بسم الله الرحمن الرحيم
والصلاة والسلام على أشرف الأنبياء والمرسلين سيدنا محمد وعلى آله وصحبه آجمعين
بسرد لكم مقتطفات من رحلتنا ( للبلاد الساحره ... تركيا )
معلومات عن الرحلة
موعد الرحلة :السبت 25-9-2010 الساعة :2,00 الظهر
الطيران : القطريه
مدة الطيران :3 ساعات
طبعا رحلتنا كانت مدتها 10 ايام توزعت بين ( اسطنبول – بورصه – يلوا - ابانت – اسطنبول )
وكننا انا وزوجي وعيالي التوأم ( بنت و ولد - 3 سنين )
خلكم معاي
:26:
الحمدلله كانت الرحله خفيفه وسريعه يمكن من ملاحقتي لعيالي ... اسكت يا ولد اقعدي يا بنت .. لا تضغط بقوه على الشاشه .. ناموا شوي .. بس الحمدلله كانت زينه
هذي وجبتنا
و هاي من السما ... الناس مقيله وانا اصور
طبعا بما ان رحلتنا كانت الساعه 2 الظهر .. كان وصولنا مطار اتاتورك الساعه 6 المغرب وكانت الشمس للحين ما غربت ..
اتصلنا في السايق اللي بيوصلنا واسمه احمد .. و جاننا معاه باقة ورد >>> ناس ذويقه هههههههههههه .. وبنتي فرحانه تقول هاي ورد عرسي >> ناس مطفوقه هههه .. ورحنا على فندقنا اللي قعدنا فيه ليله بس في منطقة بايزيد و اسمه legacy ottoman hotel مقابل ميناء امينونو
وهذي صور له من النت ما لحقت اصوره ..
ايجابياته :
*مكانه حلو بين ممرات محلات ومطاعم .. بس مش الاماكن اللي بالضبط نبيها مثل شارع تقسيم بس كان اوكي .. يمشي بالنسبه لـ ليله ..
*قريب من ميناء امينونو ..
* عجبني فطورهم ..
سلبياته :
* الغرفه جدا صغيره وضيقه .. الحمام بعد نفس الشي يادوب الواحد يتحرك .. طبعا الحمام ككل حمامات تركيا و انتوا بكرامه ما فيه شطاف ..
*المنطقه القريبه من حواليه تموت بدري >> اقصد تظلم و تسكر المحلات ..
ما عدا لك كان الفندق يمشي الحال ... واقيمه 7 من 10 ..
طبعا ما بغينا الليله تروح علينا .. صلينا وريحنا وطلعنا ننتطقس ونشوف المنطقه من حولنا ..
مشينا مشينا
لين عند المينا ... ماشالله عالم فارشه بسطاتها وتبيع ... و ريحة السمك تدخل في النافوووخ ...
وكان هالمسجد Yeni Camii يطل ع المكان ..
و تمشينا عند المحلات اللي عند محطة الترام ..
بعدها جعنا مرينا مطعم حمدي .. وكان اكله حلو ... وخاصة الكنافه شي ثاني ..
واحنا راجعين الفندق رش علينا شوي مطر مع براد خفيف و منعش.. و كان يوم حلوالحمدلله .. وتابعوني في يوم الثاني الى بورصـــه