توأمي الجميلات ، أخيرا نورتوا حياتي ❤

السلام عليكم ورحمة الله وبركاته
بصراحه مدري كيف ابدأ لكن ببدأ 😅
انا متزوجة من ٦ سنوات ونص و طول فترة زواجي ماحملت ابدا إلا في السنه السادسه الله عوضني صبري ورزقني بتوأم بنات الله يخليهم لي ويحفظهم يارب
ما تتخيلون كيف كنت يوم عرفت بحملهم ويوم عرفت الجنس ويوم ولادتهم
بصراحه أعجز اعبر واكتب ، فرحه ماعمري حسيت فيها من جيت لهدنيا
الله... يوم أتذكر قبل احمل كانوا الي تزوجوا معي وبعدي معهم طفلين ثلاثه اربعه وانا لحالي و ما اكذب عليكم كان زوجي يبان في وجهه الزعل أحيان اذا سمع أن احد إخوانه أو أقاربه جالهم مولود
طفشت عايشه لحالي اوك طيب بطلع اتمشى اغير جو اسافر بس يبقى الحمل والأطفال شاغل بالي وتعلقت بالأطفال بشكل لا يوصف لدرجة اذا زرت اختي أخذ أصغر عيالها وانظفه والبسه واكله كأنه ولدي واستانس مره لين ارجع بيتي و ارجع حزينه
و مرت علي أيام كنت ابكي فيها نهار و ليل
لكن ما كنت أنسى صلاة الليل والدعاء والصدقه
كنت أتخيل لو أني جبت بيبي اول زواجي كان الحين عمره 4 أو 5 سنوات


سبحان الله مرت الأيام والشهور والسنين
و طلعت حامل بتوأم و جبتهم بسلامه والحين أعمارهم ٦ شهور والله انهم يتعبون وأحيانا ما انام منهم بس والله فدوه لهم لو اعرف اني مارح انام شهر كامل بسببهم عادي والله راضيه
دام الله بيرزقني فيهم راضيه لو أنهم اشقياء و مزعجين راضيه فيهم الله يحفظهم لي
قسم بالله تو أحس اني فعلا متزوجة و اخر عيد عيد الفطر كان احسن عيد مر بحياتي كلها ومعي بنوتاتي الله يحفظهم
والله العظيم بيتي سار له صوت سار له حس زوجي سار يجلس كثير في البيت ما يطلع إلا وقت ما يسهر
بناتي وحده تجلس والثانيه لا هههه وحده شقيه والثانيه هاديه ووحده شعرها كثير والثانيه شبه صلعه هههههههههه الله يحفظهم لي يارب
الحين امشي عند الحريم بكل ثقه و مستانسه 😅
أخيرا تحقق حلمي لك الحمد ربي
الحمدالله حمدا كثيرا


حبيت افضفض فقط لاني للحين أحس اني بحلم
دعواتكم ربي يرزقني برهم وصلاحهم ويرزقني بأخوان وأخوات لهم 🌷


وأسأل الله العظيم أن يرزق كل وحده تتمنى الحمل ويفرح قلبها مثل ما فرحني الله يرزق الجميع بالذريه الصالحه يارب 🌷❤