جننتني أوروبا

مرحبا بنات

مقهوووووورة حدي وما اعرف لمين اشكي الشكوى لغير الله مذلة

وقلت افضفض لحبيباتي شوي بما أني هنا اشعر بالوحدة القاتلة ورب العالمين دلني على هالمنتدى اللي صار يواسي غربتي


يمكن الأغلبية عارف أني في أروبا في النرويج خصوصا كرهتها حدي مليت منها

الواحد ما يقدر يتكلم ويا عياله ولا يربيهم زي ما يحب إلا والحكومة رازة وجها في كل شئ الله يقطعها ويخلصني منها بس.

من قبل فترة صارت مشكلة بيني وبين زوجي والعيال ما كانو بالبيت المهم ما شاء الله ع الجيران على طول بوليس وخصوصا لو عرب ومسلمين عنصريه بعد جت الشرطة قالو في بلاغ أنكم بتتخانقون قلت لها يعني أنتو ما يصير بينكم اختلاف مافي مشاكل ولا كاملين وهدوء حياتكم قالي تبين نأخذ زوجك لو ماذيك أو ماذي العيال قلت لها مافي شئ والعيال ما يدرون بمشاكلنا وبوقتها العيال كانو في مباراة الحمدلله. المهم مر شهرين وسافرنا وجيت قبل اسبوعين ولا ألاقي رساله من حقوق الطفل وياويلي كيف صارت حالتي قلت بياخذون عيالي وما اشوفهم لين يكملون السن القانوني رحت قالت جانا بلاغ من الشرطة انه في مشاكل في بيتكم واحنا خايفين ع العيال قلت لها العيال عيالي وانا أخاف عليهم أكثر منكم والحمد لله مافي مشاكل بيني وبين زوجي ساعتين وانا عندها واليوم جت زياره تطمئن على العيال وقعدت تكلمهم بس ياني على كلامها بطريقة الكلام تسألهم مئة سؤال وسؤال ويجاوبون حتى على نظافة البيت علقت تقولهم غرفتكم دوم مرتبه وإمكم لما تعصب شنو تسوي وتساعدونها ولا لا وكيف بتقضون اوقاتكم ومن هالاسئله اليهودية انا مبينه قدامها هاااادية بس جواي نار تغلي والله ولما طلعت ما ادري شسوي اول شئ قلت افضفض لكم


والله كرهت عنصريتهم وكرهت أني ما اقدر إربي عيالي وهذه مو مشكلتي لوحدي مشكلة كل العرب وخصوصا المسلمين. والله لو يأخذوا طفل من مسلم ما يرجعوه لأهله لين صار مثلهم ونسى إسلامه ولو مسيحي ما يطول عندهم أكثر من شهر.



بنات أدعو لي الله يبعدهم عني ويحفظ عيالي من كل شر والله لو راح واحد منهم أموت
على ها لحال راح نظل تحت المراقبة مدة ثلاث اشهر بالله عليكم هذه عيشة لا في بلادنا عايشين ولا بالغربة مرتاحين وين نروح بس تعبت والله


آسفه صدعتكم وطولت عليكم بس اعتبروها هذرة وحده تكلم نفسها ومالها احد تكلمة