حصر تخاريف الناس واخصائي التغذية في الرجيمات

الي خلاني اكتب الموضوع اذكر قبل حوالي ٨ سنين اخويا كان وزنه حوالي ٢٠٠ كم وطوله ١٩٠ الفكرة انه نحف حوالي ٧٠ كيلو بعدين صعب عليه الموضوع شوية فصار يروح لاخصائي التغذية المختلفين فمن نصائحهم العجيبة كانت مثلا ماتعدي ٥٠٠ كالوري باليوم ابدا واوعك تجري بس مشي فقط عاوزين ندوب العضلات خالص ونبدا نبني من جديد ؟ هو المسكين ( يحزن والله : ( ) فعلا مشي على كلامه ونحف لكن باي ثمن ؟
ال ٣٠ كيلو الي كان محتاجها نحفها لكن اصبح شكله كانه جاي من مجاعة رجال طويل عريض صار هزيل جدا لدرجة اني لو لعبت معاه مكاسرة اهزمه وهو رجال مفروض يكون اقل شي ٣-٥ اضعاف قوتي وجسمه اتدمر وصار في حالة نفسيه سيئة خلته يرجع ل١٨٠ بعد مجهود ٤ سنين في النحف في سنة ..
لذلك عنا جهل كبير بالموضوع هذا والله , مو معناته لمن اخصائي تغذية يقولك شي يعني صح كثير منهم جهلة ( مع كامل احترامي ) ، ومعلوماتهم قديمة جدا خصوصا في موضوع حساس زي كدا مافيه حقائق 100 % زي قانون نيوتن مثلا و كله مبني على دراسات وعلى فترات طويلة وكل فترة وفترة تنزل دراسة جديدة تمحي مجموعات خرافات قديمة لكن الكلام الي عندهم من قبل اكثر من ٣٠ سنة . يعني لازم باستمرار الواحد يقرأ في الموضوع ويتابع الجديد فيه وأهم شي يسمع من مين ؟ مو مجرد شخص والسلام .

> كنت كتبت موضوع قبل سنة خفيف مو راضية عنه تماما الان بسبب لغته مو مفهومة كثير زائد في معلومات اتغيرت الآن لكنه مفيد
http://forum.hawaaworld.com/showthread.php?t=3932187

موضوعي خفيف مجرد توضيحات والي عندها مشاركة او حابة تعلق او تناقش ياريت تحطها خصوصا ماشاء الله في كتير من العضوات صاروا واعيات وفاهمين
نبدأ :

1- مافيه شي اسمه التنحيف الموضعي يعني ماتقدري تنحفي فخوذك لحالهم او بطنك لحالها انت حتنحفي وتدعي ربك انه المنطقه تنزل لأنه كل انسان عنده اولولية جينية في المناطق الي يسمن وينحف منها زي ماتشوفي البعض مثلا يسمن من كرشة البعض من الخلف ..مافي تمارين راح تنحف منطقة معينة او دهانات او ليمون ..إلخ انت عليكي تنحفي وان شاء الله تنزل المنطقة واذا مانزل اول شي راح تنزل بعد فترة . . هذي الخرافة منهية من قبل 20 سنة في العالم الغربي واحنا لسا نغني فيها ؟

2- رجيم انحف 5 كيلو في 5 ولا 7 ايام ..والخ من شاكلتها . عبارة عن ضحك على الناس لأنه في شي اسمه وزن الماء في الجسم وزي ماتعرفوا اكثر من 70 % بالمية من جسم الإنسان ماء , فلمن تحرم جسمك من الأملاح وامور اخرى خلال 5 ايام راح تفقد جزء كبير من الماء وبعض من الدهون طبعا وبعض من العضلات لأسباب ظاهرة . طبعا موضوع وزن الماء الي هو موضوع كبير لحاله يشمل لمن تلاقي نفسك زايدة مثلا بعض الرياضة او اكلتي وجبة من برا او او ..إلخ

3- حطي خس او ليمون او البسي البدلة حقت الرياضة عشان تعرقي وتنحفي كلها للأسف ضحك عالناس , يعني مثلا بعض البنات تعتقد انه لمن تعرق هي جالسة تخررج دهون عشان كدا تحاول تكتم نفسها وتغلق التكيف وكل شي عشان تعرق . شيء خاطئ تماما العرق مادة والدهون مادة . ومافي اي هدف انك تخنقي نفسك بالحر والكتمة واللباس .

4- ممنوع العشاء منعا باتا ؟ حرام عليكم تجوعوا الناس وتنيموهم على بطون فاضية .
مافي اي علاقة بوقت الاكل او عدد الوجبات والنحف . يعني باختصار تحرقي 2000 كالوري باليوم
كلي 1500 مثلا في وجبة واحدة قبل النوم بثواني وراح تنحفي . من تجربة شخصية زائد دراسة مثبتة
الجسم مايفهم متى اكلتي ولا يهتم هو بعملية حرق مستمرة والمحصلة نهاية اليوم تبين .

5- مافي داعي للرياضة لأوقات طويلة جدا وبشكل ممل . كثرة الرياضة تجوعك وتصيبك بالشره , زي مااتفقنا فوق كل الموضوع مرتبط بالأكل اي نعم الرياضة تساعد بس مو لدرجة تهلكي نفسك وتخلي حياتك كابوس .. يعني لو تحرق 2000 واكلتي 1700 ومارستي رياضة حرقتي 300 كالوري تتطلع المحصلة 1400 ..يعني تقريبا كيلو بالأسبوع .

6- مافي رجيم كيمائي لا بيولوجي ولا نووي ولا بيفرلي هيلز كل شي مرتبط بالسعرات الحرارية والموضوع الي فوق بيفيدكم بفكرة عامة

7- موضوع : واخيرا الحل : جسم مشدود ومتناسق بدون رياضه ( جهاز LPG) .. نصب صريح ياويلها من ربها

8- لعب الحديد مفيد جدا جدا في تناسق الجسم واظهاره بشكل عارضات الأزياء , مستحيل تعضلي زي ماالناس تخاف من دا الموضوع , بالعكس راح يقسملك جسمك وخصرك ويقويلك بنيتك بدل ماتكوني ضعيفة ..عندي كلام كثير بهذا الموضوع بس مااتوقع الناس تتقبل لسه

9- مافي شي اسمه وزن مثالي فرضا انتي طولك 150 ووزن 50 وشايفة نفسك فيه كرشة مثلا او ماعاجبك شكلك نزلي وزنك لين متوصلي للي في بالك مو خلاص وصلت وزني المثالي وحتى لو ماناسبني مالي شغل ؟؟ يعني حتخلي معادلة من 20 سنة تحكم ايش وزنك المثالي ؟ والعكس صحيح لو وزنك 60 وطولك 155 مو شرط ياحبيبتي تنزليه لين 55 عشان يصير مثالي مثلا اذا شكلك عاجبك وراضية ومناسبك
كل الأجسام تختلف عن بعض سيبوكم من دي الاشياء تسبب مرض نفسي ...انحفي او اسمني لين مترضي عن حالك وشكلك وسيبيكي من دي الأرقام الوهمية كل جسم مختلف عن الثاني سواءا سمك العظم او العضلات ..إلخ

فيه اشياء تانية كتير ..