تغيرتو بعد الزواج ؟؟ للاسوء او للاحسن

السلام عليكم ..
فضفضة نسوان لا اقل ولا اكثر
حبيت اسألكم يابنات ولا اقول ياحريم تغيرتوا بعد الحياة الزوجية ؟ للاسوء ولا للاحسن ..
بالنسبة لي انا تغيرت ( للاسوء طبعاً)
متزوجة لي 3 سنوات وعندي ولد وزوجي فيه عيوب ومزايا وليس سيء ولكن انا تغيرت


قبل الزواج كانت حياتي رائعة ومنتجة حققت فيها اهداف كثير كنت اسعى لها
موظفة ومعي ماجستير وكانت البسمة ماتفارقني كل شي كان يفرحني يعني بالعربي كان عندي شعور واحاسيس جميلة اما الان اصبحت متبلددددده واهلي كنت امشيهم بكلمة وحده امشي فيها اخواني اما الان لقيت نفسي امشي غصب عني بعد الزواج ومالي كلمة ع احد
تغيرت شخصيتي بعد الزواج كثير وتأثرت بشخصية زوجي للاسف صار هو اللي يتحكم فيها بطريقة غير مباشرة
بالعربي انا ماهي انا خلاص
صرت عصبية دايم احس بتعب انعزلت كثير عن المجتمع وصرت احس لكل خطوة حساب حتى للبس اتردد اشتريه مدري يناسبني ويناسب مجتمعي الجديد او لا
انعدمت ثقتي بنفسي والسبب هو وانا كنت قبل الزواج الكل يستشيرني وياخذ بنصيحتي اما الان احس اني ضعيفة همي بس رضاه واهتم بولدي نسيت نفسي
اما شكلي حدث ولا حرج
شوشتي طايرة كل الوقت مهما حاولت اتزبط ماش مااحس انها انا ولبسي صار كله بجامات وواسعة ووزني زاد
بالعربي انا غير سعيدة والزواج عرقل لي كل شي كنت اسعى لتحقيقة واذاب الطموح اللي بداخلي واخر علي اكمال الدكتوراه


رجعت صديقتي من الخارج وماشافتني الا بعد الزواج بسنتين انهبلت خوفتني تقول ماهي انتي ؟ احسك عجوز
اما هي صديقتي عكسي تماما بعد زواجها زادت هيبتها والكل يعزمها ويحسب لها حساب وهي صارت اجمل ومهتمة بنفسها كثير ماشاء الله الله يتمم عليها
انتظر تجاربكم .. حلوة او مرة