رفع

مواقع التفسير

اول موقع (انا طبعا مش حاطه المواقع بالترتيب من حيث الاهميه دي عشوائي انتي ادخليهم وشوفي ايلي يريحك)
http://www.imadislam.com/tafsir/index.htm

التاني
http://quran.al-islam.com/Page.aspx?...okID=12&Page=1 واعتقد دا الاشهر

التالت
http://www.s3udy.net/tafseer/ ودا ايلي انا بحبه لانه سهل ومختصر وليكي حرية الاختيار

الرابع (الشيخ الشعراوي رحمه الله وبالصوت)
http://www.elsharawy.com/


لو بنوته تعرف مواقع تانيه تقول

السلام عليكم
بصو يابنات
انا عملتلكم جدول
جدول تنظموا بيه وقتك هو صحيح مش على شكل جدول بس انا ماليش في التكنولوجيا بقى اوي معلش فممكن لوبنوته تعرف تعمله على شكل جدول ياريت

المهم هنقسم نفسناهنبدا من الصغير للكبير
يعني هعمل جدول للي بيدرسوا/جدول للمتخرجين واعدين مش وراهم حاجه/جدول للي بيشتغلوا واتجوزوا او لسه متجوزوش/جدول للي عندهم اولاد
فكل بنوته منكم بقى تدور على الجدول ايلي هيناسب حالتها متفقين
قبل اي حاجه هقول اساسيات عامه اجبارية لينا كلنا:

1/الصلاة على وقتها مفيش فيها فصال مهما كان عذرك على اد ماتقدري لااااااااازم تصلي متزعليش ربنا بقى احنا ماصدقنا

2/هقولك حاجات تربطيها بكل وضوء:*حطي على الحوض ديما 3 حاجات(الحجر الخفاف الاسود دا كل ما تتوضي ادعكي رجلك بيها+علبة صغنونه حطي فيها ملح وشويا لبن نيدو وشويا رز اطحنيهم وسكر اخلطيهم مع بعض وحطي في العلبة معلقة بلاستيك صغنونه كل ما تيجي توضي برده خدي من المعلقة وافركي ايدك كويس اووووووي دا بيساعد على بياضها ونعومتها علطووووول +كريم مرطب بعد كل وضوء حطي منه لايدك ورجلك ووشك لو محتاج) والسواك عند كل وضوء لو تقدرى
*حاجه تربطيها بكل صلاة قبل الصلاة تشربي كوباية او اتنين ميا وبعد الصلاة برده كده متنسيييش
*حاجه تربطيها بكل اكله تغسلي سنانك
*حاجه تربطيها بقبل النوم طبعا زبدة كاكاو وزيت جنين القمح لبشرتك ممتاااااااااااز او اي كريم مرطب
طبعا الصلاة زي ما قولت حاجه مفروغ منها وكذلك ايلي متعود يقرا قرءان مثلا او يقول اذكار باذن الله كده كده هنتعود عليهم مع بعض ومش هنقطعهم
*اساسي في اليوم كوباية شاي اخضر بتنقي الدم وتقلل الكوليسترول وتقضي على الهالات السودا باذن الله
*الرياضه تتعمل اول ما تصحي او قبل ما تنامي او اي وقت براحتك بس بشرط لو مرتبط بالاكل يبقى بعد الاكل بساعه وقبل الاكل بساعتين اوعي تعملي رياضه وتاكلي بعدها علطول ولازم تشربي اثناء الرياضة دا بيساعد على التخسيس


اولا لو انتي طالبه
لما تروحى المدرسه او الجامعه باذن الله
1/تصحي الساعه 4 ونص الفجر تصلي ركعتين قيام ليل وتقري صفحه قرءان وتذكري الله وتدعلي كل دا مش هياخد ربع ساعه وبعدها تصلي الفجر (الخطوة دي اختيارية بمعنى انك ممكن تعملي كل د ا بليل بعد صلاة العشاء بدل الصبح بس كده كده اجباري عليكي تصحي الساعه 5 للفجر)

2/ايلي عايزة تكمل نوم تكمل بس منصحهاش بكده لان الوقت دا بيكون عقلك في قمة تركيزه وجسمك في قمة نشاطه (افتحي النور كده وهاتي كتبك الغلسه هاتي اغلس مادة مش عارفه تذاكريها هتلاقي نفسك قدرتي عليها في الوقت دا صدقيني واقعدي من الساعه 5 ونص للساعه 7 ونص ذاكري ساعتين متواصل وقومي اتمشي في البيت او اشربي او اعمليلك شاي او نسكافيه زي ماتحبي بس استني قبل الشاي حاولي لو عندك تمر او عجوه خدى سبع تمرات وكمان لو عندك عسل نحل تدوبي معلقه منه في كوبايه هيديكي طاقه جبارة
وسنه عن حبيبك صلى الله عليه وسلم
3/خلاص اتمشيتي 5 دقايق متزوديش يلا باااااااااااك على الكتااااااب وهاتك يامذاكرة ساعتين كمان بدون فواصل اسمعي الكلام (باذن الله هتتفوقى و تطلعى الاولى بالنصايح دي لاني قريت علم نفس كتير وفاهمه انا بقولك ايه كويس جدااااااا)
4/ الساعه كام دلوقتي داخله على 10 (كان زمانك لسه صاحية من النوم كسلانه بقى ولسه هتجيبي الكتب وملل شوفتي انجزتي ازاي ف 4 ساعات ؟ لانك اصلا مختارة اكتر 4 ساعات العقل فيهم مركز جداااااااا وبيستوعب كل المعلومات

5/الساعه 10 قومي بقى افطري او اقعدي روئي نفسك ع النت اعملي ايلي انتي عيزاه لمده ساعه واحدة من 10 ل 11
6/الساعه 11 قومي باك على الكتاب بس بصي مش هتذاكري معلومه جديدة لا راجعي على حاجه قديمه /سمعي حاجه كنتي حفظاها كده يعني
7/الساعه 12 قومي صلى الظهر وارجعي تاني للكتاب كملي مراجعه لحد الساعه 1
8/الساعه 1 جت يلا قومي متقربيش من الكتاب اوعييييي (من الساعه 1 للساعه 3 او 4) دا اكتر وقت العقل بيهنج فيهم وبينام على نفسه دا برده مش كلامي دا علم النفس وعن تجربة
عندك 3 ساعات اعملي فيهم بقى نص ساعه رياضة ونص ساعه اعمليلك ماسك لوشك دا ولا سرحي شعرك روئي نفسك خدي شاور كده وحطي برفيوم اتفرجي على التيفي اقعدي مع اخواتك اي حاجه 3 ساعات برطعي فيهم ولو عايزة تنامي ساعه ونص نامي ومتنسيش صلاة العصر فى معادها ((البردين )) والغدا لو جه معاده

9/باااااااك على الكتاب من الساعه 4 او 4 ونص لحد 6 ذاكري فيهم معلومات جديدة لان الوقت دا بيكون العقل بدا ينشط تاني استغليه
10/الساعه 6 قومي 5 دقايق اتمشي في الشقه-بصي من الشباك اي حاجه 5 دقايق
11/باااااك على الكتاب وهاتك مذاكرة للساعه 9 بقى المرادي او 8 ونص ياستي يلا زي بعضه واقفلي الكتاب قومي شيليه مترميهوش ف اي حتة وخلاص خليكي منظمه ومن الساعه 9 ل 11 اعملي ايلي انتي عيزاه ومتنسيش ربع ساعه تخصصيها لاهلك تقعدي معاهم شويا وطبعا متنسيش صلاة العشاء والمغرب في المعاد
12/الساعه 11 تكوني في السرير مش اكتر من كده عايزة تنامي قبل كده نامي مانتي هتخلصي المذاكرة 9 يعني براحتك وتصبحي على خير
الجدول دا هيخليكي تذاكري 8 ساعات في اليوم تقريباومبروك النجاح والتفوق كمان
واحده تقولى مش انتى قولتى المحاضره الى فاتت الى كانت عن الوقت ست ساعات عمل بس
هقولها ماشى استى بس
مانتى اصلا كده كده هتروحى الجامعه او المدرسه وده اكيد هياخد منك الوقت بتاع الساعه 1 ممكن او لو المدرسه الصبح يبقى هتكونى فى المدرسه لساعه 10 صح ولا لا
بس الجدول ده فى ايام الامتحانات لما مش بيكون فيه خروج من البيت (ممتاز )

ثانيا لو انتي اتخرجتي واعدة لا شغل ولا مشغله ولسه متجوزتيش (الجدول دا ينفع برده لو انتي لسه متجوزة جديد ومش بتشتغلي ومش عندك اطفال)
1/تصحي الساعه 4 ونص تعملي ركعتين قيام ليل وقراية ولو صفحه قرءان واذكار ودعاء وصلاة الفجر ونامي
2/تصحي تاني الساعه 9 او 10 بالكتيييييييييييير اوعي تزودي لما تصحي اعملي ميا بعسل وكلى التمر وهاتي معلقتين من العسل بالماء تكوني حطاها في الفريزر من بليل حطيهم على عينك 5 دقايق وطبعا متنسيش تغسلي سنانك ووشك بغسول او صابونه طبيه مش حاجه تانيه علشان التجاعيد متظهرش

3/اعمليلك شاي او اي حاجه او مج شاى بلبن معتبر كده بس طبعا قبلها كوباية الميا بالعسل علشان الطاقه
4/عايزة تصلي الضحي صلي وبعدها عايزة تفطري افطري
5/ الساعه 11 تبدئي تروئي اودتك كده اوعي تكوني بتقعدي فيها وهي مكركبة غلط ياقمر هتاثر على مزاجك طول اليوم
6/تصلي الظهر وتروئي باقي الشقه بلاش كسل عايزين ستات بيوت فالحين
7/اقعدي على النت بقى او اتفرجي على التيفي بس اوعى تكونى بتتفرجى على حاجه وحشه انصحك بقناه الرحمه والله فيها كل حاجه وكمان قناه الناس ودى نصيحه ليكم كلكم
لحد معاد عمايل الغدا
8/ هتقومي تعملي الغدا ولتكن الساعه 2 او 3
9/تتغدي بقى مع اخواتك او بابا او ماما او مع نفسك براحتك حسب ظروفك ومتنسيش صلاة العصر
10/مفيش نوم في وسط اليوم على فكرة/من الساعه 4 بعد الغدا بقى وغسيل الاطباق والذي منه دا وقت فراغك من 4 للساعه ياستي 11
11/هنستغل الوقت دا ازاي بقى؟؟؟؟
*عندك نص ساعه رياضة بس زي ما قولت الرايضه تكون بعد الاكل بساعه ومتاكليش بعدها غير بساعتين مثلا نظمي كده انتي وشوفي
*عندك نص ساعه شوفي ماسك كويس وعموما الماسك الكويس ايلي يمشي مع انواع البشرة (زبادي+ لمون ولو فيه عسل ياريت وخميرة والله تحفففففففففففففففه
*شوفي شعرك كده زبطيه وادخلي خدي شاور بعد الرياضة وحطي برفيوم هتفرق معاكي اوووووي
* امسكي سماعة التليفون وشوفي قريب ليكي مش بيتسئلي فيه كلميه بنية صلة الرحم
*مارسي هوايتك!!!!
هواية ايه يانسمة معنديش
هقولك لا عندك مفيش انسان في الدنيا دي كلها معندوش هواية
انتي شوفي هوايتك بتحبي ايه دوري عليها متسكتيش
بتحبي تقري مثلا؟؟ هاتي كتب من النت واقري
بتحبي تقعدي على النت؟ اقعدي بس فيدي نفسك باي معلومة ولو صغنونه
بتحبي ترسمي ارسمي بتحبي تكتبي اكتبي وممكن تجيبي اجندة كده اكتبي فيها مذكراتك هترتاحي اوووووووي
اقري قرءان هزري مع اخواتك فرفشي مامتك كده خلي ليكي لمستك في البيت متبقيش زي قلتك

12/متنسيش هتنامي الساعه 11 بالكتير علشان بشرتك وعينك

ثالثا لو انتي بتشتغلي ولسه متجوزتيش او متجوزة بس مفيش ا طفال
1/هتصحي الساعه 4 ونص تنفذي الخطه ولو مش قادره خلاص نفذيها بعد العشا بس الاساس انك هتصحي 5 تصلي الفجر معلش لازم
2/روئي نفسك بقى افطري اقري قرءان اذكار خدي شاور البسي لحد ماييجي معاد الشغل ومع السلامه بس استني اوعي تكوني نسيتي تشربي ميا بعسل(معلقة عسل+كوب ماء)والعجوه او التمر
3/ انتي دلوقتي في الشغل اهو اشتغلي بضمير راعي ربنا بجد عاملي الناس كويس خليكي فرفوشه متكشريش في وش حد دانتي لما تبتسمي في وش حد او تقولي كلمه حلوة لحد دي في حد ذاتها صدقة تخيلي
4/رجعتي البيت حمد لله على السلامه يلا عايزة تاخدي شاور خدي علشان تفوئي او اغسلي وشك ويلا علشان تتغدي(طبعا حاجه مفروغ منها صلاة العصر تصليها ولو في جامع في الشغل وهيبقى فيه ع لى فكرة بس انتي اسالي صلي هناك جماعه ياااااااااااه روووووعه

5/اتغديتي الحمد لله عايزة تنامي ساعه نامي بس انا مش بنصحك بكده بصراحه يعني اقعدي كده شويا شوفي نفسك بقى دلعيها سرحي شعرك كده يعني
6/اقعدي على النت بقى او اتفرجي على التيفي براحتك بس خدي بالك من وقت صلاة المغرب
7/بصي ياستي لاني معرفش ظروفك برده بس لازم تخصصي نص ساعه من وقت تعملي فيهم رياضة سواء الصبح بقى لما تصحي او بليل قبل ما تنامي او بعد الغدا بساعه زي ماتحبي

8/لازم تخصصي ربع ساعه او نص ساعه تقعدي فيها مع اهلك شويا متنسيش

9/ المهم حددي انتي وقت فراغك من ساعه ماترجعي من الشغل لحد ماتنامي بليل الساعه 11
يعني مثلا لو الوقت دا هيكون حوالي من 7 ل 4 ساعات
قسميهم بقى نص ساعه رياضه –نص ساعه مع اهلك-نص ساعه شوفي بشرتك وشعرك وايدك-ساعه اقري قرءان او اذكار زي ماتحبي-نص ساعه او ساعه اقعدي على النت (كده يعني متبقاش سبهلله بالبركه لا خليكي منظمه بدئتي تقعدي على النت قولي انا هقوم الساعه كذا علشان ابدا عمل كذا فهماني)
10/يلا ياستي على السرير بس استني متنسيش ركعتين قيام الليل لو بتكسلي تصحي 4 ونص ومتنسيش تغسلي رجلك كويس قبل النوم وسنانك تصبحي على خير


رابعا لو انتي متجوزة وعندك اطفال ومش بتشتغلي (خدي بالك دي اكتر حالة محتاجه نظام رهييييييييب)
1/هتصحي من النوم الساعه 4 ونص لو قدرتي ولو لا يبقى متنسيش بعد صلاة العشاء تعمملي الخطه(قيام ليل+قرءان ولوصفحه+اذكار 5 دقايق+دعاء 5 دقايق) وخلي اساسك انك هتصحي الساعه 5 معلش بالطول او بالعرض مش هيفرق معاكي 3 دقياق تصحيهم تصلي الفجر وتنامي تاني ساعه ولا حاجه على ما تصحي العيال او تفضلي صاحيه تستمعي بحلاة الوقت دا لوحدك والهدوء

2/سواء نمتي ساعه ولا حاجه او منمتيش طبعا شوفي هتصحي اولادك امتى وصحيهم وشوفي جوزك لو هيفطر قبل مايروح الشغل ولا حاجه وافطري انتي كمان

3/اما انك هتنزلي توصلي ولادك للحضانه او المدرسه /او انك هتقعدى تذاكريلهم
في حاله انك هتوديهم للمدرسه هترجعي طبعا من غيرهم وبالك هيبقى مرتاح ومفيش حد في البيت الا لو عندك نونو
سواء لوحدك في البيت بعد ما العيال راحو المدرسه او معاكي نونو اقعدي بقى روئي الشقه كلها مش هتاخد منك نص ساعه صدقيني وحاولي تخلصي كل ايلي وراكي لحد ما العيال ييجو من المدرسه يعني مثلا شوفي النونو كده نيميه وشوفي الشقه روئيها وشوفي صلاة الظهر اذن ولالا وشوفي هتعملي غدا ايه واعمليه واخلصي منه مش لازم يتعمل قبل معاده بخمس دقايق مانتي ممكن تعمليه بدري علشان تقعدي براحتك باقي اليوم من غير مطبخ على الاقل
4/بعد ما تخلصي البيت والطبيخ ادخلي بسرعه خدي شاور وزبطي نفسك وحطي برفيوم يجنن وحطي ميكب كمان وسرحي شعرك حلو والبسي حاجه حلوة بلاش العبايات ليل نهار وبلاش الايشارب ايلي على راسك طول اليوم شعرك اتخنق من الكتمه
5/ خلاص زبطتي نفسك ولسه عيالك مجوش من المدرسة؟
اقعدي بقى كده برنسيس اتفرجي على التيفي او اقعدي على النت براحتك

6/(طبعا لو انتي ايلي بتنزلي تجيبي عيالك من المدرسه يبقى تأجلي الشاور وكل الروقان دا لبعد ما تجيبيهم وتغديهم كمان)
7/ عيالك وصلوا بالسلامه يلا اتغدوا وقسمي الوقت بينهم يعني مثلا قولي ل س يلا هذاكرك واتابعك لمده ساعه ونص او ساعتين من الساعه كذا لكذا وتقولي ل ص انتي اقعدي اعملي واجبك او العبي لحد ما افضالك واخلص وقت اختك س وليكي برده ساعه ونص او ساعتين زيهم ...فهماني؟؟؟
يعني عيالك مثلا س و ص
هتخصصي لكل واحد منهم وقت معين كل يوم من الساعه كذا لكذا تقعدي معاهم تذاكريلهم وتتابعيهم وانجزي مش لازم جوزك ييجي يلاقيكي اعده معاهم لسه مخلصتوش يعني على اد ما تقدري انجزي معاكي طول اليوم من اوله تخصصيلهم وقت برده ل س ول ص
ولنفسك
اهم حاجه جوزك لما يرجع يلاقيكي مزبطه نفسك ومخلصه طبيخك وواخدة شاور وحاطه ميكب وبرفيوم وعامله شعرك مزبطاه

8/تقعدي مع جوزك بقى شويا واتغدي معاه ولو لازم تتغدي مع ولادك يبقى خلاص اتغدي معاهم نص طبقك ومع جوزك النص التاني اتصرفي
9/الرياضة ثم الرياضة ثم الرياضة معلش لو جسمك تقييييييييل بالتدريج هتتعودي عليها وصدقيني جسمك هيتفرد بس الصبــــــــــر (خلي وقت الرياضه بقى ياما لما جوزك يرجع لو بينام شويا او قبل ما يرجع او اول ما تصحي الصبح)
10/حاولي من الساعه 9 ل 11 مثلا تخصصيه وقت انتي وجوزك واولادك تتجمعوا سوا اعمليلهم فيشار مثلا او شيبسي كده يعني روئيهم

خااامسا لو بتشتغلي وكمان عندك ولاد طبعا ليكي الجنه باذن الله الله يكون في عونك:
1/هتصحي من نومك برده على 4ونص لو قدرتي علشان تنفذي (قيام الليل+قرءان ولو صفحه+دعاء+ذكر ) لو مقدرتيش تصحي يبقى هتعملي كده بعد صلاة العشاء وكده كده لازم تصحي الساعه 5 اساسي تصلي الفجر
2/بعد ماتصلي الفجر لو عايزة تناميلك ساعه ووقتك يسمح اوك
لو لا مينفعش خلاص احسن اقعدي كده في هدوء ربع ساعه اذكري الله هتحسي براحه هايله وبعدها قومي جهزي فطار للاولاد مثلا او لنفسك او لجوزك وطبعا لازم تجهزي الغدا ياما الصبح في الوقت دا ياما بليل قبل ماتنامي وانا ارشح الصبح
3/هتصحي ولادك بقى ولا شوفي بيصحوا ازاي وامتى وصحي جوزك علشان شغله وفطريه والبسي بقى بسرعه وانزلي على شغلك بس تكوني قايله لولادك على مهااااام لازم تتعمل على ما تيجي وتشرفي عليها بنفسك وايلي يعملها تديله هديه حاجه بسيطه زي باكو بسكوت والله هيفرحوا حتى لو كبار هما بيحبوا الحاجات دي وطبعا ايلي ميعملش ايلي وراه تعاقبيه مثلا تمنعيه من الكمبيوتر كده يعني
والمهام دي هتكون عبارة عن مذاكرة طبعا تحدديلهم مادة يذاكروها من صفحه كذا لكذا وتيجي تساليهم فيها ولو اكبر شويا من كده يعني مثلا من اعدادي لثانوي هتضيفي على مهمة المذاكرة مهمه ترويئ البيت
هتقوليلهم كل واحد عليه حاجه
4/انتي دلوقتي في شغلك راعي ضميرك وبلاش كسل ومتنسيش صلاة الظهر اكيد عندك جامع في شغلك او مصلية احنا عندنا في الجامعه كان فيه جامع صغير وكان فيه كمان بنات اشوفهم بيقفلوا على نفسهم اوده مثلا ويصلوا
5/لما ترجعي البيت بالسلامه تعبانه معلش انتي مضطرة تجهزي الغدا وانتي اصلا كنتي مجهزاه فهتسخنيه بسرعه وخلاص وتحطي الاكل وتاكلي مع ولادك شويا
6/عايزة تنامي ساعه او ساعه ونص نامي
7/لما تصحي تندهي للولاد بقى وتقعدي مع كل واحد منهم لوحددددده انا بكرر اهو لوحده كل واحد تقعدي معاه ساعه بالكتير مثلا تشرفي على المهام ايلي طلبتيها منه وتسمعيله ولو في حاجه مش فاهمها مثلا
8/شوفي نفسك شويا وحاولي طبعا تنظمي وقتك بحيث ان قبل ماجوزك ييجي من الشغل انتي تكوني على الاقل على الاقل مزبطه نفسك يعني واخدة شاور وحاطه برفيوم وحطي ولو روج او كحل اي تغيير يعني وشيلي الاشارب من راسك وسرحي شعرك كويس كل دا مش هياخد ربع ساعه اصلا
9/جوزك جه اهو قومي جهزيله الغدا واقعدي معاه على الاكل حتى لو مش بتاكلي
10/شوفي بقى جوزك متعود مثلا ينام شويا لما ييجي اوك سيبيه ينام وارجعي لولادك لو مكنتيش لسه خلصتي معاهم ولو كنتي خلصتي اقعدي على النت شويا او اتفرجي على التيفي شوفي مثلا المطبخ زبطيه على السريع كده هاتي مجله اقريها اعملي ايلي تحبيه وخلاص لحد جوزك ما يصحي
11/لو جوزك مش بينام خلاص خليكي معاه او شوفي هو متعود على ايه عادي
في كللللل دا انتي كده ناقصلك الرياضه ولو ربع ساعه شوفي بقى ايلي يريحك عايزة تعمليها اول ما تصحي اوك او قبل ماتنامي اوك برده ايلي يريحك
12/وانتي في البيت متجبيش سيرة الشغل ابداااااااااااااااااااا ومترديش على تليفونات تخص الشغل خاااااااااااالص خلي تركيزك مع عيالك وجوزك ونفسك
13/في خلال كل اليوم طبعا متنسيش الصلاة على وقتها بالله عليكى


صدقيني ياست الكل انتي ممكن تشوفي كلللللللللللللل دا كتييييييييييييييير وصعب انما اصلا لو مارستيه هتتعودي عليه بتلقائيه شديدة وهتحبي يومك وهتحسي انك بتعملي حاجه مفيده لجوزك ولعيالك ولنفسك والاهم لربك

اليوم 24 ساعه مش معقوله مش لاحقة تخلصي ايلي وراكي فيهم
24 ساعه هنشيل منهم 8 ساعات نوم بقوا كام ممممممم اه 16 متهيالي
16 ساعه نظميهم
هنقول ساعه او ساعتين للعبادات كلها على مدار اليوم مش متواصلين يعني
ساعه ونص ياستي تروئي بيتك وتعملي الاكل
نص ساعه رياضه ونص ساعه تهتمي بنفسك ونص ساعه تقعدي مع اهلك او جوزك على روئان
و4 او 6ساعات للمذاكرة او لعيالك لحد كده بقوا حوالي11 ساعة وناقصلك من ال 16 ساعه 5 او 6 ساعات
عندك اهو 5 او 6 ساعات اعملي فيهم ايلي انتي عيزاه

صدقوني يابنات الوقت كتييييييييييييير اوي بس للي يعرف ينظمه صح
اي استفسار تحت امركم



بالمناسبة/ايلي عندهم عذر شرعي هيمنعهم من جدول الصلاة ليهم درجات على عبادات تانيه
1/ اذاكار الصباح عليها 10 درجات
2/الترديد وراء الاذان على الاقل مرتين في اليوم 10 درجات
3/الاستغفـــــــار على مدار اليوم 10 درجات
4/اذكار المساااااااء 10 درجات
5/الصلاة على النبي والدعاااااء 10 درجات
وبكده 50 درجه برده
قولتلكم مفيش كسل يعني مفيش كسل
وراكم وراااااااااكم

سبحانك اللهم وبحمدك اشهد ان لا اله الا انت استغفرك واتوب اليك
فى حفظ الله ورعايته

لا حول ولا قوه الا بالله العلى العظيم

رفع