حرقت مطبخنا...عشان أنعم كشتي

سلاااااااام الله عليكم ورحمته وبركاته...

كيف حالكم....
((أحياناً أحس إنه السؤال عن الحال شي مال أمه داعي...لأنك مبسوطه مصروعه مذبوحه بيكون الجواب واحد بخير....
هااااااااه فهمت يمكن عشان الواحد يتفاءل..قامت تتفلسف أنثى))

أقول ترى الموضوع طويل وأنا متعقده من الفاتوره ياللي تتصلون بالنت عن طريق تليفون البيت مثلي...إقطعوا الإتصال...وبعد ما تمخمخون وتتفحصون الموضوع إشبكوا وردوا


أمممممممممممم...لحظه...بأقرص أخوي وجايه..











معليش ممكن تكونون سامعين صوت صياحه..بس إتحملوا..
وش أسوي جنني بهذلني...يعاندني ..
عمره خمس سنوات...ويقول لي....أوريك شغلك!!!!!!
شي والله ..هالمفعوص يوريني شغلي...
كله كوم ولما يغني الأماكن...حفظها من الزواجات...
كذا يغنيها....
الأماااااااااتن تلها مسقاقه لك...والعنون إللي بها فيها حياتي..
الأماتن إللي فيها عنوني حياتي...سوف حالي سوف عنوني آآآآآآآه

لو محمد عبده سمعها من أخوي بيعتزل الغناء...خخخخخخخ

يجيب لي الصمرقع الله يهديه...

هيا أقص يدي من هنا لو تعرفون معنى الصمرقع....



أقول أسسسس ولا كلمه لاتحاولون معي مانيب قايله معناها...



ياربي تصدقون صياحكم ذكرني بصياح أخوي...خلاص بأقولكم معناها..


معنى الصمرقع..يعني الجنان..وفي معاني كثيره لهالكلمه بس وقت البرنامج مايسمح...إخس ياهناء الركابي((ترى هذه مذيعه مو إسمي))

المهم....بأقولكم اليوم سالفه كانت ستقضي علي حتماً لا أمراً شكراً((بالله وش رأيكم ما أنفع أصير مذيعه..والله ما عاد أحد يطالع التلفزيون))

بسم الله ...طفوا اللمبه عشان أدخلكم جو رومانسي..خخخخخخ

في يوم من أيام هذه الصيفيه القصيره...إيه قصيره المفروض رمضان بعد إجازه الناس تبي تصوم وتتعبد ربها..
وشوال بعد إجازه الناس تبي تعيد وتحمد ربها..
وذي القعده بعد إجازه الناس تبي تتهيأ نفسياً ومالياً للحج..
وذي الحجه بعد إجازه الناس تبي تحج وتتوب لربها...

وأكتوبر بعد إجازه..((ترى مدري متى وقت هالأكتوبر بس حبيت أعلمكم إني أعرف شهر واحد بالميلادي))

((أكيد أختي العضوه LEDY ليدي بتموت من الفرح على هالكلام..لأنها مثلي تكره الدراسه))


المهم...كانت الساعه تشير إلى الواحده ليلاً...((ما تلاحظون كل مصايبي ماتصير إلا في الليل..يحق لي أبوي نايم ولاغاب القطو شوف شغلك يافار))

وجلست طفشاااااااانه...وش أسوي ياربي ..؟؟؟؟؟


((((وش حيلة الطفشان غير تدوير المشاكل))))


وش رأيكم بس في حكمتي.....خخخخخخخ


مسكت أخواني كل أبوهم من أكبرهم لأصغرهم بنات وأولاد..وجلست أتمشكل ((يعني أدور مشكله))
طيب وش أسوي طفشانه..وهم محد فايق لي ..كل ما تناقرت مع واحد طنشني ومشي..وأخواتي..طفشت من كثر ما أناقرهم ..ضعيفات ما يسون لي شي..((إهب يالمقوي))

أنا أبي هوشه مع أخواني العيال خبركم دراما شد شعر وسب وأمي تتدخل لفظ النزاع بس تطفش وتقول عساكم ......((خليني ساكته أخاف تقولون آآمين))

وبينما أنا قرفانه((قرفانه يعني قرفانه..تشطّروا عاد وإفهموها))

وما في أمل بالهوشه..رحت طالعت بالمرايا..
لقيت كشتي منكوشه...

نعم ..نعم..كشتي ألا وهو شعري...

قلت مسيكين هالشعر مظلوم معي...شهرين ما مشطته..

وجااااااااا الفرج...

رحت وأخذت زيت الزيتون بأدهن الكشه...بعدين تذكرت خبيرة التجميل إللي جات بالتلفزيون تقول...سخني الزيت قبل وضعه على الكشه...((ترى أنا مودرن ما أعرف كلمة كشه بس هالخبيره هي إللي خربتني...))خخخخ

قلت يالله وش وراي خليني أهتم بجمالي لو ساعه وحده بالسنه...

وأخذت شي زي كذا شكله...












أوه آسفه الصوره ما طلعت....












خخخخخخخخخ...أصلاً ما حطيت صوره بس كذا بأسوي فيكم لعانه..
أمزح ..لاتزعلون إطلعوا مره ثانيه وبتلقونها....

















((الحمدلله والشكر...بعد صدقتوا وطلعتوا....))



بس ضحكتوني أشكالكم تضحك وإنتوا طالعين....بس ياليت آخر عضوه طلعت المره الجايه تستر نفسها يعني عيب مايصير ...خخخخخخخ






خلااااااااص ما أستهبل عليكم مره ثانيه...بس ما أوعدكم أحاول...


إيه وش كنا نقول.....نسيت لحظه بأطلع أشوف وين وصلنا وأجيكم..





ماشاءالله ياكبر العيون المبققه...غضوا البصر...وش تبون تشوفون فيني وأنا طالعه..تخيلوا وأنا طالعه الهواء طيّر فستاني الله يهديكم بس....الفضائيات مخربتكم..وهيفاء جحشي وعليسا معودتكم تشوفون كل شي مباح..أستغفروا ربكم إنه كان توابا..


إيه وصلنا عند تسخين الزيت...وخبركم عاد أنا مهتمه بجمالي إسبوعياً وأنا عند الخبيره جننتها ..إلين ماقالت لي:لك شو إنتي ...كفاكي جمال لك والله بتطيري العإل...إنتي لو شافوكي ملكات الجمال إنتحروا كلياتهن...

قلت ..: طبيعي مني يغارون ...لأني أحلى منهن...هذولاء أصلاً شيفه..بس دخلوهن الورشه وشاف الميكانيكي شغله..


وأخذت قدر صغير وسكبت الزيت فيه وخليته على نار هاديه....على أساس إنه دقايق ...بس تسخين ....

وأنا في المطبخ أنتظر ...أمي تناديني ...تبي تحنيني...خخخخخخ
أمي تناديني تبيني أعلمها كيف تفتح الراديو في الجوال...
وغرفة المعيشه جنب المطبخ لاصقه فيه..((ياما نصحت غرفة المعيشه والمطبخ إللي تسونه عيب بس مايعطوني وجه))

وطولت وأنا أشرح لأمي وماهي راضيه تفهم..الظاهر إنها فاطره فول..
وبينما أما مستغرقه ومتعمقه في الشرح ...لأمي ...

لفت إنتباهي لون الجدار...يعكس اللون الأحمر...ويتحرك اللون بعد...

أوووووووووووه نسيت الزيت...



وأدخل المطبخ....وألقى الزيت ولعععععععع....
يممممممممممممممممممه ...

يمه إلحقيني الزيت ولع....
قالت:ياغبيه مخليه الزيت على النار وجايتني..؟؟؟

قلت لها:الجنه تحت أقدام الأمهات...((ياعيني على التصريفه))

والنار على الفرن تشتعل في القدر..وأنا أمي نتناقر..أقصد نتجاذب أطراف الحديث..((المعذره لو الجمله خطأ..بس لأنه ركبتي تعورني))خخخخخ

والنار..وسعت نطاق إستيطانها للفرن..تماماً كما توسع أمريكا وبريطانيا نطاق إستيطانهم للوطن العربي..((لا تلوموني أكره أمريكا وبريطانيا..أحسهم ألعن من شغالتنا إللي شردت))


وعاااااااد جينا في الجد....قلبي بيوقف...أول مره أكون في مواجهه عسكريه..أقصد ناريه..

وأمي معتمده علي....
ياااااااا أنثى طفي النار إنتي قويه...أقوى مني وتعرفين تتصرفين بهالمواقف...

قلت:إيه وقبل شوي تقولين إنتي أخس بناتي..لا لا.. طفيها إنتي ...((أم النذاله))

قالت:والله يالمرجوجه لأقول أبوكي إنتي من حرق البيت...

قلت:لاااااااا تكفين يا أمي يستر عرضك..

قالت..بسررررررعه طفيها زي ماشبيتيها....((سبحان الله كل شي على راسي لكم الله يالمضطهدين في الأرض..خليني أطلع من هالحريقه حيه إذا ما أسست جمعيه لرعاية حقوق المضطهدين..إنتي أول إشحني جوالك))

والنار مازالت مشتعله بس في نطاق ضيق...بس فوق الفرن...



((((نصيحه لكم يا خوياتي))))

أنبوبة الغاز..أو الإسطوانه..لااااااااا تكون في المطبخ أبداً..حذر قبل كم سنه الدفاع المدني وقال..لازم أنبوبة الغاز تكون بعيده عن المطبخ..بحيث إنه لاسمح الله صارت حريقه بالمطبخ ماتنفجر أنبوبة الغاز وتفجر البيت بكبره..وصارت هذه الحادثه كثيييييييييييير في جده...مره إحترقت باكستانيه وأطفالها في حارتنا وتفحمت الجثث..والسبب إندلاع حريق بسيط بالمطبخ..وإمتد للأنبوبة ومن قوة الحرارة ...إنفجرت أنبوبة الغاز...وإتقلعت أبواب البيت والشبابيك...هذاااا كله بسبب هالدب الإسطوانه....

أبوي قرأ بالجريده التنبيه...والله يسعده على طول أخذ الإسطوانه وحطها بحوش أبوه مدري أمه..المهم بعدها عنا...

ترى حوش جدي بعيد شوي عن حوش جدتي لأنهم مطلقين...والله لو أحكيكم عن سواليفهم تنصرعون من الضحك...

المهم الحين ...لو سمحتي لو أنبوبة الغاز في المطبخ بسررررعه طلعوها وجيبوها بحوش جدي...
أقصد بحوشكم...أهم شي بعيده عن الحراره يعني حطوها بالفيه((أدري مافهمتوا وش يعني الفيه..يعني مكان فيه ظل..بعيد عن الشمس..نياهاهاها فلووووووووس الترجمه..وإلا أقول خليتها لله صدقه عني وعن أهلي))

أما إللي فرنها بالكهرباء فياليت تجيب لنا واحد مثله..خخخخخخ
أحس إنه أريح وأكثر أمان من هالثور إللي عندنا....




أقول حبياتي لا يكون حاطه شي على النار وناسيته...أعرفكم مراجيج مثلي..((كلٍ يرى الناس بعين طبعه))

المهم وين وصلنا.....إيه وتذكرت يوم يجيبون في التلفزيون السعودي ..ماذا تفعل عندما يندلع حريق بالمنزل...
أولاً:إتصل بالدفاع المدني ورقمه 99 والباقي من الدليل..

ثانياً:لم الكشه المنكوشه حتى لا يتفاقم الحريق((هم عارفين إني أتابع البرنامج عشان كذا نبهوني))خخخخخخ

ثالثاً:أخرج كل الوراعين والبزارين خارج المنزل..حتى لا يتعرضوا للإختناق...أما إنتي يا أنثى ماهو مشكله إحترقي((ماقلت لكم مضطهده))

رابعاً:إفتح مصادر التهويه من شبابيك حتى يروا الناس كشتك..أقصد يروا الدخان فيبادروا بالمساعده وإبلاغ الدفاع المدني....يخسون أخاف أحد يصورني وينشرونه بالبلوتوث..خبركم أنا ملكة جمال..صعبه يصوروني محروقه..ولو أخاف على مشاعركم لا وصلكم البلوتوث...((بسم الله علي))

خامساً:لاتحاول الصراخ..حتى لاتعصب النار وتلسعك...

سادساً:أبلغ جيرانك ومن يعز عليك بإحتمال موتك محروقاً لذا يجب عليهم العفو عنك في حال موتك..ومسامحتك في الديون وحركات النذاله إللي مسويها فيهم...

سابعاً:أخرج إنبوبة الغاز خارج المنزل...لأنك لو خليتها بتلعب بذيلها وتغدر بك..

ثامناً:إنطق الشهادتين...ولا تنسى **(كل نفسٍ ذائقة الموت)**

بنات والله صدق...تخيلي لو كنتي بهالموقف لا سمح الله...وماصليتي كذا عبط ماصليتي..أسألك بالله...وش عذرك قدام ربك؟؟؟
بتقولين....**(ربي إرجعون علّي أعمل صالحاً فيما تركت)**

وينك من أول...في الدنيا ساهيه لاهيه تسمعين الأذان وماتفكرين تصلين..ليه وش شاغلك...؟؟؟النت...لا النت لا أبو النت..
وإلا شاغلتك مسلسله...

يابنات إحسبوا حساب اليوم إللي فيه تنزع روحك منك..

ياااااااااااااااااارب ياحي ياقيوم يامن قال **(إدعوني أستجب لكم)** ياربي هذا دعاء المستغيثه المسكينه...الخائفه من عذابك....اللهم ياهادي إهدي جميع نساء المسلمين وإهدي جميع شباب المسلمين...
و وحد كلمة الأمه..اللهم إجعل قوتنا ترهب العدو..اللهم إرحم شهداء المسلمين..اللهم إشفي مرضى المسلمين...
ياودود ياودود ياذا العرش المجيد أرزق كل وحده تبي خلفه...يالله يارب لاتكسر بخاطرها وإنت أرحم بها من الأم بولدها...ويارب إشفي أطفال المسلمين وإجعل الأخرس ينطق وناقص العقل يكتمل عقله يارب تشفي إخت هتون...يالله يارب وفقنا كلنا بنات حواء..وطهر قلوبنا من الحقد...
ويااااااجبار إحمي بيوتنا من النار...




وش بلاكم ساكتين قولوا آمييييييييييين......



آمين...





إيه ونرجع لكلام المرجوجه أنثى...

ومازالت النار تشتعل في الزيت.....وأنا التفاكير ذابحتني....

قلت.....ياخبله هذي نار وش يطفيها غير المويه....

وآخذ كاسه كبيره وأمليها مويه ..

وبكل ثقه وأمام أمي المصونه إللي تطالع من بعيد..
تقدمت للنار..إللي بالقدر الصغير....

وبكل غباء أقصد عفويه....كبيت المويه على الزيت....وأنا أناظر في أمي وأبتسم كذا

إلا أشوف أمي تصررررررخ :إبعدي عن النار..إبعدي....بتموتين..
أناظر....!!!!!!

النار كبرت يابنات وصلت السقف.....صرخت :لااااااا يمه بننحرق...
والله يا بنات أسلاك اللمبه إحترقت...
لكن الصدقه تدفع البلا....
طلع أخوي الكبير من غرفته على صياحي....وقال:يالله النار شابه...
قلت:إنت الرجال يالله طفيها...

قال:يامجنونه الكهرباء...

ورااااااح جري للحلاق إللي تحت بيتنا...((بعدين أقولكم ليه راح))

والنار شابه...وكانت غرفت أخوي مفتوحه...وشفت........






أخاف تطردوني برا المنتدى....تقولون هذي فتاه مرجوجه وممكن تعدي العضوات.....


إهئ إهئ...يااااربي إضطهاد بكل مكان حتى بالمنتدى..((في أحد قال إنه بيطردك يالزينه))

وشفت...وشفت....








شفت الوساده....إللي هي المخده...

قلت :بس هي مافي غيرها...يالله يا أمي دورك..

قالت:لا تعقبين((يعني تحلمين))

قلت:ليه..بلا غش يا أمي مره إنتي ومره أنا ..

قالت:أنا وراي زوجي وعيالي...إنتي وش وراك..؟؟؟

قلت وأنا أبكي:هيا خلي الحريقه..وإللي فيها فيها...وماني مطفيتها...عادي نحترق كلنا سوا((سوا وإلا موبايلي))خخخخخخ

إلا أسمع صوت إخواني الصغار يبكوووووون..صياحهم يقطع القلب...

وقلت لأمي:سامحيني لو مت...وأخذت الوساده بأروح أحطها فوق النار ..مدري أي عقل أحمل..أظن عقل تكارين..

إلا أمي قالت :هاتي الوساده أنا بأطفيها وإنتبهي لأخوانك لومت..

وجلسنا نبكي..كلنا ...

وتقدمت أنا وياها للمطبخ وقالت:وش أسوي بهذي يالخبله؟؟

أمي توها تستوعب إن إللي معها وساده..

قلت :يا أمي حطيها فوق القدر وبتنطفي النار..لأنها بتنكتم ماعاد فيه أكسجين وبتموت..((لو أنا مدرسه كل طالباتي راسبات))

قالت:لا هذي تزيد النار إشتعال...

قلت:لا أنا شفتهم بالتلفزيون يسون كذا....

قالت:متأكده....

قلت:لا أكذب.....أجل يا أمي هذا سؤال..يالله بسرعه...

وحطت أمي الوساده على القدر الصغير المشتعل فوق الفرن....

وإختفت النار ......والوساده فوقها...

قلت لها:ماقلت لك..أنا أم التصاريف..وأم الحلول وأم الذكاء وأمك إنتي بعد يا أمي....

قالت:الحمدلله بغينا نموت والسبب كشتك....((يعني شعرك))

وبينما نحن نهني بعضنا بالسلامه...

جااات أختي تقول:إلحقوووووووووووووا حريقه في المطبخ....

قلت:هاهاهاي إلعبي على غيري..

قالت:والله...تحسبيني مثلك....قسم بالله حريقه..

قمت ...لقيت الوساده مشتعله....

صرخت.....إلحقووووووووووووووووا والله هالمره بنموت...

أمي قالت:كله منك...إذا ماحلقت لك صلعه...عالصفر ما أكون أمك...

وجاء أخوي الكبير إللي أكبر من الخبل إللي راح للحلاق......قال...يالله نار وقاعدين إطلعوا برا البيت...

يامهابيل وش جاب هالوساده القطن بالنار.....؟؟؟؟

قلت له:عشان تنطفي...

قال:الله على الذكاء ويلوموني فيك...

جلست أبكي بحرقه وأقول:والله ما أطلع أنا إللي شبيت الحريقه وأنا أول من يحترق....

قال:الله على الفليم الهندي...إطلعي طلعت روحك..

قلت:قسم بالله ما أطلع ...يالله عادي نحترق مع بعض...

لما شاف إن الكلام معي ضايع...وتيقن إني منهاره عصبياً ونفسياً وإنه معدل الرجه إزداد برأسي...خخخخخخخخخ

أخذ جالون المويه الكبير....ودخل المطبخ...
وأنا أراقبه...
يعني قلت لو شبت النار فيه بأدخل عشان تشب فيني أنا بعد...والله كان الإحساس بالذنب قاتلني ومعذبني...

أول ماسكب المويه زاد إشتعال النار لأنه فيه شوي من الزيت..
و واصل سكب المويه إلين ما طفت...

قلت له:خلك مكانك ترى النار غداره بعد شوي تشب مره ثانيه...تراها محششه خلك...

قال:تطمني يالذكيه..مابتشب...

تدرون بهالحظه....من جاء؟؟؟





الخبل أخوي....ياقلبي.....ياناس أموت فيه...
جايب معه طفاية الحريق من عند الحلاق...

قلت:تكفى تعبت نفسك إستريح.....خبل إنت خبل..وينك من أول والله نموت ونحترق ويصلون علينا ويدفنونا وإنت باقي ماجبت الطفايه...
..






بس ودي أسأل طفاية الحريق إللي تطفي النار هي نفسها إللي تطفي الزيت لا إحترق....

نفسي أعرف وش ممكن يصير لو أخوي طفا الزيت المشتعل بالطفايه العاديه بتشتعل أكثر مثل المويه....



آآآآآآآآآآآآآآآآآآآآه ياقلبي ....يااااااااليتهم يحطوني وزيرة التربيه والتعليم....
والله لأحذف هالمناهج إللي أكل وشرب ونام عليها الزمن....

بس أخلي مناهج الدين...مره حلوه...

وأهم ماده بحياة المسلم....القرآن...
كل يوم المفروض ندرس قرآن...
تخيلوا في الإسبوع حصه وحده بس للقرآن...
ومره تكون نظر..ومره تسميع غيب..

وأضيف حصه للرياضه للبنات....

إيه وش بلاكم تناظروني كذا؟؟؟؟

والله البنات صاروا كذا
لازم رياضه خفيفه....

يعني جري لعب كوره أشياء تنشط الدوره الدمويه..
وتضفي السعاده والبهجه والوناسه على البنات وتغير شوي من الروتين القاتل...

وبعد فيه منهج مهم ...مهم..مهم....للحياه الزوجيه المستقبليه..
كثرت حالات الطلاق في السعوديه....
60%..وأسباب الطلاق...تاااااااااااااافهه في أغلب الحالات..
لازم المنهج يكون للأولاد والبنات...
يتعلمون كيف يتعاملون مع تيوس الفغله...أقصد أزواج المستقبل...خخخخ



ومنهج مره مهم.......لاااااااااازم أحطه للطلاب والطالبات((صدقت نفسها وزيرة التربيه والتعليم))

المنهج هو.....






كيف تطفي الحريقه لا شبت في مطبخكم؟؟؟؟؟؟






إيه والله..تخيلوا أخوي ما جاء وأنا ما أعرف أتصرف لأني مدري إن الزيت المفروض يطفونه برمل....

ومت...وفقدتوني....بالله ماهي مصيبه....؟؟؟


إهئ إهئ...أتخيل نفسي ميته تحت التراب....



حسبي الله على كل القائمين على مناهجنا....

عاد وحده بكبري ماتعرف كيف تطفي النار؟؟؟؟

لا تقولون ذنبي..لاياحبيباتي ..ذنب المدرسه..لازم تكون التوعيه منها..إذا ماكانت من البيت..لغفلة أهله إذاً تكون من وين؟؟؟؟

وأزيدكم من الشعر عشر طعشر بيت((هذا عددي المميز))

الطلاب المبتعثين للخارج لما عملوا لهم مقابله شخصيه...سألوا كل واحد فيهم عن البلاد إللي هو مبتعث لها...

تفاجأوا إن الأغلبيه من الطلاب مايعرف من البلد إلا إسمه..أو شي واحد بارز فيه....

والله فشيله...هاذولا يمثلون المملكه بالخارج..ثقافه ما عندهم ...
بس والله ما ألومهم...

مناهجنا يبي لها إعادة نظر..
مثلاً.......
أخس المواد بحياتي...بلاغه *أدب*نحو

النحو؟؟؟؟؟ما أبلعه بس لازم ندرسه لأنه لغتنا ....

طيب..البلاغه والأدب....وععععع
ودي أسأل ليه هالمادتين ماتندمج وتصير ماده وحده....

أصلاً مال أمها داعي....
يحذفون بعض مواضيعها التافهه..ويختصرونها...وتصير ماده..
ذيك الساعه ممكن أبلعها وأشرب وراها مويه..


وبعد لازم تكون فيه ماده....تنمي الثقه بالنفس..وتنمي المواهب...
والله مساكين شبابنا وبناتنا يحزنون...

تشوفين الواحد يتكلم بالتلفزيون ماهو قادر يرص كلمتين على بعض...ماااااش مافي ثقه بالنفس...ولاثقافه...
لو كان البيت هامل هالموضوع المفروض المدرسه تقوم به...


وما أنسى اللوحه المكتوبه عند باب مدرستنا,,,,,


(((((المدرسه بيتك الثاني)))))

يعني إللي ما ألقاه بالبيت ألقاه بالمدرسه...
إحتمال البيت يكون مكهرب بالمشاكل والعقد النفسيه...


((((ترى قررت أفتح قناه ثقافيه للفلسفه...لاتخافون بأعينكم مذيعات..ومساعدات للفلسفه..خخخخ))))


ويارب ماتشب حريقه ببيتكم..






نصيحه..لاتدهنون كششكم((يعني شعوركم))بزيت مسخن..حطيه كذا أضمن...





وياحبذا لو تعطوني رأيكم بالمناهج....بنات أنا أتكلم جد..مناهجنا تسبب النعاس...
يالله وين المدرسات والطالبات وربات البيوت....
بأعرف ردودكم عن الحريقه..أقصد عن المناهج...


أما بالنسبه لخوياتي من خارج السعوديه....أكيد ماتعرفون مناهجنا...بس عطوني رأيكم عن الدور الفعّال إللي قمت به عند إندلاع الحريقه....
أدري المفروض أتعين نائبة مدير الدفاع المدني بس من يسمع؟؟؟خخخ
وإللي شبت في بيتهم حريقه تقول..خلينا نستمتع بسماع مغامراتنا

يالله سلاااااااام.....
لحظه....
بس ودي أقولكم إني أحب الملك عبدالله من أعماق قلبي