حبيبة قلبي - قصة خليجيه حلوه

السلام عليكم

كيف حالكم ؟؟؟ يا حلوين

جبت لكم قصه حلوه قريتها في احدى المنتديات ان شا الله تعجبكم



اترككم مع القصة


الجـــــزء الأول ..



في السياره ( طارق وفيصل اخوه وسالم )

طارق : الووووووووو هلا والله بالغالين هلا يبه

رغد : اهلييين ابن العم شخباركم ؟

طارق : الحمد لله ,

رغد : في صوت عندك , اعترف مين معاك ؟ ( تضحك ) ..

طارق : هههه هذولي فيصل وسالم

رغد : والله ؟ عطني عطني بكلّمهم

طارق : خذي فيصل :

فيصل : الووووووووووو

رغد بعفويتها المعتاده : هلا فصّووووول

فيصل : بنت

رغد تضحك : خلاص اسفين فيصل . شخباركم مانشوفكم ؟

فيصل : الحمد لله تعرفين ..اااااااااه مشغولين بالدراسه ( فيه الضحكه )

رغد : ماتعرف ترقّع .. احنا في اجازه

فيصل : شسوي مكشوفه ..

رغد : الّا قول ماتبون تجي بيتنا , تراني ما أعض , ولا نايم 24 ساعه

فيصل : لا انشاء الله اقرب وقت برز خشتي عندج , وبتزهقين مننا

رغد : لااا وشدعوه حد يزهق من عيال عمامه وعماته , اقول ماعندك سالفه عطني سالم

سالم : هلا والله بالغاليه

رغد : هلاااااا سالم شخبارك ؟

سالم : الحمد لله شمسويه انتي ؟

رغد : والله زهق , وبعدين وين سارونه ماترد علي ادق عليها ؟ واخر مره تقول لي انك انت مارضيت تجيبها

سالم : حرام عليج كانت سيارتي خربانه

رغد : خلاص مسموح

سالم : قلبج ابيض داري ماتزعلين , بكره اييبها لج

رغد : شكرا , عطني طارق

طارق : هلا

رغد : طارق تكفى ييب سعووووووووود ابلعب معاه شوي

طارق يضحك : لأ مافيه

رغد : الله يخليك والله زهقانه انت تعرف ماعندي احد في البيت .. ويدتي كله نايمه

طارق : طيب بس مو الحين

رغد : لييييش ؟ والله زهقانه يللا عاد

طارق : احنا الحين طالعين الجمعيه

رغد : طيب عقبه ؟

طارق : طيب خلاص ولايهمج كله ولا رغّوده ..

رغد : شكرا يللا باي

طارق : لحظه سالم يبيج

رغد : عطني اياه

سالم : اقول رغوده تيين ويانا الجمعيه ؟

طارق وفيصل يأيدون الفكره : ايه تعالي

رغد : لا أخليكم لحالكم ,, المره اليايه

سالم : يعني مهيب اول مره بنوديج رحتي ويانا قبل .. تعالي

رغد : لا والله ماني مستعده نفسيا ..

سالم : اووووووه .. نفسيا .. بس مستعده حق سعودوه ولد طارق

رغد : عاد هذا شي ثاني ييلا باي قول لطارق لا يتأخر

سالم : انشاء الله , باي

رغد : باي


بعد ماسكر سالم : ياحيلها بنت عمّنا

فيصل : ماشاء الله عليها محد يكرهها ..

طارق : أي والله صادقين .. مدري ليش هذي الوحيده من عايلتنا اللي تدش القلب
سالم : واختي ساره ؟

طارق : رح انت ويا اختك

فيصل : ههههههههههه

فيصل : بس شي ثاني

سالم : وشو

فيصل : رغد حليوه وحبوبه بس تكسر خاطري ..

طارق : ليش ؟

فيصل : يعني تعرفون .. ماعندها اخوان ولا خوات .. وامها متوفيه من 5 سنين .. وابوها كله مسافر .. وهاليّده مريضه ماتقوم من مكانها , شي طبيعي تزهق في البيت ..

طارق : بس رفيجتها امل دايم وياها

سالم : ايه صج طارق بقول لك شي ,بعدك صغير .. وانت تعرف ان ولدك سعود يحتاج ..

طارق بعصبيه : وش يحتاج ؟؟

سالم بصوت واطي : أم , يعني معقوله الوالده هي اللي بتعتني فيه طول الوقت ؟

طارق معصب : مابي اتزوج , بعدين شياب الطاري الحين ؟

فيصل : خلاص خلّه ياسالم .. اسفين

طارق : والله مو وقته تفتحون الجرح وترشون عليه ملح ..

سالم : سلطه ؟

طارق يضحك ببرود : بايخ

فيصل : هههههههههاي والله طرّوق شكلك يموّت ضحك وانت فايخ

سالم : خخخخخخخخخخخخخخخخخخخخخخخخخ

طارق : نزلوا نزلوا الله يصبرني عليكم

سالم : بس رغد فيها شي حلو , ياريت لو ساره تسوّي زيها ..

طارق وفيصل : وشو ؟

سالم : متمسّكه , يعني حتى لاراحت السوق تلبس شيلتها وعباتها مو بس عنا..
طارق : صح هذا شي حلو , بس لاتنسى ياسلّوم ان امها الله يرحمها سعوديه

فيصل : والنعم

طارق : بس سالم صادق , انا ماقد مره شفتها بدون شيله او عبايه

فيصل : انا مره وحده بس ..

طارق : والله مافيها شي ينعاب ,,.. , ياحظ اللي بياخذها .. كنز عنده

سالم : ايه والله صادق

طارق : طيب يللا دخلنا .. والله اليوم يارغد تكلمنا فيك لما قلنا بس

فيصل : ماحشّينا

طارق : طيب يللا ( ودخلوا الجمعيه وتمّوا يتمشون ويسولفون )

سالم : الا صح طارق ابوي شكان يبي اليوم ؟

طارق : مدري انا ماكنت وياكم..

سالم : فيصل انت كنت بالشركه اليوم .. ابوي وصّاني على شي بس مادري وشو نسيت .

فيصل : ماذكر

سالم : يوووه .. الحين اذا مايبت له اللي يبي بينازعني

طارق : موب قايل لك شي .. هذا الجمعيات مليانه .. لبغى شي ييب بنفسه

فيصل : انت ماتشوف عمامنا كلهم موب فاضين لحد ؟ كلّه في الشركه .. ولا مسافرين .. والمسؤليات علينا احنا شي طبيعي

طارق : ميخالف فصّول .. أهلنا شنسوي بعد ..

سالم : انا ماعتقد بييي اليوم اللي افكر اخذ فيه دوام ثابت بشركتنا

طارق : حتى انا .. اروح زياره لابوي ولا عمامي .. ومايخلّوني فاضي لازم اشتغل

فيصل : يابن الحلاااااااال .. بلا شركه بلا بطيخ .. شلنا على الهم ووجع الراس .. خلينا بحريتنا

طارق : ايوه يابو حريه .. امشوا امشوا يللا تأخرنا بنمرّ ناخذ سعود نوديه عند رغد .. تيون وياي ؟

فيصل : لا انا ابي انام ..

طارق : ونت سالم ؟

سالم : اخاف يبوني الأهل

طارق : طيب ماشي .. اروح لحالي ..

سالم : والله صج , امي توها داقه علي مارديت عليها .. معليش طارق وقت ثاني

طارق يلتفت على فيصل : وانت فصول ماتأجل نومك ؟

فيصل : اسف .. النوم اهم شي .. ماأخره دقيقه وحده

طارق : خلاص هالمرّه بعديها لكم .. طلعنا

( عند رغد )

طارق يدق الجرس

تاني تفتح الباب : سلامو اليكم بابا طارق

طارق : هلا والله بأهل سيرلانكا

تاني : اوووه دش يللا بابا انت واجد مشكله

طارق بصوت واطي : بابا في عينج ياشينها من حلجج

طارق : ايه انا عمج بعد مو بس ابوج يالسيلانيه

( تاني متعوده على اسلوب كل واحد فيهم صار لها 5 سنين عندهم )

تاني : كلاس عمي انتا فوق راس مال انا مافي سوي قرقر واجد يللا دش

طارق : انزين الله يغربل بليسج خربتي حجينا

تاني : رغد رغد

طارق : هذي عمتج لاتقولين لها جذي رغد حاف

تاني : لا هذي يدّه مال انا , انت ايش مشكل رغد في قول ناديني شذي

طارق : بس بس لاتكملين مو ضابطه ابد .. وين يدّتي نايمه ؟

تاني : لا

طارق : اوكي بروح لها

( نزلت رغد من فوق ودورت على طارق مالقته وسألت تاني قالت لها انه عند يدّتهم )

رغد تروح غرفة يدتهم الا طارق توه طالع

طارق : بسم الله الرحمن الرحيم

رغد تضحك : الحمد لله رب العالمين

طارق : من وين طلعتي يالينّيه ؟

رغد : من فوق , عطني سعودوه اشوف

طارق : مابعطيج اول قولي اسمه عدل

رغد تضحك : سعود بن طارق

طارق : هاج خذيه مابيه

رغد : والله الساعه المباركه

طارق : هيه لج نص ساعه بس بردّ اخذه

رغد : مب على كيفك , انت مو يايب اغراضه وياه ؟

طارق : الا

رغد : الحين الساعه 3 .. الساعه 5 تعال خذه

طارق : اوف قويه , ويييييييييييييييييين .. لا يللا انطرج الحين حبيه ورجّعيه

رغد تضحك وبعفويتها امعتاده ومزاحها المعتاد : يللا قوم قوم برا برا عندنا اجتماع انا وولد عمي .. لاخلصنا دقّينا عليك

طارق يرفع حواجبه : موب قايم .. تدرين شلون ؟ قومي ييبي لي قلاص ماي

رغد : مابي هذا تاني عندك

طارق : انا ابيج انتي تييبينه .. ولا مابعطيج سعود

رغد تمشي للمطبخ : اوهوووه ,, ذلّنا هذا مع ولده ..

طارق فاقع ضحك

رغد وهي راجعه : خذ .. ومو عشان ولدك حلو تستغلّنا فيه ..

طارق : شكرا شفيج كابته على عباتج ؟

رغد وهي تطالع عباتها : إه مانتبهت

طارق يضحك بقوه : من كثر منتي معصبه

رغد تكلم سعود : حبيبي سعود ابوك ماينبلع ابد ..

طارق يقوم ويروح عند سعود في يد رغد : حبيبي سعود بنت عمك مليقه ماتنعطى ويه ..

رغد بمرح بس تسوي عمرها زعلانه وتقلب حركات بزران كانوا متعوّدين يسوونها : اصلا انا احلى منك

طارق : يوهووووه انا نسيتها ذي شلون يات في بالج ؟

رغد تكمّل : وبعد وبعد بيتنا احلى من بيتكم

طارق يضحك على حركه رغد : هههههاي حلوه هذي

رغد : وعندنا العاب وايد ماعندكم زيها

طارق : هههههههههههههههههههههههههههههههههههههههههههههاي يا أيام الأبتدائيه

رغد تضحك : بس والله ذكريات حلوه

طارق : يوه باقيلها سنه وتخلص مسكيييييينه

رغد : مو عشانك مخلص جامعه تشوف عمرك

طارق يضحك : لا لا نمزح

رغد : وبعدين صح ؟ سلوم وفصول وينهم ؟

طارق : كل واحد في بيتهم .. محد رضى يي وياي

رغد : مالومهم ولد عمتهم ومقرود .. يتبرّون منه بعد ؟

طارق دفّ رغد من عند كتفها : روحي زين

رغد تسوي انها جاده : ممنوع اللمس لو سمحت

طارق يدفها بقوه بغيت تطيح ويطيح سعود وياها

رغد : هاي انت ؟ مصّختها امزح بشويش تراني وايد رقيقه

طارق : والله لو ماولدي في يدج كان سطحتج بالأرض

رغد : شدعوه طمباخيه ؟

طارق : كاااااااااااااااااااااااااااااااخخخخخخخخخخخخخخخخخ ,, يبيلج نحطج بملعب ونحلي اللاعبين يشوتون فيج عاد ابن امه اللي بيبج قول

رغد : مايضحك

طارق يبتسم : الا والله يضحك

رغد : انزين الحين اخلص علينا بتقعد عندنا ولا بتروح ؟

طارق : لا بردّ بيتنا .. وحلي عندج سعود لما تشبعين منه دقي علي ايي اخذه .. انا بروح انام

رغد : وشلون ادق لك وانت بتنام ؟

طارق : مابخليه عالسايلنت بخليه عام عسب ترمسيني انش من الرقاد , انطرج

رغد : يوه لاتعقدني وتتحشى اماراتي مافهم شي

طارق : بس انتي امج سعوديه ؟ لاتنسين نحن نتحدّر من أصل اماراتي

رغد : انزين يالأصل ونعم فيكم والله

طارق يبتسم : يللا مع السلامه

رغد تسكر الباب وراه : باي

( بيت ابو رغد كان هو اكبر بيت في العيله .. وابو رغد برضوا هو اكبر واخوانه وامه عندهم في البيت .. فهم يتجمعون كل خميس في بيتهم .. طبعا يمرّون العمام احيانا يسلمون على امهم .. والشباب يمرون مرتين بالاسبوع او اكثر .. يتطمنون على اليدّه .. ويشوفون رغد ان كانت تبي شي )

( الساعه 4) يدق الباب

رغد : منو هذا لايكون طارق ياي ياخذ سعود ؟ مابعطيه اياه

رغد راحت تفتح الباب , شافت واحد طويل وعريض واقف ومعطيها ظهره

رغد في نفسها : منو هذا ؟

........( يلتفت) : السلام

رغد : حمداااااااااااااااااااان .. هلا والله وينك وين الناس مانشوفك ( حمدان ولد عمهم بس بعيد شوي .. مايي بيتهم وتجمعاتهم وايد ومن زمان عنهم )

حمدان : هلا رغد

رغد : دش

حمدان يطالع فيها : بس كنت بسلّم على يدّتي

رغد : موجوده , ( تضحك) وين بتروح فيه يعني ؟

حمدان يبتسم : وعمي موجود ولا مسافر ؟

رغد : مسافر

حمدان : متى بيرد ؟

رغد تأشر له يدش : يمكن بعد اسبوعين انشاء الله , شخبار اروى عساها طيبه

حمدان : طيبه , وتسلّم عليج ,

حمدان يبتسم ونظراته مبينه : وانتي ماتزهقين لحالج ؟

رغد : مو وايد .. رفيجتي امل دايم عندي .. وساروه ومريم بعد

حمدان : بنات عمتج ؟

رغد : ايه تذكرهم ؟

حمدان : ايه عرفتهم ( يلتفت على الكنبه الثانيه يشوف سعود نايم ..)
حمدان : ماشاء الله ماشاء الله , هذا ولد طارق ؟

رغد : ايه سعود

حمدان : يشبه له

رغد : وايد
حمدان يلتفت عليها : شخبار طارق وفيصل وسالم ؟

رغد : الحمد لله

حمدان بنظره : ليش انتي شدرّاج عنهم؟

رغد : والله الصراحه احنا مترابطين ولله الحمد .. انت اللي لحالك مب حول الدنيا

حمدان : والله شغلي بالشركه ماخذ كل وقتي

رغد تبتسم : كيفك , احنا اللي ميتين عليك

حمدان : روحي ويا ويهج

رغد : لحظه شوي بييب لك عصير

حمدان : لا ماله داعي بدخل اشوف يدّتي

رغد تأشر على الغرفه : بنفس الغرفه ماغيرناها ؟ ولا نسيتها ؟

حمدان : لا شدعوه

رغد تضحك : والله مايندرى .. يللا عن اذنك

حمدان : خذي راحتج

( بعد ماراحت )

حمدان : والله تغيرت .. احلوت اول ماكانت ذاك الحلا .. ضحكتها حلوه .. صوتها ناعم .. وايد رقيقه .. بس اختي اروى وايد احلى منها

رغد جايه من المطبخ وشايله صينيه فيها عصير : مارحت حق يدتي ؟ الو ؟

حمدان : هاه ؟ الحين بروح

رغد تمد له الصينيه : وقول حق اروى.. تيي الخميس هذا . مانشوفها الا في الشهر مره

حمدان يبتسم : انشاء الله , عصير شنو هذا ؟

رغد : ليمون

حمدان : ماكو تفاح ؟

رغد : يللا اقول اشرب وانت ساكت , مافي الا ليمون تبيه ولا موب لازم

حمدان يبتسم : مو حلو الليمون

رغد ترفع حواجبها : ليش ؟

حمدان يضحك : روحي رديه محل مايبتيه , مابي اشربه

رغد تشرب العصير : توفّر

حمدان يضحك : عن اذنج بروح حق يدتي

رغد تشرب العصير وتأشر له بيدها ( روح)

حمدان وهو يمشي يلتفت عليها ويطالعها ..

رغد بعد ماراح حمدان : متغيّر .. بس شفيه كل شوي يطالع فيني ؟ لايكون فيني شي غلط ولا العبايه منكب عليها عصير ؟

حمدان رد من عند يدّتـه وهو يطالعها : يللا فمان الله

رغد : مع السلامه

حمدان يمد يده : خلينا نشوفكم ؟

رغد تصافحه بسرعه : سلم عليهم

حمدان : طيب , مع السلامه

رغد بعد ماراح حمدان تتطنز : عليه نظرات مالها داعي, ماشاء الله عليه ولد العم وايد اخلاق .

(رغد واااايد تحب اليهّال .. وسعود كان نايم .. كل شوي تطالعه وتحبه .. دقت على رفيجتها امل وامت تسولف وياها .. امل هذي حياة رغد .. مستحيل تستغنى عنها .. وكل كبيره وصغيره .. تدري عنها )

رغد : تدرين امل .. زين انج ماييتي اليوم بيتنا

امل : ليش ؟

رغد : اليوم يا ولد عمي حمدان

امل : اللي ماتشتهينه؟

رغد : والله اهو حليو .. بس الثلاثي المرح احسن منه

امل : ماتبينه عطينا اياه .. شالنحاسه ؟

رغد : حلالج , مانبيه

امل تضحك : هههه ياحليلج امزح وياج .. اجل سعود وينه ؟

رغد : نايم . شوفي القهر يوم يابه طارق نام

امل : اصلا هو شبيفهم منج نايم ولا قاعد

رغد : كيفي احب اناغيه واحاجيه .. انتي بنفسج ذاك اليوم كنتي وياي ..

امل : متى

رغد : يوم سبّحناه ولبسناه ثياب اللعبه حقت اختج , تذكرين ؟ قبل اسبوعين

امل تضحك : ههههههههههههههاي . عاد انتي ولد عمج صغير يناسب له ملابس العروسه

رغد : والله عروستكم اهي اللي كبيره

امل : ذاك اليوم طارق موّتني ضحك يوم شافه بغى يستخفّ

رغد تضحك : اييييييييييييييييييييه .. هزأني

امل : ياحليله

رغد : لايكون حاطه عينج عليه ؟

امل : لا يبه مخلينه لج ..

رغد : شكرا مانحتاج

امل : الا صج هو مو مفكر يتزوج ؟

رغد : لا

امل : شقلتي لي اسم زوجته الله يرحمها ؟

رغد : نوره . بس انا قلت لج اهو ماكان يحبها بس تزوجها مبكر عشان ابوه

امل : بس اكيد حبّها بعد الزواج .؟

رغد : مو وايد . بس عمي كان يبي يشوف احفاده قبل لايموت لانه كان وايد مريض .. بس الحين الحمد لله تعافى

امل : توفت بحادث ؟

رغد : لا , اول ماولدت سعود , الله يرحمها , بس وايد حزن عليها .. اهو صج ماكان يحبها , بس ماتمنى نهايتها تصير جذي .

امل : الله يرحمنا برحمته اجمعين .. سمعي امي تناديني مضطره اسكر عنج .. يللا باي

رغد : سمعيني قولي لامج انج بكره بتتغدين عندنا زي قبل امس ..

امل : مارح يي حد بيتكم ؟

رغد : ماتوقع ..

امل : خلاص اوكيه

رغد : واذا يا احد عادي , عاد كنج مو متعوّده عليهم .. ايتها الصديقه الصدوقه

امل : ههههههههههههههههههههه حلوه .. أي والله صار لنا 3 سنين صديقات .. ماشاء الله علينا ,, الله لايجيب الزعل بينج وبيني

رغد : وان زعلت ارضيج انا يانور عيني خخخخخ .. خرّبناها صح ؟.. يلا روحي امج تبيج اسمعها تناديج مع السلامه

امل : باي

( الساعه 5 ونص جا طارق خذ سعود .. وراحت رغد غرفتها .. امل كانت متعوده تروح حق رغد بيتهم 3 مرات بالاسبوع .. احيانا رغد توصلها او اهي توصل رغد .. وايد ميانه بينهم .. وبيوتهم قريبه عند بعض .. وساره ومريم بنات عم رغد يقعدون وياها بنص الاسبوع بس مو دايم )


يوم الاربعاء :

رغد : قومي امل ياكرهج على هالحركات . نبي نتمشى بالسوق

امل : والله مالي نفس

رغد : موب كيفج .. بمر عليج بعد ربع ساعه

امل : يوووه .. مشكله مانقدر نرد لج طلب

رغد : ادري يابعد قلبي انتي .. اختج نوره مهيب يايه ويانا ؟

امل : لا هي بتروح عند رفيجتها , نروح لحالنا ؟

رغد : اول مره نسويها يعني ؟ بعدين انا مارح الاقي حد يروح ويانا .. يللا لبسي يايتج

امل : طيب

( وطلعت امل ويا رغد السوق .. وكانوا يتمشون ويلحقون وراهم شباب .. في البدايه البنات مانتبهوا لهم .. بس بعدين انتبهاو لكنهم ماعطوهم ويه ولا كأنهم موجودين .. طبعا كان فيه واحد قرر انه اليوم يتمشى بنفس السوق وهو ( حمدان) .. ولما راقبهم ومشى وراهم .. فرقع من العصبيه على البنات ليش ياين بروحهم .. )

حمدان يقطع مشي رغد وامل بنظره كلها غضب

حمدان : رغد

رغد : حمدان ؟ شهالصدفه

حمدان واصل حده : لو سمحتي رغد انتي ورفيجتج جدامي البيت

رغد ترفع حواجبها : ليش ؟

حمدان : بقول لج بس اول امشوا البيت , لاتخلوني افشلكم جدام الناس

رغد : انزين احنا بنيي مع الدريول

حمدان : موب على كيفكم .. شيضمني انا بتردون البيت ؟

رغد تطالع فيه بنظرة استحقار وترفع راسها : حمدان قلت لك بنرد البيت انا ماجذب ..

حمدان : انطركم هناك

رغد باستهزاء : انشاء الله

( نزل حمدان وراح عند الباركنج .. ودق على طارق يلاقيه هناك في بيت عمهم عبد الله ابو رغد )

رغد : هذا شيبي شالسخافه ؟

امل : شكله معصب , يمكن عشان الشباب اللي كانوا ماشين ورانا

رغد تسجب امل وتنزل وياها : واحنا شسوينا ؟ والله اني مقهوره منه

امل : انا برد البيت

رغد : موب بكيفج يللا بتيين وياي . انا شلون اتصرف مع هذا بدونج ؟

امل : والله شكله يخوف

رغد : الله يستر

( وركبوا السياره وتمت طول الوقت رغد خايفه شبيسوي فيها ولا شبيقول لهم .. وحمدان قاعد ينطرها ببيتهم ومحترق على نار )

رغد تفتح الباب اللي كان نص مفتوح : السلام

حمدان ييي عند الباب : ساعه انطركم ؟ متأكدين مارحتوا مكان ثاني ؟
0
رغد باستحقار من فوق الى تحت : ليش ؟ تفكّرنا من اللي خبرك ؟

امل ساكته

حمدان : مع منو رايحين السوق ومنو موديكم ؟ ومن منو مستأذنين ؟

رغد تلف ويهها عنه وماترد وامل خايفه وواقفه على جنب ( في هذي اللحظه دخل طارق )

حمدان بعصبيه يسحب رغد من ذراعها : ردي علي ولا ماعندج شي تقولينه ؟

رغد تطالع في يد حمدان اللي ماسكه ذراعها : مو من حقك , ممكن تشيلها لو سمحت ؟

حمدان يضغط على يدها بقوه من كثر ماهو معصب ويلفها عليه يبيها تجاوب على اسألته : ردي علي ماتفهمين ؟

طارق كان واقف على جنب اللي ماحد انتبه له

رغد انفجرت وقامت تصيح وسحبت يدها بقوه : شفيها يعني ؟ احنا طالعين السوق .. ومحترمين انفسنا ومتستّرين .. وبعدين احنا ماطلعنا صايعين ضايعين داشرين .. انا قايله حق يدّتي ان احنا بنطلع .. واهي قايله حق امها ..

حمدان بعيون كلها شرر : واللي لحقوكم ؟

رغد تكمل صياح : والله عاد مو ذنبنا اذا انتوا يالشباب ماتحترمون انفسكم وتلحقون ورا كل بنت .. احنا حتى الضحك والسوالف ماكنا نعلي صوتنا عشان مانلفت الانتباه .. وبعدين انت باي حق تيي تهاوشنا

امل كانت منصدمه وماقدرت تتكلم

حمدان : المره اليايه بتطلعين انتي ورفيجتج هاذي ....

قطعت كلامه امل : لو سمحت اخوي .. انت مالك خص احنا قايلين حق اهلنا واهم راضين .. وبعدين انت سيدا ياي تتهمنا بأشياء ماسويناها ؟

حمدان يطالع في امل و يرد يهزأ في رغد وطارق اللي انتبه له حمدان واقف ومتكتف يسمع السالفه

حمدان بعصبيه : المره اليايه بتطلعون لازم يصير معاكم حد كبير ولا محرم

رغد تطالع فيه باقوى نظره امتلكتها في حياتها وهي تصيح : واللي ماعندها اخوان اكبر منها شتسوي ؟ واللي امها متوفيه ؟ وابوها ماتشوفه الا بالشهر مره ؟ واللي محد فاضي لها ؟ واللي .. ( تطالعه من فوق لتحت ) عيال عمها مايحبونها ؟ تنتحر ؟

حمدان يطالع فيها : اذا انتي محد مهتم فيج مو مشكلتي ,انا حذرتج , مع السلامه

رغد : انا عندي ثلاث عيال عمومه بس .. سمعت ياحمدان .. ثلاثه

حمدان يطالع في طارق : خليهم ينفعونج , مايدرون عنج اصلا , مع السلامه

وهو طالع امل عطته نظره : مع السلامه

( رغد راحت المجلس تصيح اللي ليتاته كانت مطفّيه

طارق : امل روحي شوفي رغد

امل تتنهد : تحتاج تكون بروحها

طارق : شاللي صار اصلا ؟

امل : بس طالعين السوق انا وياها , لحقونا شباب .. يانا وعيونه نار واول مادخلنا مسك رغد وقعد يهزأها

طارق : الله يهديه

امل : مارح تحاجيه ؟

طارق : بلى بس بنطر يهدا شوي

امل : اوكي

طارق : مارح تروحين لها ؟

امل : مارح تسمع مني انا اعرفها لاصارت زعلانه ومعصبه

طارق : هدّيها على الاقل ..

امل : طيب

( دشّت امل عند رغد )

امل : رغد

رغد : ...................

امل : ماعليج منه والله انه سخيف

رغد : شنو يعني يتهمنا بأشياء ماسويناها ؟ وبأي حق اصلا . يعني خايف علي يعني ..

امل : رغد خلاص , انا بتركج هني ,, بروح بيتنا .. لاهديتي كلميني

رغد : ............................

امل : مع السلامه

( طلعت امل الصاله وكان طارق واقف ينطرها )

طارق : هاه ؟

امل : بخليها تهدا بعدين بحاجيها مع السلامه توصي شي ؟

طارق : سلامتج , ايه صح
امل : شنو ؟

طارق : لاتقولين حق اهلج عن هاذي السالفه مانبي مشاكل

امل تبتسم : لاتخاف ..

( طلعت امل .. وطارق متردد .. يبي يرد البيت ويبي يتطمن عليها .. حمدان دق عليه اهو بالذات لانه اكبرهم واعقلهم .. شلون يروح الحين بدون مايحل على الاقل جزء من المشكله ؟ )

دخل المجلس اللي كان ظلمه ( ورغد كانت قاطه عمرها على الكنبه ومغطيه ويهها وتصيح بصوت واطي )
طارق : رغد ؟

رغد مستغربه شياب طارق الحين ؟ : .................

طارق : يللا عاد رغد ماعليج منه والله انه سخيف .

رغد بصوت واطي : مو بس سخيف الا غبي وبايخ ووقح وقليل ادب بعد

طارق ماسك طرف شيلتها : يللا عاد لازعلين , انا بحاجيه بعد شوي

رغد ترفع راسها وتقابله : شنو يعني ؟ ترضى حد يتهمك باشياء ماسويتها ؟ ويشك فيك ؟ ويفشلك جدام العالم ؟ انه خايف علي ومهتم فيني .. واهو ولا عمره حس فيني ولا سأل عني , وبعدين بصفته ايش ياي يهزأ؟

طارق : خلاص هدّي .. هو طبايعه كذا كلنا عارفينه

رغد تستعدل في قعدتها : طارق اذا احنا سوينا شي غلط علّمنا ؟

طارق : لا ماسويتوا شي . وبعدين شفيها انتوا مو يهّال

رغد : واموله وينها

طارق : قلت لها ترد البيت .. قالت لي انها عندج من الظهر والحين المغرب .. تأخرت وايد , يمكن يحاتونها اهلها

رغد : لا عادي متعودين انا وياها جذيه

طارق : الله يخليكم لبعضكم انشاء الله , يللا انا بروح توصين شي ؟

رغد : كرهته كرهته

طارق : لا عاد مو زين تكرهين حد ,, انتي قلبج ابيض وطيبه وايد .. تركيه عنج .. تلاقينه بينسى بعد كم من يوم

رغد : يصير خير ( تبتسم )

طارق يدفها : ياكرهج لازعلتي

رغد : انزين خلاص بس بكره تيون كلكم لاتنسى بكره الخميس , مو تقولون بنطلع ويا ربعنا

طارق : وان مايينا عندج مريومه وساره

رغد : لأ كلكم يعني كلكم .. مايصلح نصير ناقصين

طارق : انشااااء الله

رغد : وفصيل لايتهرب انا اعرفه بيقول فيني النوم .. وسالم سيارته خربانه

طارق : ههههههههههههههههههههههههههههههههههههاي حلوه حلوه , أي والله صادقه

رغد: انا حذرتكم ( تضحك)

يتبع