السلام عليكم ورحمه الله وبركاته
طبعا انا الفتره الاخيره صايره مسنتررره 24 ساعه فقسم التنظيف والاجهزه الكهربائيه بسبب التعب والارهاق الي جاني من شغل البيت الي مايخلص
كنت ادور حلول تخفف شي من الشغل وقعدت افرفر القسم واشوف مواضيع البنات لين طاحت عيني عمواضيع مكانس الموكيت
لي 8 سنين ساكنه بيتي والموكيت ماتغير من سكنا لانه ايجار قلنا حرام نتخسر فيه مايسوى وبصراحه رااافع ضغطي مررره نوعيته موكويسه والشعر ملبد ونايم من كثر الاستخدام وجربت مره انظفه بيدي يااارباه احس طلعت لي عضلاااات وانا افرك
المهم قلت اجرب المكنسه يمكن تفيد مع هالعله الي عندي
واحترررت كثير بالانواع بالاخير رسيت على هوووفر الحب 😍
كهربت بيتي كلها 110 والي بالسوق كله 220 فالي سويته اني طلبتها من موقع امريكي ووصلتني فخلال اسبوعين ونص تقريبا ومن الحماس اول ماوصلت ركبتها وشبكتها واستخدمتها خخخخخخ
التكلفه الاجماليه مع شحنها من امريكا تقريبا بحدود 1200 ريال
هذرت عليكم واجد يلا نشوف الزبده
هنا اول ماوصلت الجميله

وهنا محتويات الكرتون


هذا بعد ماطلعتها كانت مفككه قطعه قطعه ودوختني شوي فالتركيب

وهنا بعد العمليه خخخخخ

طبعا لو تلاحظون المكنسه فيها جالون علوي للمويه والشامبو وجالون سفلي تتجمع فيه المويه الوسخه الي تنشفط من السجاد
وهذا زر التحكم بقوه الفرش .. قوي او ناعم او بدون دوران ومهمته ينشف الموكيت

وهذي العلامه الخضرا تاكدو انها تدور دورانها يعني دوران الفرش واذا واقفه يعني في مشكله في دوران الفرش

هذا زر الشامبو العادي

هذا زر الشامبو العميييق يحطلك كميه شامبو مضاعفه للاماكن الشديده الاتساخ

هنا فتحه نشبك فيها الخرطوم الخاص بالقطع تبع الكنب والدرج

وهنا شكل المكنسه من ورا معلق فيها السلك الكهرب والخرطوم تبع التنظيف كلن في مكانه

اول شي شوفو صور الموكيت قبل التنظيف بالهوفر .. طبعا كنسته بالمكنسه العاديه زييين عشان اي شعر او بقايا تروح خفت تخرب المكنسه علي



هنا الجالون العلوي فكيته من المكنسه وحطيت الشامبو داخله بعدين عبيته مويه حاااره الى الخط الي وضحته لكم بالسهم
وطبعا انا زدت من عندي حطيت مع المويه كلوركس الملون لزياده التنظيف

الشامبو نحطه نفس العيار هذا 5oz والمعيار هذا هو نفس الغطا حق الجالون

وهنا قفلناه استعدادا للمهمه الصعبه

وركبناه

بسم الله نبدأ
طريقه الاستخدام: ابدأي من احد الجنبين يمين او يسار الموكيت ومشي المكنسه لقدام وبنفس الوقت اضغطي زر الشامبو العادي وبعدين رجعي المكنسه لورا واتركي الزر بنفس الوقت بتلاحظيها قاعده تشفط الصابون الي حطيتيه واستمري رايحه جايه عنفس المكان بدون ضغط الزر وهالحركه تساعد الموكيت انه ينشف بسرعه



شوفو كيف تشفط الصابون ماشاءالله


بعد ماخلصت نص الغرفه لاحظت ان خزان المويه الوسخه امتلى وصوت المكنسه صار عالي كانها غصت(هذا مؤشر يدلك على ان جالون المويه الوسخه امتلى) والخزان العلوي بدا يفضى
وقفت وفرغت الخزان السفلي وشوفو كيف المويه الي طلعت يالطييييف




غسلته عالسريع وعبيت الخزان الثاني مويه وشامبو ورجعت اكمل شغل

والحمدلله خلصناااااا شوفو النظافه والريحه الخياااليه شي يفتح النفس خاصه لمن تشوفي كميه الوسخ والاتربه الي طلعت


لاحظو يابنات الموكيت عمره 8 سنين ونوعيته مش ولابد بس ماشاءالله مع المكنسه الشعر وقف ورجع زي الجديد والنتيجه جدا مرضيه بالنسبه لي
طبعا حاولي قد ماتقدري ماترجعي تمشي عالموكيت لين ينشف
وتقريبا اخذ معاي ساعه وبعدها نشف تماما بدون مكيف ولا مرروحه
وهذي الفرش الجميله بعد ماخلصنا تجمع عليها كميه شعر موطبيعيه

لسى ماخلصنا
المكنسه لها ملحقات واحد لتنظيف الموكيت والستاير وغيره
والثاني لتنظيف الدرج والزوايا والسجاد الصغير وهي القطعه المثبته في مقدمه الجهاز فوق
هذا شكل راس الخرطوم قبل اركب عليه القطع المخصصه للتنظيف
ركبت قطعه الكنب ونظفت جزء منه عالسريع بس للتجربه
نرش مويه ونمشي القطعه عالكنبه قدام وورا راح ينشفط الصابون وتنفرك الكنبه بنفس الوقت
لاحظو الاتربه الي تنشفط
وهنا قطعه الدرج نظفت فيها قطعه سجاد صغيره عندي بنفس الطريقه
اظغط الزر عشان بنزل الصابون والفرشه تدور فنفس الوقت وتنظف المكان وبنفس الوقت الصابون ينشفط وياخذ كل الاتربه والاوساخ معه
بعد التنظيف
طبعا فالصور مو واضحه مره نفس الطبيعه
طبعا جربت المكنسه عالسيراميك لانها تنظفه برضو بس ماعجبتني لانها تتركه رطب شوي غير عن انها مو عمليه عالسيراميك بسبب ثقلها:09:
وطبعا صوتها مايحتاج مززززعج بس كله يهون جنب النظافه والريحه الحلوه:laugh2:
فالنهايه اتمنى اكون افدتكم ويعلم ربي التعب والجهد والوقت الي اخذه مني ترتيب وتنزيل وتنسيق الموضوع لكن كل هدفي مساعده بنات حواء ولو بالشي القليل لان كثير محتارات مثلي ومايلقون مواضيع او افاده كافيه
وباذن الله راح اعمل لاحقا تقرير عن غساله الصحون الجديده بوش لمن يركبها لي ابو الشباب :eek:
ولاتنسوني من دعواتكم :)