حرب ضراير 1 ( صورة حرمتين متماعطين الكشش )

مسكت معي الا اكتب وش اكتب وش اكتب ما لقيت شي اكتب عنه << وش حادتس تكتبين

طيب ازعل نفسي والا اكتب؟ ما يصير

طبعا ما فيش موضوع يعني لا تتوقعون بتلاقون شي مهم لذلك من قاصرها اطلعوا

يعني بسولف مع نفسي بفضفض لها وبنسوي مجلس حش مع بعض << مالقت احد تحش معه

الا وراه الحريم تحب الحش؟ سؤال يفرض نفسه وبقوه ؟؟

مره بعزيمة كبيررررررررره قامت وحده ماشاء الله وقعدت تتكلم عن الغيبه والنميمه
والوعيد الشديد للمغتاب . والله يسلمها مافيه آيه ولا حديث الا استشهدت فيه وقعدوا
الحريم الكبار يصيحون << مخزنين غيبه لين قالوا بس
لدرجة يوم قالت الي تحدث الله يبارك بهاليوم الي جمعنا ، صاحت عجوز جنبي وقعدت
تحوقل وتبسمل خخخخخخ ياحبي لهم العجز يصايحون على كلش

نرجع للحش المهم خلصت الاخت جزاها الله خير ، عقب ما صاحوا الحريم وخلاص تابوا
وكل وحده توعدت لسانها ما عاد يحش الا وتقطعه
شوي وحنا في صالة الاكل ! الا وحده تقول للثانيه : ياختي ولا عمري ذقت عندهم
ورق عنب زين . تكرم النعمه !
ترد الثانيه : صحونهم شوي ! وشوله يحطون بوفيه من اصله !

\
/
\
/

حرب ضراير

حكي ان رجل اعرس على زوجته وفي يوم قررت الزوجة الثانيه تحط عزيمة
لاهلها وصديقاتها والي يعز عليها ، الزوجة الاولى صممت تروح للعزيمة ، زوجها عدلي
بدلي يامره ، الاااااااا بتروح تحضر العزيمة << بتشوف وش حاطين وش شايلين
الاولى كانت ليلتها وجايه مع زوجها للعزيمة والثانيه جايه مع السواق << تنسيق التعدد
الثانيه بدت تحر تسبد الاولى : ابو فلان قالي انتي حلوه ، ابو فلان امس شاري لي
عقد روعه ابو فلان ابو فلان << وقضت ثلاث ارباع الجلسه على ابو فلان حط وابو فلان قال
الاولى احترت تسبدها خاصة قدام اهل وصديقات الجديدة فقررت تنتقم
مسكت ولدها وقالت رح لابوك وقل لها يعطيك شنطة اختك بغير لها
راح الولد ورجع قال يقول ابوي ما لقيت شي
قالت رح ثانيه ، راح الولد لابوه ونفس الرد مافيه شي بالسياره !
الحرمه مصره قامت ارسلت الولد للمره الثالثه وهي تناظر بالزوجة الثانيه
رجع الولد مره ثالثه قامت سالته بصوت عالي : وش قال ابوك؟
رد الولد بصوت اعلى : قال قل لامك تاكل تبن
الزوجة الثانيه بكل برود : الشنطة الي جنبك يام فلان لمين

\
/
\
/

سالفة قديمه ايضن عن حرب الضراير


في قديم الزمان وسالف الظهر والاون كان هناك واحد والواحد سبحانه في عالي سماه
هذا الرجل عزوبي وما عنده احد . ويمون على وحدة من جماعته في نفس الحاره ، والحرمه هذي
متزوجه وزوجها متزوج عليها وحده ثانيه << ابو التفصيل ياشيخه
كانت الاولى هي الي من جماعة العزوبي يعني تقرب له ومن وقت لوقت ترسل له
عشا او غدا وبيوم جا لعندها هالعزوبي وقال:
يا ام فلان اليوم عازمن لي رجاجيل من الديرة ولا اعرف اطبخ الذبيحه . طالبتس تطبخينها.
ردت عليه : والله ودي بس عندي شغل !
قال لها : اكنس واغسل عنتس بس بيضي وجهي عند جماعتي .
- ماانت عارف لشغلي صعععععب
- افا عليتس يام فلان مالتس الا الي يرضيتس بس وش هالشغل ؟
- لي جارتن ربي باليني فيها ومسكنها زوجي قبال بيتي ولا صار هالصبح
طلعنا السطح وكل وحده تقول وش جاب لها زوجها وش حط لها ، قايلتن لك صعععب

طق الرجال صدره وقال هاتي بس عباتس ولا يهمتس والله لا اطيرها من البيت كله
- بتعرف الصوت انه صوت رجل - اقولتس ما عليتس روحي سوي الغدا بس

لبس الرجل عباية الحرمه وهي راحت تسوي الغدا.

طلع للسطح ولان سطوح اول قصيره مره فكانوا الحريم يلبسون عبايات .
المهم جت الضره وصارت تقول شفتي ابو فلان البارح جاب لي حلق ذهب
الرجل ما رد . وسوى حركة بيدينه مثل قولة حر مدري كيف اسويها بس افهموها
الي زي طقة الاصبع بس بدون صوت (الابهام والسبابه)
دايم نسويها وحنا صغار <<ما عرفت تشرحها وبلشت
طبعا الضره احتارت اكيد شي احسن ، قامت قالت : ابو فلان اليوم ما طلع من عندي الا يوم
اضحت الشمس << مدري كذا والا لا بس موب مشكله عنكم ما فهمتوا
طبعا الاخ ما رد سوى نفس الحركه الي قبل
استشاطت الضره وقالت: ابو فلان امس يوم ذاق الجريش قال تذكرت جريش امي
الرجل ما رد بس سوى الحركة الانفه الذكر (اذا احد ما فهمها موب لازم )

نزل الرجل قامت قالت له قريبته : قايلتن لك الشغله صعبه ما انت عارفن لها
قال لها : روحي شوفي جارتس بالشارع ( من حر ما تونس مسطت من السطح )

انتقلت الضره لمسكن ثاني لانها ما تحملت

\
/
\
/

قضينا من الضراير والحش وش اسولف به بعد <<ماسكه عالسوالف


اكيد بعضكم يعرف صديقتي دلال << كل يومين تتحلل منها
المهم صديقتي هذي عليها طلعات مدري وش تبي من يومين ارسلت لي مسج

مشتاقه لك ياوحشه

قمت انا طنشتها اجل انا وحشه الصراحه يقال لي بثقل
الا مسج ثاني

ردي والا تراني بجي لعندك !

ما رديت قلت بشوف وش اخرتها

نص ساعه والجرس يرن

ياهي لصقه << بتنجلد

عليها طلعات لين قبل بس ماله داعي اغثكم يكفي انها غاثتني

نسيت اقول لكم متصله علي صبح العيد تصيح تقول انها كل عيد اضحى اكتئب
طب انا وش ذنبي تكئبيني معتس

لا احد يعلق على سواليف دلال لاني بفضفض لي لحالي

\
/
\
/

نرجع لسوالفي البايخه


وش لونكم المفضل ؟
بجد عاد فيه احد له لون مفضل ؟
ودي وقسم يصير لي لون مفضل زي الخلق والعالم عجززززت كل لون اخمه
مره بنت عمي توريني دولابها اغلبه اسود تقل ارمله امس ميت زوجها
تقول شسوي احب الاسود
انا استحيت اوريها دولابي صراحه لانه ما عندي لون مفضل << الا قولي دولاب لحجيه
تتوقعون اعاني من مرض نفسي !
مره قاعدين في جلسة كذا وكاشخين الا وكل وحده من البنات قاعده تسولف
عن عشقها للون الوردي وبدوا البنت لااا الموف احلى اموت فيه والثانيه ترد لا احد يقول
شي عن اللون البرتقالي << ذوق خوال
انا بلمت صراحه وانعقد لساني يوم جا دوري لقيت نفسي اقول لوني الي احبه
الاخضر كلهم ناظروني كأني قايله اللون الكهرماني
- غريبه عروق قليل تلبسينه !!
- ايه احب اناظره << عنز

طيب وش لونكم المفضل


\
/
\
/

قضينا من اللون المفضل نجي للبلوى الثانيه : من تحبين تسمعين له ؟
كل وحده تقول اغاني فلان او فلانه الاااااااااااااااااا انا
كلن اسمع له اوقات حتى اغني لنفسي << هذا ساس البلا
هذا غير وش تفضلين ماركه عطر وماركة لبس ووووو

احس فيه خلل بشخصيتي

يله فتكم بعافيه واذا تذكرت سالوفه غير هذولا بقولها