حامل.. تغذيتي ضعيفة جدا وخايفة عالبيبي

السلام عليكم ورحمة الله وبركاته

توقعت اني القى مواضيع لأخصائيات طب النساء والولادة، لكن عموما بس حابة حد يطمني

طبعا لا يخفى على احد ان بلادي "ليبيا " في حالة حرب من سبعة اشهر او يزيد، وانا حملت اثناء هذه الفترة والان كيفني داخلة الخامس..

مشكلتي ان بسبب الحرب، وخاصة مع دخول شهر رمضان، ارتفعت الاسعار واختفت بعض المواد الغذائية ونقصت من الاسواق بسبب مشاكل معبر راس جدير (والكل طبعا يعلم اننا كنا في حصار بحري وجوي يمنع وصول الغذاء) ، فصرت اخجل اطلب من زوجي يجيب شي لاننا ماكناش قادرين نسحب من المصرف اكثر من الراتب واحيانا اقل من الراتب، كما ان الاسعار كانت في ازدياد، فحبيت اننا نوفروا وما نصرفوش كل اللي عندنا، بالتالي صرت اطلب بس عشان تغذية بنتي، يعني الحليب والجبنة والفاكهة والخضروات صرت ما نشتري منها كثير وما اعطيها الا لبنتي لانها صغيرة "دوبها سكرت عام الان"...

الخلاصة ان تغذيتي سيئة جدا ووزنت من اسبوعين فاتوا عند عيادة لقيت وزني 52 كيلو!! هذا كان وزني وانا بنت قبل ما اتزوج!! يعني لو مش حامل ممكن يكون اقل بعد!!! مع العلم ان طولي 157 سم

بصراحة ضميري مأنبني عشان اللي في بطني، هو روح ومن حقه انه يتغذى، وفي نفس الوقت الظروف المادية زي ماحكيتلكم زائد النفسية التعبانة طول هالمدة اللي ساهمت وطيرت الشهية منعني اني اهتم بنفسي لدرجة اني كنت متوقعة لما اروح للعيادة حالقاه ميت في بطني وتفاجأت (وفرحت) لما شفت قلبه ينبض في الجهاز..

لكن مخاوفي مازالت قائمة... يا ترى هل فات أوان التغذية؟؟ هل اقدر اعوض الشهور اللي فاتوا؟؟ قررت اضغط على نفسي واقول لزوجي واطلب منه عشان اللي في بطني!!! لكن هل ينفع الان ام ان اللي صار صار وخلاص العظام تكونت؟؟
الحمدلله الحصار بدأ ينفك تدريجيا وتتوفر السلع اللي كانت ناقصة، بس مازال الغلاء للأسف !!

لاني حتى حبوب الحديد والفيتامينات لا اداوم عليها، اولا لنقصها في الصيدليات ثانيا لان سعرها تضاااااعف جدا!!!

طمنوني بالله عليكم اخواتي!!
.
.