واروح عند امي


وزوجي عنده 5 اخوات كلهم يحبوني ويحترموني وعايشات مع امهم ومو متزوجين


المهم

ولدت الحمد لله وجبت ولد والكل فرح فيه اهلي واهله وكل اقاربنا وطلعت من المستشفى على بيت اهل زوجي

واستقبلوني احلا استقبال


وجوني الزوار وقايمات بالواجب واكثر



لكن انا صابني اكتئاب صرت بس ابكي واشتاق لامي واخواتي وادق عليهم يوميا واخليهم يجوني
مع ان حمولتي مو مقصرين معي بس انا احس نفسي ثقيله عليهم حتى ملابسي ما اخليهم يلمسونها ارسل غسيلي وغسيل ولدي لاهلي ينظفونه وبعد 6 ايام من ولادتي تعبت وما قدرت اتحمل اجلس عندهم مو كره لهم لا بس كذا تعبت نفسيا

وزوجي شاف نفسيتي تعبت قال بوديك عند اهلك يمكن ترتاحين يعني انا ما طلبت منه قلت له خليني اكمل الاسبيوع عندهم قال لا بوديك

انا ما اتحمل اشوفك كذا وكنت ابكي لحالي مو قدامهم بس زوجي شافني وحس فيني وانا والله ابكي مو بيدي احس نفسي مخنوقه واحس اني غريبه بينهم وما اني متعوده اخلي احد يخدمني يعني بالعربي حسيت اني ثقلت عليهم وما ابي اتعبهم معاي تعرفون النافس يبي من يخدمها يعني
قلت امي وخواتي يتحملوني لان امي متعوده خواتي اكبر من ي 4 دايم يتنفسون عندها وجو البيت وناسه وفله وما شاء الله كبيره البيت يعني ما اثقل عليهم

المهم لميت اغراضي وجهزت نفسي عشان اروح عند امي هما هنا زعلو ليش اروح من عندهم قبل اخلص الاسبوع يا اناس الاسبوه بقي له يوم ويخلص لازم يعني على الموعد ساعة بقبن انا صرت هههههه

تخيلو يا بنات طلعت من بيتهم ولا احد منهم ودعني ولا سلم علي بالعكس سبوني كأني مسويه جريمه

حتى حفيدهم ما سلمو عليه

حتى امه ما رضيت تسلم علينا وين الغلا وين المحبه كذا اختفو مره وحده لاني تركت بيتهم قبل الالسبوع احمدو ربكم اني جلست عندكم وما رحت من بدايتها عند امي لانه من حقي


بس الله يسسامحهم على كل تصرفاتهم ضحكو الناس علينا وسببو حساسيه بينا

والله والله يابنات هاجموني وراحو يتشكو على الناس وكل الذنب اللي سويته اني ما كملت الاسبوع عندهم


يعني هذا غلطي في حقهم من وجهة نظرهم
الله يسامحهم سببولي اكتئاب وتظايقت مررره وصار نفاسي كله بكى وماتهنيت بمولدوي احسهم كرهوني في عيشتي

وانا هذي اول فرحتي

وبعد ما خلصت نفاسي قلت اعمل باصلي واروح ازورهم مع انهم غلطو بحقي واخليهم يسلمو على حفيدهم تخيلو ما استقبلوني البنات الا امهم استقبلتنا وفهمة وجهة نظري وموقفي وقدرتني ولا خواته كلهم ما سلمو علي

وانا عن نفسي ظنشتهم انا اهم شي اني جدة ولدي فهمتنا وقدرت موقفي وهم طز فيهم وفي تفكيرهم المحدود

وصرت الحمد لله يوميا امر بيتهم وافوت عند ام زوجي واخليبها تلعب حفيدها وهما اول ما ادخل البيت يختفو وما يقابلوني


بالله يا بنات الحين الحق مع مين معي ولا معاهم


وهل تصرفي صح

والسالفه لها الحين سنه ولدي صار يمشي ما شاء الله عليه
وهما ما يسلمون علي الا ام زوجي بس هي اللي تستقبلني


مع اني زوجي خاصمهم بس ما ردو عليه وزوجي قالي لا عاد تروحين لهم قلت حرام احرم امك من حفيدها قال انا الزم ماعلي كرامتك قلت ما عليش اتحمل لجل نبر امك وما نحرمها من حفيدها



وهذي سالفتي كلها بالله يا بنات قولولي الحق مع مين حبيت افضفض لكم واريح نفسي شوي

ويشهد الله اني صادقه في كل كلمه قلتها

واتركم في حفظ الله ورعايته