السلام عليكم والرحمه

انه بقول لكم قصتي وكيف انتهت بعلاج الروكتين

انه من البحرين عمري 23, تخرجت وانخطبت في نفس الوقت..

اللي تبي تسمع قصتي حياها الله :44:

وجهي ما عمره عرف الحرار او البقع الا في فترة الدورة الشهرية حبه حبتين ويروحون في ايام قليلة.. ولا قط حفيت ويهي غير الشنب

يوم انخطبت قبل 3 اشهر بالضبط .. رحت وحفيت ويهي وسويت تنظيف بشرة ...

وابتدت بشرتي مع المشاكل

صارلي حرار واااااااايد في ويهي كله تقريبا.. ونصحوني استخدم صابون acne aid وبالفعل استخدمته . خف الحرار اللي في الجبهه بس مكان الزلف (تحت الخدود) تقريبا في وايد حرار ومبقع ما يروح..

رحت مستشفى الدكتور طارق سعيد .. عند وحده هنديه .. عطتني كريمين اخلطهم واحط في ويهي كل يوم بليل قبل لا ارقد وغسول للبشره الجافه مع العلم ان بشرتي دهنية وايد وحته شعري دهني..

صاااااااااااااااار ويهي ابيض بدرجه مو طبيعيه والحرار ماراحوا وتم ويهي مبقع

استخدمت هالكريمين اسبوعين ووقفت لانه صارت لي حكه مو طبيعيه واحمرار في ويهي..

تميت اسبوعين رديت استخدم نفس صابونتي .. بس الحرار اللي صوب الزلف قاعد يزيد ويزيد ..

نصحوني اروح دكتور محمود الفضل.. وفعلا رحت وقلت له عن حالتي

قالي لا تستخدمين كريمات انتي بشرتج دهنيه ما تحمل اي كريم .. ووصفلي صابونه acne aid نفس صابونتي وعطاني مطهر ومضاد حيوي..

هاي المضاد الحيوي يوم قريت النشره مالته مكتوب حق اللي يعانون من امساك او شي في الجهاز التنفسي او هالاشيه .. الحمدلله انه مافيني اي من هالاشيه

كليت من المضاد 3 حبات ووقفت لاني مو مقتنعه منهم شله اكل حبوب من عله انه مافيني..

اللحين انه وايد مكتئبه وويهي ما ينجاف ومن يجي خطيبي اروح ارص ويهي ميكب عشان اخش البقع والحرار .. واعيش في حاله نفسيه وكل ما يسالوني مته العرس اقولهم مادري واقول حق امي بأجل عرسي مابي اللحين لين ما يخف اللي في ويهي..

اخر شي امي قالت بتوديني عياده الدكتور حلمي ربيع..

هذي الدكتور قالي لازم تاخذين الروكاتين :icon33:.. بس الغريب في الموضوع انه قال لي اخذيها بس اسبوعين لانه انه مخطوبه وخطر علي بعدين لي عرست

قلت اوكي واخذتها اسبوعين يعني حسيت انه في شوي جفاف والحرار ما يقام يطلع .. بس ما راحوا .. رحت للدكتور بعد اسبوعين من استخدامي للروكتان شاف وجهي وقال في تحسن بس بعد راح اعطيكي اسبوعين روكتان وصار شهر وانه استخدم الروكتان .. الحرار خف والحمدلله بس مكان الحرار باقي اثار وتخررررررع

سويت سيرج عن الروكتان وعرفت كل المعلومات اللازمه عنه.. رديت للدكتور وقلت له ابي اخذ كروس علاج بالروكتان .. بس الدكتور مصر انه ما يصير اعطيك العلاج لاني مخطوبه .. تحايلت على الدكتور وقتله معليش دكتور ما اريد اخذ كورس كامل بس خلني اكمل بعد اسبوعين على الاقل قال اوكي

صار شهر ونص ورجعت للدكتور وكانت تطلع لي حبوب وحرار في اماكن متفرقه من الوجه بس مو نفس قبل الروكتان يعني اخف .. وقتله دكتور الحرار للحين يطلع لازم اكمل العلاج.. قالي اوكي بعد اسبوعين

صارلي شهرين الحين وانه استخدم الروكتان تقريبا ومرتاحه من النتيجه ..

المختصر المفيد..

عمري 23
وزني 53
جرعاتي
اول اسبوعين 20 مل غرام
شهر ونص 40 مل غرام
لو اكمل بعد 3 اشهر 50 مل غرام .. راح آآآكل تقريبا 122 ملم غرام .. وهذي الكميه تكفي باذن الله للشفاء ومقاومه المرض..حسب النشره بالروكتان..

الاعراض الجانبيه اللي حسيتها

جفاف بالوجه وبالشعر وبالشفاه ... بس مرتاحه من جفاف الوجه والشعر لانه قبل كله دهني ومغربلني.. بس جفاف الشفاه مو مرتاحه منه
ألم بالظهر كاني عيوز ام 60 سنه
الدوره الشهريه تأخرت اسبوع عن موعدها

بس والله كله يهون في سبيل بشره صافيه

حالتي النفسيه زفت بس مو من الروكتان حالتي النفسيه تعبت لاني قعدت بالبيت تخرجت ولا حصلت وظيفه اجابل الطوف ... والشي الثاني انخطبت وفرحت شهر وعقبها صار اللي صار وطلع الحرار بالوجه وكرهت حياتي حتى اني ما اطلع مع خطيبي وايد كله اتجاهله..
ثالث شي خايفه على الحمل في المستقبل .. في النشره مكتوب بعد ما نخلص العلاج بشهر يصير احمل.. وضمان خليها 3 شهور... بس كيف اقنع خطيبي يأجل الفرح (العرس) 5 او 6 شهور واحنه اولردي لنا 4 اشهر مخطوبين يعني توتل 9 او 10 اشهر مخطوبين مده طووووووويله ...

بالاضافه انه خطيبي يقولي لا تاكلين الروكتان بس شهرين يكفي .. واليوم قلت له خلاص انه وقفت اكل الروكتان بس انه للحين اكل يعني كذبت عليه :icon33:

بس على فكره امي قالت لي كملي العلاج.. واذا حطيبك مو راضي لا تقولين له ... بس متضايقه لاني كذبت عليه ..

قلت قصه حياتي كلها .. بس والله محد فاهمني .. عشان جذي جيت افضفض هناااااا:icon33:

نسيت اقول بعد اني امس سويت تحاليل في مستشفى حكومي والنتيجه راح تطلع بعد 10 ايام

دعواتكم لي وللبنات اللي يعانون مثلي بالشفاء العاجل

الشهيه معدومة
صرت آكل بس عشان الدواء
ساعات الواحد ما يبي ياكل او انه ماله نفس
لكن لما يجي الدواء اغصب نفسي
الدواء هذا بيمتني
اول مرة احس بجفاف عيني خاصه اليسرى تعور وحمرا اما اليمين مستقره الحمدلله

يابنات انا اليوم طلعت التحاليل ويقول الدكتور عندك ارتفاع بالدهون " يعني الكوليسترول " عالي

اول مابديت اخذ الروكتان كان الكوليسترول 0.99 واليوم وبعد ثلاثة شهور صار 1.8 يعني صار الدبل

وش اسوي عادي هالنسبة من الارتفاع ولا فيه خطر .. على فكرة جرعتي 40 باليوم

ايه وعندي مشكلة في عيوووووووني ذبحتني الحكه فيها لاني كل يوم قبل اروح للجامعة احط مسكرة وحسست حييييييييل وش السواة معها

أختي الله يسهل امرك ان شاءالله ويعديها على خير ..

شوفي حبيبتي مو ضروري تكذبي على خطيبك صارحيه ان مده العلاج لازم تكون كامله وانتي ماسويتي

هالشيء الا علشانه من شان مايزعل ويوقف معك ..

أهم شيء حبيبتي ماتجازفين وتتزوجين وانتي تأكلينها انتي عارفه باالمؤثرات واذا مو

قادرين تأجلون الزواج خلاص وقفي الكورس قبل الدخله بشهر ..


موفـــــــــــــــــــــــــــــــقه اختي الله يتمم عليك وعلينا بالكوس

وبالنتايج الطيبه يارب:(..