رماح ردينية :

ياناس حاجة تجنن...الكذب صار ملون!! زمان..كنَّا نسمع عن كلمة تلفزيون ملون...أو زجاج ملون...أو صور ملونة...أو حتى ورق ملون!! أما إنه توصل الدرجة إلى إنه الكذب صار بألوان وأشكال ومتوفر بجميع الأحجام والمقاسات!فهذا شيء عجيب الصراحة!! مرت علي نماذج الله يعافيكم ولايبتليكم! ناس الكذب عندهم أسهل من شرب الموية! وخير من يمثل هذه الفئة صديقة لنا بالثانوي كان اسمها(رشيدة)...اللهم لاشماتة ولااستهزاء بشكل المخلوقة..بس كانت ذات جسم سمين ولاتمتلك مقومات الجمال اللي يمتلكها غيرها من الفتيات ومو هذا موضوعنا كل إنسان وله مواصفات وشكل.. لكن كانت غثيثة لدرجة إنها لما تشوف أي شلة قاعدين تدخل بينهم مثل أشعب!! وتخلي مسار الحوار كله عن نفسها..وياليته صدق!!كله كذبxكذب!! وفي كل مرة تجلس فيها معانا تحكي لنا عن طوابير الخُطاب اللي قدام بابها!!(هي من حقها تحلم..بس مو بالكذب!!) وإنه ماقد طاحت عليها عين إنس ولا جِن إلا وانهبلوا بجمالها!! وإنه ملابسها كلها مستوردة بأسعار تفوق الخيال!وإن أبوها يستلم الراتب ويحطه كله بإيدها ويقول إنتي حرة فيه!!! وإنه نظرات الحساد تلاحقها من مكان لمكان..لدرجة إنها فضَّلت اعتزال الناس!! وإنها دايماً تسافر من بلد لـ بلد..وتحكي لنا قصص خيالية...والمشكلة إنه لها أقارب بالمدرسة يدحضون كلامها كله..ويقولون خذوها على قد عقلها!! ماراح تتخيلون لو أقول لكم إنه هالبنت صارت مضرب المثل للكذابات في المدرسة!لدرجة إنه البعض صاروا يطلقون عليها مَثَل: فكما نقول..أمكر من ثعلب..أحقد من جمل صاروا يقولون أكْذَب من رشيدة!!! وصاحباتي دايماً يخلونها تاخذ راحتها في الكذب ويجارونها في الكلام لين ماتنثر كل مافي جعبتها!وبعد ماتقوم من عندهم يطيح عليهم وابل من الضحك!!وهذا شي يثير حفيظتي! وحدث وتجادلنا مرة.. قلت لهم:تدرون إنكم تكسبون ذنب في هذي الآدمية وانتم ماتدرون؟؟؟ قالوا:كيف؟؟ قلت:تشجعونها على الاستمرار فيه وانتم عارفين إنه كذب!بدل ماوحدة منكم تنصحها بأسلوب أو على الأقل تذكر لها عقاب الكذَّابين..وسوء هذي المعصية وإنها من صفات المنافقين..ألقاكم تضحكون وتسحبونها في الكلام!! سحر:يختي إنتي وش عليك منها؟خلها تقول اللي بخاطرها!! مشاعل:ايه صحيح..باين عليها تعاني من عقدة النقص وتحاول تعوض النقص بهذا الشكل! أنا:وإلى متى تقعد مهزأة نفسها؟؟أقاربها ماتقدر تكذب عليهم هذي الكذبات لأنها تدري مابيصدقونها..لكن إحنا تتوقع هي إنها ممكن تمشي علينا!!وبعدين تراها مسكينة تحسب إنه الكل ممكن يغير نظرته لها أو يُعجب فيها بعد مايسمع سواليفها الخيالية عن نفسها!!البنت هذي لازم تصحى! سحر:خلاص إذن..صَحِيها بـ طريقتك الخاصة!! والمشكلة في رشيدة هذي..إنها تكذب الكذبة من هِنا وبعد كم يوم تنساها وتألف غيرها!وهكذا دواليك!!!!!!! رحت وراها ولقيتها واقفة في الشمس تحت شجرة... أنا:السلام عليكم.. رشيدة:هلا وعليكم السلام... أنا:ليش واقفة لوحدك؟؟ رشيدة:ياشيخة الواحد أحسن له يبعد عن الناس!مايجيه من وراهم إلا الغيرة والحسد! أنا:وماشاء الله يحسدونك على إيش وانتي تقديرك في الترم الأول مقبول؟؟؟ رشيدة:يعني الناس ماتحسد إلا على التفوق؟أساساً أنا مستوايا ماانحدر إلا من كثر ماأسافر!زي ماإنتي عارفة كم مرة سافرت لأوروبا ولفيتها في الخميس والجمعة وأجي السبت وأنا مافتحت كتاب!!!!!!!! أنا:معقول؟أجل أكيد عندك طيارة خاصة؟صح؟ رشيدة:لا ماعندنا..أسافر من المطار.. أنا:طيب تدرين إنك لو فكرتي تسافرين لأوروبا ماراح توصلين إلا بعد أيام لأنك راح تمرين بمحطات ومطارات ويتم تبديل الطيارات فيها؟؟أجل كيف لفيتي أوروبا في يومين؟؟؟ رشيدة(وهي منحرجة):لاتدققين مرة..مو كل أوروبا لفيتها!جزء منها بس!! أنا:طيب ياترى اش عاصمة فرنسا؟وياترى إش أكثر شي عجبك في بوركينا فاسو؟؟ رشيدة(وهي تتهرب من الاجابة):اسألي أبلة الجغرافيا!وأكثر حاجة عجبتني في بوركينا فاسو أكلاتهم مرة لذيذة!! أنا:ههههههه وتدرين إن بوركينا فاسو في أفريقيا مو أوروبا؟! انحرجت رشيدة وقامت تغير الموضوع!! رشيدة:انتي جاوبيني...لو خيروك بين الدراسة والزواج اش تختارين؟؟ أنا:الدراسة طبعاً!!!من ورا قلبي ترى!!ههههه رشيدة:ليييييييه؟؟اشفيه الزواج؟؟ أنا:الزواج خير وبركة بس ماحد خطبني!تسلفيني واحد من الطابور اللي واقف قدام بابكم؟؟؟ رشيدة:لو كان واحد منهم يصلح كان وافقت عليه!بس للأسف كلهم طمعانين فيَّا!!!!!! أنا:ماشاء الله...ليش؟اش عندك شي ممكن يطمعون فيه؟ رشيدة:أبوي كاتب لي كل أملاكه بإسمي!حتى سيارته! (وناسية الأخت رشيدة إنه أبوها موظف عادي لاوراه ولاقدامه وساكن ببيت أجار!!لا وعنده 6أبناء وبنات غير رشيدة!!!!!) أنا:أقول رشيدة حبيبتي؟قلبك مايعورك؟؟ رشيدة:بسم الله علي ليش؟؟ أنا:لأن كل نبضة معاها كذبة لاإله إلا الله صواريخ وتتحذف شرق وغرب!!يابنت ماتستحين؟؟كل يوم تفطرينا خرُاط وتغدينا بَكَش مشوي!1خلاص ملينا..ترى عندنا عقول!بالله اش تستفيدين من تأليف الكذبات بإحتراف؟؟موهبتك هذي لو تستغلينها في تأليف مشاهد تمثيلية للإذاعة أبرك!! رشيدة:كلن يناظر الناس بعين طبعه ياآنسة تغريد!أنا عمري ماكذبت على أحد في حياتي!! أنا:لااااااا صدقتك!!!أجل وش رايك أنادي قريباتك وارجعي احكي لهم كل مغامراتك اللي كنتي تحكينها لنا طول الأيام الماضية!!! رشيدة(بـ فشلة):وش دخل قريباتي بالموضوع؟؟خلاص اسكتي وانسي!! أنا:شوفي يابنت الناس...أنا ماأحب المشاكل..بس والله عيب بنت في سنِك يطلع منها سواليف فاضية ..البزران يستحون يقولونها!!!ومين يدري يمكن بكرة تتزوجين وتفتحين بيت وسلسلة الكذب هذي مستمرة بطبعات ونسخ جديدة!!وعاد ساعتها دوري أحد يتحملك!! رشيدة:خلاص ياتغريد..لاتكبرين الموضوع! أنا:هل تعرفين إنه نبينا محمد لما سألوه الصحابة عن الانسان المؤمن هل يسرق أو يزني وقال لهم نعم..ولما سألوه هل يكذب قال:لا!!!!!!! هل تعلمين انه الرسول قال في صفات المنافقين(وإذا حدَّث كذب)؟؟؟؟ و(إن الرجل ليكذب ويتحرى الكذب حتى يُكتب عند الله كذابا)؟؟؟ (وأيكب الناس في النار على وجوههم إلا حصائد ألسنتهم) وهل تدرين انه الكلمة اللي تقولينها كذب ممكن تقذف بك في النار سبعين خريف؟؟؟ سمعت رشيدة الكلام وكان له وقع المطارق على مسامعها وماقدرت تنطق كلمة!!! وبنفس اليوم لما رجعت البيت زارتنا أختي طيف بالليل وتناقشنا في موضوع الكذب وحكيت لها كل ماصار... طيف:الصراحة ماألوم هالبنت كثر ماألوم حريم متزوجات وأمهات والوحدة كل كذبة والثانية عندها هالكبر!!! أنا:يالطيف يارب..كيف؟؟ طيف:تصدقين وحدة من جيراني زوجها سكير يضربها ليل ونهار وصياحها الكل يسمعه...وماتصدق تشوفنا قاعدين بمجلس من غير مناسبة تبدأ تحكي لنا عن زوجها وكرمه وإنه مدلعها دلع يفوق الوصف وعن رومانسياته!مع إنه ماحد مننا يسألها عنه..ولايهمنا نعرف شي عن حياتها...مدري اش بتستفيد؟؟ أمي:يمكن تبغى تلمِّع صورته قدامكم؟؟ طيف:ياأمي ماهي مجبورة...لاعمرنا سألنا عنه ولااهتمينا بأخباره..بس عقدة النقص شينة!!والأشين جارتي الثانية تشتري أطباق من النسوان وتضحك علينا في الاجتماعات وتحلف إنه شغل ايدينها ولابغينا نحرجها ونقول هاتي الطريقة..تقول:سر المهنة!! والثالثة:زوجي أهداني ساعة قيمتها مدري كم ألف وجاب لي جوال بالسعر الفلاني..وهي أصلاً متسلفة فلوس هالأشياء من أهلها عشان تكشخ..وزوجها مادرى عنها!!! -----بعد الكلام السابق تدرون إن الرسول عليه الصلاة والسلام قال(المتشبع بما لم يعطَ كلابس ثوبي زور)؟؟؟ المعنى:من يكذب ويزعم أن عنده وعنده وهو في الحقيقة لم يعطى هذه الأشياء كمن يشهد بالزور؟!!!

ياناس حاجة تجنن...الكذب صار ملون!! زمان..كنَّا نسمع عن كلمة تلفزيون ملون...أو زجاج ملون...أو صور...

رماح ردينية :

مجلة الحـــــــــــــــــــــــائط!! كنت أنا وصديقاتي بالمرحلة الثانوية(سحر+مشاعل+دانة).... المسئولات عن مجلة الحائط المدرسي..واللي كان لها أهمية كبرى لدرجة إنه مديرة المدرسة والمعلمات كانوا يتابعون مانكتب أول بأول!يعني المجلة تحت الرقابة!! المهم الفترة الأخيرة ماصار عندنا جديد نضيفه للمجلة فقمنا نخبِّص!! استدعتنا مربية الفصل(أبلة فاطمة) وهي اللي كانت مشرفة على المجلة وهي اللي اختارتنا لها. وبنبرة جادة قالت:اش هالروتين؟وإش هالفوضى اللي في المجلة؟؟ترى الحياة مو نُكت وهل تعلم ومعلومات عامة!فيه أشياء أهم تخدم القراء! دانة:ياأبلة فاطمة الاختبارات الشهرية صارت مشغلتنا وماقمنا نركِّز بالمجلة مثل قبل... أبلة فاطمة:مو شغلي!عندكم خميس وجمعة استغلوها وابحثوا عن موضوعات أفضل..ولاتنسون إن المجلة أسبوعية..يعني كل أسبوع نبغاه أميَز من اللي قبله... مشاعل:طيب ساعدينا بالأفكار ياأبلة..أنا شخصياً مخي فاضي... أبلة فاطمة(وهي تطالعني بتفحص من تحت النظارة):أنا عتبي الأكبر على الآنسة تغريد!كنتي تبدعين لنا بالأفكار لدرجة إني ألقى زحمة قدام المجلة والبنت يقرأون بشغف!أما اليوم فحدِّث ولاحرج!! أنا:بأحاول أبذل جهدي.. سحر:ياأبلة فاطمة...أعطينا أي فكرة وإحنا ممكن نطورها بطريقتنا.. أبلة فاطمة:شوفوا أنا أبغاكم تبحثون لي عن أهم المشاكل اللي يمرون فيها الطالبات هالفترة..وتتكلمون عنها ولازم تحطون باعتباركم إنه هذي المجلة من الطالبات ولهم..ولاتنسون فقرة استطلاع الرأي اللي اعتبرها من أهم زوايا المجلة..وحاولوا تسألون جميع الصفوف عن رأيهم بالموضوع المطروح...مفهوم؟؟ أنا:طيب ياليت ياأبلة فاطمة تشرحين أكثر عن المشاكل اللي نكتب عنها.. أبلة فاطمة:يعني أنا اقترح انه كل أسبوع تختارون مشكلة وحدة وتكتبون عنها باستفاضة.. مين يدري؟؟يمكن وحدة تهتدي لحل مشكلتها بسببكم..خل نقول مثلاً:مشكلة الاعجاب اللي طالعين فيها البنات هاليومين..بنت تعجب ببنت..أو تُعجب بمعلمة..وتراسلها وتغازلها كأنها عاشقة..تكتبون بزاوية..التعريف بمعنى الاعجاب وزاوية أخرى فيها فتوى توضح نظرة الشرع لهذا الاعجاب..وزاوية أخرى تبين أسباب لجوء البنت إلى الاعجاب والتعلق بالأشخاص الآخرين وزاوية أخرى فيها علاج لهذي المشكلة ثم أخيراً طرق الوقاية من الوقوع بالاعجاب..وتحطون استطلاع للرأي بين الطالبات كمثال:لو حصل وأُعجِبت فيك زميلة فكيف راح يكون تصرفك؟؟؟ إحنا كلنا:فكرة حلوة ياأبلة.. أبلة فاطمة:بس هذي فكرتي أنا!!!شوفوا لكم مشكلة غيرها!! وخرجنا من عند أبلة فاطمة وإحنا نتباحث... سحر:أنا من رأيي نكتب عن ظاهرة الاسترجال اللي غثونا فيها بعض البنات!الصراحة كل مامرت من جنبي العنود هاللي مسترجلة أحس ودي أعطيها كف!بلا وش هالخشونة الزايدة اللي فيها ولا حركاتها وضحكاتها تقولون ولد؟!!! مشاعل:لا لا أنا أقترح نكتب عن تكوين بعض البنات في هاالسن لعلاقات فاسدة بالشباب..وتباهيهم بذلك قدام بعض من غير علم الأهل..واللي ممكن توصل لحد التفريط بالشرف! دانة:حلوة موضوعاتكم بس خلوها مرة ثانية..أنا نفسي تتكلمون عن الدلع الزايد والميوعة المنتشرة هنا بزيادة!مدري ليش البنات عندهم مفهوم الدلع هو التمايع والتغنج بطريقة تجيب الغثيان يقلدون المذيعة فلانة الله ياخذها!أنا من رأيي إنه الدلع هو العيش برفاهية زايدة.. وقاموا يطالعون فيني وأنا سارحة بأفكاري بعيد! مشاعل:تغريد؟أين رحلتي ياإمرأة؟؟ أنا:إنني هُنا يا ابنة الوالي...!!! دانة:وماهو شأنك؟؟هل ستفتحين بلاد الأندلس عمَّا قريب؟؟؟ أنا:لا بل سأفتتح الأندلس مول بزيارة قريبة! الجميع:هههههه سحر:لا بـ جد اش فكرتك؟إش ماتكون إحنا معاك..على الأقل نقدر نرمي كل شي على راسك وإحنا متطمنين! أنا:مدري..أخاف ماتعجبكم! البنات:قووووولي.. أنا:الصراحة ودي أكتب عن التفرقة الصريحة بين بنات المتوسط والثانوي من جميع النواحي: ليش الكل ينظر لبنات الأدبي إنهم فاشلات؟؟ ليش بعض الأهالي يستعِرُّون من اختيار بناتهم للقسم الأدبي؟؟ ليش المعلمات يجاملونهم بالدرجات أكثر مننا؟؟ ليش الكل مستكثر علينا حصص الفراغ ويهزأونا على الفضاوة مع إن توزيع المنهج والحصص يقتضي ذلك؟؟ ليش المقارنات اليومية من المعلمات مابيننا وبين قسم العلمي؟؟ ليش الاعتقاد السائد إنه بنات العلمي أذكى وأشطر من بنات الأدبي؟؟ ليش يعتبرونهم أفضل مع إن منهجهم يركز على الفهم..مع إنه منهجنا يعتبر أصعب لأنه يجمع بين الفهم والحفظ بشكل أعمق وأكثر؟؟ ليش الكل يعتبر إنه لهم مستقبل أكبر..مع انه لو جينا للحق كثير من علماء الفيزياء والكيمياء مانحفظ أسمائهم ولاتبقى بذاكرتنا..لكن الأدباء بسهولة ممكن ينشَد لهم أي شخص ويتابع انتاجاتهم الأدبية من قصص وشعر ومقالات؟؟؟ وماننسى في الأخير نسوي استطلاع للرأي بين شريحة من بنات العلمي والأدبي على حد سواء..اش رايكم؟؟ البنات:معاكِ بقوة! مشاعل:بس ماتظنون إن أبلة مشاعل ممكن تسوي فيها إنَّ؟؟؟ أنا:لاتكبرينها وهي صغيرة!مو هي اللي أعطتنا الضوء الأخضر في الكتابة عن مشاكلنا؟؟خلاص إذن لازم تتحمل النتيجة!ويتهيأ لي إحنا مابنغلط لما نعبر بصراحة عن مشاكلنا.. البنات:صح كلامك.. وفعلاً بدأنا في العمل على مجلة الحائط وكل ماسألتنا أبلة فاطمة عن الموضوع نقول لها مفاجأة!! وجاء اليوم المنشود وعلقنا مجلة الحائط بمكان بارز في المدخل الواقع بين الإدارة والفصول.. وتوافدوا عليها القارئات والله لايوريكم الحرب اللي شبَّت بين بنات العلمي والأدبي..كلام على الجدران مثل:يحيا العلمي ويسقط الأدبي!! العلمي فوق والأدبي تحت! ويرد عليهم الطرف الثاني:الأدبي عطر المكان والعلمي عار الزمان!! الأدبي عِز وشرف والعلمي خيبة وقرف!! وصار مضاربات في الأسياب وعلى أبواب الفصول مابين بعض الطالبات ضعيفات العقول!! بنات الأدبي:مالت عليكم ياأحفاد أنيشتاين ونيوتن! ويردون بنات العلمي:انطموا ياصاحبات قيس ليلى وكُثَيْر عزة!!! ومر هذاك الأسبوع فوضى في فوضى وعاد إحنا الرباعي(أنا+سحر+دانة +مشاعل)ماسلمنا من تعليقات أحد! ومن المعلمات قبل الطالبات! بل وحدة من طالبات جماعة الدين صاحت فينا وقالت:لابارك الله فيمن يؤجج نار الفتنة!! أما أبلة فاطمة قالت:أنا قلت اكتبوا عن المشاكل وحلولها..ماقلت سووا مشكلة حية على أرض الواقع!!! وسؤالي لكم:ماهو الأفضل من وجهة نظرك؟القسم العلمي أم الأدبي؟؟ هل التعبير عن الرأي أصبح بلوة من بلاوي الدهر؟؟؟؟ بانتظار آرائكم..

مجلة الحـــــــــــــــــــــــائط!! كنت أنا وصديقاتي بالمرحلة...

رماح ردينية :

عالم الرؤى والأحلام في شهر ذو الحجة الماضي..زارنا خالي وزوجته وبنته وأبناؤه وهم في طريقهم إلى الحج... وكان عنده بنت اسمها سهام هي الوحيدة اللي مارافقت أهلها في رحلتهم للحج وقضت اجازتها عندنا أما أخوي عبدالكريم فراح مع خالي وأولاده للحج... المهم ياعزيزاتي كان بيتنا فاضي وماحد فيه إلا أنا وأمي وسهام بنت خالي فقط(وهي طالبة بالثانوي)! وكانت سهام يا نايمة يا معاها كتاب صفحاته كثيرة وتقلِّب فيه طول الوقت!! جاملتها اليوم الأول والثاني.. أما اليوم الثالث...فدار بيني وبين أمي حوار.. أمي:ياتغريد؟نادي سهام تقعد معانا..وشفيها بس قاعدة بغرفة النوم لحالها؟؟؟ أنا:مدري عنها لها يومين من وقت ماوصلت وهي شايلة كتاب ضخم وتقرأ فيه ليل ونهار! أمي:ماشاء الله..شكلها تبغى تستغل الاجازة في المذاكرة!! أنا:لا ماظنتي!!أشك إن هذا الكتاب شايل وراه سر خطير!! ودخلت لغرفة نومي اللي كانت سهام تنام معاي فيها ولقيتها على نفس وضعها.. حاطة الكتاب الضخم قدامها وتقرأ فيه بكل شغف.. سمحت لنفسي بالتلصص عليها وهي مو حاسة وسحبت الكتاب من بين إيديها!!! سهام:تغريد؟؟بسم الله خرعتيني! أنا:الله يالاندماج..خلني أشوف وش هالكتاب! ويوم مسكت الكتاب وقفلته وقرأت عنوان الغلاف لقيته كتاب مفهرس بالترتيب الأبجدي لتفسير الأحلام!! أنا(بدهشة):سهاااااام؟؟كل هالوقت اللي تضيعينه وآثاريك تقرأين في كتاب تفسير أحلام؟؟وأنا اللي على بالي إنك تقرأين بمرجع علمي أو سيرة تاريخية؟؟؟ سهام:وشفيه كتاب تفسير الأحلام؟؟عيب ولا حرام؟ أنا:لا هذا ولا ذاك...بس اش المُحصِلة النهائية اللي استفدتيها من قراءة كلمات مأبجدة ويحتمل تفسيرها أكثر من معنى؟؟؟ سهام:أنا أبغى أحفظ كل المعاني عشان أمارس هوايتي في تفسير الأحلام لزميلاتي بالمدرسة!!! أنا:ايش؟؟هوايتك في تفسير الأحلام؟؟ حبيبتي انتي تدرين إن تفسير الأحلام يندرج تحت الفتوى؟؟؟بدليل إن ملك مصر لما أراد تفسير رؤيته قال:يأيها الملأ أفتوني في رؤياي؟؟ ولما الشخصين اللي مع نبينا يوسف بالسجن عرضوا رؤيتهم عليه وفسرها وقالوا له كذبنا عليك رد عليهم وقال(قُضي الأمر الذي فيه تستفتيان)؟؟والنبي محمد عليه الصلاة والسلام قال(أجرأكم على الفُتيا... أجرأكم على النار)؟؟؟؟ معقول تسمحين لنفسك تفتين للناس بغير علم؟؟ سهام:يووه ياتغريد عاد لاتطولينها وهي قصيرة!أنا كان قصدي أخدم البنات..وبعدين ماغلطت أرجع للكتاب وآخذ مقتطفات من كلامهم وأحلامهم وأفسرها بطريقتي!!! أنا:يابنتي مايجوز لك..علم الرؤى علم عميق يتأتى للشخص عن طريق موهبة ويحتاج المفسر والمُعبِّر إنه يكون حافظ للقرآن والسنة عشان يكون عنده الاستطاعة على فك رموز الرؤيا..وانتي بالله من وين حافظة القرآن؟؟لو قلتي لي إنك حافظة جزء عمَّ بس..ياشيخة يمين لأعطيك هدية وأبوس راسك بعد!!! سهام:هههه..الصراحة اعتمادي في التفسير على اللي أقراه في الكتاب بس! أنا:وش دراك أصلاً إن كل الكلام المكتوب بالكتاب صح؟؟اسمعي ياسهام أنا أقول استغلي وقتك اللي تضيعينه في قراءة هالكتاب بقراءة شي ينفعك دينياً ودينيوياً... سهام:بس ماتصدقين قد ايش تفسير الأحلام فادني دَعوياً!! أنا:كيف فادك دعوياً؟وضحي لي.. سهام:تصدقين؟بعض البنات معانا بالمدرسة اللي ألاحظ إنهم مقصرين ومفرطين بعباداتهم..أروح لهم وأقول لهم رأيت فيكم رؤيا!!اللي أقول لها شفتك والنار تحاول تحرقك!!واللي أقول لها شفتك بين الأموات والمقابر..وهكذا..وصدقيني يتأثرون بكلامي ومدة بسيطة وألقاهم تحسنوا وبدأوا يهتمون بدينهم!!! أنا:أعوذ بالله من إبليس!!ومِن متى كان الكذب وسيلة دعوية؟؟يابنت الكذب حرام شرعاً بجميع أشكاله وألوانه..ويجوز في حالة الصلح بين طرفين متنازعين كأن تحسنين صورة كل شخص عند الثاني..أو في الحرب وخداع العدو مثل ماقال المصطفى(الحرب خُدعة)!!لكن غير كذا حرام عليك! سهام:ياالله عليك ياتغريد كيف تحبين تبالغين!أنا قصدي صالحهم..وشفيها يعني لاقلت أنا حلمت فيك كذا وكذا وأنا أكذب؟؟هاه؟ماغلطت على أحد! أنا:إلا غلطتي ونص!!تدرين إن الكذب في الحلم يندرج عند بعض العلماء تحت مُسمى الكبائر؟؟ سهام:أوف!يالطيف! ليش؟؟ أنا:لأن الرسول عليه الصلاة والسلام قال(من تحلم بحلم لم يره..كلِّف أن يعقد بين شعيرتين ولن يفعل)!!! يعني يوم القيامة يُعطى حبتين شعير ويؤمر أن يضفرهم على بعض وماراح يقدر!!ويُعاقب بعدها؟ سهام:ليه؟؟ أنا:لأنه الرؤيا من الله..ولما تقولين لأحد أنا رأيت فيك كذا وكذا وانتي كذابة..فكأنك كذبتي على الله وتقولتي عليه بشيء لم يفعله الله لك!!! سهام:إخس عليك ياتغريد..حسستيني إنه علم الرؤى علم تافه!! أنا:لا ياحبيبتي..مو علم تافه..وخير دليل إنه النبي محمد كان بعد صلاة الفجر يجلس مع الصحابة ويسألهم(من رأى منكم رؤيا)؟ويفسرها لهم..وقال في الحديث(لم يبقَ من النبوة إلا المبشرات وهي الرؤيا الصالحة يراها المسلم أو تُرى له)...لكن كل اللي قصدته لاتفتين بغير علم لأنك مؤاخذة على ذلك ويمكن يكون أغلب تفسيراتك غلط..وخلي التأويل لمن له علم فيه.. سهام:استغفر الله..ماكنت أدري عن كل اللي تقولينه... ونلاحظ ياعضواتنا العزيزات إنه كثير من الناس أصبحوا يعطون للأحلام أهمية أكبر مما يجب أن تُعطى! وعندي في ذلك ملحوظات: 1-مو كل شي نشوفه بالمنام يُسمى رؤيا ويحتاج إلى تفسير!!فيه أحلام من الشيطان..وفي أضغاث أحلام يعني مجموعة مشاهد مختلطة وفيه حديث النفس..مثال:الحلم بالاختبارات في وقت الاختبار!حلم العروس بخطيبها في وقت الخطبة!وذلك لانشغال النفس بالموضوع فنجد إن تأثير ذلك ينتقل للحلم مباشرة...بل إن أشهر مفسر عرفه تاريخنا الاسلامي كان ابن سيرين كان البعض ممن يحضرون مجالس ابن سيرين يقولون:كان ابن سيرين من بين 40 رؤيا تُطرح عليه يُفسر واحدة وأما الباقي فليست رؤى!!! 2-تفسير الرؤى لايتم بشكل عشوائي عن طريقة قراءة كلمات في كتب..وإنما لابد للمفسر من معرفة حال الرائي وقت حدوث الرؤيا ومدى صلاحه ويحاول تحليل الرؤيا إلى عدة رموز ثم يربط بينها ويجعل بينها علاقة تجعله يتوصل إلى فهمها ووضع تفسير لها.. 3-وجهنا النبي إلى كيفية التخلص من الرؤى المزعجة...وذلك أن يقوم من حلم بحلم مخيف أو مزعج بالنفث عن يساره3مرات وقول(اللهم اجعله خيرا)..وأن يغير وضع نومه لو كان على الجانب الأيمن ينتقل للأيسر وبالعكس.. 4-طرح الرؤى على أهل العلم الثقات وليس بعض الدجالين الذين امتلأت بهم شاشاتنا الآن! 5-أحياناً قد يرى نفس الرؤيا عدة أشخاص ولكن يتم تفسيرها لكل شخص تفسير آخر بحسب حالة الرائي... قبل بضع سنوات قرأت كتاب رائع بعنوان(من رأى رؤيا فكانت كما رأى) فيه رؤى منذ عهد الأنبياء مروراً بالصحابة وحتى عصرنا الحاضر و تفسير كل رؤيا...من أرادت الرجوع له فالمؤلف اسمه(ابراهيم الحازمي)

عالم الرؤى والأحلام في شهر ذو الحجة الماضي..زارنا خالي وزوجته وبنته وأبناؤه وهم في طريقهم إلى...