عندي سئوالين لو تسمحين حبيبتي دينا الدندونة
كيف بتقطعي الميل في بعد خبزه دون أن يتكسر أو يتفتت و ما شاء الله شكله مرتب و مقاس واحد
و هل عجينة الميل في هي نفسها عجينة البف باستري

ازيك يا ام العلاء انتى تسئلى زى مانتى عايزة وانا معاكى للصبح :)
ماتخافيش ما بيتكسرش لما تيجى تقطعية. المهم ان تكون السكينة حامية وطويله مقاس العجينة علشان تقطعية مرة واحدة على طول وعندك فى الصورة انا ماسكة السكينة وبقطعه امامك لانى فضلت بدل ما اعملكم نوع واحد اعمل نوعين فعلشان معنديش عجينة تانى قسمت المتوفرة عندى بالنص وعملته جاتوة بدل تورتة بالسكر وبالشيكولاتة

عجينة الميل فى
كيلو دقيق
زرة ملح
معلقة صغيرة بيكنج بودر
3/4 كيلو زبدة
2 كوب ماء للعجن
1/2 معلقة صغيرة عصير ليمون
الطريقة
1- انخلى الدقيق مع الملح و اعملى حفرة فى وسط الدقيق
2- نزلى الماء واحدة واحدة على الدقيق و افضلى اعجنى اعجنى بأيدك
3- لحد ما تتكون معاكى عجينة بس تكون جامدة ماسكة نفسها
4- بعد ما تتكون العجينة اعجنى فيها شوية بأديكى
5- افردى العجينة امامك على الرخامة على هيئة مستطيل طويل
6- رشى الزبدة بيادوب رشة دقبق صغيرة (علشان تسحب الماء اللى موجود فى الزبدة)
7- افردى الزبدة على نص المستطيل اللى من ناحيتك مثلا بحيث تكون فى المنتصف و بعيدة عن الاطراف و الجناب
8- .اقفلى النص التانى الفاضى من المستطيل بحيث يغطى الزبدة و دوسى بأديكى على الجناب كويس
9- بالنشابة بالراحة افردى العجينة عشان الزبدة ما تطلعش منها و طبقيها على هيئة ظرف يعنى تجيبى الجنب اليمين فى نص المستطيل و الجنب الشمال فى نص المستطيل و الطرف اللى ناحيتك ترفعية لنص المستطيل و الطرف اللى هناك فى نص المستطيل كدة حتبقى شكلها بقى مربع او مستطيل صغير
10- ضعيها فى الفريزر بالظبط لمدة 15دقيقة ولا اقل ولا ازيد بين كل مرتين
11- تطلعيها بعد ال15 دقيقة وتكررى نفس عملية الفرد بالنشابه و التطبيق تانى و تحطيها برضة فى الفريزر 15 دقيقة تفضلى تعملى كدة لمدة 6 مرات
ملحوظة
سبب الفرد و التطبيق كل هزه المرات هو دة اللى بيخليها طبقات مورقة
علشان كدة ماتقلليش عدد المرات
اثناء الفرد بالراحة بالنشابة علشان الزبدة ما تطلعش لبرة
ظبط الوقت بين كل تطبيقة و التانية مهم جدا
احتفظى بها فى الفريزر فى كيس نايلون لحين الاستخدام و بالهنا والشفا
طبعا علشان هى متعبة بس فى عمايلها فأنا من رأيى انك تتعبى مرة واحدة و تخليها عندك فى الفريزر

عجينة الباف باسترى puff pastry
نفس عجينة الميل فى بس الاختلاف الوحيد فى المقادير بس
المقادير
مقدار الزبدة هو نفسه مقدار الدقيق
يعنى كيلو زبدة
كيلو دقيق
ماء بارد للعجن
زرة ملح
1/2 معلقة صغيرة عصير ليمون لكل 1/4 كيلو دقيق
و بالهنا والشفا