جَمالك له دور بشخصيتك مع اسرتك ومُحيطك,بطلي كَسل واهتمي(1)

صباح/ مساء الهنا والسعادة وراحة البال






عاملين ايه ؟




هالفترة احنا بأوج العَام الدراسي ، الناس مشغوله .. بس البنات المتخرجات وقاعدات بالبيت او متوظفات وغير متزوجات اقولكم ( ياحظكم) ماشاء الله ..


فعلاً راحة البَال مهمه ، شعور الحرية وعدم الارتباط بشخص امر جَميل ، لكن الارتباط بشخص مريح ايضاً امر جميل ..




كلامي التالي عن الثَقه بالنفس وعدم الاهتِمام بكلام البشر+ كيف تتحدين نفسك بما يخص الجمال .. راح يكون كلامي لطيف بعدين تزداد الحده فيه .. للمصلحه العامه .. :rolleyes:


هالثقه بالنفس دائماً يصاحبها عدة عناصر تختلف من شخص لشخص ..


فيه نَاس يثقون بنفسهم لأنهم اشكالهم مقبوله اجتماعياً ( جميلين) ، وفيه ناس ثقتهم عاليه بسبب ثقافتهم ومَنصبهم، اخرين ثقتهم بنفسهم عاليه بسبب بيئتهم ومحيطهم الي يساعد على ان الواحد ينشأ واثق من نفسه قادر يتواصل مع المجتمع ..



احنا بزمن السَطحيه فيه شاده حيلها ، السطحيه تلعب دور كبير بحَياتنا ، نهتم بجمالنا وشراء كل مايُمكن يعشمنا بشكل افضل سواءللبشره ، شعر، جسم ، ( حتى تكبير الشفايف البعض صار يبيه حتى لو كانت الشفايف الكبيره الممتلئه غير مناسبه لهم) !




القناعه كنز ..



العمر يجري واحنا نطمح لجمال اكبر .. ضاع المغزى الحقيقي من الجمعات والحميميه فيها.. صارت الوحده مُمكن ماتحضر مناسبه بسبب اسباب واهيه تخص الشكل !


الي تملك الثقه هذي انسانه مَحظوظه ، ربي انعم عليها بأنها تنظر للحياة بمنظور ايجابي .. عرفت تستمتع بحياتها دون الخوف من نظرات المُجتمع لها وتعليقهم على حالتها الاجتماعيه او الماديه ، او شكلها، لبسها الخ...


البنت الي مو واثقه من نفسها .. لمتى التخفي ؟ لمتى الانعزال ومُعاقبة نفسك لانك مو واثقه من شي فيك ؟! ..


هل المُجتَمع الي بتواجهينه بيرفكت لهالدرجه ؟! وحتى لو كان مجتمع مثالي من ناحية الماده او الصيت او الجمال.. ماتحزنين على نفسك وشكلك وانتي مخبيتهم لأنك تنظرين لهم نظرة دونيه !!



الثقه بالنفس وحُبها ، امر يبيله مُمارسه وتمرين .. مره على مره وموقف ورا موقف بتكونين توب ومافيه مِثلك .. لكن اعطي نفسك فرصه !



القهر بالأمر ان مُمكن البنت مو واثقه بنفسها لكن ماتشتغل على نفسها اصلاً حتى تكون افضل ..


الجسم مُش ولابد ؟ اكلتي اكل غير صحي او اكلتي من الملل لدرجة التشققات بانت وبشرتك تعبت ؟ لمتى هالحال؟


هل سويتي رياضه ، هل شربتي ماء اكثر .. ؟



الإهمال والعَجز امر منتشر بين البنات والحَريم ، اي شي فيه تعب ومشقه يكون خارج الصوره مايبونه ؟


مايدرون ان العُمر يروح والاجواء الحلوة تعدي وتفوت وهم منغلقين على نفسهم !!


كل بِنت ماتشتغل على نَفسها بشكلها ، انا متأكده ان داخلها مكنونات جميله من ابداع وجاذبيه .. لكن الشكل يحطمها ويخليها بنت عاديه بشخصيتها..


مَن تعاني او تعرف احد يُعاني من هالأمر ؟!



من حُسن الحظ اننا بزمن الوقت يعدي بسرعه فيه ، يعني حتى لو اهتميتي بجسمك وتعبتي عليه وحرمتي نفسك من الاكل الدسم ( بيكون الامر مو متعب لك لان الوقت يعدي بسرعه، والنتيجه مُهي بعيدة المنال)



بحَالتك الامر يبيله عزيمه واراده ، وعَقل واعي يعرف وش يبي ..


الاساس مُهم ، لو اجتمعت كل ماركات العالم حولك بالميك اب او الفاشن ، لكن مافيه اساس حلو يستقبلهم .. مارح تكوني انثى جَميلة ..


واتَوقع الفنانات اثبتوا هالشي امامكم ..
الي زولها حلو تطلع تصاميم (فَالنتينو) او (إيلي صعب) خياليه عليها ..


اما الي جَعلت عمليات التجميل والفيلر والبوتكس حَلها الوحيد تصرف ماده اكثر ولا يبين الا مَاركات جميله عليها كأنها علاقه فقط..


كوني ذَكيه ، خلي اساسك كأنه (مانيكان) يفتح النفس للملابس .. حَافظي على بشرتك المتخشبه من الهلاك ..



مُنتجات لا تشترينها ع العمياني ! َضروري تكونين مسويه سيرش عن كل شي من مكوناته وسعره ونتايجه ..


فشل التجربه بعد اقتناء المنتج امر مُحبط للكل .. فلابد الوعي بهالأمر ..



كوني اكيده ان الرياضة + الماء = ٣/٤ الجمال .



سنين مَخليه نفسي مثل فأر التجارب لبعض المستحضرات الغالية والمتوسطة بالسعر.. ( حاشاني عن الفئران لكن بوضح لكم)

اكتشفت ان المُنتجات خاصة المخصصه للبشره ، تحتاج تَدخل منك انتي حتى تبان نتايجها عليك !



هل تَعرفون هالأمر ؟


كثير نشكي ان المنُتج المخصص لحب الشباب فشل معانا مع اننا التزمنا فيه ..

حطي ببالك ان استخدام بعض المنتجات للبشره يَحتاج مساعده منك انتي ايضاً ..


مو مَعقوله تحطين شي لبشرتك وتبينه ينفعك وانتي راعية اكل دسم وفلفل ومحذقات + شبه انعدام للماء بجسمك!!


الامر وَعي وثقافه قبل مايكون دفع فلوس ..



حصيلة تجاربي الحَاليه ، لابد اوضحها واسردها لاحقاً بانستقرام بخصوص البشره والسيلوليت ومنتجات لترطيب الشعر المهلوك دون كثرة زيوت ..



ايضاً/

صَدقيني ايتها العجازه والمُتهاونه بالرياضه .. احب اقولك وابشرك .. نص جمالك بتلاقينه بالرياضه ( بعد فتره بسيطه بتلاحظين كيف الخدود تورد ، كيف الجِينز يدخل برجولك وفخوذك دون مُضاربه ، مؤخرتك بترتفع وتكون جذابه مهما كان جسمك عريض ) وغيره من فوائد وطرق ممكن تبين اساسك الي تبينه يبان لك.


كفاية ان اول دَقيقتين من تمارين التحميه .. بتحسن الطاقه السَلبيه طلعت منك ..


لما الواحد يكون مَعصب فيه تمارين حسب ماجربت تطير العصبيه بشكل !


بعد الرياضه ارجع للشَخص الي زعلني واتفاهم معاه برواق ، لأني طَلعت حرتي بالتَمارين .. ( دائماً ردود فعلنا القوية الي مالها داعي مو لازم نطلعها للبشر ) فنطلعها بالرياضه .. ( اسهل حل للتنفيس+صحه+ايجاد ملامح الجسم)




اتمنى الكُل يبدا ويلتزم ، لاتبدأون بالصعب وتتركونه !
خليكم بالسَهل مع الالتزام ، ثم زيدو التمارين وهكذا ..


دامنا احَياء بهالدنيا وش ورانا ؟ وش ناقص البنات عن انهم يكونون ذوات اجَسام ملمومه وتُسر الناظر ؟




كل كَلامي ذا يُعتبر مقدمه او نبذه عن اهمية الاهتمام ..


لما افضى عدل بسرد مواضيع هُنا او كلام موثق بالصور بانِستقرام عما يُفيد.


وياليت الكل يُبادر بالعطاء .. كلنا خَوات وعرب ، نبي نرتقي بالتَعامل ونكون الافضل حتى بالاهتمام والعناية ..


موفقين ..