جبنه قريش .....من إيدين خالتي

أنا لاميتا جايبه لكوا جبنه قريش من إيدين خالتي حبيبتي
جربوها وهي جميله جدا وسهله في عملها جدا ..
لكن الأفضل في الشتاء لأن اللبن بخيره أكتر من الصيف


الجبنه القريش

نملأ برام فخار باللبن الحليب بدون غليه
بمعني نحضر اللبن ونضعه في البرام علي طول ..نملأه علي الآخر
نضع البرام في أي مكان في المطبخ ..
علي الترابيزه مثلا أو في فرن البوتاجاز أو دولاب المطبخ
بعد حوالي 24 ساعه .....
نضغط بإصبع علي اللبن نشعر بطبقه طريه وتحتها طبقه جامده قليلا
الطبقه الطريه هي القشطه ... والجامده هي ما ستكون ( جبنه قريش )
نرفع باليد القشطه الموجوده علي الوش .. نستخدم اليد حتي نحدد ونشعر بطبقة الجبن من أسفل
نضع ماء مغلي في البرام فوق الجبنه من الجوانب وممكن أيضا من النص ..
بعد قليل عندما تنفصل الجبنه عن حواف البرام ويبرد الماء ..
نقلب الجبنه علي شاشه أو ممكن والأصح علي حصيره لتعطينا الشكل الخارجي للجبنه القريش المتعارف عليه ممكن في طاقيه من الخوص أواللوف
نترك الجبنه معلقه بعض الوقت حتي تصفي كل الماء من داخلها
لا يضاف ملح للجبنه القريش .. بل نكتفي بدرجة الملوحه الطبيعيه الموجوده فيها
لا تضاف منفحه للجبنه القريش .. مثل الجبنه البيضاء
ممكن تجربة برام صغير كبدايه وكتجربه ..
ممكن إستبدال البرام بسلطانيه بايركس أو صيني

دعواتكم لخالتي حبيبتي