ربما تجدون مشاركتي قليلة لكنني صديقة قديمة للموقع
وأشكركم جدا لمساعدتنا ولمد يد العون
اسأل الله يجزاكم جنات الفردوس
وهذه مشكلتي بين يديكم
لعل الله يبعث لي الفرج ولا يذيقكم مكروها قط
أرجوا أن تكون مشكلتي في القسم المناسب
وأرجوا سرعة المساعدة قبل يوم السبت
وأرجوا من كل الذي يقرؤون المشكلة أن يدلوا بدلوهم لعل وعسى يكون فيه فرجا أو تنبيها
أترككم مع المشكلة " وبكتبها بالعامي عشان اعبر زين "
...........................
مشكلتي ان قبل 3 سنوات تعرفت على وحده بالجامعه
هي كانت صديقة صديقتي ومع الايام صارت صديقتي
اسمها عبير
هي مو سعوديه من جنسية عربية لكن اخذت الجنسية
ووالله ماتستاهل الجنسية لأنها تمشي وتسب بالسعوديين وتمدح ديرتها الاصل
حتى البنات يقولون كيف مخاوينها وهي تسب بس حنا دلووووخ ومع الايام اتأكد اني غبيه اكثر واكثر
المهم هالبنت صارت تتلصق فيني ودائما تلمسني
ويوميا الصبح تضممممممممني ساااااااااااااعه وياما سمعنا كلام من البنات وتلميحات ونظرات
غير كذا تضم بقوة والله ان مره عورني صدري اكثر من اسبوعين بسببها
وقلت لها خلاص ضم وحركات نص كم ما ابغى
صارت تسولف سواليف وسخه وكل كلامها عن غشاء البكارة والله انا مجرد مستمعه استحيييييي وهي ولا همها ولا بوجهها ذرة حيا
ومن ضمن هالسوالف تقول ان بديرتها الاصل بكل سهولة يسوون عملية ترقيع الغشاء وبرخص التراب
< كأنها تلمح لي انه عادي لو خسرناه نقدر نرجعه وبسهوله والعياذ بالله :angry2:
وقلت لها هالسواليف مابيها وتركت هي هالسوالف
وصارت بس تزعل على اتفه الاشياء
لو اكح زعلت والله اشياء تاااااااااااافهه تزعل عليها وتروح للمصلى حق الكليه وتقعد تصييييييح
ويجون البنات يعاتبوني ويقولون ليه تزعلينها هي حساسه وماتتحمل تحمليها عشانها تحبك ومن يحصل له احد يغليه ويحبه ومن هالكلام
احيانا اراضيها واحيان كثير اطنشها
واستمرت ع هالحال 3 سنوات
ماكانت تبيني اصادق احد وكانت تحاول تفرق بيني وبين صديقاتي لحد مانجحت وشتت الشله وانا مادريت انه مخطط منها
حسبت الله كشفهم وصارت مشكله وتفارقنا
وبقيت بس انا وهي وبنتين ثانيات وكانت مره تلتصق فيني وانا كنت اتهرب واطنش واسوي نفسي ما انتبهت او ما ادري
واحاول ابتعد بطريقة غير مباشرة
لما مره من الايام قالت انها هي اللي سببت المشكلة وفرقت بيننا تنتقم مني لأن ضحكت عليها بالمحاضرة مع العلم كل الشلة ضحكوا وما انتقمت الا مني !
المهم السنه هذي وهي السنه الثالثه صارت من بداية السنة بس تدوخ وتتشنج يوميااااااا
بالبداية خفنا عليها لأن شكلها مره يخوف كأن فيها مس بسم الله تقعد تتشنج وماتقدر تتكلم ولا تمشي
وتسوي حركات غريبه بيدينها وتصرخ فجأه
انا للمعلوميه فيني آلام بالمفاصل ومع ذلك كنت اشيلها مع البنات وثقلها كله علي
وكنت ادفها بالعربيه لين باب الباص وانا فيني مفاصل والله اروح للبيت يدي اعجز احركها من الألم
وكل يوم فجأة تصرخ وتدوخ وتحوسنا حوس مايعلمه الا الله
نصير فرجه للبنات ونسحب ع محاضراتنا عشانها وعشان نقعد معها ونوصلها لباب الباص من دون ماتحرك ولا عضو
الاخصائية اللي بالوحده استغربت قالت هذي الاعراض غريبه جدا ودقت على ابوها ووداها ابوها لمدينة الملك فهد الطبيه وقالوا سليمه
عقبها البنت صارت ماتبي الوحده الصحية واذا داخت ترفض رفض قاطع انه نوديها للوحده
وحنا غبيات وساذجات نتحمل ومانوديها
لما مره داخت وتشنجت بقاعتنا << للمعلوميه هي بقاعه ثانيه مو معنا وهذاك اليوم عندها اوف بس جت مدري ليه وجايه طاقة الزين واول المحاضرة تشنجت علينا
انا هنا بديت اشك
كيف تعبانه وطاقة الزين ؟
ومن جت وهي مكشرة وتدور علينا الزلة وتشيش لأتفه سبب
وعندها اوف ليش جت من الصبح وهي تقول ياشر اشتر
مدري جاني شك واحساس انه فيه شي
وفشلتنا قدام الدكتورة وقدام بنات القاعه وقلت خلاص بنوديها للوحده احسن خليهم يكلمون اهلها يدورون لها حل
ملينا الى متى كذا
والله بكل بريك تسويها ومانتهنا ببريكاتنا من الترم الاول لحد الترم 2 وهي كذا
كل ماتقهوينا والله مايمدينا نشرب فنجال الا تسويها
ولو قلت لها حرف سوتها والبنات يعاتبوني يقولون تعبتي نفسيتها وجتها حالتها
المهم بهذيك اللحظه صممت انه نوديها للوحده لان من جد ملينا مو حاله هذي
كل يوم كل يوم كل يوم كل يوم كل يوم كل يوم
المهم قعدت تصارخ وماتبي الوحده ومدري ايش قالت بروح للمصلى قلت طيب بنوديك للمصلى
وغمزت لصديقاتي انه بنوديها للوحده بس لاتدري
وفعلا وديناها للوحده وعند الباب صار شي
الا وهو انه الشخص اذا صار متشنج ودايخ تكون قوته ضعيفه صح ؟
وانا صديقتي قعدنا نسحبها نحاول ندخلها للوحده وهي تسحب نفسها بتهرب
كيف وحده دايخه ومتشنجه قدرت تقوى بنتين ؟؟؟ لأن احنا 2 عجزنا نقواها وندخلها
وبعدين كنا شايلينها كيف فجأة وقفت ع رجلينها وبتهرب بعد !!!
بس الحمدلله اللي بالوحده مسكوها معنا ودخلوها واول ماشافتها اللي بالوحده قالت ايه هذي فلانه الفلاني ؟
استغربنا كيف عرفتها وهي لها فتره ترفض تروح للوحده
المهم قالت الدكتورة "وحده ثانية غير الاولى اللي دقت على اهل البنت " خلاص خلوها ترتاح
ويوم طلعنا مسكتنا وقالت وش تتوقعون اللي فيها
قلنا يمكن مس
قالت لا هذي .....<< وهنا الفاجعه
قالت انها تمثل
وقالت انها لها 28 سنه بالوحده الصحيه مروا عليها ممثلات اشكال والوان بس مثل هالابداع ماشافت
وانها من الترم 1 كاشفتها واللي بالوحده عارفينها وكاشفينها
وقالت انه اذا طلعتوا تقوم مثل الحصان مافيها شي
وقالت اتركوها شوفو كيف من نفسها بتطلع وبتركب الباص
انصعقنا معقوله تقريبا سنه كاملة تلعب علينا يومييييييييييا وحنا ياغافلين لكم الله !!!!
انا المريضه اوصلها للباص وهي مافيها الا العافيه واصح مني !!!
المهم تركناها هذاك اليوم وفعلا طلعت ولا كأن فيها شي ولا كاننا كل يوم نطلعها بعربيه
واللي بالوحده قالت ان الدكتورة الاولى ماكانت تدري انها تمثل لكن الدكتورة الثانيه ماشاء الله نبيهة وعرفت
حولتني لأخصائية نفسيه قالت عشان نتابع معها الموضوع ونعرف كيف نتصرف
قالت لي الاخصائيه انتم لاحظتوا عليها حركات جنسيه ؟؟ انا هنا تذكرت كل بلاويها وقلت لها
قالت ايه هي شاذة وتبيك بأي طريقة
وفعلا كانت اذا داخت تقعد تلمّسني وانا قلت لا اكيد هي ماتحس بنفسها ولا تشوف هي وش قاعده تلمس والله كذا كنت افكر
وكانت اذا داخت تقعد تقول لي احبك واغليك ولاتتركيني ومن هالكلام وبقية البنات تطنشهم وماتقول لهم شي
هذا دليل انها تبيني انا بس << الله يعظم اجري بحياتي محد حبني ويوم انحبيت حبتني وحده مو صاحيه
المهم قعدنا نتذكر حركاتها معنا قالت وحده من صديقاتي انه لما كنا نشيلها كانت صديقتي تحاول تشيل بس لاحظتها انها ترمي نفسها علي
يعني صديقتي تحاول تساعدني بس عبيروه ترمي نفسها وثقلها علي انا << من زين مفاصلي الله لايحللها الغداره
المهم قالت الاخصائيه حاولي تسايرينها وقولي ماقدر اشيلك عشان مفاصلي
واذا سوت هالحركات خلوها قولوا ان الدكتوره قالت انها تتوهم و خلوها تعتمد على نفسها
وفعلا سوينا كذا لين هي تركت هالحركات من نفسها وقالت انها تعالجت سبحان الله بين يوم وليله تعالجت تماما
بس احنا نعجز نتحملها بس مكشرة طول الوقت وتتمشكل مع الدكتورات والمشرفات وتنافخ وتهاوش بأعلى صوتها فشلتنا
وكل شوي تحلف لنا تقول مو قصدي اتعبكم
وانه غصب عني ادوخ وموقصدي اتعب مفاصل ليلى < الا قصدها ونص
صرنا نتهرب منها لين قلت خلاص ليش نسوي كذا ونلف وندور تعبنا وكأننا هربانين من جريمه مسوينها وحنا ماسوينا شي غلط ابدا
المهم مره الظهر طلعنا كلنا وبقيت صديقتي جت عبيروه وقعدت تتكلم معها وتقول ادري ان ليلى متضايقه مني واني متعبتكم وتقعد تحلف كذب انه الدوخات غصب عنها
المهم قالت صديقتي خلاص اتركيها وش يضرك عندك صداقات غيرنا اذا تحبينها اتركيها قالت خلاص بتركها بس عشان ترتاح
قلت انا خلاص دامها عطتنا ضوء اخضر انه فيه امل تنقلع عننا
كان عندنا تربية عملية يعني نروح للمدراس المتوسطه ونتدرب ع التدريس
ورحنا بعد كذا لمدة اسبوعين متواصلة لمدرسة متوسطة وخلال هالاسبوعين ماشفناها
ولما خلصنا ارسلت لها بالجوال قلت خلاص لاتجيني ولا تكلميني اللي بيننا انتهى
انا من فترة المح لها اني بتركها لأن تعبتنا معها غير الدوخات فيه نفخ وهواش وتدور المشاكل بمنقاش ملينا كل يوم مشاكل وهواش ونفخ مو حاله
المشكلة ماذكر اننا عشنا معها لحظه حلوه
دايم مشاكل وهواش ونفرح اذا غابت يعني على وش نصبر ونتحمل شين وقوي عين
المهم كنت المح لها انه هي اللي رفستني برجلها وهي بهالتصرفات تخلينا نتركها ونكرهها
يعني ماجاها الموضوع فجأه
المهم قعدت تدق وما ارد وارسلت رسالة طويله عريضه تحلف فيها انه غصب عنها تدوخ وماكان قصدها تتعبنا
فوق التمثيل تحلف كذب !!
المهم لما صار من بكرا غابت بعدين اليوم اللي بعده جت ولقيتها منتظرتني عننند باب الدخول
ومسكتني وكان ورانا مكتب الامن وكانت وحده من الامن تطل من الشباك << لاحظوا
المهم قعدت تتمسكن وتقول اني احبك وماكان قصدي وانه غصب عني << مصرة ع الكذبه
المهم قلت خلاص مو قلتي بتتركيني خلاص اتركيني قالت بس بقول لك كلمتين قبل ماتروحين قلت يلله قولي
قالت انا احبك واسرارك ماراح افشيها وانا وانا وانا الخ
قلت خلاص عُلِم ومشيت جت فجاة مسكتني وقامت تنافخ بصوت والله كأنه زئير اسد والله ما ابالغ صوتها عالي بشكل مو طبيعي
والله ماشفت صوت عالي مثل صوتها الله يسلط عليها من لايرحمها مثل ماتسلطت علينا
المهم قامت تنافخ وتقول كل هذا عشان اخو حنان << لأن مره نستهبل قالت بزوجك اخوي قلت لا ابغى اخو حنان مع العلم انه صغير
بس هي حبت تفضحني وتفشلني قدام الخلق او بتبين للناس انه الهوشة بسبب رجال
المهم قامت تنافخ واخو حنان واخو حنان والله البنات تجمعوا وصرت فرجه الله لاااااااااااايوفقها
لدرجة ان البنات اللي بالكافيتيريا طلعوا يشوفون وش السالفه
قلت لها لاتنافخين قالت انتي اللي تنافخين !!!!! الحين كل هالهواش بالاخير صرت انا اللي انافخ ؟؟؟
المهم والامن مطيره عيونها علينا وفيه امن ثانيه تحوم حولنا احس ودها تتدخل بس مدري كيف
المهم قلت بصوت عالي ترا اعلم عليك الامن قالت علميهم مايهموني بالطقاق وتقولها باستحقار << والامن قدامها تخيلوا جرأتها ووقاحتها
اصلا الاخصائية قالت انه هالنفسيات مايهمها احد ابد اهم شي توصل للي تبيه حتى سمعتها ماتهمها
المهم نافخت لين طلع اللي بقلبها ولين ملت وانا ماعرفت ارد وسكتت ورحت
قلت خلاص اخيرا رميت همها وافتكيت وكان عندنا ذاك اليوم اختبار شهري
رقيت عند صديقاتي وحنا نراجع حول القاعه جت من بعيد وعيونها كلها شرار
على اساس خلاص خلصنا مدري وش رجعها المهم قامت بأعلى صوتها والله ياعليها صوت قسم بالله ماشفت مثل عليته
المهم قامت تهاوش وتنافخ وليش تسوون كذا ومين فتن علي ومين قال لكم ولاتصدقون اللي بالوحده <عارفه انهم كاشفينها
ومن هالكلام قلت لصديقاتي خلوها تنبح لين تمل وتنقلع
والله قعدت حول ساعه قسم بالله ما ابالغ طووووولت وهي تنبح اهب على هالحلق اللي ماتعب اخر شي جت بنت بتصلح بيننا الله يجزاها خير
قلت ماراح اتكلم ولا اقول شي الا عند الاخصائية النفسيه
قلت البنت خلاص روحوا اختبروا وبعد الاختبار تلقينها عند الاخصائية قالت عبيروه اكيد وقعدت تتوعد قلت ايه خلاص نروح هناك وسفهتها ورحت للقاعه
والله عجزت اختبر واحس يديني فيها رجفه وعجزت اركز عقب البلاوي اللي سوتها لي ع الصبح
ورحنا للأخصائية وقعدنا حول ساعتين
والاخصائية تحاول تقنعها تقول خلاص شي عادي وحده ماتبيك ليش تسوين كذا روحي وانتهينا ليش الصراخ والفضايح
وهذيك رافضه وتصيح وتصارخ والله حتى الاخصائية عجزت تقواها
الاخصائيه تحاول تقنعها انه عادي كل الناس كذا يتفارقون مافيها شي بعضهم تتزوج 20 سنه ويتركها زوجها بعضهم صداقة 10 سنين ويتركون بعض ولا سوو كذا
المهم اخر شي قالت الاخصائية خلاص اطلعي يا ليلى بتفاهم معها واذا طلعت تعالي
وطلعت وطوووووولت عبيروه عندها ويوم طلعت تصيح ولا ناظرتني وراحت ودخلت انا عند الاخصائيه
قالت خلاص هانت البنت قالت خلاص بتتركك واذا سوت لك اي شي ولو قالت اي كلمه على طول تعالي خبريني
وقالت انتبهواااااااا تردون عليها مهما قالت ومهما سوت لالاتتكلمون هي تبي منكم كلمه عشان تسوي هوشة وتلقى شي تشيش عليه
اسكتوا ولا تعطونها امل انه بيطلع منكم حرف عشان تيأس
واخذت بنصيحتها وقلت الحمدلله انتهينا وافتكينا
عقبها هي غابت بعدين حنا كلنا اتفقنا وغبنا
وبعدين يوم داومنا الصبح تلاحقنا وحاطه الجوال بوجهنا ماشالته ابدا
ووين مانروح هي ورانا وتتعمد تجي على جنب وتحط الجوال بوجهنا بطريقه غريبه كأنها تقول ايه هذاني اصوركم
مره واضحه حركتها
المهم سفهناها ومشينا ولا كانها ورانا اخر شي قامت تصارخ وتقول يالظالمات ياللي ماتخافون ربكم << قدام البنات والناس يتفرجون
يا الله وش هالبلوى
انسانه مو طبيعيه الله لايبلانا
وبرضو وهي تمشي ورانا تصارخ و تقول بقعد على قلوبكم ماراح اروح ووراكم وراكم تذكرت الاخصائية يوم تقول اي شي تعالوا لي على طول
وفعلا رحنا لها لقيناها مابعد جت
قالوا ماراح تجي الا ع الساعه 10
رحنا بنحضر محاضرتنا ويوم دخلنا جت معنا مع انها مو معنا في الشعبه بس نجاسه بتلصق فينا
وكنت حاطه كيستي ع الكرسي جت رمت كيستي ع الارض وجلست ع الكرسي تعاند
وسفهناها ولا كأن احد يسوي شي ماقلنا ولا كلمه ولا ناظرناها ماكأنها موجوده وهي تنافخ وفرجت العالم علينا
وبعد المحاضرة رحنا للأخصائية قالت الاخصائية خلاص روحي وخليني معها
وقعدت فترة طوييييييييييييييييلة يتكلمون واسمع صراخها وانا برا الغرفه بس ماعرفت وش يقولون واساسا ماحاولت اعرف وش يقولون قلت اخاف اسمع شي يضيق صدري زياده
لأنه عندي مشاكل غيرها والله عندي مشاكل مو فاضيه لها هي وشرها الله لايحللها
المهم بعد مده طويله طلعت تصيح وتشاهق وراحت دخلت ع الاخصائيه
قالت خلاص هالمره اكيد ماراح تتعرض لك عقبها وقالت انها تقول اني انا اقول لها كلام وسخ !! << تتبلى علي الظالمه
بتقلب السالفه علي المهم قالت الاخصائية خلاص انا حاولت بكل قوتي ولنا شهرين نحاول معها عجزنا خلاص المره الثانيه لاتجيني روحي للأمن على طول انا خلاص حاولت وماقدرت
وش اسوي ياربييييييييه حتى الاخصائية على قوتها ماشاء الله عجزت تقواها << الاخصائية ماشاء الله عندها سرعة بديهة والله قويه ماشاء الله ومع ذلك ماقدرت
المهم صارت بس تدق ع جوال امي و ع جوالي < انا قلت لها اني غيرت رقمي عشان ماتزعجني
صارت بس تدق ع جوال امي من رقمها ومن ارقام غريبه صارت امي ماترد عليها
مع العلم امي ماتدري عن كل اللي صار ولا تدري عن مشاكلي الثانيه ابدا انا ماحبيت اضايقهم بقرادتي وسوء حظي
وقلت لامي لاتردين عليها لأنها تقهرنا قالت وش سوت لكم ؟ قلت ماسوت شي بس تصرفاتها كأنها بزر ومانبيها
وماقلت لامي الحقيقة
والله ثم والله ثم والله اني ما اذيت احد هي كذا المشاكل جتني والله ماغلطت ولا اذيت احد بس الحمدلله ع كل حال
المهم الحين لنا اسبوع مانداوم لأنه الاختبارات النهائية السبت القادم يعني بعد 3 او 4 ايام تقريبا
فـ صرت ما اشوفها بس ازعجتنا بالاتصالات وترسل ع جوالي رسايل فاضية مادري تجس النبض او بتتأكد انا غيرته ولا لا مدري عنها
الحين ابيكم تساعدوني
تكفووووووووووووون ساعدوني والله انا بحاجتكم
ماعندي احد يساعدني الا الله ثم الاخصائية والحين الاخصائيه غسلت يدها وتبرت من هالقضية
تكفون قولولي وش اسوي كيف اتصرف ؟
انا متاكده بالاختبارات بتنشب لنا وبتسوي مشاكل
اخاف ماقدر احل عارفه نفسي اذا تضايقت تجيني رجفه بيديني ورجليني حتى يوم شاشت علينا وتمشي وتقول يالظالمات والله عجزت امشي جتني رجفه بجسمي وقعدت ع الكراسي
الحين وش السواة الله يجزاكم الجنه
وش اسوي
وغير كذا كل شوي اتذكر يوم تغز الجوال بوجيهنا اخاف تنشر صورنا ولا شي لأنها من جد ماااااااااااتخاااااااف ربها ولا تخاف من احد ابد
افكر اقول للعميده
والامن اخاف مايتجاوبون معي او مايسوون شي يوقفها عند حدها
"من فرج عن مؤمن كربة فرج الله عنه كربة من كرب يوم القيامه "
تكفون ساعدوني والله ماعندي احد ولا اعرف لمين الجأ بعد الله سبحانه
و انا وصديقاتي دايم ندعي بالثلث الاخير وبأوقات الاجابه
بس قلت نشاور ذوي العلم والخبرة يمكن الله يبعث الفرج من خلال احدهم
ارجوووووووووووووووووكم ساعدوني الله يجزاكم الجنه
بنات اعذروني اسلوبي ركيك ومدري كيف
بس من قلقي ونفسيتي الزفت عندي مشاكل الدنيا
صدق المصايب تنزل جميع بس الحمدلله ع كل حال
ويمكن تحسون مشكلتي تافهه او اني مكبرة الموضوع
بس تخيلوا احد لاصق فيكم ويصارخ قدام الناس من ادخل الكلية القاها عند الباب
وتلصق فيني وتقعد تصارخ وتسب فشلتني و أخزتني الله يخزيها
ولا نفع معها امن ولا اخصائية ولا شي
قولي دايم اللهم اكفنيها بما شئت
وقولي اللهم اا نجعلك في نحورهم ونعوذ بك من شرورهم
الله يستر عليك ويفرج همك اكثري الدعاء والاستغفار والصدقة
لاحول ولاقوة الا بالله العلي العظيم