حسد + حقد + غيره + تجسس = زميلتي في العمل

السلام عليكم


اخواتي بغيتكم تساعدوني في مشكلتي اللي اهي اني من فتره توظفت والحمدلله .... بالمكتب معاي كانو بنتين قديمات بالعمل . وتوظفت انا مع وحده بنفس الوقت....

في البدايه كان كل شي عادي ، شويوي شفنا وحده من القديمات بالعمل تشوش المسؤول علينا ولو اهي تغلط في الشغل تقط الغلط علينا انا والجديده ، فصارت المشاكل ووصل الموضوع للمشرف وتدخل وكانت سالفه طويله... المهم انا والجديده بحكم انها كانت تضرنا كنا مقهورين منها فكنا نشتكي لبعض منها...

طلعت اجازه مرضيه من فتره ويوم رجعت شفت الجديده منقلبه علي وواقفه في صف القديمه ، قلت بكيفهم ، لكن صرت من اطلع من المكتب وادخل يسكتون ومن عيونهم ووجوهم يبيين انههم يتكلمون علي، قلت الله عليهم ، من فتره الجديده كنت اكلمها ما تكلمني بدون اي سبب ، مع ان عمري 27 ومتزوجه وعتدي اثتنين وهي توها 20 ومو متزوجه وكان واجب عليها تحترم شوي، المهم انتظرت لي اخر الدوام وحسيت اني بانفجر لاني ما سويت لها شي وكانت تتعمد تحرجني يعني كنت اكلمها وما ترد علي جدام الموظفات،، فقلت لها شفيج يا فلانه ؟ عسى ما شر؟ لا يكون غلطت عليج وما خطيت بالي؟؟ الا تقولي لا ما فيني شي بس مساعه كلمتج وما رديتي علي ، قلت لها والله ما حطيت بالي ويمكن اكون ما سمعتج، الا تقولي اي قلت يمكن مالج مزاج فسكت عنج، قلت لها من مساعه اكلمج وانتي حاقرتني ومالي مزاج؟ المهم قلت لها ترى احنا اخوات ولا تخلين شي تافه جذي يغير علاقتنا ببعض ، فاهي استحت من رده فعلي وصارت عادي يومين ورجعت ما تعطيني وجه وصارت في صف القديمه مع انهم يتضاربون كثير في الكلام ، قلت خلهم بكيفهم اصلا كل وحده قلبها متروس على الثانيه وخلهم انا مالي شغل مع انهم يحاولون يغيظوني بعض الاحيان بانهم يسولفون ويتساسرون مع بعض وانا اقول الله عليهم ، بس انا احس انها خانتني بهالطريقه يعني احسها وصلت كل الكلام اللي قلته لما كنا في زعل مع القديمه لها ، مع انها اهي نفسها ما خلت شي وما قالته بس انا ما ودي اتبع اسلوب نقل الكلام والفتنه واقول الله عليها،، فنصحوني شنو اسوي معاها وخصوصا انها عدوانيه ووقحه في ردودها وكلامها كثييييير وما تحترم احد........


نجي للثانيه اللي اهي القديمه المصيبه الكبيره في عملي ،،،، هذي الله يسلمكم صارت تعيش حياتها عشاني وعشان تقارن بين حياتي وحياتها ، تخيلووو دخلت جامعه صارت مثل المجنونه وتزاعلت مع زوجها لانه ما كان يبيغيها تدرس ، بس اهي عاندته وقالت ادرس غصبا عنه، واهي دايما تشتكي منه وتذم الرجاجيل خاينيين مالهم امان وانا اقولها لا تعمييين مو كلهم تقوم تقولي اي لان زوجج طيب وزين مو مثل اللي عندي فحاليا قمت اسكت وابتسم بس....


المشكله انها من اتكلم مع زوجي في التلفون تقط اذنها علي ، يعني مثلا انا كنت اكلم زوجي اقولها مر علي الدوام الساعه 9 واهي تتكلم مع الثانيه شن تقوم تقطع سالفتها وتقولي ليش يمرج وين بتروحون؟؟ اسكت عنها او اقولها وهذي الغلط اني اقولها لان الاماكن ياتكون مستشفى يا مكان عادي فليش ما اقول.... ساعات اتكلم مع زوجي بهدوء وبصوت منخفض تقول بسكم غزل واسرار ، اسكت عنها.. بس اتضايق كثيير احس اني ما اقدر اخذ راحتي....

طيب نجي لموقف ثاني كانت تتكلم مع وحده عن موديلات العبايات الجديده الا تقول لها فصلت لي عبايه التطريز في اليد من فوق ، بس عاد انا ما بتصير حلوه علي لان يبغيلها يد وزند مثل يد فلانه (( اللي اهي انا ، لاني مليانه شوي واهي ضعيفه من كثر حسدها واهتمامهم بامور الناس ومقارنه حياتها فيهم)) قمت انا قلت لها ويي وشقصدج وانا اضحك ،، انقهرت بس ما ابغي ارد عليها ويصير زعل ومشاكل...

موقف ثاني مره كانو يتكلمون عن الجسم والحساسية وانا ساكته اشتغل ، الا تقولي اي فلانه فيها مسام واسعه في رجلها (( اللي اهي انا)) فقلت لها شلون عرفتي ؟؟ الا تقولي وانتي تلبسين الشراب بعد الوضوء شفت رجلك كلها مسام واسعه .... انا انصدمت انها تلاحظ كل شي فيني بس كالعاده سكت وما قلت شي:(


موقف بعد....كنا في رمضان وانا اقرأ قرآن الا تقولي انا عيوني تعورني من الشغل وانتي ما تعورج عينيج من قراءه القران ول عليج (( مع اني اعاني من حساسيه في عيني )) فانا من غبائي قلت لها لاني ابغي اخلص الاجزاء اللي فاتتني قراتها لما كانت علي الدوره.. الا تقول انا عمري ما ختمت القران وانتي تختمينه؟؟ سكت عنها كالعاده.....


ومره كانو بنات جايبيين حلاوه فكل البنات ياكلون وانا كنت اشتغل ، ولما خلصت شغل رحت باكل توني احط اول قطعه بفمي الا تقولي بسج عاد بيصيدج السكري من كثر الحلويات قمت سكت وما اشتهيت اكمل الحلاوه ورحت الحمام وانا مقهوره انها حاطه بالها وبالي غي كل شي حتى في الحمل تقولي لا تحملين الحين صبري لما نكمل دراسه نحمل مع بعض مع ان بنتي صار عمرها 8 سنوات واهي بنتها توها سنتين ، قلت لها اللي في الخير يسويه رب العالمين الا تقولي يعني من صجج تفكرين واهي معصبه، قلت لها ما ادري الا تقولي بس انتي لاحقه شلج بالعيال توج صغيره وصبري مع انها دايم تقول ابغي عيال اكثر ،،وكانت تتكلم واهي معصبه وكانها تدافع عن حق من حقوقها وانا اسكت عنها....


قبل العيد قلت نسولف عن العبايات قلت باسوي عبايه لونها ذهبي تفاجات بعد العيد مسويه عبايه ذهبيه طيعا....


المشكله يا اخواتي قلبي يقبضني من كلامها واخاف على نفسي وعيالي وزوجي من عيونها وحسدها مع اني دايم اذكر اذكار الصباح واتحصن بس يا اخواتي بعد خايفه لاني احس ان حياتها قايمه على انها تقارنها بحياتي ،،،، تخيلووو مره تقولي كنت بالليل ودي البس قميص نوم بس لان عيالي معاي بنفس الغرفه ما قدرت ، وعلى طول جيتي في بالي وقلت فلانه تقدر اكيد لان عيالها بغرفه ثانيه,,,, يعني حتى واهي في بيتها تقارن...

اهي ما تحب احد الا نفسها تخيلوو تعقر وتتكلم على امها تقول امي طاحت امس في السوق لانها ما تقعد من مكان وسوق لي سوق ، تتكلم على ابوها، تحسد اختها تقولي اختي زوجها يحبها مو انا ، حتى مره تقول زوج اختي جسمه ابيض قلت له وشلون عرفتي الا تقولي واهو يصلي ارتفع الشورت اللي عليه وشفت جسمه وكان ..... تازل بعد وشفت اللي شفته....!!!! ، تكره اهل زوجها حتى صديقاتها تتكلم عليهم........


لما افضفض لزوجي او اهلي او صديقاتي يقولون لي لا تكونين سلبيه ردي عليها ووقفيها عند حدها بس انا اقول ما ابغي مشاكل مو ضعف بس جد ما ودي بمشاكل واقول حتى لو كلمتها بتسكت عن التعليقات لكن بيكون بينها وبين نفسها الكلام والمقارنه......



انا بطبعي ما احب اتكلم عن حياتي الشخصيه حتى لو فيها مشاكل ومحد خالي من الهموم والمشاكل بس الشكوى لله والحمدلله على كل حال ، بس البعض مثلها يعتقد عدم الشكوى للغير يعني ان حياتنال مثاليه وما فيها اي هم....


الكل يقولي لا تكونين ضعيفه بس انا مو ضعيفه انا ما احب ا لمشاكل وماودي تكون حرب بينا والكل يتمنى يتشمت بالثاني ودي نكون على قلب واحد والله يا اخواتي ساعات لما نضحك مع بعض كلنا اقول ياريت على طول نكون كذا مع بعض... وللعلم انا الحين ما اتعامل الا برسميه يعني اسولف بس في المواضيع العاديه بس اكثر الوقت اكون ساكته وارد بكلمتين بس



ساعدوني خواتي شلون اتصرف مع الاثنتين بدون مشاكل وبطريقه اني ما انزل نفسي لهم ولا اكون ضعيفه امامهم؟؟؟؟؟؟؟