تكفوووووووون خواتي الشك بيدمرني مو عارفة شسوي

بنات ساعدوني ما عندي أحد أتكلم معاه

الشك بيذبحني وبيدمر حياتي ومو قادرة أسوي شي

بصراحة ما أدري شقول زوجي يحبني وعمري ما شفته متغير علي في الفراش
وبالعكس لمن نكون متزاعلين وتطول المدة لإسبوع مثلا يجي حتى لو ما أعتذر يقول لي أنه محتاج هذي الشغلة (.......)
وهذا معناه أنه ما يروح لوحدة غيري

بس هو كان دايما يروح مقاهي انترنت عشان أنه دايما أقفشه وهو داخل شات وتهاوش معاه وأقول اذا ما هونت أنا بعد بروح أدخل الشات فهو قال لي خلاص بهون
وقام فترة يسهر بروحه مع اللاب توب في المجلس وأنا نايمة ومررررررة صارت بينا هوشة كبيرة وقال لي خلاص ما راح أدخل النت الا بالصالة بالجهاز العام

بس مرة نسى يسكر الماسنجر وطلع من البيت وانا جيت جلست ما انتبهت أن الماسنجر مو مسكر فدخل علي واحد من أصحابه ((يعني هو مش من اصحابه بس من ربعه اللي يجلسون معاه بالديوانية ))
وسلم طبعا أنا ما رديت عليه السلام فهو قال داخل بهذا الايميل أكيد أنت في البيت لو كنت في المقهى كان دخلت بالايميل الثاني وطبعا هذا الشخص دايما زوجي يسولف لي عليه أنه راعي بنات ومغازل
لدرجة أنه مرة زوجي كان داخل الشات وأنا كنت معاه فقال شفتي هذا فلان ((....))
قلت له اشفيه قال هذا اللي اسولف لك عنه والحين بسوي فيه مقلب
قام زوجي دخل له على أنه بنت وقام يغازله وذاك مستانس وأنا قلت هذا من جد قذر
المهم بعدين زوجي عطاه موعد على الكورنيش على أنه بنت وهذاك ما صدق خبر وطار على السيارة فزوجي كلمه بعد شوي وهو ميت ضحك وقال له وين أنت
القذر قال أنا بروح الكورنيش فزوجي قال صدق ما تستحي يا قليل الأدب هذا أنا اللي كنت أدردش معاك

المهم هذا القذر لمن قال أنت لو بالمقهى كان استخدمت الايميل الثاني أنا قامت الدنيا تلف فيني وعرفت أن زوجي يروح مقاهي الانترنت وعنده ايميل ثاني لأنه ايميله الأول أنا أعرفه الباسووورد حقه وهو وعدني انه عمري ما راح يضيف فيه بنات

اتصلت عليه على طول وجاني قلت هذا صاحبك يقول كذا وكذا وش سالفة الايميل الثاني واقسم بالله أنه ما عنده ايميل ثاني وأنه ما يرووووح مقاهي الا نادرا وأنه مو راعي بنات وما يعرف لهاسوالف وقال لي أنا أخاف الله أنا عندي بنت وأخاف عليها معقولة أروح ألعب مع بنات الناس
الكلام هذا قبل سنتين صارت بعده أحداث كثيرة وكل مرة توصل بنا الهوشة للسما بس هو يقول إنا لو أعرف وحدة غيرك كان إنت أول وحدة بتعرفين وهو فعلا زي ما قلت لكم ما تغير علي وأنا دايما أتعوذ من ابليس وقول يمكن هذي مجرد شكوك

طبعا هو من النوع اللي ما ياخذ ويعطي مع الحريم لدرجة أن ساعات أقوله أنت تفشلني قدام خواتي اذا ركبوا معانا في السيارة على طول ساكت وحتى لمن حرمة تسلم عليه دايما يرد عليها السلام بصيغة الجمع

لكن هو من ثلاثة أيام سافر عشان شغل وانا أنظف غرفتنا فتحت الدرج الخاص فيه وهو عنده طبع كريه أن ما يرمي القصاصات الصغيرة ويجمعها لين ما تصير الدنيا حوسة يعني قصاصات الة الصرافة او سوبرماركت أو مغسلة أو أي شي دايما يطلعهم من ثوبه لمن يتوسخ ويحطهم على التسريحة وأنا أدخلهم الدرج
فقلت في نفسي اش هالحوسة لازم أفرز هالأوراق وأرتب الدرج
المهم وأنا أرتب شفت تقريبا ثمان كروت حقت مقاهي الانترنت في بعضها مسجل ايميلات بنات
وقامت الدنيا تدور فيني وكان الوقت قريب الفجر طبعا أنا ما أقدر أفتح هذا الموضوع حتى لاهلي حتى لأقرب وحدة من خواتي لي لأني أحبه وما أقدر أسيء لسمعته اللي هي من سمعة عيالي
وأخاف أكون ظالمته
المهم قمت اتصلت فيه وقلت حبيبي أنا شنو سويت لك عشان أشوف عندك كل هالايميلات فقال والله العظيم أنا تبت كانت فترة وعدت وأنا أستحقر نفسي فيها يعني انجرفت ورا هالانترنت وكأني مراهق وكنت اكلمهم بالشات والايميلات تظل عندي وبس
وقام يحلف أن ما في حياته وحدة غيري وأنه ما يفكر الا فيني وفي أولادي وكيف يبني مستقبلنا
وأنا شفته في الفترة الأخيرة حتى الماسنجر ما قام يفتحه وقال تأكدي من تاريخ الكروت حقت المقهى راح تشوفين أنها من أكثر من سنتين
المهم أنا هدأت شوي ورحت نمت لما قمت من النوم قلت خلني أروح أتأكد من التاريخ اللي في الكرت بعضها شفت عليها تاريخ وبعضها من مقهى ثاني ما عليها تاريخ
المهم اللي فيهم تاريخ بالفعل كان تاريخ 4/ 1424 وحدة منهم وأنا أدور على التاريخ شفت فيها رقم جوال وتلفون ومكتوب عليها اسم بنت عسى الله لا يوفقها وخلاص أنهرت وما قمت أشوف دقيت على الرقم وطلعت بنت فعلا
أتصلت عليه وأنا منهارة
قال والله العظيم عمري ما أخذت من وحدة رقم تلفون ولا سولفت مع وحدة أنا أستحي حتى من خيالي يمكن هذا الكرت تركه مستخدم قبلي وانا شلته بالغلط تأكدي من الخط نفس خطي ؟؟
وهو بالفعل الخط طالع شوي غيرلأن خط زوجي مو حلو يعني يمشي حاله
وقال لو عندي ارقام ما بتركهم بالبيت وأنا ظليت أبكي وأبكي وأقوله ريحني الشك بيذبحني فقال لي إنت تبين تدمرين حياتنا وأنا ما عندي في حياتي غيرك

طبعا أنا مو من عادتي أدور في أغراضه بس مرة أتصل وقال لي أنا سكرت السيارة والمفتاح داخل فروحي لدولابي وبتشوفين محفظة طلعي منها المفتاح السبير المهم رحت أدور المفتاح وولدي يدور معاي فقال لي شوفي ماما شريحة جوال حقت سوا محطوطة في المحفظة وهذا الكلام رمضان الماضي1425
لما رجع راويته الشريحة فقال لي هذي أنا شريتها لمن رحت الحج 1424 لأني خفت ما يصير فيه ارسال في مكة وقلت استخدمه فشريتها وظلت والحين انتهت مدتها لاني ما استخدمته
المهم أخذت الشريحة عندي وحطيتها في جوالي وشفت فيها رقم واحد بس وطبعا ما كانت تشتغل شريحة سوا
حطيت شريحتي ودقيت على نفس الرقم وطلع رجال وسكرت
وبعدين رميت شريحة سوا في الزبالة
اليوم لمن لعب الفار بعبي قمت رحت لنفس المحفظة اللي لقينا فيها شريحة سوا وقعدت أدور فشفت بطاقة سوا بقيمة 100 ريال وأخر تاريخ للإستخدام هو 7/ 2005
يعني قبل شهرين أنا غشيمة في هالسوالف وقمت دقيت على وحدة صاحبتي وقالت لي أن البطاقة حدها شهر وتنتهي صلاحيتها

والليلة هو بيرجع من السفر بعد ما ظليت البارحة أكلمه وأبكي وأعاتبه حتى في النهاية قال والله إنك كدرتيني في السفر وأنا مهموم ولو ودي ما أرد بعد اللي سويتيه قلت له اتحملني ما عندي احد أقدر أتكلم معاه ولو ما تكلمت راح أموووووت

أنا صار لي يومين ما ذقت الأكل وما أدري شسوي لمن يرد أقوله على سالفة بطاقة سوا والا أسكت وأعتبره ماضي وانتهى

اللي عندها فكرة عن بطاقة سوا تعلمني اذا فيه بطاقات مدتها طويلة تكفون أرجوكم جاوبوني

طولت عليكم أدري بس أنا مو عارفة شسوي معقولة زوجي يكون يعرف بنات والله مو مصدقة والله أنه معاي بالفراش كأنه لسه متزوجين معقوله واحد يعرف بنات ويحمل هالمشاعر لزوجته مو قادرة أصدق

ارجوكم قولوا لي شسوي قولوا شي يريحني قولوا لي طريقة أقدر أبعد شكوكي وهل فعلا طلع راعي بنات وهو أنا اشوفه من فترة وهو يقول لي والله أنا كبير وثقي فيني أنا ما عندي خرابيط ولا أحب هالسوالف

شسوي يارب ارحمني يارب دلني على الصواب أعرف الحقيقة وارتاح والا أظل أشك وأموت في كل لحظة

لا تقولون لي لا تهمي حالك أنا أحبه وما أقدر استغني عنه أبدا هو كل حياتي ارجوكم ساعدوني لا تتخلووون عن أخت لكم في الله يا النشميات