( حريم الحميان )... وعلاقتج فيهم .. تعالوا نفضفض !!

السلام عليكم ورحمة الله وبركاته

هلاااا بخواتي ...
والله أني أحبكم في الله ..
وأشتاق لكم ...

مشكلتي اليوم ... وإلا تدرون .. لا لا لا ماهي مشكلة .. مدري ايش اسميها ..
خلوني أقول .. ( فضفضة )
الموضوع الله يسلمكم ... هو ( حريم حمياني )
مادري ليش ماقدرت أندمج معاهم ... رغم انهم في ظاهرهم ... حليوات وطيبات .. وأحس جذيه أنهم ما يرتاحون لي ؟؟؟ مع أني بشهادة الجميع والحمدلله لا رياء ذوق في التعامل مع الكل .. وأحب الأحترام المتبادل مع الكل ..
ساعات أحز انهم حزب علي ... لأنهم يقربون لبعض .. وأنا أعتبر غريبة عنهم
وساعات أقول ... يمكن يحسون أن أهل زوجي يحبوني وااايد والحمدلله .. وساعات أحس أنهم يغارون مني ...مع أن معاملة أهل زوجي لنا كلها وحدة ... وإذا حسوا أنهم يفضلوني .. ترى لسبب واحد ... أني واصلتهم .. وما أقطعهم .. بعكسهم .. اللي ما يزورون أهل زوجي إلا كل أسبوعين أو أكثر .. والزيارة تقولون طارينها ... نص ساعة على الأكثر .. بعكسي أبات بيت أهل زوجي في الويك أند ... بخلاف الزيارات وسط الاسبوع ...
بس مع ذلك كله .. أحترمهم .. واحاول تكون العلاقة بينا طبيعية لما أشوفهم .. بس بصراحة أحس اكون متضايقة ... لأني أحس ان الموضوع دخل فيه النفاق .. واللي مستحيل أقبله على نفسي

هااا خواتي ..
اشلون علاقتكم بأزواج حميانكم ( زوجة أخ الزوج )
خلونا نفضفض.. ونستفيد من تجارب بعض