تغيرت حياتي عندما تركت وظيفتي!!! + التعاسةاللي اعيشها مع زوجي

استقلت من وظيفتي بسبب تسلط المديرة علي الله لايوفقها لا دنيا ولا آخرة وحسبي الله ونعم الوكيل فيها والله يذوقها ماذقته من قهر وحرمان
استقلت من وظيفتي لاني انقرفت .. تعبت .. معد اتحمل الاهانة والسم كل صباح الى ماطلع للبيت بسبب وحده سليطة مقرفة ناقصة .. دايم تحقر بالموظفات
مابعد الاستقالة :
أصبحت تحت رحمة زوجي اللي اكره تصرفاته .. صرت الجأ له في كل شي سواء ابغا شي تافه أو ضروري
صار مايتحملني ويعايرني بالاستقالة بأني انسانة فاشلة وغبية وكل هذا عشان هالراتب اللي يجيني اخر الشهر بعد مايطلعونه من خشمي
ضعفت بعد ماتركت وظيفتي صرت انسانة فارغة وفاضية وماعندي شيئ .. فقدت الاستقلال المادي اللي مقويني عليه ومخلي لي هيبة
ماصرت اشتري اي شي اشتهيه وأبيه سواء لي او لبنتي .. كل ماشفت شي قلت آآآآه على ايام الفلوس والعز ( سبحان الله العز مايدوم )
زوجي انسان اناني مايهمه الا نفسه وروحاته وجياته وسفراته وكل ماقلت له شيئ قال ماعندي فلوس انا عندي ديون .. اجار .. فواتير ....... الخ
كرهت نفسي وعيشتي ودايم مكتئبة بسبب اني مالقيت لي وظيفة ثانية مع ان عندي خبرة 4 سنوات وماجستير !!!!
كل ماقدمت على مكان وسويت مقابة سكروها بوجهي .. لازم واسطة بهالبلد ولا ماتمشي امورك لو *****الله انك عبقرية زمانك وانسانة مكافحة كل هذا مايشفع لك
اتمنى اتمنى اتمنى اليوم قبل بكرا القا لي وظيفة ارتاح فيها نفسيها واصرف على عمري وعلى بنتي وادخلها احسن المدارس واعزها واعز نفسي واترفع عن هالحقير
لو ان زوجي زي اخوانه كان ماضطريت اطلع من البيت الى العصر واكرف كرف الحمير .. انسان غريب غير اخوانه في كل شي كل شي
اخوانه مدلعين حريمهم وعيالهم رافعينهم للقمرر .. حاطين لهم احس البيوت ومدخلين عيالهم احس المدارس ومية الف سفرة بالسنة .. ومرفهينهم لأخر انواع الترفيه
مع ان حريمهم لا شهادة ولا علم ولا سنع ولا جمال ولا حتى اجسام .. كل وحدة تقول انا الشحوم عندي وفيهم خبث مو طبيعي ..
وانا ياحسررررة حظي طايح بالارض محسرني بحياتي ومخليني التفت لغيري واندب حظي وبالرغم اني اقل وحده من الناحية المادية الا انهم يحقدوووون علي ويكرهوني ويغاررروني مني مره
وانا بيني وبين نفسي اظحك ههههههههه واقول يغارون من ايش عالقصر اللي انا عايشة فيه ولا على سفرياتي كل سنة ولا عالدلع اللي انا عايشته..سبحان الله هالأشكال مايملى عينهم غير التراب
واخو زوجي انسان حسود زي حرمته .. حاسد زوجي علي وباينه عليه الغيرة يحسبنا طيور الكناري عايشين في حب .. حتى زوجته كانت تقولي في بداية زواجي انو زوجي غاثني فيك ويقولي صيري زي فلانة!!!
احس فيني عين مو متوفقة في أي شي لا بوظيفة ولا في بيتي ولا حتى مع زوجي .. دايم متنرفز ولا يتحمل الكلمة مني وغير كذا والله يابنات ثم والله كل مايدق عليه اخوه وانا اكون جنب زوجي من بعد مايسكر منه تقوم الحرب العالمية بيني وبين زوجي وماأطيقه ..
مره دق علينا واحنا رايحين لمطعم وعلمه زوجي اننا طالعين تعرفون وش صار يابنات ؟ تهاوشنا ورجعنا قبل مانوصل للمطعم ( طبعا الطلعة للمطاعم بالسنة حسنة معه وبعد ترجي ومذلة ) وهذاك هو زوجته كل اسبوع يطلعون للمطاعم والكوفيات
ومره دق عليه وهو بالبيت قاعد عندنا قاله زوجي انا في البيت وبعد ماسكر منه .. صارت مشكلة كبيرة بيني وبين زوجي
ومره كنا نتعشا عند اهلي ودق عليه اخوه قاله انا عند اهل حرمتي اتعشا بعد ماسكر منه صقع الملعقة بالصحن وطلع من غير مايسلم على امي وابوي .. واشوا ان امي وابوي ماكانو موجودين
ومرة جا ياخذني من زواج ودق عليه اخوه وقاله انا رايح اجيب زوجتي من العرس وبعد المكالمة عصب علي وشوي ويمد يده علي
ومرة قاله بودي زوجتي لأهلها قاله اخوه والله انك فاضي تضرب مشاوير وتوديها لأهلها ( وهو موفر لحرمته سواق وشغالة وكل شي ) طبيعي زوجي يوديني اجل من بيوديني سواق حرمتك ؟ وبعد ماطلعنا تضارب معي زوجي ووداني للبيت وقال مافي روحة لأهلك
والله العظيم ماتصير المصايب والمشاكل الا بعد مايتصل اخوه عليه .. وكم مرة اقوله لاتقوله انك عندي او احنا طالعين يعاندني ويقول بتكلم على كيفي
ماني طايقة نفسي .. ولا حياتي .. وفيني اكتئاب مو طبيعي .. بديت اتبلد واهمل كل شي انا احبه واهتم فيه .. حتى جمالي بدا يذبل بسبب الهم والغم
كرهت الزواج وزوجي وبيتي وكل شي يخص هالبيت .. وتمنيت اني ماتزوجت الا بعد ماكونت نفسي وتوظفت بوظيفة حكومية وصار لي كيان ودور في المجتمع ودخل مستقل علشان اسحب عالجميييع واولهم زوجي