تسلم يد كل وحده شاركت او رفعت الموضوع الله يقومنا بسلااااااامه

شوفي كل وحده وحسب مجتمعها ،، لاتقارنين بالناس اللي حولك ..

اولا هل يجيك صياني شكولاطه بالمستشفى ؟ وكم يجيك ؟
اللي يزورونك هل فيه منهم ناس من النوع اللي تجيب قهوتها معها ؟

كم عدد ضيوفك اللي يعتبرون اجناب او تستحين منهم وكم اللي تمونين عليهم ؟

احسبيها انتي وشوفي ..

يعني مثلا انا شخصياً تجيني شكولاطه بالمستشفى بحدود ٣ او ٤ صياني تكون فخمه والباقي ان جاء يكون عادي ..
واعرفهم ..

هذي الـ ٤ استعمل منها وحده بالمستشفى وتقعد الباقي تقديم بالبيت ..

فيه كثير من الجيران وخالاتي لازم يجيبون قهوتهم اذا زاروا ..

يبقى اهل زوجي وصديقاتي الوحيدين اللي اذا جاو اعبي لهم شئ فخم حالى ومالح مع الاشياء اللي عندي من اول وكل صينيه تفضى يا اعبيها من نفس النوع او اشيل اللي فيها لصينيه اصغر واخيلها مرتبه .. واقدمها للي ما استحي منهم او بالاصح امون عليهم ...

يعني التقديم بيكلفك حسب وضعك .. ومجتمعك

اغراض الصيديله والعطار اذا حددتي اش تبين بالضبط ماتكلف اكثر من ٥٠٠ وانتي الصيدليه قريبه والعطار قريب متى ما احتجتي شئ اي احد ممكن يجيبه فـ لاتكثرين الاغراض ..

التموين .. من الان اكتبي الحاجات اللي بتحتاجينها اول ماتولدين ..
مثل فواكه / خضار / لحم / مناديل / ....الخ الاساسيات
والورقه عطيها زوجك اذا ولدتي وانتي بالمستشفى يشتري الاغراض ويوديها بيت اهلك .. ع حسب العدد بالبيت اذا انتم قليل ماتكلف كثير بس اذا بيت اهلك كبير ممكن تكلف ..

مدامك خلصتي الملابس والجلابيات يعني خلاص الباقي خليه معاك لانك ممكن تحتاجين اشياء اضافيه ،،

انا حاولت اقدم لك اللي عندي .. مع اني ما اتبع هالنظام : )

انا من الشهر الخامس كنت كل شهر اخلص شوي اشياء واخيراً الشهرين الجايه راح اقسم عليها الباقي ..
والتموين زوجي عاده اهله انهم يتقضون لأهل البنت او ماتولد .. فـ هو يروح يجيب الاساسيات بدون تحديد ومعاها اللحم ..

العقيقه باليوم السابع يروح يذبح ويوزع شوي ويجيب لاهلي شوي ويودي لاهله وخلاص .. بدون عزايم ولاتكاليف ..

والان فيه حاجه مره منتشره بس انا ما اقدر اسويها ..
انه الناس تحدد موعد للزياره يعني لو احد كلمك بيزور تقولين لهم الله يحييكم يوم الاثنين او الثلاثاء او اي يومين اهم شئ تحددين يومين عشان ماتتكلفين كل يوم ع حرمه وحده او ٢ ..

بس الصراحه امي عيت تقول عيب اصلا احنا زوارنا اغلبهم مجموعات .. يعني عماتي سوا .. خالاتي سوااا صديقاتي سوااا اهل زوجي سوااا وكذا ..


والله يسهل ويعين ...

الف شكر لك حبيبتي ام الاميره النظام مره حلو فكرته الله يعطيك العافيه ويقومك بسلامه شكلي بروح اقول لزوجي خلي اهلك هم الي يجبون التقديمات وكل شي احتاجه بدل وجع الراس ههههههههههههه

خليها على الله ولاتحسبين خلي عندك ميزانية واصرفي بقدر وبيبارك لك ربي

انا بالنسبة لي راح اولد عند اهلي والمدينة اللي ساكنين فيها اهلي ما فيها اقاربنا الا خالاتي بس والباقين جارات امي وصديقاتها
اما اهل زوجي في مدينة ثانية ومرة ما يجوا فأنا ما أتكلف إلا بالقرايب وهم قليلين وعادة يجوا كلهم سوا ثلاث او اربع ايام ورا بعض بعدين خلاص ما يرجعوا ييجوا الا يوم السابع علشان كذا

اولا : اشتري حلويات وبيتي فور ومعجنات ومكسرات من بنده واخلي امي توزعها بترتيب على صواني فخمة عندها اصلا من اول وتستخدمهم للعزائم وتغلفها بطريقة حلوة بالسلوفان والشرائط وهاذي كلها ما تكلف الا 300 ريال

اما توزيعات وخرابيط ما بسوي ابدا لأني شفت قريبتي يوم اعطت التوزيعات للأهل شافت كم وحدة منهم حاطة التوزيعات حقتها بالحمام الله يعزكم تخيلوا ولما سألتهم ليش كذا قالوا لأنها تحفة وجاية على لون الحمام "أكرمكم الله " والله قهرررررررر

بالنسبة لمفرش السرير راح اشتري من محلات العروسة شفت لحاف ب200 ريال مرررررة رائع وفخخخخم

وراح اشتري قميص نوم فخم للاستقبال وشكلي راح اروح الهرم يقولوا عندهم ارواب زي نعومي ب40 ريال ... وراح اخذه بنفس لون اللحاف علشان لما يجيني زوجي من السفر .... وراح اخذ تقريبا اربع جلابيات فخمة علشان البسهم قدام الناس
مع ملابس داخلية قطنية من سيتي ماكس وسنتيات الرضاعة وشورتات قطنية طويلة """"" بالنسبة للمشد راح أستخدم المشد اللي لبسته في ولادتي الأولى ان شاء الله وهذي الملابس راح احطلها 600 ريال

ملابس المولود راح احط لها 600 ريال وماراح اكثر علشان الهدايا اللي راح تيجي

طبعا الأكل الخاص بالنفاس يعني " الدجاج كرتون او اكثر _العسل 2 كيلو _السمن او الزبدة _ البيض _ الدخن _المعمول ومعجون التمر وتمر عادي ومنه كمان للتقديم _او اي شي ثاني خضار وفواكه" وهاذي ب 1000 ريال

الذبيحة 800 او 1000 ريال

العطار "الأعشاب تقريبا 200 ريال " اعشاب تاكليها او تغليها وتشربيها زي قرفة قرنفل زنجبيل قشر قهوة نونخة عنزروت حبة سودة حلبة رشاد نعناع ناشف كمون فلفل اسود "
_ واعشاب تتشطفي بيها" ارطي _ مرة _ قشر رمان _ زعتر بري_ملح حجري " طبعا اللي تبغي
" ملح حجري _ وكريمات تبيض علشان الكلف يروح وكريمات حقت خلطات يعني زي جليسوليد وفيك وفازلين وكركم جسم وصوابين البابايا والكركم والغار وماء ورد هاذي كلها تيجي 300 ريال

يعني حطي للعطار 500 ريال

الصيدلية اول شي لك : فوط صحية لك وطبعا خذي كمية كبيرة _مناديل _كريم بتادين او غسول بيتادين الطبي للخياطة _ قطن _مناديل الصدر للرضاعة _شفاط حليب الصدر وهاذا مهم _كريم لتشققات الحلمات والمفروض يكون زبدة الكاكاو _ مشد طبي _
للبيبي: حفاظات _ رضاعة صغيرة وما تكون قزاز والأفضل اشتري طقم كامل _ حليب صناعي وطبعا وقتها اسألي الدكتور ايش احسن نوع لا تشتريه بدري_ مجموعة تنظيف شامبو وكريم وبودرة انا احب منتجات نونو مامنها خوف _ مناديل للتنظيف مبللة _اعواد اذن وقطن
وهذا كله ترى مررة يكلف والله انا جربت الصيدلية اكثر شي يكلف

اممممممممممممم ايش كمان ؟؟؟؟ والله احس مخي فضي اذا نقصت شي بالله قولولي وان شاء الله تستفيدوا مني في بعض الأشياء


ايوة اهم شي : اللوك الجديد بعد النفاس يعني صبغة شعر_ تنظيف مغربي _ ازالة شعر جسم _قمصان نوم وشورتات واشياء حلوة للزوج المهموم علشان تنسيه هموم الأربعين ههههههههههه
عطور وكريمات للجسم وشموع وحركات يعني تعرفوها وهاذي التكاليف عاد غالية يعني ممكن تحطي 2000 ريال وعلى فكرة مو لازم تروحي للصوالين الكبيرة علشان المولود فين تحطيه وكذا أحسن شي جيبي حرمة للبيت تثقي فيها وتكون أرخص طبعا

وطبعا اهم شي ابغى اقولكم عليه يمكن اللي تحس انه مبلغ 5000 قليل هو صح قليل اذا كانت تتقضى كل هاذي الأشياء في وقت واحد وهذا اكبر غلط المفروض طول فترة الحمل تجهزي نفسك كل شهر كم حاجة مهمة تاخذيها وبكذا ما ييجي الشهر التاسع الا وانتي عندك فائض فلوس بس طبعا البكريات منكم معذورات مالكم خبرة وامهاتكم الله يهديهم ما قالولكم على هالنقطة وعاد المهم الله يسهل علينا ويباركلنا امييييييييييييييييين يارب