السلام عليكم ورحمة الله و بركاته
بنات انا شفت وايد بنات يشتكون من عدم الثقة بالنفس و قلت اكتب لكم اللي أعرفه في هذا المجال
طبعا مثل ما ذكرت لكم في موضوعي عن الأنوثة ان انا غير متخصصة في هذا المجال لكن مطلعه و مجربه وعندي معلومات و حابه افيدكم فيها.. و كل اللي ابيه منكم دعوة صادقة لي بالتوفيج وان ربي يحقق لي امنياتي و يحفظ لي اهلي و جميع المسلمين
قبل ما اكتب عن كيفية اكتسابج ثقتج بنفسج لازم تحطين في بالج هذي النقاط
· اذا ما عندج دافع او ارادة من داخلج للتغيير فصدقيني ماراح تتغيرين .. لأن جسمج يستجيب حق اللي يقوله عقلج.
· حطي في بالج الآية الكريمة ((إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ)).
· الثقة بالنفس هي مفتاح للنجاح في كل شي بحياتج بعد توفيق الله.
· المعلومات اللي اكتبها حفظتها من دراسات و من تجارب علماء لأني بصراحه ما احب الكلام العايم او ال****يي وأفضل التجارب العملية
· انا وحده طبيعية لكن مريت بتجربة قاسية جدا جدا افقدتني ثقتي بنفسي بدرجة كبيرة لكن كان في داخلي رفض شديد ومقاومة علشان ما استمر علي هذي الحالة واجتهدت وتعلمت الخطوات و جربتها وراح اذكر شي من تجاربي حتي رجعت أفضل بوايد من شخصيتي اللي قبل وهذا توفيق و فضل من الله . والحمد الله حمدا كثيرا.
بسم الله نبدأ
علشان تعرفون معني الثقة بالنفس لازم تفهمون لغة الجسد أولا .. لأن لغة الجسد تمثل 80% او 90% من لغة التواصل والباقي بالكلام او بالمحادثه
نستشهد بعالم الحيوان "عزكم الله" كيف ان لغة الجسد لها تأثير كبير قبل الكلام
لاحظوا في هذي الصور الحيوانات في "أوج قوتها" وقمته و كلها تتشارك في انها " فارده عضلاتها و نافخه نفسها و جسمهم يميل في انه يكون مفتوح علشان يعطيها شكل أكبر من حجمها الحقيقي"
وانا اضمن لكم اذا شفتوا حيوان في هذي الحالة ماراح اشوف غير غبرتكم هههههههههه
بينما الصور الثانية لما تكون الحيوانات في موضع "ضعف "وخوف و انكسار لاحظو انها "منكمشة على نفسها و مصغرة جسمها "
ولما نشوف حيوان في حالة ضعف نستقوي عليه و نحاول نكشه و ننهره و يمكن نطقه .. هذا اذا مافي قلوبنا رحمه
نفس الشي يحدث مع الإنسان .. الإنسان الواثق يكون في موضع "قوة" بينما اللي ما عنده ثقة بنفسه يكون بموضع "ضعف".. لما نشوف انسان واثق من نفسه نحترمه و نسمع له و نحسب له حساب بينما الشخص الغير واثق نهمله حتي لو كنا ما نقصد او نتعمد تهميشه... طبعا استشهدت في بنات صغار احتراما لقوانين المنتدي.. عاد الخيال عليكم.. تخيلوا انهم حريم كبار:
الإنسان الواثق لاحظو ان لغة الجسدية ..صدره مفتوح و الوقفه مستقيمة و الراس مرفوع باعتزاز و نبرة الصوت تكون واضحة و مسموعة و نظرة العين فيها قوة و هدوء و طمأنينه
والأنسان فاقد الثقة لاحظوا يكون منكمش راسه نازل و نبرة الصوت خافته و احيانا تكون غير مسموعة و العيون تنظر لليمين و اليسار يعني ما يقدر يحط عينه في عينك لما يكلمك
الحين ندخل في الأهم.. بتسألون كيف اكون واثقة من نفسي؟؟
الجواب بكل بساطة انج تكونين واثقة من نفسج.. سهل جدا
وانا تأثرت جدا في جملة قالها الملاكم البطل المشهور محمد علي كلاي "To be great champion you must believe you are the best. If you are not, pretent you are"
ترجمة الكلام " لكي تكون بطل عظيم يجب عليك الإيمان بأنك الأفضل, واذا كنت ليس كذلك فتظاهر بذلك"
ما عليه ترجمتي ركيكة هههههههههه لكن ان شا الله وصل لكم المعني
لكن كيف.؟؟. اتبعي هالخطوات
**** قبل كل شي لازم تكون نيتج سليمة و تبدين بالدعاء الخالص وبحضور القلب ان ربي يساعدج تكونين واثقة وعلي يقين انج باذن الله بتكونين واثقة من نفسج... بعدها تبدين في الخطوات التالية:
1- الكتابة و تحديد اللي تبينه..اخذي ورقة و قلم و اكتبي حسب التعبير اللي يريحج او الصياغة اللي تعجبج وكلها تكون ايجابية ..اشلون تكون ايجابية؟ يعني لا تكتبين انا ابي اتخلص من شخصيتي الضعيفة .. لاحظي الكلمة اللي تحتها خط سلبية لازم تصيغينها بايجابية و تكون بصيغة الحاضر وكأنج عايشتها (أنا واثقة من نفسي), انا احب نفسي انا شخصيتي قوية وانا مميزة ..الخ.. وتقرين هذي الجمل اول ما تقومين من النوم و قبل ما تنامين و عادي بعد لو في اي وقت من النهار تقرينه
2- العمل و التطبيق.. يعني حاولي تثقفين نفسج من هذي الناحية.. انا كنت أدرس بيني و بين نفسي اللغة الجسدية للمشاهير و الشخصيات الكبيرة و أتدرب عليها جدام المراية بعدين اطبقها.. كانت بداية تطبيقاتي في السوق.. ادخل علي محل واكلم البايع وانا منتبهه علي لغتي الجسدية و مستوي نبرة الصوت واطلب منه غرضي و كان يلبي لي طلبي بكل احترام وانتباه.. و بصراحه كنت بيني و بين نفسي اضحك واقول يسسسسسسسسس yes لأني ضبطت الدور
3- التكرار و عدم اليأس.. يعني عادي انج تفشلين في اول محاولاتج وراح تتعبين لكن لا تيأسين ارجعي مره ثانية وعدلي اخطاءج,, وخلي حوارج مع نفسج ايجابي ,, مثلا فشلتي بتطبيق شي لا تقسين علي نفسج و تقولين انا ما ينفع معاي ..انا فاشله ما مني فايده,,, لا خلي حوارج مع نفسج يكون تطمين و تشجيع .. عادي حبيبتي سارونه انتي شجاعه و انا واثقة انج بتنجحين ناس وايد فشلوا بعدين نجحوا.مافي انسان يطلع من بطن امه متعلم
4- كتبي بورقة و قلم كل انجاز انجزتيه وأثر فيج او حبيتي هالأنجاز .. او كل ميزة فيج حتى لو كانت بسيطة.. بنت مدحت عيونج سجلي هالشي بالورقة مثلا ابوج قال انتي جميلة سجلي هالشي بالورقة.. مدرستج شكرتج علي اجابة اجبتيها سجليها وبين فترة و فترة اقري الورقة..
اعطيكم مثال علشان ابيين احنا ليش نسوي جذي: مثلا في بنت بالمدرسة راسبه في جميع المواد و نجحت في مادة وحدة... تكتب في الورقة اسم المادة اللي نجحت فيها.. ليش تسوي جذي؟؟ . لانها تتفاءل وما فقدت الأمل ووهالشي بيعطيها نوع من الفخر و تفتخر ودافع انها تحاول تنجح في المواد الثانية .. و سبحان الله جسم الانسان مصمم من الخالق سبحانه انه يتبع المخ و المخ يكون مسيطر علي كل جزء من جسمنا .. اذا كان تفكيرج ايجابي جسمج كله راح يستجيب لهذا الشي لا شعوريا.
طبعا لازم تمارسين التظاهر او اقناع نفسج بأنج واثقة و اتوماتيكيا راح تصيرين واثقة من نفسج تدريجيا من غير ما تشعرين.
*** و نصيحة يا بنات لكم و لراحتكم النفسية بعيد عن موضوع الثقة بالنفس.. لا تنشغلون الا بنفسكم وبذواتكم وبتحسين اخلاقكم و تصرفاتكم .. لا تقولين والله فلانه تحتقرني علشان جذي انا اسب فيها!!!..اذا احتقرتج انتي اشتغلي بنفسج وشوفي عيوبج ونقاط ضعفج اللي خلت هذي الانسانه تتعدي عليج وتعلمي اشلون تعزين نفسج و ترزينها بدون ما تغلطين على احد او تتعدين عليه مو يكون همج انج تردين لها الصاع صاعين .. او وحده تقول والله فلانه سوت و فعلت و قالت و حطت و تنقدها .. ليش ما افكر ان انا اعدل من نفسي علشان ما اطيح بغلطات غيري.. و قيسوا هالشي مع ازواجكم و اخواتكم و صديقاتكم و الي ما ذلك
وصدقوني كل ما ابتعدتوا عن دايرة ذاتكم وركزتوا علي الاشخاص اللي حواليكم راح تتعقد المشكلة و تتعبون اكثر و كل ما ركزتوا علي ذواتكم راح ترتقون و تتطورون و ترتاحون اكثر والناس تحترمكم.
*** بنات اقول لكم من الحين ان يمكن مو كل رد ارد عليه او سوال لكن احاول قدر الامكان اني اجاوبكم اذا استطعت و لقيت الوقت.
**يمكن في بنات بيقولون هذا اللي تقولينه خرابيط.. بالضبط انا اول ما بديت بهذا الشي اقول انه خرابيط لكن لما جربت و التزمت لقيت له نتايج مبهره ما كنت اتوقعها.. ولاتنسون ان في ناس اشتغلت علي هالشي و جربته ونجحوا.. وبيني و بين نفسي انا ترجمت هذي الدراسات انها تشرح ألية الدعاء المستجاب بس طبعا بدراسات و تجارب
تحياتي لكم :kissa:
