تفكرين في طليقة زوجك؟؟ صدفتي غريبة جدا

السلام عليكم ورحمه الله وبركاته




اخباركم حبيباتي


حصلت معاي صدفه غريبه وانا مااحب احكي اموري لاي شخص غير امي وزوجي واحس باحساس مختلط غريب جدا


مجرد فضفضه وحابه اشوف آرائكم


انا متزوجه من شخص منفصل من غير أطفال زواجه دام سنة والنص بالمحاكم ، المهم انا طبعا ما كنت ابي اتزوج مطلق ابدا بس لقيت فيه أشياء كثيره كويسه فتوكلت على الله . زوجي خطبني بعد سنتين من طلاقه ..


بالبداية كنت اغار من طليقته خاصه اني شفت بعض اشيائها الخاصه وبطاقات اعياد وزعلت كثير بس كبرت عقلي ماادري ليه مرات اذا اروح أي مكان اناظر في اللي حولي يمكن هاذي يمكن ذيك لا شعوريا ..


بس بشكل عام مو مهتمه وعايشه مبسوطه الرجال صار زوجي ومستحيل يرجعها مافي شي يربطهم هو وأهله يكرهونها لانها تسببت في مشاكل كثير بسبب عصبيتها هي مريضه نفسيه عندها أعصاب وتتعالج ولازم تأخذ الحبوب على طول . والمواقف والاحداث اللي عاشها زوجي واهله كانت زي الأفلام المهم حتى زوجي مادخل في تفاصيل عنها وماحب يتكلم عنها وستر عليها هالشي عرفته على مدى سنتين ونص عمر زواجي ومن الناس لما سألنا عن زوجي وأسباب طلاقه حتى من أهلها قبل زواجي .


الصدفة الغريبه اللي حصلت معاي من يومين واللي تاركتني بشعور مختلط جدا ..


قبل 6 سنوات خطبني واحد وانا ماحبيت الشوفه بالبيت واحنا ماعندنا البنت تظهر لخاطب من غير عبايه . المهم رحت انا وامي وهو واخته لمطعم وجلسنا الولد مستحيل كنت أوافق عليه مش من ثوبنا ابدا احنا عايله ملتزمه وهم متحررين بزياده . اللي استغربت منه ولين اليوم ماانساه واذا يذكرون الخطبات الغريبه دايم اذكر هالخطبه . اخته كانت عصبيه جدا لدرجه تهاوشت مع اخوها واحنا جالسين وقالت انها دكتوره وبرضو تعمل مع زوجها عندهم محلات وانها مو فاضيه لازم تروح بسرعه واخذت شنطتها ورمت كل اللي فيها على الطاوله علشان تبغي ورقه صغيره منحشره ماشافتها . وبعد يومين اتصلت لامي امي قالت لها مافي نصيب وقامت تصارخ على امي أصلا احنا مانبي بنتك وبنتك مو نحيفه وجبنا لها عصير ما تنزلت تشربه واحنا سألنا عنها كثير والناس قالت بنتك دايم ترفض الخطاب المهم امي ردت لها ما سكتت وقالت لها البنت أصلا رشيقه بس لانها مره مره نحيفه وسألتها هذا هالكلام من عندها او من اخوها قالت الصراحه من عندي اخوي يبي البنت وارجوكم ردو علينا . بعد يومين برضو رجعت كلمت اختها الكبيره تعتذر وتطلب نسوي الفحص وكذا المهم اعتذرت منها امي كلمونا كم مره بس انس بعد اللي صار خاصه .




تعرفون هالبنت العصبيه من طلعت ....طليقه زوجي شفتو الصدفه الغريبه وبذيك الفتره كانت زوجه زوجي وتتكلم عنه وتعمل معه سبحان الله ماحبتني شكلها اخذ اخوها اخذت زوجها . انا من اول ما تزوجت زوجي وهو يحكي لي انه اختياره كان خطأ كبير وانه كثير خطب بنات وماعجبوه وانا زي ما كتبت هالخطبه الغريبه مانسيتها فقلت له الموقف وحزتها هو عرف لانها كانت معه وتخبره بالتفاصيل . بس وقتها ماحب يخبرني . قبل يومين بس جالسه بس كذا ولا عبالي طبعا وجات في بالي المقارنات بالصدفه بين هالبنت وطليقه زوجي فسألته مع اني مااحب اجيب سيرتها ابدا عن اخوها قبل مااكمل كلامي قالي اللي في بالك صح . وجلسنا نضحك نضحك صدفة غريبه بس انا مصدومه ومستغربه مره الناس حتى مو من منطقتنا سبحان الله كيف الدنيا صغيره .


بس ابشركم مو مره حلوه وكذا البنت عادية :)


بس ليه هالاحساس الغريب داخلي مو قادره اناظره حتى وهو كل اشوي يناظرني ويضحك ويقولي راح وانتهى نحن هنا .